Library·Mahābhārata (critical edition)·8·8.53
संजय उवाच तेषाम् अनीकानि बृहद्ध्वजानि; रणे समृद्धानि समागतानि गर्जन्ति भेरीनिनदोन्मुखानि; मेघैर् यथा मेघगणास् तपान्ते
saṃjaya uvāca teṣām anīkāni bṛhaddhvajāni; raṇe samṛddhāni samāgatāni garjanti bherīninadonmukhāni; meghair yathā meghagaṇās tapānte
Sanskrit only: no published translation is held for this verse.
महागजाभ्राकुलम् अस्त्रतोयं; वादित्रनेमीतलशब्दवच् च हिरण्यचित्रायुधवैद्युतं च; महारथैर् आवृतशब्दवच् च
mahāgajābhrākulam astratoyaṃ; vāditranemītalaśabdavac ca hiraṇyacitrāyudhavaidyutaṃ ca; mahārathair āvṛtaśabdavac ca
Sanskrit only: no published translation is held for this verse.
तद् भीमवेगं रुधिरौघवाहि; खड्गाकुलं क्षत्रियजीववाहि अनार्तवं क्रूरम् अनिष्टवर्षं; बभूव तत् संहरणं प्रजानाम्
tad bhīmavegaṃ rudhiraughavāhi; khaḍgākulaṃ kṣatriyajīvavāhi anārtavaṃ krūram aniṣṭavarṣaṃ; babhūva tat saṃharaṇaṃ prajānām
Sanskrit only: no published translation is held for this verse.
रथान् ससूतान् सहयान् गजांश् च; सर्वान् अरीन् मृत्युवशं शरौघैः निन्ये हयांश् चैव तथा ससादीन्; पदातिसंघांश् च तथैव पार्थः
rathān sasūtān sahayān gajāṃś ca; sarvān arīn mṛtyuvaśaṃ śaraughaiḥ ninye hayāṃś caiva tathā sasādīn; padātisaṃghāṃś ca tathaiva pārthaḥ
Sanskrit only: no published translation is held for this verse.
कृपः शिखण्डी च रणे समेतौ; दुर्योधनं सात्यकिर् अभ्यगच्छत श्रुतश्रवा द्रोणसुतेन सार्धं; युधामन्युश् चित्रसेनेन चापि
kṛpaḥ śikhaṇḍī ca raṇe sametau; duryodhanaṃ sātyakir abhyagacchata śrutaśravā droṇasutena sārdhaṃ; yudhāmanyuś citrasenena cāpi
Sanskrit only: no published translation is held for this verse.
कर्णस्य पुत्रस् तु रथी सुषेणं; समागतः सृञ्जयांश् चोत्तमौजाः गान्धारराजं सहदेवः क्षुधार्तो; महर्षभं सिंह इवाभ्यधावत्
karṇasya putras tu rathī suṣeṇaṃ; samāgataḥ sṛñjayāṃś cottamaujāḥ gāndhārarājaṃ sahadevaḥ kṣudhārto; maharṣabhaṃ siṃha ivābhyadhāvat
Sanskrit only: no published translation is held for this verse.
शतानीको नाकुलिः कर्णपुत्रं; युवा युवानं वृषसेनं शरौघैः समार्दयत् कर्णसुतश् च वीरः; पाञ्चालेयं शरवर्षैर् अनेकैः
śatānīko nākuliḥ karṇaputraṃ; yuvā yuvānaṃ vṛṣasenaṃ śaraughaiḥ samārdayat karṇasutaś ca vīraḥ; pāñcāleyaṃ śaravarṣair anekaiḥ
Sanskrit only: no published translation is held for this verse.
रथर्षभः कृतवर्माणम् आर्च्छन्; माद्रीपुत्रो नकुलश् चित्रयोधी पाञ्चालानाम् अधिपो याज्ञसेनिः; सेनापतिं कर्णम् आर्च्छत् ससैन्यम्
ratharṣabhaḥ kṛtavarmāṇam ārcchan; mādrīputro nakulaś citrayodhī pāñcālānām adhipo yājñaseniḥ; senāpatiṃ karṇam ārcchat sasainyam
Sanskrit only: no published translation is held for this verse.
दुःशासनो भारत भारती च; संशप्तकानां पृतना समृद्धा भीमं रणे शस्त्रभृतां वरिष्ठं; तदा समार्च्छत् तम् असह्यवेगम्
duḥśāsano bhārata bhāratī ca; saṃśaptakānāṃ pṛtanā samṛddhā bhīmaṃ raṇe śastrabhṛtāṃ variṣṭhaṃ; tadā samārcchat tam asahyavegam
Sanskrit only: no published translation is held for this verse.
कर्णात्मजं तत्र जघान शूरस्; तथाच्छिनच् चोत्तमौजाः प्रसह्य तस्योत्तमाङ्गं निपपात भूमौ; निनादयद् गां निनदेन खं च
karṇātmajaṃ tatra jaghāna śūras; tathācchinac cottamaujāḥ prasahya tasyottamāṅgaṃ nipapāta bhūmau; ninādayad gāṃ ninadena khaṃ ca
Sanskrit only: no published translation is held for this verse.
सुषेणशीर्षं पतितं पृथिव्यां; विलोक्य कर्णो ऽथ तदार्तरूपः क्रोधाद् धयांस् तस्य रथं ध्वजं च; बाणैः सुधारैर् निशितैर् न्यकृन्तत्
suṣeṇaśīrṣaṃ patitaṃ pṛthivyāṃ; vilokya karṇo 'tha tadārtarūpaḥ krodhād dhayāṃs tasya rathaṃ dhvajaṃ ca; bāṇaiḥ sudhārair niśitair nyakṛntat
Sanskrit only: no published translation is held for this verse.
स तूत्तमौजा निशितैः पृषत्कैर्; विव्याध खड्गेन च भास्वरेण पार्ष्णिं हयांश् चैव कृपस्य हत्वा; शिखण्डिवाहं स ततो ऽभ्यरोहत्
sa tūttamaujā niśitaiḥ pṛṣatkair; vivyādha khaḍgena ca bhāsvareṇa pārṣṇiṃ hayāṃś caiva kṛpasya hatvā; śikhaṇḍivāhaṃ sa tato 'bhyarohat
Sanskrit only: no published translation is held for this verse.
कृपं तु दृष्ट्वा विरथं रथस्थो; नैच्छच् छरैस् ताडयितुं शिखण्डी तं द्रौणिर् आवार्य रथं कृपं स्म; समुज्जह्रे पङ्कगतां यथा गाम्
kṛpaṃ tu dṛṣṭvā virathaṃ rathastho; naicchac charais tāḍayituṃ śikhaṇḍī taṃ drauṇir āvārya rathaṃ kṛpaṃ sma; samujjahre paṅkagatāṃ yathā gām
Sanskrit only: no published translation is held for this verse.
हिरण्यवर्मा निशितैः पृषत्कैस्; तवात्मजानाम् अनिलात्मजो वै अतापयत् सैन्यम् अतीव भीमः; काले शुचौ मध्यगतो यथार्कः
hiraṇyavarmā niśitaiḥ pṛṣatkais; tavātmajānām anilātmajo vai atāpayat sainyam atīva bhīmaḥ; kāle śucau madhyagato yathārkaḥ
Sanskrit only: no published translation is held for this verse.