Mahābhārata (critical edition) 8.2

संजय उवाच हते द्रोणे महेष्वासे तव पुत्रा महारथाः बभूवुर् आश्वस्तमुखा विषण्णा गतचेतसः

saṃjaya uvāca hate droṇe maheṣvāse tava putrā mahārathāḥ babhūvur āśvastamukhā viṣaṇṇā gatacetasaḥ

Sanskrit only: no published translation is held for this verse.

अवाङ्मुखाः शस्त्रभृतः सर्व एव विशां पते अप्रेक्षमाणाः शोकार्ता नाभ्यभाषन् परस्परम्

avāṅmukhāḥ śastrabhṛtaḥ sarva eva viśāṃ pate aprekṣamāṇāḥ śokārtā nābhyabhāṣan parasparam

Sanskrit only: no published translation is held for this verse.

तान् दृष्ट्वा व्यथिताकारान् सैन्यानि तव भारत ऊर्ध्वम् एवाभ्यवेक्षन्त दुःखत्रस्तान्य् अनेकशः

tān dṛṣṭvā vyathitākārān sainyāni tava bhārata ūrdhvam evābhyavekṣanta duḥkhatrastāny anekaśaḥ

Sanskrit only: no published translation is held for this verse.

शस्त्राण्य् एषां च राजेन्द्र शोणिताक्तान्य् अशेषतः प्राभ्रश्यन्त कराग्रेभ्यो दृष्ट्वा द्रोणं निपातितम्

śastrāṇy eṣāṃ ca rājendra śoṇitāktāny aśeṣataḥ prābhraśyanta karāgrebhyo dṛṣṭvā droṇaṃ nipātitam

Sanskrit only: no published translation is held for this verse.

तानि बद्धान्य् अनिष्टानि लम्बमानानि भारत अदृश्यन्त महाराज नक्षत्राणि यथा दिवि

tāni baddhāny aniṣṭāni lambamānāni bhārata adṛśyanta mahārāja nakṣatrāṇi yathā divi

Sanskrit only: no published translation is held for this verse.

तथार्तं स्तिमितं दृष्ट्वा गतसत्त्वम् इव स्थितम् स्वं बलं तन् महाराज राजा दुर्योधनो ऽब्रवीत्

tathārtaṃ stimitaṃ dṛṣṭvā gatasattvam iva sthitam svaṃ balaṃ tan mahārāja rājā duryodhano 'bravīt

Sanskrit only: no published translation is held for this verse.

भवतां बाहुवीर्यं हि समाश्रित्य मया युधि पाण्डवेयाः समाहूता युद्धं चेदं प्रवर्तितम्

bhavatāṃ bāhuvīryaṃ hi samāśritya mayā yudhi pāṇḍaveyāḥ samāhūtā yuddhaṃ cedaṃ pravartitam

Sanskrit only: no published translation is held for this verse.

तद् इदं निहते द्रोणे विषण्णम् इव लक्ष्यते युध्यमानाश् च समरे योधा वध्यन्ति सर्वतः

tad idaṃ nihate droṇe viṣaṇṇam iva lakṣyate yudhyamānāś ca samare yodhā vadhyanti sarvataḥ

Sanskrit only: no published translation is held for this verse.

जयो वापि वधो वापि युध्यमानस्य संयुगे भवेत् किम् अत्र चित्रं वै युध्यध्वं सर्वतोमुखाः

jayo vāpi vadho vāpi yudhyamānasya saṃyuge bhavet kim atra citraṃ vai yudhyadhvaṃ sarvatomukhāḥ

Sanskrit only: no published translation is held for this verse.

पश्यध्वं च महात्मानं कर्णं वैकर्तनं युधि प्रचरन्तं महेष्वासं दिव्यैर् अस्त्रैर् महाबलम्

paśyadhvaṃ ca mahātmānaṃ karṇaṃ vaikartanaṃ yudhi pracarantaṃ maheṣvāsaṃ divyair astrair mahābalam

Sanskrit only: no published translation is held for this verse.

यस्य वै युधि संत्रासात् कुन्तीपुत्रो धनंजयः निवर्तते सदामर्षात् सिंहात् क्षुद्रमृगो यथा

yasya vai yudhi saṃtrāsāt kuntīputro dhanaṃjayaḥ nivartate sadāmarṣāt siṃhāt kṣudramṛgo yathā

Sanskrit only: no published translation is held for this verse.

येन नागायुतप्राणो भीमसेनो महाबलः मानुषेणैव युद्धेन ताम् अवस्थां प्रवेशितः

yena nāgāyutaprāṇo bhīmaseno mahābalaḥ mānuṣeṇaiva yuddhena tām avasthāṃ praveśitaḥ

Sanskrit only: no published translation is held for this verse.

येन दिव्यास्त्रविच् छूरो मायावी स घटोत्कचः अमोघया रणे शक्त्या निहतो भैरवं नदन्

yena divyāstravic chūro māyāvī sa ghaṭotkacaḥ amoghayā raṇe śaktyā nihato bhairavaṃ nadan

Sanskrit only: no published translation is held for this verse.

तस्य दुष्पारवीर्यस्य सत्यसंधस्य धीमतः बाह्वोर् द्रविणम् अक्षय्यम् अद्य द्रक्ष्यथ संयुगे

tasya duṣpāravīryasya satyasaṃdhasya dhīmataḥ bāhvor draviṇam akṣayyam adya drakṣyatha saṃyuge

Sanskrit only: no published translation is held for this verse.

द्रोणपुत्रस्य विक्रान्तं राधेयस्यैव चोभयोः पाण्डुपाञ्चालसैन्येषु द्रक्ष्यथापि महात्मनोः

droṇaputrasya vikrāntaṃ rādheyasyaiva cobhayoḥ pāṇḍupāñcālasainyeṣu drakṣyathāpi mahātmanoḥ

Sanskrit only: no published translation is held for this verse.

सर्व एव भवन्तश् च शूराः प्राज्ञाः कुलोद्गताः शीलवन्तः कृतास्त्राश् च द्रक्ष्यथाद्य परस्परम्

sarva eva bhavantaś ca śūrāḥ prājñāḥ kulodgatāḥ śīlavantaḥ kṛtāstrāś ca drakṣyathādya parasparam

Sanskrit only: no published translation is held for this verse.

एवम् उक्ते महाराज कर्णो वैकर्तनो नृपः सिंहनादं विनद्योच्चैः प्रायुध्यत महाबलः

evam ukte mahārāja karṇo vaikartano nṛpaḥ siṃhanādaṃ vinadyoccaiḥ prāyudhyata mahābalaḥ

Sanskrit only: no published translation is held for this verse.

स सृञ्जयानां सर्वेषां पाञ्चालानां च पश्यताम् केकयानां विदेहानाम् अकरोत् कदनं महत्

sa sṛñjayānāṃ sarveṣāṃ pāñcālānāṃ ca paśyatām kekayānāṃ videhānām akarot kadanaṃ mahat

Sanskrit only: no published translation is held for this verse.

तस्येषुधाराः शतशः प्रादुरासञ् शरासनात् अग्रे पुङ्खे च संसक्ता यथा भ्रमरपङ्क्तयः

tasyeṣudhārāḥ śataśaḥ prādurāsañ śarāsanāt agre puṅkhe ca saṃsaktā yathā bhramarapaṅktayaḥ

Sanskrit only: no published translation is held for this verse.

स पीडयित्वा पाञ्चालान् पाण्डवांश् च तरस्विनः हत्वा सहस्रशो योधान् अर्जुनेन निपातितः

sa pīḍayitvā pāñcālān pāṇḍavāṃś ca tarasvinaḥ hatvā sahasraśo yodhān arjunena nipātitaḥ

Sanskrit only: no published translation is held for this verse.