Mahābhārata (critical edition) 8.40

द्रौणिपाण्डवयोर् एवं वर्तमाने महारणे वर्धमाने च राजेन्द्र द्रोणपुत्रे महाबले हीयमाने च कौन्तेये कृष्णं रोषः समभ्ययात्

drauṇipāṇḍavayor evaṃ vartamāne mahāraṇe vardhamāne ca rājendra droṇaputre mahābale hīyamāne ca kaunteye kṛṣṇaṃ roṣaḥ samabhyayāt

Sanskrit only: no published translation is held for this verse.

स रोषान् निःश्वसन् राजन् निर्दहन्न् इव चक्षुषा द्रौणिं ह्य् अपश्यत् संग्रामे फल्गुनं च मुहुर् मुहुः

sa roṣān niḥśvasan rājan nirdahann iva cakṣuṣā drauṇiṃ hy apaśyat saṃgrāme phalgunaṃ ca muhur muhuḥ

Sanskrit only: no published translation is held for this verse.

ततः क्रुद्धो ऽब्रवीत् कृष्णः पार्थं सप्रणयं तदा अत्यद्भुतम् इदं पार्थ तव पश्यामि संयुगे अतिशेते हि यत्र त्वा द्रोणपुत्रो ऽद्य भारत

tataḥ kruddho 'bravīt kṛṣṇaḥ pārthaṃ sapraṇayaṃ tadā atyadbhutam idaṃ pārtha tava paśyāmi saṃyuge atiśete hi yatra tvā droṇaputro 'dya bhārata

Sanskrit only: no published translation is held for this verse.

कच्चित् ते गाण्डिवं हस्ते रथे तिष्ठसि चार्जुन कच्चित् कुशलिनौ बाहू कच्चिद् वीर्यं तद् एव ते

kaccit te gāṇḍivaṃ haste rathe tiṣṭhasi cārjuna kaccit kuśalinau bāhū kaccid vīryaṃ tad eva te

Sanskrit only: no published translation is held for this verse.

एवम् उक्तस् तु कृष्णेन क्षिप्त्वा भल्लांश् चतुर्दश त्वरमाणस् त्वराकाले द्रौणेर् धनुर् अथाच्छिनत् ध्वजं छत्रं पताकां च रथं शक्तिं गदां तथा

evam uktas tu kṛṣṇena kṣiptvā bhallāṃś caturdaśa tvaramāṇas tvarākāle drauṇer dhanur athācchinat dhvajaṃ chatraṃ patākāṃ ca rathaṃ śaktiṃ gadāṃ tathā

Sanskrit only: no published translation is held for this verse.

जत्रुदेशे च सुभृशं वत्सदन्तैर् अताडयत् स मूर्च्छां परमां गत्वा ध्वजयष्टिं समाश्रितः

jatrudeśe ca subhṛśaṃ vatsadantair atāḍayat sa mūrcchāṃ paramāṃ gatvā dhvajayaṣṭiṃ samāśritaḥ

Sanskrit only: no published translation is held for this verse.

तं विसंज्ञं महाराज किरीटिभयपीडितम् अपोवाह रणात् सूतो रक्षमाणो धनंजयात्

taṃ visaṃjñaṃ mahārāja kirīṭibhayapīḍitam apovāha raṇāt sūto rakṣamāṇo dhanaṃjayāt

Sanskrit only: no published translation is held for this verse.

एतस्मिन्न् एव काले तु विजयः शत्रुतापनः न्यवधीत् तावकं सैन्यं शतशो ऽथ सहस्रशः पश्यतस् तव पुत्रस्य तस्य वीरस्य भारत

etasminn eva kāle tu vijayaḥ śatrutāpanaḥ nyavadhīt tāvakaṃ sainyaṃ śataśo 'tha sahasraśaḥ paśyatas tava putrasya tasya vīrasya bhārata

Sanskrit only: no published translation is held for this verse.

एवम् एष क्षयो वृत्तस् तावकानां परैः सह क्रूरो विशसनो घोरो राजन् दुर्मन्त्रिते तव

evam eṣa kṣayo vṛttas tāvakānāṃ paraiḥ saha krūro viśasano ghoro rājan durmantrite tava

Sanskrit only: no published translation is held for this verse.

संशप्तकांश् च कौन्तेयः कुरूंश् चापि वृकोदरः वसुषेणं च पाञ्चालः कृत्स्नेन व्यधमद् रणे

saṃśaptakāṃś ca kaunteyaḥ kurūṃś cāpi vṛkodaraḥ vasuṣeṇaṃ ca pāñcālaḥ kṛtsnena vyadhamad raṇe

Sanskrit only: no published translation is held for this verse.