Mahābhārata (critical edition) 8.48

संजय उवाच श्रुत्वा कर्णं कल्यम् उदारवीर्यं; क्रुद्धः पार्थः फल्गुनस्यामितौजाः धनंजयं वाक्यम् उवाच चेदं; युधिष्ठिरः कर्णशराभितप्तः

saṃjaya uvāca śrutvā karṇaṃ kalyam udāravīryaṃ; kruddhaḥ pārthaḥ phalgunasyāmitaujāḥ dhanaṃjayaṃ vākyam uvāca cedaṃ; yudhiṣṭhiraḥ karṇaśarābhitaptaḥ

Sanskrit only: no published translation is held for this verse.

इदं यदि द्वैतवने ह्य् अवक्ष्यः; कर्णं योद्धुं न प्रसहे नृपेति वयं तदा प्राप्तकालानि सर्वे; वृत्तान्य् उपैष्याम तदैव पार्थ

idaṃ yadi dvaitavane hy avakṣyaḥ; karṇaṃ yoddhuṃ na prasahe nṛpeti vayaṃ tadā prāptakālāni sarve; vṛttāny upaiṣyāma tadaiva pārtha

Sanskrit only: no published translation is held for this verse.

मयि प्रतिश्रुत्य वधं हि तस्य; बलस्य चाप्तस्य तथैव वीर आनीय नः शत्रुमध्यं स कस्मात्; समुत्क्षिप्य स्थण्डिले प्रत्यपिंष्ठाः

mayi pratiśrutya vadhaṃ hi tasya; balasya cāptasya tathaiva vīra ānīya naḥ śatrumadhyaṃ sa kasmāt; samutkṣipya sthaṇḍile pratyapiṃṣṭhāḥ

Sanskrit only: no published translation is held for this verse.

अन्वाशिष्म वयम् अर्जुन त्वयि; यियासवो बहु कल्याणम् इष्टम् तन् नः सर्वं विफलं राजपुत्र; फलार्थिनां निचुल इवातिपुष्पः

anvāśiṣma vayam arjuna tvayi; yiyāsavo bahu kalyāṇam iṣṭam tan naḥ sarvaṃ viphalaṃ rājaputra; phalārthināṃ nicula ivātipuṣpaḥ

Sanskrit only: no published translation is held for this verse.

प्रच्छादितं बडिशम् इवामिषेण; प्रच्छादितो गवय इवापवाचा अनर्थकं मे दर्शितवान् असि त्वं; राज्यार्थिनो राज्यरूपं विनाशम्

pracchāditaṃ baḍiśam ivāmiṣeṇa; pracchādito gavaya ivāpavācā anarthakaṃ me darśitavān asi tvaṃ; rājyārthino rājyarūpaṃ vināśam

Sanskrit only: no published translation is held for this verse.

यत् तत् पृथां वाग् उवाचान्तरिक्षे; सप्ताहजाते त्वयि मन्दबुद्धौ जातः पुत्रो वासवविक्रमो ऽयं; सर्वाञ् शूराञ् शात्रवाञ् जेष्यतीति

yat tat pṛthāṃ vāg uvācāntarikṣe; saptāhajāte tvayi mandabuddhau jātaḥ putro vāsavavikramo 'yaṃ; sarvāñ śūrāñ śātravāñ jeṣyatīti

Sanskrit only: no published translation is held for this verse.

अयं जेता खाण्डवे देवसंघान्; सर्वाणि भूतान्य् अपि चोत्तमौजाः अयं जेता मद्रकलिङ्गकेकयान्; अयं कुरून् हन्ति च राजमध्ये

ayaṃ jetā khāṇḍave devasaṃghān; sarvāṇi bhūtāny api cottamaujāḥ ayaṃ jetā madrakaliṅgakekayān; ayaṃ kurūn hanti ca rājamadhye

Sanskrit only: no published translation is held for this verse.

अस्मात् परो न भविता धनुर्धरो; न वै भूतः कश् चन जातु जेता इच्छन्न् आर्यः सर्वभूतानि कुर्याद्; वशे वशी सर्वसमाप्तविद्यः

asmāt paro na bhavitā dhanurdharo; na vai bhūtaḥ kaś cana jātu jetā icchann āryaḥ sarvabhūtāni kuryād; vaśe vaśī sarvasamāptavidyaḥ

Sanskrit only: no published translation is held for this verse.

कान्त्या शशाङ्कस्य जवेन वायोः; स्थैर्येण मेरोः क्षमया पृथिव्याः सूर्यस्य भासा धनदस्य लक्ष्म्या; शौर्येण शक्रस्य बलेन विष्णोः

kāntyā śaśāṅkasya javena vāyoḥ; sthairyeṇa meroḥ kṣamayā pṛthivyāḥ sūryasya bhāsā dhanadasya lakṣmyā; śauryeṇa śakrasya balena viṣṇoḥ

Sanskrit only: no published translation is held for this verse.

तुल्यो महात्मा तव कुन्ति पुत्रो; जातो ऽदितेर् विष्णुर् इवारिहन्ता स्वेषां जयाय द्विषतां वधाय; ख्यातो ऽमितौजाः कुलतन्तुकर्ता

tulyo mahātmā tava kunti putro; jāto 'diter viṣṇur ivārihantā sveṣāṃ jayāya dviṣatāṃ vadhāya; khyāto 'mitaujāḥ kulatantukartā

Sanskrit only: no published translation is held for this verse.

इत्य् अन्तरिक्षे शतशृङ्गमूर्ध्नि; तपस्विनां शृण्वतां वाग् उवाच एवंविधं त्वां तच् च नाभूत् तवाद्य; देवा हि नूनम् अनृतं वदन्ति

ity antarikṣe śataśṛṅgamūrdhni; tapasvināṃ śṛṇvatāṃ vāg uvāca evaṃvidhaṃ tvāṃ tac ca nābhūt tavādya; devā hi nūnam anṛtaṃ vadanti

Sanskrit only: no published translation is held for this verse.

तथापरेषाम् ऋषिसत्तमानां; श्रुत्वा गिरं पूजयतां सदैव न संनतिं प्रैमि सुयोधनस्य; न त्वा जानाम्य् आधिरथेर् भयार्तम्

tathāpareṣām ṛṣisattamānāṃ; śrutvā giraṃ pūjayatāṃ sadaiva na saṃnatiṃ praimi suyodhanasya; na tvā jānāmy ādhirather bhayārtam

Sanskrit only: no published translation is held for this verse.

त्वष्ट्रा कृतं वाहम् अकूजनाक्षं; शुभं समास्थाय कपिध्वजं त्वम् खड्गं गृहीत्वा हेमचित्रं समिद्धं; धनुश् चेदं गाण्डिवं तालमात्रम् स केशवेनोह्यमानः कथं नु; कर्णाद् भीतो व्यपयातो ऽसि पार्थ

tvaṣṭrā kṛtaṃ vāham akūjanākṣaṃ; śubhaṃ samāsthāya kapidhvajaṃ tvam khaḍgaṃ gṛhītvā hemacitraṃ samiddhaṃ; dhanuś cedaṃ gāṇḍivaṃ tālamātram sa keśavenohyamānaḥ kathaṃ nu; karṇād bhīto vyapayāto 'si pārtha

Sanskrit only: no published translation is held for this verse.

धनुश् चैतत् केशवाय प्रदाय; यन्ताभविष्यस् त्वं रणे चेद् दुरात्मन् ततो ऽहनिष्यत् केशवः कर्णम् उग्रं; मरुत्पतिर् वृत्रम् इवात्तवज्रः

dhanuś caitat keśavāya pradāya; yantābhaviṣyas tvaṃ raṇe ced durātman tato 'haniṣyat keśavaḥ karṇam ugraṃ; marutpatir vṛtram ivāttavajraḥ

Sanskrit only: no published translation is held for this verse.

मासे ऽपतिष्यः पञ्चमे त्वं प्रकृच्छ्रे; न वा गर्भो ऽप्य् अभविष्यः पृथायाः तत् ते श्रमो राजपुत्राभविष्यन्; न संग्रामाद् अपयातुं दुरात्मन्

māse 'patiṣyaḥ pañcame tvaṃ prakṛcchre; na vā garbho 'py abhaviṣyaḥ pṛthāyāḥ tat te śramo rājaputrābhaviṣyan; na saṃgrāmād apayātuṃ durātman

Sanskrit only: no published translation is held for this verse.