Library·Mahābhārata (critical edition)·8·8.68
संजय उवाच शल्यस् तु कर्णार्जुनयोर् विमर्दे; बलानि दृष्ट्वा मृदितानि बाणैः दुर्योधनं यान्तम् अवेक्षमाणो; संदर्शयद् भारत युद्धभूमिम्
saṃjaya uvāca śalyas tu karṇārjunayor vimarde; balāni dṛṣṭvā mṛditāni bāṇaiḥ duryodhanaṃ yāntam avekṣamāṇo; saṃdarśayad bhārata yuddhabhūmim
Sanskrit only: no published translation is held for this verse.
निपातितस्यन्दनवाजिनागं; दृष्ट्वा बलं तद् धतसूतपुत्रम् दुर्योधनो ऽश्रुप्रतिपूर्णनेत्रो; मुहुर् मुहुर् न्यश्वसद् आर्तरूपः
nipātitasyandanavājināgaṃ; dṛṣṭvā balaṃ tad dhatasūtaputram duryodhano 'śrupratipūrṇanetro; muhur muhur nyaśvasad ārtarūpaḥ
Sanskrit only: no published translation is held for this verse.
कर्णं तु शूरं पतितं पृथिव्यां; शराचितं शोणितदिग्धगात्रम् यदृच्छया सूर्यम् इवावनिस्थं; दिदृक्षवः संपरिवार्य तस्थुः
karṇaṃ tu śūraṃ patitaṃ pṛthivyāṃ; śarācitaṃ śoṇitadigdhagātram yadṛcchayā sūryam ivāvanisthaṃ; didṛkṣavaḥ saṃparivārya tasthuḥ
Sanskrit only: no published translation is held for this verse.
प्रहृष्टवित्रस्तविषण्णविस्मृतास्; तथापरे शोकगता इवाभवन् परे त्वदीयाश् च परस्परेण; यथा यथैषां प्रकृतिस् तथाभवन्
prahṛṣṭavitrastaviṣaṇṇavismṛtās; tathāpare śokagatā ivābhavan pare tvadīyāś ca paraspareṇa; yathā yathaiṣāṃ prakṛtis tathābhavan
Sanskrit only: no published translation is held for this verse.
प्रविद्धवर्माभरणाम्बरायुधं; धनंजयेनाभिहतं हतौजसम् निशम्य कर्णं कुरवः प्रदुद्रुवुर्; हतर्षभा गाव इवाकुलाकुलाः
praviddhavarmābharaṇāmbarāyudhaṃ; dhanaṃjayenābhihataṃ hataujasam niśamya karṇaṃ kuravaḥ pradudruvur; hatarṣabhā gāva ivākulākulāḥ
Sanskrit only: no published translation is held for this verse.
कृत्वा विमर्दं भृशम् अर्जुनेन; कर्णं हतं केसरिणेव नागम् दृष्ट्वा शयानं भुवि मद्रराजो; भीतो ऽपसर्पत् सरथः सुशीघ्रम्
kṛtvā vimardaṃ bhṛśam arjunena; karṇaṃ hataṃ kesariṇeva nāgam dṛṣṭvā śayānaṃ bhuvi madrarājo; bhīto 'pasarpat sarathaḥ suśīghram
Sanskrit only: no published translation is held for this verse.
मद्राधिपश् चापि विमूढचेतास्; तूर्णं रथेनापहृतध्वजेन दुर्योधनस्यान्तिकम् एत्य शीघ्रं; संभाष्य दुःखार्तम् उवाच वाक्यम्
madrādhipaś cāpi vimūḍhacetās; tūrṇaṃ rathenāpahṛtadhvajena duryodhanasyāntikam etya śīghraṃ; saṃbhāṣya duḥkhārtam uvāca vākyam
Sanskrit only: no published translation is held for this verse.
विशीर्णनागाश्वरथप्रवीरं; बलं त्वदियं यमराष्ट्रकल्पम् अन्योन्यम् आसाद्य हतं महद्भिर्; नराश्वनागैर् गिरिकूटकल्पैः
viśīrṇanāgāśvarathapravīraṃ; balaṃ tvadiyaṃ yamarāṣṭrakalpam anyonyam āsādya hataṃ mahadbhir; narāśvanāgair girikūṭakalpaiḥ
Sanskrit only: no published translation is held for this verse.
नैतादृशं भारत युद्धम् आसीद्; यथाद्य कर्णार्जुनयोर् बभूव ग्रस्तौ हि कर्णेन समेत्य कृष्णाव्; अन्ये च सर्वे तव शत्रवो ये
naitādṛśaṃ bhārata yuddham āsīd; yathādya karṇārjunayor babhūva grastau hi karṇena sametya kṛṣṇāv; anye ca sarve tava śatravo ye
Sanskrit only: no published translation is held for this verse.
दैवं तु यत् तत् स्ववशं प्रवृत्तं; तत् पाण्डवान् पाति हिनस्ति चास्मान् तवार्थसिद्ध्यर्थकरा हि सर्वे; प्रसह्य वीरा निहता द्विषद्भिः
daivaṃ tu yat tat svavaśaṃ pravṛttaṃ; tat pāṇḍavān pāti hinasti cāsmān tavārthasiddhyarthakarā hi sarve; prasahya vīrā nihatā dviṣadbhiḥ
Sanskrit only: no published translation is held for this verse.
कुबेरवैवस्वतवासवानां; तुल्यप्रभावाम्बुपतेश् च वीराः वीर्येण शौर्येण बलेन चैव; तैस् तैश् च युक्ता विपुलैर् गुणौघैः
kuberavaivasvatavāsavānāṃ; tulyaprabhāvāmbupateś ca vīrāḥ vīryeṇa śauryeṇa balena caiva; tais taiś ca yuktā vipulair guṇaughaiḥ
Sanskrit only: no published translation is held for this verse.
अवध्यकल्पा निहता नरेन्द्रास्; तवार्थकामा युधि पाण्डवेयैः तन् मा शुचो भारत दिष्टम् एतत्; पर्यायसिद्धिर् न सदास्ति सिद्धिः
avadhyakalpā nihatā narendrās; tavārthakāmā yudhi pāṇḍaveyaiḥ tan mā śuco bhārata diṣṭam etat; paryāyasiddhir na sadāsti siddhiḥ
Sanskrit only: no published translation is held for this verse.
एतद् वचो मद्रपतेर् निशम्य; स्वं चापनीतं मनसा निरीक्ष्य दुर्योधनो दीनमना विसंज्ञः; पुनः पुनर् न्यश्वसद् आर्तरूपः
etad vaco madrapater niśamya; svaṃ cāpanītaṃ manasā nirīkṣya duryodhano dīnamanā visaṃjñaḥ; punaḥ punar nyaśvasad ārtarūpaḥ
Sanskrit only: no published translation is held for this verse.
तं ध्यानमूकं कृपणं भृशार्तम्; आर्तायनिर् दीनम् उवाच वाक्यम् पश्येदम् उग्रं नरवाजिनागैर्; आयोधनं वीरहतैः प्रपन्नम्
taṃ dhyānamūkaṃ kṛpaṇaṃ bhṛśārtam; ārtāyanir dīnam uvāca vākyam paśyedam ugraṃ naravājināgair; āyodhanaṃ vīrahataiḥ prapannam
Sanskrit only: no published translation is held for this verse.
महीधराभैः पतितैर् महागजैः; सकृत् प्रविद्धैः शरविद्धमर्मभिः तैर् विह्वलद्भिश् च गतासुभिश् च; प्रध्वस्तयन्त्रायुधवर्मयोधैः
mahīdharābhaiḥ patitair mahāgajaiḥ; sakṛt praviddhaiḥ śaraviddhamarmabhiḥ tair vihvaladbhiś ca gatāsubhiś ca; pradhvastayantrāyudhavarmayodhaiḥ
Sanskrit only: no published translation is held for this verse.
वज्रापविद्धैर् इव चाचलेन्द्रैर्; विभिन्नपाषाणमृगद्रुमौषधैः प्रविद्धघण्टाङ्कुशतोमरध्वजैः; सहेममालै रुधिरौघसंप्लुतैः
vajrāpaviddhair iva cācalendrair; vibhinnapāṣāṇamṛgadrumauṣadhaiḥ praviddhaghaṇṭāṅkuśatomaradhvajaiḥ; sahemamālai rudhiraughasaṃplutaiḥ
Sanskrit only: no published translation is held for this verse.
शरावभिन्नैः पतितैश् च वाजिभिः; श्वसद्भिर् अन्यैः क्षतजं वमद्भिः दीनैः स्तनद्भिः परिवृत्तनेत्रैर्; महीं दशद्भिः कृपणं नदद्भिः
śarāvabhinnaiḥ patitaiś ca vājibhiḥ; śvasadbhir anyaiḥ kṣatajaṃ vamadbhiḥ dīnaiḥ stanadbhiḥ parivṛttanetrair; mahīṃ daśadbhiḥ kṛpaṇaṃ nadadbhiḥ
Sanskrit only: no published translation is held for this verse.
तथापविद्धैर् गजवाजियोधैर्; मन्दासुभिश् चैव गतासुभिश् च नराश्वनागैश् च रथैश् च मर्दितैर्; मही महावैतरणीव दुर्दृशा
tathāpaviddhair gajavājiyodhair; mandāsubhiś caiva gatāsubhiś ca narāśvanāgaiś ca rathaiś ca marditair; mahī mahāvaitaraṇīva durdṛśā
Sanskrit only: no published translation is held for this verse.
गजैर् निकृत्तापरहस्तगात्रैर्; उद्वेपमानैः पतितैः पृथिव्याम् यशस्विभिर् नागरथाश्वयोधिभिः; पदातिभिश् चाभिमुखैर् हतैः परैः विशीर्णवर्माभरणाम्बरायुधैर्; वृता निशान्तैर् इव पावकैर् मही
gajair nikṛttāparahastagātrair; udvepamānaiḥ patitaiḥ pṛthivyām yaśasvibhir nāgarathāśvayodhibhiḥ; padātibhiś cābhimukhair hataiḥ paraiḥ viśīrṇavarmābharaṇāmbarāyudhair; vṛtā niśāntair iva pāvakair mahī
Sanskrit only: no published translation is held for this verse.
शरप्रहाराभिहतैर् महाबलैर्; अवेक्ष्यमाणैः पतितैः सहस्रशः प्रनष्टसंज्ञैः पुनर् उच्छ्वसद्भिर्; मही बभूवानुगतैर् इवाग्निभिः दिवश् च्युतैर् भूर् अतिदीप्तिमद्भिर्; नक्तं ग्रहैर् द्यौर् अमलेव दीप्तैः
śaraprahārābhihatair mahābalair; avekṣyamāṇaiḥ patitaiḥ sahasraśaḥ pranaṣṭasaṃjñaiḥ punar ucchvasadbhir; mahī babhūvānugatair ivāgnibhiḥ divaś cyutair bhūr atidīptimadbhir; naktaṃ grahair dyaur amaleva dīptaiḥ
Sanskrit only: no published translation is held for this verse.
शरास् तु कर्णार्जुनबाहुमुक्ता; विदार्य नागाश्वमनुष्यदेहान् प्राणान् निरस्याशु महीम् अतीयुर्; महोरगा वासम् इवाभितो ऽस्त्रैः
śarās tu karṇārjunabāhumuktā; vidārya nāgāśvamanuṣyadehān prāṇān nirasyāśu mahīm atīyur; mahoragā vāsam ivābhito 'straiḥ
Sanskrit only: no published translation is held for this verse.
हतैर् मनुष्याश्वगजैश् च संख्ये; शरावभिन्नैश् च रथैर् बभूव धनंजयस्याधिरथेश् च मार्गे; गजैर् अगम्या वसुधातिदुर्गा
hatair manuṣyāśvagajaiś ca saṃkhye; śarāvabhinnaiś ca rathair babhūva dhanaṃjayasyādhiratheś ca mārge; gajair agamyā vasudhātidurgā
Sanskrit only: no published translation is held for this verse.
रथैर् वरेषून् मथितैश् च योधैः; संस्यूतसूताश्ववरायुधध्वजैः विशीर्णशस्त्रैर् विनिकृत्तबन्धुरैर्; निकृत्तचक्राक्षयुगत्रिवेणुभिः
rathair vareṣūn mathitaiś ca yodhaiḥ; saṃsyūtasūtāśvavarāyudhadhvajaiḥ viśīrṇaśastrair vinikṛttabandhurair; nikṛttacakrākṣayugatriveṇubhiḥ
Sanskrit only: no published translation is held for this verse.
विमुक्तयन्त्रैर् निहतैर् अयस्मयैर्; हतानुषङ्गैर् विनिषङ्गबन्धुरैः प्रभग्ननीडैर् मणिहेममण्डितैः; स्तृता मही द्यौर् इव शारदैर् घनैः
vimuktayantrair nihatair ayasmayair; hatānuṣaṅgair viniṣaṅgabandhuraiḥ prabhagnanīḍair maṇihemamaṇḍitaiḥ; stṛtā mahī dyaur iva śāradair ghanaiḥ
Sanskrit only: no published translation is held for this verse.
विकृष्यमणैर् जवनैर् अलंकृतैर्; हतेश्वरैर् आजिरथैः सुकल्पितैः मनुष्यमातङ्गरथाश्वराशिभिर्; द्रुतं व्रजन्तो बहुधा विचूर्णिताः
vikṛṣyamaṇair javanair alaṃkṛtair; hateśvarair ājirathaiḥ sukalpitaiḥ manuṣyamātaṅgarathāśvarāśibhir; drutaṃ vrajanto bahudhā vicūrṇitāḥ
Sanskrit only: no published translation is held for this verse.
सहेमपट्टाः परिघाः परश्वधाः; कडङ्गरायोमुसलानि पट्टिशाः पेतुश् च खड्गा विमला विकोशा; गदाश् च जाम्बूनदपट्टबद्धाः
sahemapaṭṭāḥ parighāḥ paraśvadhāḥ; kaḍaṅgarāyomusalāni paṭṭiśāḥ petuś ca khaḍgā vimalā vikośā; gadāś ca jāmbūnadapaṭṭabaddhāḥ
Sanskrit only: no published translation is held for this verse.
चापानि रुक्माङ्गदभूषणानि; शराश् च कार्तस्वरचित्रपुङ्खाः ऋष्ट्यश् च पीता विमला विकोशाः; प्रासाः सखड्गाः कनकावभासाः
cāpāni rukmāṅgadabhūṣaṇāni; śarāś ca kārtasvaracitrapuṅkhāḥ ṛṣṭyaś ca pītā vimalā vikośāḥ; prāsāḥ sakhaḍgāḥ kanakāvabhāsāḥ
Sanskrit only: no published translation is held for this verse.
छत्राणि वालव्यजनानि शङ्खाः; स्रजश् च पुष्पोत्तमहेमचित्राः कुथाः पताकाम्बरवेष्टिताश् च; किरीटमाला मुकुटाश् च शुभ्राः
chatrāṇi vālavyajanāni śaṅkhāḥ; srajaś ca puṣpottamahemacitrāḥ kuthāḥ patākāmbaraveṣṭitāś ca; kirīṭamālā mukuṭāś ca śubhrāḥ
Sanskrit only: no published translation is held for this verse.
प्रकीर्णका विप्रकीर्णाः कुथाश् च; प्रधानमुक्तातरलाश् च हाराः आपीडकेयूरवराङ्गदानि; ग्रैवेयनिष्काः ससुवर्णसूत्राः
prakīrṇakā viprakīrṇāḥ kuthāś ca; pradhānamuktātaralāś ca hārāḥ āpīḍakeyūravarāṅgadāni; graiveyaniṣkāḥ sasuvarṇasūtrāḥ
Sanskrit only: no published translation is held for this verse.
मण्युत्तमा वज्रसुवर्णमुक्ता; रत्नानि चोच्चावचमङ्गलानि गात्राणि चात्यन्तसुखोचितानि; शिरांसि चेन्दुप्रतिमाननानि
maṇyuttamā vajrasuvarṇamuktā; ratnāni coccāvacamaṅgalāni gātrāṇi cātyantasukhocitāni; śirāṃsi cendupratimānanāni
Sanskrit only: no published translation is held for this verse.
देहांश् च भोगांश् च परिच्छदांश् च; त्यक्त्वा मनोज्ञानि सुखानि चापि स्वधर्मनिष्ठां महतीम् अवाप्य; व्याप्तांश् च लोकान् यशसा समीयुः
dehāṃś ca bhogāṃś ca paricchadāṃś ca; tyaktvā manojñāni sukhāni cāpi svadharmaniṣṭhāṃ mahatīm avāpya; vyāptāṃś ca lokān yaśasā samīyuḥ
Sanskrit only: no published translation is held for this verse.
इत्य् एवम् उक्त्वा विरराम शल्यो; दुर्योधनः शोकपरीतचेताः हा कर्ण हा कर्ण इति ब्रुवाण; आर्तो विसंज्ञो भृशम् अश्रुनेत्रः
ity evam uktvā virarāma śalyo; duryodhanaḥ śokaparītacetāḥ hā karṇa hā karṇa iti bruvāṇa; ārto visaṃjño bhṛśam aśrunetraḥ
Sanskrit only: no published translation is held for this verse.
तं द्रोणपुत्रप्रमुखा नरेन्द्राः; सर्वे समाश्वास्य सह प्रयान्ति निरीक्षमाणा मुहुर् अर्जुनस्य; ध्वजं महान्तं यशसा ज्वलन्तम्
taṃ droṇaputrapramukhā narendrāḥ; sarve samāśvāsya saha prayānti nirīkṣamāṇā muhur arjunasya; dhvajaṃ mahāntaṃ yaśasā jvalantam
Sanskrit only: no published translation is held for this verse.
नराश्वमातङ्गशरीरजेन; रक्तेन सिक्ता रुधिरेण भूमिः रक्ताम्बरस्रक् तपनीययोगान्; नारी प्रकाशा इव सर्वगम्या
narāśvamātaṅgaśarīrajena; raktena siktā rudhireṇa bhūmiḥ raktāmbarasrak tapanīyayogān; nārī prakāśā iva sarvagamyā
Sanskrit only: no published translation is held for this verse.
प्रच्छन्नरूपा रुधिरेण राजन्; रौद्रे मुहूर्ते ऽतिविराजमानाः नैवावतस्थुः कुरवः समीक्ष्य; प्रव्राजिता देवलोकाश् च सर्वे
pracchannarūpā rudhireṇa rājan; raudre muhūrte 'tivirājamānāḥ naivāvatasthuḥ kuravaḥ samīkṣya; pravrājitā devalokāś ca sarve
Sanskrit only: no published translation is held for this verse.
वधेन कर्णस्य सुदुःखितास् ते; हा कर्ण हा कर्ण इति ब्रुवाणाः द्रुतं प्रयाताः शिबिराणि राजन्; दिवाकरं रक्तम् अवेक्षमाणाः
vadhena karṇasya suduḥkhitās te; hā karṇa hā karṇa iti bruvāṇāḥ drutaṃ prayātāḥ śibirāṇi rājan; divākaraṃ raktam avekṣamāṇāḥ
Sanskrit only: no published translation is held for this verse.
गाण्डीवमुक्तैस् तु सुवर्णपुङ्खैः; शितैः शरैः शोणितदिग्धवाजैः शरैश् चिताङ्गो भुवि भाति कर्णो; हतो ऽपि सन् सूर्य इवांशुमाली
gāṇḍīvamuktais tu suvarṇapuṅkhaiḥ; śitaiḥ śaraiḥ śoṇitadigdhavājaiḥ śaraiś citāṅgo bhuvi bhāti karṇo; hato 'pi san sūrya ivāṃśumālī
Sanskrit only: no published translation is held for this verse.
कर्णस्य देहं रुधिरावसिक्तं; भक्तानुकम्पी भगवान् विवस्वान् स्पृष्ट्वा करैर् लोहितरक्तरूपः; सिष्णासुर् अभ्येति परं समुद्रम्
karṇasya dehaṃ rudhirāvasiktaṃ; bhaktānukampī bhagavān vivasvān spṛṣṭvā karair lohitaraktarūpaḥ; siṣṇāsur abhyeti paraṃ samudram
Sanskrit only: no published translation is held for this verse.
इतीव संचिन्त्य सुरर्षिसंघाः; संप्रस्थिता यान्ति यथानिकेतम् संचिन्तयित्वा च जना विसस्रुर्; यथासुखं खं च महीतलं च
itīva saṃcintya surarṣisaṃghāḥ; saṃprasthitā yānti yathāniketam saṃcintayitvā ca janā visasrur; yathāsukhaṃ khaṃ ca mahītalaṃ ca
Sanskrit only: no published translation is held for this verse.
तद् अद्भुतं प्राणभृतां भयंकरं; निशम्य युद्धं कुरुवीरमुख्ययोः धनंजयस्याधिरथेश् च विस्मिताः; प्रशंसमानाः प्रययुस् तदा जनाः
tad adbhutaṃ prāṇabhṛtāṃ bhayaṃkaraṃ; niśamya yuddhaṃ kuruvīramukhyayoḥ dhanaṃjayasyādhiratheś ca vismitāḥ; praśaṃsamānāḥ prayayus tadā janāḥ
Sanskrit only: no published translation is held for this verse.
शरैः संकृत्तवर्माणं वीरं विशसने हतम् गतासुम् अपि राधेयं नैव लक्ष्मीर् व्यमुञ्चत
śaraiḥ saṃkṛttavarmāṇaṃ vīraṃ viśasane hatam gatāsum api rādheyaṃ naiva lakṣmīr vyamuñcata
Sanskrit only: no published translation is held for this verse.
नानाभरणवान् राजन् मृष्टजाम्बूनदाङ्गदः हतो वैकर्तनः शेते पादपो ऽङ्कुरवान् इव
nānābharaṇavān rājan mṛṣṭajāmbūnadāṅgadaḥ hato vaikartanaḥ śete pādapo 'ṅkuravān iva
Sanskrit only: no published translation is held for this verse.
कनकोत्तमसंकाशः प्रदीप्त इव पावकः सपुत्रः पुरुषव्याघ्रः संशान्तः पार्थतेजसा प्रताप्य पाण्डवान् राजन् पाञ्चालांश् चास्त्रतेजसा
kanakottamasaṃkāśaḥ pradīpta iva pāvakaḥ saputraḥ puruṣavyāghraḥ saṃśāntaḥ pārthatejasā pratāpya pāṇḍavān rājan pāñcālāṃś cāstratejasā
Sanskrit only: no published translation is held for this verse.
ददानीत्य् एव यो ऽवोचन् न नास्तीत्य् अर्थितो ऽर्थिभिः सद्भिः सदा सत्पुरुषः स हतो द्वैरथे वृषः
dadānīty eva yo 'vocan na nāstīty arthito 'rthibhiḥ sadbhiḥ sadā satpuruṣaḥ sa hato dvairathe vṛṣaḥ
Sanskrit only: no published translation is held for this verse.
यस्य ब्राह्मणसात् सर्वम् आत्मार्थं न महात्मनः नादेयं ब्राह्मणेष्व् आसीद् यस्य स्वम् अपि जीवितम्
yasya brāhmaṇasāt sarvam ātmārthaṃ na mahātmanaḥ nādeyaṃ brāhmaṇeṣv āsīd yasya svam api jīvitam
Sanskrit only: no published translation is held for this verse.
सदा नॄणां प्रियो दाता प्रियदानो दिवं गतः आदाय तव पुत्राणां जयाशां शर्म वर्म च
sadā nṝṇāṃ priyo dātā priyadāno divaṃ gataḥ ādāya tava putrāṇāṃ jayāśāṃ śarma varma ca
Sanskrit only: no published translation is held for this verse.
हते स्म कर्णे सरितो न स्रवन्ति; जगाम चास्तं कलुषो दिवाकरः ग्रहश् च तिर्यग् ज्वलितार्कवर्णो; यमस्य पुत्रो ऽभ्युदियाय राजन्
hate sma karṇe sarito na sravanti; jagāma cāstaṃ kaluṣo divākaraḥ grahaś ca tiryag jvalitārkavarṇo; yamasya putro 'bhyudiyāya rājan
Sanskrit only: no published translation is held for this verse.
नभः पफालाथ ननाद चोर्वी; ववुश् च वाताः परुषातिवेलम् दिशः सधूमाश् च भृशं प्रजज्वलुर्; महार्णवाश् चुक्षुभिरे च सस्वनाः
nabhaḥ paphālātha nanāda corvī; vavuś ca vātāḥ paruṣātivelam diśaḥ sadhūmāś ca bhṛśaṃ prajajvalur; mahārṇavāś cukṣubhire ca sasvanāḥ
Sanskrit only: no published translation is held for this verse.
सकाननाः साद्रिचयाश् चकम्पुः; प्रविव्यथुर् भूतगणाश् च मारिष बृहस्पती रोहिणीं संप्रपीड्य; बभूव चन्द्रार्कसमानवर्णः
sakānanāḥ sādricayāś cakampuḥ; pravivyathur bhūtagaṇāś ca māriṣa bṛhaspatī rohiṇīṃ saṃprapīḍya; babhūva candrārkasamānavarṇaḥ
Sanskrit only: no published translation is held for this verse.
हते कर्णे न दिशो विप्रजज्ञुस्; तमोवृता द्यौर् विचचाल भूमिः पपात चोल्का ज्वलनप्रकाशा; निशाचराश् चाप्य् अभवन् प्रहृष्टाः
hate karṇe na diśo viprajajñus; tamovṛtā dyaur vicacāla bhūmiḥ papāta colkā jvalanaprakāśā; niśācarāś cāpy abhavan prahṛṣṭāḥ
Sanskrit only: no published translation is held for this verse.
शशिप्रकाशाननम् अर्जुनो यदा; क्षुरेण कर्णस्य शिरो न्यपातयत् अथान्तरिक्षे दिवि चेह चासकृद्; बभूव हाहेति जनस्य निस्वनः
śaśiprakāśānanam arjuno yadā; kṣureṇa karṇasya śiro nyapātayat athāntarikṣe divi ceha cāsakṛd; babhūva hāheti janasya nisvanaḥ
Sanskrit only: no published translation is held for this verse.
स देवगन्धर्वमनुष्यपूजितं; निहत्य कर्णं रिपुम् आहवे ऽर्जुनः रराज पार्थः परमेण तेजसा; वृत्रं निहत्येव सहस्रलोचनः
sa devagandharvamanuṣyapūjitaṃ; nihatya karṇaṃ ripum āhave 'rjunaḥ rarāja pārthaḥ parameṇa tejasā; vṛtraṃ nihatyeva sahasralocanaḥ
Sanskrit only: no published translation is held for this verse.
ततो रथेनाम्बुदवृन्दनादिना; शरन्नभोमध्यगभास्करत्विषा पताकिना भीमनिनादकेतुना; हिमेन्दुशङ्खस्फटिकावभासिना सुवर्णमुक्तामणिवज्रविद्रुमैर्; अलंकृतेनाप्रतिमानरंहसा
tato rathenāmbudavṛndanādinā; śarannabhomadhyagabhāskaratviṣā patākinā bhīmaninādaketunā; himenduśaṅkhasphaṭikāvabhāsinā suvarṇamuktāmaṇivajravidrumair; alaṃkṛtenāpratimānaraṃhasā
Sanskrit only: no published translation is held for this verse.
नरोत्तमौ पाण्डवकेशिमर्दनाव्; उदाहिताव् अग्निदिवाकरोपमौ रणाजिरे वीतभयौ विरेजतुः; समानयानाव् इव विष्णुवासवौ
narottamau pāṇḍavakeśimardanāv; udāhitāv agnidivākaropamau raṇājire vītabhayau virejatuḥ; samānayānāv iva viṣṇuvāsavau
Sanskrit only: no published translation is held for this verse.
ततो धनुर्ज्यातलनेमिनिस्वनैः; प्रसह्य कृत्वा च रिपून् हतप्रभान् संसाधयित्वैव कुरूञ् शरौघैः; कपिध्वजः पक्षिवरध्वजश् च प्रसह्य शङ्खौ धमतुः सुघोषौ; मनांस्य् अरीणाम् अवसादयन्तौ
tato dhanurjyātalaneminisvanaiḥ; prasahya kṛtvā ca ripūn hataprabhān saṃsādhayitvaiva kurūñ śaraughaiḥ; kapidhvajaḥ pakṣivaradhvajaś ca prasahya śaṅkhau dhamatuḥ sughoṣau; manāṃsy arīṇām avasādayantau
Sanskrit only: no published translation is held for this verse.
सुवर्णजालावततौ महास्वनौ; हिमावदातौ परिगृह्य पाणिभिः चुचुम्बतुः शङ्खवरौ नृणां वरौ; वराननाभ्यां युगपच् च दध्मतुः
suvarṇajālāvatatau mahāsvanau; himāvadātau parigṛhya pāṇibhiḥ cucumbatuḥ śaṅkhavarau nṛṇāṃ varau; varānanābhyāṃ yugapac ca dadhmatuḥ
Sanskrit only: no published translation is held for this verse.
पाञ्चजन्यस्य निर्घोषो देवदत्तस्य चोभयोः पृथिवीम् अन्तरिक्षं च द्याम् अपश् चाप्य् अपूरयत्
pāñcajanyasya nirghoṣo devadattasya cobhayoḥ pṛthivīm antarikṣaṃ ca dyām apaś cāpy apūrayat
Sanskrit only: no published translation is held for this verse.
तौ शङ्खशब्देन निनादयन्तौ; वनानि शैलान् सरितो दिशश् च वित्रासयन्तौ तव पुत्रसेनां; युधिष्ठिरं नन्दयतः स्म वीरौ
tau śaṅkhaśabdena ninādayantau; vanāni śailān sarito diśaś ca vitrāsayantau tava putrasenāṃ; yudhiṣṭhiraṃ nandayataḥ sma vīrau
Sanskrit only: no published translation is held for this verse.
ततः प्रयाताः कुरवो जवेन; श्रुत्वैव शङ्खस्वनम् ईर्यमाणम् विहाय मद्राधिपतिं पतिं च; दुर्योधनं भारत भारतानाम्
tataḥ prayātāḥ kuravo javena; śrutvaiva śaṅkhasvanam īryamāṇam vihāya madrādhipatiṃ patiṃ ca; duryodhanaṃ bhārata bhāratānām
Sanskrit only: no published translation is held for this verse.
महाहवे तं बहु शोभमानं; धनंजयं भूतगणाः समेताः तदान्वमोदन्त जनार्दनं च; प्रभाकराव् अभ्युदितौ यथैव
mahāhave taṃ bahu śobhamānaṃ; dhanaṃjayaṃ bhūtagaṇāḥ sametāḥ tadānvamodanta janārdanaṃ ca; prabhākarāv abhyuditau yathaiva
Sanskrit only: no published translation is held for this verse.
समाचितौ कर्णशरैः परंतपाव्; उभौ व्यभातां समरे ऽच्युतार्जुनौ तमो निहत्याभ्युदितौ यथामलौ; शशाङ्कसूर्याव् इव रश्मिमालिनौ
samācitau karṇaśaraiḥ paraṃtapāv; ubhau vyabhātāṃ samare 'cyutārjunau tamo nihatyābhyuditau yathāmalau; śaśāṅkasūryāv iva raśmimālinau
Sanskrit only: no published translation is held for this verse.
विहाय तान् बाणगणान् अथागतौ; सुहृद्वृताव् अप्रतिमानविक्रमौ सुखं प्रविष्टौ शिबिरं स्वम् ईश्वरौ; सदस्यहूताव् इव वासवाच्युतौ
vihāya tān bāṇagaṇān athāgatau; suhṛdvṛtāv apratimānavikramau sukhaṃ praviṣṭau śibiraṃ svam īśvarau; sadasyahūtāv iva vāsavācyutau
Sanskrit only: no published translation is held for this verse.
सदेवगन्धर्वमनुष्यचारणैर्; महर्षिभिर् यक्षमहोरगैर् अपि जयाभिवृद्ध्या परयाभिपूजितौ; निहत्य कर्णं परमाहवे तदा
sadevagandharvamanuṣyacāraṇair; maharṣibhir yakṣamahoragair api jayābhivṛddhyā parayābhipūjitau; nihatya karṇaṃ paramāhave tadā
Sanskrit only: no published translation is held for this verse.