Mahābhārata (critical edition) 7.131

शरमीनां महारौद्रां प्रासशक्त्युग्रडुण्डुभाम् मज्जामांसमहापङ्कां कबन्धावर्जितोडुपाम्

śaramīnāṃ mahāraudrāṃ prāsaśaktyugraḍuṇḍubhām majjāmāṃsamahāpaṅkāṃ kabandhāvarjitoḍupām

Sanskrit only: no published translation is held for this verse.

केशशैवलकल्माषां भीरूणां कश्मलावहाम् नागेन्द्रहययोधानां शरीरव्ययसंभवाम्

keśaśaivalakalmāṣāṃ bhīrūṇāṃ kaśmalāvahām nāgendrahayayodhānāṃ śarīravyayasaṃbhavām

Sanskrit only: no published translation is held for this verse.

शोणितौघमहावेगां द्रौणिः प्रावर्तयन् नदीम् योधार्तरवनिर्घोषां क्षतजोर्मिसमाकुलाम्

śoṇitaughamahāvegāṃ drauṇiḥ prāvartayan nadīm yodhārtaravanirghoṣāṃ kṣatajormisamākulām

Sanskrit only: no published translation is held for this verse.

प्रायाद् अतिमहाघोरं यमक्षयमहोदधिम् निहत्य राक्षसान् बाणैर् द्रौणिर् हैडिम्बम् आर्दयत्

prāyād atimahāghoraṃ yamakṣayamahodadhim nihatya rākṣasān bāṇair drauṇir haiḍimbam ārdayat

Sanskrit only: no published translation is held for this verse.

पुनर् अप्य् अतिसंक्रुद्धः सवृकोदरपार्षतान् स नाराचगणैः पार्थान् द्रौणिर् विद्ध्वा महाबलः

punar apy atisaṃkruddhaḥ savṛkodarapārṣatān sa nārācagaṇaiḥ pārthān drauṇir viddhvā mahābalaḥ

Sanskrit only: no published translation is held for this verse.

जघान सुरथं नाम द्रुपदस्य सुतं विभुः पुनः श्रुतंजयं नाम सुरथस्यानुजं रणे

jaghāna surathaṃ nāma drupadasya sutaṃ vibhuḥ punaḥ śrutaṃjayaṃ nāma surathasyānujaṃ raṇe

Sanskrit only: no published translation is held for this verse.

बलानीकं जयानीकं जयाश्वं चाभिजघ्निवान् श्रुताह्वयं च राजेन्द्र द्रौणिर् निन्ये यमक्षयम्

balānīkaṃ jayānīkaṃ jayāśvaṃ cābhijaghnivān śrutāhvayaṃ ca rājendra drauṇir ninye yamakṣayam

Sanskrit only: no published translation is held for this verse.

त्रिभिश् चान्यैः शरैस् तीक्ष्णैः सुपुङ्खै रुक्ममालिनम् शत्रुंजयं च बलिनं शक्रलोकं निनाय ह

tribhiś cānyaiḥ śarais tīkṣṇaiḥ supuṅkhai rukmamālinam śatruṃjayaṃ ca balinaṃ śakralokaṃ nināya ha

Sanskrit only: no published translation is held for this verse.

जघान स पृषध्रं च चन्द्रदेवं च मानिनम् कुन्तिभोजसुतांश् चाजौ दशभिर् दश जघ्निवान्

jaghāna sa pṛṣadhraṃ ca candradevaṃ ca māninam kuntibhojasutāṃś cājau daśabhir daśa jaghnivān

Sanskrit only: no published translation is held for this verse.

अश्वत्थामा सुसंक्रुद्धः संधायोग्रम् अजिह्मगम् मुमोचाकर्णपूर्णेन धनुषा शरम् उत्तमम् यमदण्डोपमं घोरम् उद्दिश्याशु घटोत्कचम्

aśvatthāmā susaṃkruddhaḥ saṃdhāyogram ajihmagam mumocākarṇapūrṇena dhanuṣā śaram uttamam yamadaṇḍopamaṃ ghoram uddiśyāśu ghaṭotkacam

Sanskrit only: no published translation is held for this verse.

स भित्त्वा हृदयं तस्य राक्षसस्य महाशरः विवेश वसुधां शीघ्रं सपुङ्खः पृथिवीपते

sa bhittvā hṛdayaṃ tasya rākṣasasya mahāśaraḥ viveśa vasudhāṃ śīghraṃ sapuṅkhaḥ pṛthivīpate

Sanskrit only: no published translation is held for this verse.

तं हतं पतितं ज्ञात्वा धृष्टद्युम्नो महारथः द्रौणेः सकाशाद् राजेन्द्र अपनिन्ये रथान्तरम्

taṃ hataṃ patitaṃ jñātvā dhṛṣṭadyumno mahārathaḥ drauṇeḥ sakāśād rājendra apaninye rathāntaram

Sanskrit only: no published translation is held for this verse.

तथा पराङ्मुखरथं सैन्यं यौधिष्ठिरं नृप पराजित्य रणे वीरो द्रोणपुत्रो ननाद ह पूजितः सर्वभूतैश् च तव पुत्रैश् च भारत

tathā parāṅmukharathaṃ sainyaṃ yaudhiṣṭhiraṃ nṛpa parājitya raṇe vīro droṇaputro nanāda ha pūjitaḥ sarvabhūtaiś ca tava putraiś ca bhārata

Sanskrit only: no published translation is held for this verse.

अथ शरशतभिन्नकृत्तदेहैर्; हतपतितैः क्षणदाचरैः समन्तात् निधनम् उपगतैर् मही कृताभूद्; गिरिशिखरैर् इव दुर्गमातिरौद्रा

atha śaraśatabhinnakṛttadehair; hatapatitaiḥ kṣaṇadācaraiḥ samantāt nidhanam upagatair mahī kṛtābhūd; giriśikharair iva durgamātiraudrā

Sanskrit only: no published translation is held for this verse.

तं सिद्धगन्धर्वपिशाचसंघा; नागाः सुपर्णाः पितरो वयांसि रक्षोगणा भूतगणाश् च द्रौणिम्; अपूजयन्न् अप्सरसः सुराश् च

taṃ siddhagandharvapiśācasaṃghā; nāgāḥ suparṇāḥ pitaro vayāṃsi rakṣogaṇā bhūtagaṇāś ca drauṇim; apūjayann apsarasaḥ surāś ca

Sanskrit only: no published translation is held for this verse.