Mahābhārata (critical edition) 7.156

अर्जुन उवाच कथम् अस्मद्धितार्थं ते कैश् च योगैर् जनार्दन जरासंधप्रभृतयो घातिताः पृथिवीष्वराः

arjuna uvāca katham asmaddhitārthaṃ te kaiś ca yogair janārdana jarāsaṃdhaprabhṛtayo ghātitāḥ pṛthivīṣvarāḥ

Sanskrit only: no published translation is held for this verse.

वासुदेव उवाच जरासंधश् चेदिराजो नैषादिश् च महाबलः यदि स्युर् न हताः पूर्वम् इदानीं स्युर् भयंकराः

vāsudeva uvāca jarāsaṃdhaś cedirājo naiṣādiś ca mahābalaḥ yadi syur na hatāḥ pūrvam idānīṃ syur bhayaṃkarāḥ

Sanskrit only: no published translation is held for this verse.

सुयोधनस् तान् अवश्यं वृणुयाद् रथसत्तमान् ते ऽस्माभिर् नित्यसंदुष्टाः संश्रयेयुश् च कौरवान्

suyodhanas tān avaśyaṃ vṛṇuyād rathasattamān te 'smābhir nityasaṃduṣṭāḥ saṃśrayeyuś ca kauravān

Sanskrit only: no published translation is held for this verse.

ते हि वीरा महात्मानः कृतास्त्रा दृढयोधिनः धार्तराष्ट्रीं चमूं कृत्स्नां रक्षेयुर् अमरा इव

te hi vīrā mahātmānaḥ kṛtāstrā dṛḍhayodhinaḥ dhārtarāṣṭrīṃ camūṃ kṛtsnāṃ rakṣeyur amarā iva

Sanskrit only: no published translation is held for this verse.

सूतपुत्रो जरासंधश् चेदिराजो निषादजः सुयोधनं समाश्रित्य तपेरन् पृथिवीम् इमाम्

sūtaputro jarāsaṃdhaś cedirājo niṣādajaḥ suyodhanaṃ samāśritya taperan pṛthivīm imām

Sanskrit only: no published translation is held for this verse.

योगैर् अपि हता यैस् ते तान् मे शृणु धनंजय अजय्या हि विना योगैर् मृधे ते दैवतैर् अपि

yogair api hatā yais te tān me śṛṇu dhanaṃjaya ajayyā hi vinā yogair mṛdhe te daivatair api

Sanskrit only: no published translation is held for this verse.

एकैको हि पृथक् तेषां समस्तां सुरवाहिनीम् योधयेत् समरे पार्थ लोकपालाभिरक्षिताम्

ekaiko hi pṛthak teṣāṃ samastāṃ suravāhinīm yodhayet samare pārtha lokapālābhirakṣitām

Sanskrit only: no published translation is held for this verse.

जरासंधो हि रुषितो रौहिणेयप्रधर्षितः अस्मद्वधार्थं चिक्षेप गदां वै लोहितामुखीम्

jarāsaṃdho hi ruṣito rauhiṇeyapradharṣitaḥ asmadvadhārthaṃ cikṣepa gadāṃ vai lohitāmukhīm

Sanskrit only: no published translation is held for this verse.

सीमन्तम् इव कुर्वाणां नभसः पावकप्रभाम् व्यदृश्यतापतन्ती सा शक्रमुक्ता यथाशनिः

sīmantam iva kurvāṇāṃ nabhasaḥ pāvakaprabhām vyadṛśyatāpatantī sā śakramuktā yathāśaniḥ

Sanskrit only: no published translation is held for this verse.

ताम् आपतन्तीं दृष्ट्वैव गदां रोहिणिनन्दनः प्रतिघातार्थम् अस्त्रं वै स्थूणाकर्णम् अवासृजत्

tām āpatantīṃ dṛṣṭvaiva gadāṃ rohiṇinandanaḥ pratighātārtham astraṃ vai sthūṇākarṇam avāsṛjat

Sanskrit only: no published translation is held for this verse.

अस्त्रवेगप्रतिहता सा गदा प्रापतद् भुवि दारयन्ती धरां देवीं कम्पयन्तीव पर्वतान्

astravegapratihatā sā gadā prāpatad bhuvi dārayantī dharāṃ devīṃ kampayantīva parvatān

Sanskrit only: no published translation is held for this verse.

तत्र स्म राक्षसी घोरा जरा नामाशुविक्रमा संधयाम् आस तं जातं जरासंधम् अरिंदमम्

tatra sma rākṣasī ghorā jarā nāmāśuvikramā saṃdhayām āsa taṃ jātaṃ jarāsaṃdham ariṃdamam

Sanskrit only: no published translation is held for this verse.

द्वाभ्यां जातो हि मातृभ्याम् अर्धदेहः पृथक् पृथक् तया स संधितो यस्माज् जरासंधस् ततः स्मृतः

dvābhyāṃ jāto hi mātṛbhyām ardhadehaḥ pṛthak pṛthak tayā sa saṃdhito yasmāj jarāsaṃdhas tataḥ smṛtaḥ

Sanskrit only: no published translation is held for this verse.

सा तु भूमिगता पार्थ हता ससुतबान्धवा गदया तेन चास्त्रेण स्थूणाकर्णेन राक्षसी

sā tu bhūmigatā pārtha hatā sasutabāndhavā gadayā tena cāstreṇa sthūṇākarṇena rākṣasī

Sanskrit only: no published translation is held for this verse.

विनाभूतः स गदया जरासंधो महामृधे निहतो भीमसेनेन पश्यतस् ते धनंजय

vinābhūtaḥ sa gadayā jarāsaṃdho mahāmṛdhe nihato bhīmasenena paśyatas te dhanaṃjaya

Sanskrit only: no published translation is held for this verse.

यदि हि स्याद् गदापाणिर् जरासंधः प्रतापवान् सेन्द्रा देवा न तं हन्तुं रणे शक्ता नरोत्तम

yadi hi syād gadāpāṇir jarāsaṃdhaḥ pratāpavān sendrā devā na taṃ hantuṃ raṇe śaktā narottama

Sanskrit only: no published translation is held for this verse.

त्वद्धितार्थं हि नैषादिर् अङ्गुष्ठेन वियोजितः द्रोणेनाचार्यकं कृत्वा छद्मना सत्यविक्रमः

tvaddhitārthaṃ hi naiṣādir aṅguṣṭhena viyojitaḥ droṇenācāryakaṃ kṛtvā chadmanā satyavikramaḥ

Sanskrit only: no published translation is held for this verse.

स तु बद्धाङ्गुलित्राणो नैषादिर् दृढविक्रमः अस्यन्न् एको वनचरो बभौ राम इवापरः

sa tu baddhāṅgulitrāṇo naiṣādir dṛḍhavikramaḥ asyann eko vanacaro babhau rāma ivāparaḥ

Sanskrit only: no published translation is held for this verse.

एकलव्यं हि साङ्गुष्ठम् अशक्ता देवदानवाः सराक्षसोरगाः पार्थ विजेतुं युधि कर्हि चित्

ekalavyaṃ hi sāṅguṣṭham aśaktā devadānavāḥ sarākṣasoragāḥ pārtha vijetuṃ yudhi karhi cit

Sanskrit only: no published translation is held for this verse.

किम् उ मानुषमात्रेण शक्यः स्यात् प्रतिवीक्षितुम् दृढमुष्टिः कृती नित्यम् अस्यमानो दिवानिशम्

kim u mānuṣamātreṇa śakyaḥ syāt prativīkṣitum dṛḍhamuṣṭiḥ kṛtī nityam asyamāno divāniśam

Sanskrit only: no published translation is held for this verse.

त्वद्धितार्थं तु स मया हतः संग्राममूर्धनि चेदिराजश् च विक्रान्तः प्रत्यक्षं निहतस् तव

tvaddhitārthaṃ tu sa mayā hataḥ saṃgrāmamūrdhani cedirājaś ca vikrāntaḥ pratyakṣaṃ nihatas tava

Sanskrit only: no published translation is held for this verse.

स चाप्य् अशक्यः संग्रामे जेतुं सर्वैः सुरासुरैः वधार्थं तस्य जातो ऽहम् अन्येषां च सुरद्विषाम्

sa cāpy aśakyaḥ saṃgrāme jetuṃ sarvaiḥ surāsuraiḥ vadhārthaṃ tasya jāto 'ham anyeṣāṃ ca suradviṣām

Sanskrit only: no published translation is held for this verse.

त्वत्सहायो नरव्याघ्र लोकानां हितकाम्यया हिडिम्बबककिर्मीरा भीमसेनेन पातिताः रावणेन समप्राणा ब्रह्मयज्ञविनाशनाः

tvatsahāyo naravyāghra lokānāṃ hitakāmyayā hiḍimbabakakirmīrā bhīmasenena pātitāḥ rāvaṇena samaprāṇā brahmayajñavināśanāḥ

Sanskrit only: no published translation is held for this verse.

हतस् तथैव मायावी हैडिम्बेनाप्य् अलायुधः हैडिम्बश् चाप्य् उपायेन शक्त्या कर्णेन घातितः

hatas tathaiva māyāvī haiḍimbenāpy alāyudhaḥ haiḍimbaś cāpy upāyena śaktyā karṇena ghātitaḥ

Sanskrit only: no published translation is held for this verse.

यदि ह्य् एनं नाहनिष्यत् कर्णः शक्त्या महामृधे मया वध्यो ऽभविष्यत् स भैमसेनिर् घटोत्कचः

yadi hy enaṃ nāhaniṣyat karṇaḥ śaktyā mahāmṛdhe mayā vadhyo 'bhaviṣyat sa bhaimasenir ghaṭotkacaḥ

Sanskrit only: no published translation is held for this verse.

मया न निहतः पूर्वम् एष युष्मत्प्रियेप्सया एष हि ब्राह्मणद्वेषी यज्ञद्वेषी च राक्षसः

mayā na nihataḥ pūrvam eṣa yuṣmatpriyepsayā eṣa hi brāhmaṇadveṣī yajñadveṣī ca rākṣasaḥ

Sanskrit only: no published translation is held for this verse.

धर्मस्य लोप्ता पापात्मा तस्माद् एष निपातितः व्यंसिता चाप्य् उपायेन शक्रदत्ता मयानघ

dharmasya loptā pāpātmā tasmād eṣa nipātitaḥ vyaṃsitā cāpy upāyena śakradattā mayānagha

Sanskrit only: no published translation is held for this verse.

ये हि धर्मस्य लोप्तारो वध्यास् ते मम पाण्डव धर्मसंस्थापनार्थं हि प्रतिज्ञैषा ममाव्यया

ye hi dharmasya loptāro vadhyās te mama pāṇḍava dharmasaṃsthāpanārthaṃ hi pratijñaiṣā mamāvyayā

Sanskrit only: no published translation is held for this verse.

ब्रह्म सत्यं दमः शौचं धर्मो ह्रीः श्रीर् धृतिः क्षमा यत्र तत्र रमे नित्यम् अहं सत्येन ते शपे

brahma satyaṃ damaḥ śaucaṃ dharmo hrīḥ śrīr dhṛtiḥ kṣamā yatra tatra rame nityam ahaṃ satyena te śape

Sanskrit only: no published translation is held for this verse.

न विषादस् त्वया कार्यः कर्णं वैकर्तनं प्रति उपदेक्ष्याम्य् उपायं ते येन तं प्रसहिष्यसि

na viṣādas tvayā kāryaḥ karṇaṃ vaikartanaṃ prati upadekṣyāmy upāyaṃ te yena taṃ prasahiṣyasi

Sanskrit only: no published translation is held for this verse.

सुयोधनं चापि रणे हनिष्यति वृकोदरः तस्य चापि वधोपायं वक्ष्यामि तव पाण्डव

suyodhanaṃ cāpi raṇe haniṣyati vṛkodaraḥ tasya cāpi vadhopāyaṃ vakṣyāmi tava pāṇḍava

Sanskrit only: no published translation is held for this verse.

वर्धते तुमुलस् त्व् एष शब्दः परचमूं प्रति विद्रवन्ति च सैन्यानि त्वदीयानि दिशो दश

vardhate tumulas tv eṣa śabdaḥ paracamūṃ prati vidravanti ca sainyāni tvadīyāni diśo daśa

Sanskrit only: no published translation is held for this verse.

लब्धलक्ष्या हि कौरव्या विधमन्ति चमूं तव दहत्य् एष च वः सैन्यं द्रोणः प्रहरतां वरः

labdhalakṣyā hi kauravyā vidhamanti camūṃ tava dahaty eṣa ca vaḥ sainyaṃ droṇaḥ praharatāṃ varaḥ

Sanskrit only: no published translation is held for this verse.