Mahābhārata (critical edition) 7.94

संजय उवाच द्रोणं स जित्वा पुरुषप्रवीरस्; तथैव हार्दिक्यमुखांस् त्वदीयान् प्रहस्य सूतं वचनं बभाषे; शिनिप्रवीरः कुरुपुंगवाग्र्य

saṃjaya uvāca droṇaṃ sa jitvā puruṣapravīras; tathaiva hārdikyamukhāṃs tvadīyān prahasya sūtaṃ vacanaṃ babhāṣe; śinipravīraḥ kurupuṃgavāgrya

Sanskrit only: no published translation is held for this verse.

निमित्तमात्रं वयम् अत्र सूत; दग्धारयः केशवफल्गुनाभ्याम् हतान् निहन्मेह नरर्षभेण; वयं सुरेशात्मसमुद्भवेन

nimittamātraṃ vayam atra sūta; dagdhārayaḥ keśavaphalgunābhyām hatān nihanmeha nararṣabheṇa; vayaṃ sureśātmasamudbhavena

Sanskrit only: no published translation is held for this verse.

तम् एवम् उक्त्वा शिनिपुंगवस् तदा; महामृधे सो ऽग्र्यधनुर्धरो ऽरिहा किरन् समन्तात् सहसा शरान् बली; समापतच् छ्येन इवामिषं यथा

tam evam uktvā śinipuṃgavas tadā; mahāmṛdhe so 'gryadhanurdharo 'rihā kiran samantāt sahasā śarān balī; samāpatac chyena ivāmiṣaṃ yathā

Sanskrit only: no published translation is held for this verse.

तं यान्तम् अश्वैः शशिशङ्खवर्णैर्; विगाह्य सैन्यं पुरुषप्रवीरम् नाशक्नुवन् वारयितुं समन्ताद्; आदित्यरश्मिप्रतिमं नराग्र्यम्

taṃ yāntam aśvaiḥ śaśiśaṅkhavarṇair; vigāhya sainyaṃ puruṣapravīram nāśaknuvan vārayituṃ samantād; ādityaraśmipratimaṃ narāgryam

Sanskrit only: no published translation is held for this verse.

असह्यविक्रान्तम् अदीनसत्त्वं; सर्वे गणा भारत दुर्विषह्यम् सहस्रनेत्रप्रतिमप्रभावं; दिवीव सूर्यं जलदव्यपाये

asahyavikrāntam adīnasattvaṃ; sarve gaṇā bhārata durviṣahyam sahasranetrapratimaprabhāvaṃ; divīva sūryaṃ jaladavyapāye

Sanskrit only: no published translation is held for this verse.

अमर्षपूर्णस् त्व् अतिचित्रयोधी; शरासनी काञ्चनवर्मधारी सुदर्शनः सात्यकिम् आपतन्तं; न्यवारयद् राजवरः प्रसह्य

amarṣapūrṇas tv aticitrayodhī; śarāsanī kāñcanavarmadhārī sudarśanaḥ sātyakim āpatantaṃ; nyavārayad rājavaraḥ prasahya

Sanskrit only: no published translation is held for this verse.

तयोर् अभूद् भरत संप्रहारः; सुदारुणस् तं समभिप्रशंसन् योधास् त्वदीयाश् च हि सोमकाश् च; वृत्रेन्द्रयोर् युद्धम् इवामरौघाः

tayor abhūd bharata saṃprahāraḥ; sudāruṇas taṃ samabhipraśaṃsan yodhās tvadīyāś ca hi somakāś ca; vṛtrendrayor yuddham ivāmaraughāḥ

Sanskrit only: no published translation is held for this verse.

शरैः सुतीक्ष्णैः शतशो ऽभ्यविध्यत्; सुदर्शनः सात्वतमुख्यम् आजौ अनागतान् एव तु तान् पृषत्कांश्; चिच्छेद बाणैः शिनिपुंगवो ऽपि

śaraiḥ sutīkṣṇaiḥ śataśo 'bhyavidhyat; sudarśanaḥ sātvatamukhyam ājau anāgatān eva tu tān pṛṣatkāṃś; ciccheda bāṇaiḥ śinipuṃgavo 'pi

Sanskrit only: no published translation is held for this verse.

तथैव शक्रप्रतिमो ऽपि सात्यकिः; सुदर्शने यान् क्षिपति स्म सायकान् द्विधा त्रिधा तान् अकरोत् सुदर्शनः; शरोत्तमैः स्यन्दनवर्यम् आस्थितः

tathaiva śakrapratimo 'pi sātyakiḥ; sudarśane yān kṣipati sma sāyakān dvidhā tridhā tān akarot sudarśanaḥ; śarottamaiḥ syandanavaryam āsthitaḥ

Sanskrit only: no published translation is held for this verse.

संप्रेक्ष्य बाणान् निहतांस् तदानीं; सुदर्शनः सात्यकिबाणवेगैः क्रोधाद् दिधक्षन्न् इव तिग्मतेजाः; शरान् अमुञ्चत् तपनीयचित्रान्

saṃprekṣya bāṇān nihatāṃs tadānīṃ; sudarśanaḥ sātyakibāṇavegaiḥ krodhād didhakṣann iva tigmatejāḥ; śarān amuñcat tapanīyacitrān

Sanskrit only: no published translation is held for this verse.

पुनः स बाणैस् त्रिभिर् अग्निकल्पैर्; आकर्णपूर्णैर् निशितैः सुपुङ्खैः विव्याध देहावरणं विभिद्य; ते सात्यकेर् आविविशुः शरीरम्

punaḥ sa bāṇais tribhir agnikalpair; ākarṇapūrṇair niśitaiḥ supuṅkhaiḥ vivyādha dehāvaraṇaṃ vibhidya; te sātyaker āviviśuḥ śarīram

Sanskrit only: no published translation is held for this verse.

तथैव तस्यावनिपालपुत्रः; संधाय बाणैर् अपरैर् ज्वलद्भिः आजघ्निवांस् तान् रजतप्रकाशांश्; चतुर्भिर् अश्वांश् चतुरः प्रसह्य

tathaiva tasyāvanipālaputraḥ; saṃdhāya bāṇair aparair jvaladbhiḥ ājaghnivāṃs tān rajataprakāśāṃś; caturbhir aśvāṃś caturaḥ prasahya

Sanskrit only: no published translation is held for this verse.

तथा तु तेनाभिहतस् तरस्वी; नप्ता शिनेर् इन्द्रसमानवीर्यः सुदर्शनस्येषुगणैः सुतीक्ष्णैर्; हयान् निहत्याशु ननाद नादम्

tathā tu tenābhihatas tarasvī; naptā śiner indrasamānavīryaḥ sudarśanasyeṣugaṇaiḥ sutīkṣṇair; hayān nihatyāśu nanāda nādam

Sanskrit only: no published translation is held for this verse.

अथास्य सूतस्य शिरो निकृत्य; भल्लेन वज्राशनिसंनिभेन सुदर्शनस्यापि शिनिप्रवीरः; क्षुरेण चिच्छेद शिरः प्रसह्य

athāsya sūtasya śiro nikṛtya; bhallena vajrāśanisaṃnibhena sudarśanasyāpi śinipravīraḥ; kṣureṇa ciccheda śiraḥ prasahya

Sanskrit only: no published translation is held for this verse.

सकुण्डलं पूर्णशशिप्रकाशं; भ्राजिष्णु वक्त्रं निचकर्त देहात् यथा पुरा वज्रधरः प्रसह्य; बलस्य संख्ये ऽतिबलस्य राजन्

sakuṇḍalaṃ pūrṇaśaśiprakāśaṃ; bhrājiṣṇu vaktraṃ nicakarta dehāt yathā purā vajradharaḥ prasahya; balasya saṃkhye 'tibalasya rājan

Sanskrit only: no published translation is held for this verse.

निहत्य तं पार्थिवपुत्रपौत्रं; रणे यदूनाम् ऋषभस् तरस्वी मुदा समेतः परया महात्मा; रराज राजन् सुरराजकल्पः

nihatya taṃ pārthivaputrapautraṃ; raṇe yadūnām ṛṣabhas tarasvī mudā sametaḥ parayā mahātmā; rarāja rājan surarājakalpaḥ

Sanskrit only: no published translation is held for this verse.

ततो ययाव् अर्जुनम् एव येन; निवार्य सैन्यं तव मार्गणौघैः सदश्वयुक्तेन रथेन निर्याल्; लोकान् विसिस्मापयिषुर् नृवीरः

tato yayāv arjunam eva yena; nivārya sainyaṃ tava mārgaṇaughaiḥ sadaśvayuktena rathena niryāl; lokān visismāpayiṣur nṛvīraḥ

Sanskrit only: no published translation is held for this verse.

तत् तस्य विस्मापयनीयम् अग्र्यम्; अपूजयन् योधवराः समेताः यद् वर्तमानान् इषुगोचरे ऽरीन्; ददाह बाणैर् हुतभुग् यथैव

tat tasya vismāpayanīyam agryam; apūjayan yodhavarāḥ sametāḥ yad vartamānān iṣugocare 'rīn; dadāha bāṇair hutabhug yathaiva

Sanskrit only: no published translation is held for this verse.