आकूत्यै प्रयुजे अग्नये स्वाहेत्य् आकूत्या वा आकूतिर् यक्ष्यते स्य इति प्रयुजः खलु वा एनं यज्ञाय प्रयुञ्जते मेधायै मनसे अग्नये स्वाहेति मेधया हि मनसा यज्ञम् अश्नुते दीक्षायै तपसे अग्नये स्वाहेति दीक्षया हि तपसा यज्ञम् अश्नुते सरस्वत्यै पूष्णे अग्नये स्वाहेति वाग् वै सरस्वती वाचा व्याहरति यक्ष्यते स्य इति पूषा खलु वा एनं यज्ञं प्रापिपद् य एनम् अपूपुषद् आपो देवीर् बृहतीर् विश्वशंभुवा इत्य् आपो हि यज्ञो द्यावापृथिवी उरो अन्तरिक्षेति द्यावापृथिवी वा अन्व् अन्तरिक्षं यज्ञ उपश्रितस् तत एव यज्ञम् आलब्ध बृहस्पतिर् नो हविषा वृधातु स्वाहेति ब्रह्म वै बृहस्पतिर् ब्रह्मणा वा एतत् पुरस्तात् सर्वान् कामान् आप्त्वा दीक्षाम् आलभते यत्र वा अस्य यज्ञः श्रितो यत्रयत्रोपश्रितस् ततस्ततो वा एतत् सर्वं ब्रह्मणा यज्ञं संभृत्यालब्ध न वा एकाहुतिर् दीक्षितं करोति यद् एतानि जुहोति द्वितीयत्वाय प्रजापतिर् वै यत् किंच मनसादीधेत् तद् आधीतयजुर्भिर् एवाप्नोत् तद् आधीतयजुषाम् आधीतयजुष्ट्वं तद् य एवं विद्वान् आधीतयजूंषि जुहोति यद् एव किंच मनसा दीध्यज् जुहोति तद् आप्नोत्य् एते वै यज्ञस्य संभारा एष ह त्व् एव संभृतसंभारेण यज्ञेन यजते यस्यैतानि हूयन्त एतद् ध स्म वा आहारुण औपवेशिः किम् उ स यज्ञेन यजेत यो यज्ञस्य संभारान् न विद्याद् इति पञ्चभिर् जुहोति पाङ्क्तो यज्ञो यावान् एव यज्ञस् तम् आलब्ध षड्भिर् जुहोति षड् वा ऋतव ऋतुष्व् एव प्रतितिष्ठति यज्ञो वै सृष्टः प्र सामाव्लिनात् प्र यजुस् तं वा ऋग् एवायछद् एका वा एनम् ऋग् अयछद् द्वादश यजूंषि नव सामानि तस्मान् नवभिर् बहिष्पवमाने स्तुवते नव ह्य् एनं सामान्य् अयछंस् तस्माद् वात्संबन्धविदो द्वादशभिर् औद्ग्रभणं जुह्वति द्वादश ह्य् एनं यजूंष्य् आयछन्न् एतर्हि खलु वा एष सृज्यते यर्हि दीक्षते यद् ऋचौद्ग्रभणं जुहोति यज्ञं वा एतत् सृष्टम् ऋचायछति तस्माद् आरुणिविद ऋचौद्ग्रभणं जुह्वत्य् एका ह्य् एनम् ऋग् अयछत्
ākūtyai prayuje agnaye svāhety ākūtyā vā ākūtir yakṣyate sya iti prayujaḥ khalu vā enaṃ yajñāya prayuñjate medhāyai manase agnaye svāheti medhayā hi manasā yajñam aśnute dīkṣāyai tapase agnaye svāheti dīkṣayā hi tapasā yajñam aśnute sarasvatyai pūṣṇe agnaye svāheti vāg vai sarasvatī vācā vyāharati yakṣyate sya iti pūṣā khalu vā enaṃ yajñaṃ prāpipad ya enam apūpuṣad āpo devīr bṛhatīr viśvaśaṃbhuvā ity āpo hi yajño dyāvāpṛthivī uro antarikṣeti dyāvāpṛthivī vā anv antarikṣaṃ yajña upaśritas tata eva yajñam ālabdha bṛhaspatir no haviṣā vṛdhātu svāheti brahma vai bṛhaspatir brahmaṇā vā etat purastāt sarvān kāmān āptvā dīkṣām ālabhate yatra vā asya yajñaḥ śrito yatrayatropaśritas tatastato vā etat sarvaṃ brahmaṇā yajñaṃ saṃbhṛtyālabdha na vā ekāhutir dīkṣitaṃ karoti yad etāni juhoti dvitīyatvāya prajāpatir vai yat kiṃca manasādīdhet tad ādhītayajurbhir evāpnot tad ādhītayajuṣām ādhītayajuṣṭvaṃ tad ya evaṃ vidvān ādhītayajūṃṣi juhoti yad eva kiṃca manasā dīdhyaj juhoti tad āpnoty ete vai yajñasya saṃbhārā eṣa ha tv eva saṃbhṛtasaṃbhāreṇa yajñena yajate yasyaitāni hūyanta etad dha sma vā āhāruṇa aupaveśiḥ kim u sa yajñena yajeta yo yajñasya saṃbhārān na vidyād iti pañcabhir juhoti pāṅkto yajño yāvān eva yajñas tam ālabdha ṣaḍbhir juhoti ṣaḍ vā ṛtava ṛtuṣv eva pratitiṣṭhati yajño vai sṛṣṭaḥ pra sāmāvlināt pra yajus taṃ vā ṛg evāyachad ekā vā enam ṛg ayachad dvādaśa yajūṃṣi nava sāmāni tasmān navabhir bahiṣpavamāne stuvate nava hy enaṃ sāmāny ayachaṃs tasmād vātsaṃbandhavido dvādaśabhir audgrabhaṇaṃ juhvati dvādaśa hy enaṃ yajūṃṣy āyachann etarhi khalu vā eṣa sṛjyate yarhi dīkṣate yad ṛcaudgrabhaṇaṃ juhoti yajñaṃ vā etat sṛṣṭam ṛcāyachati tasmād āruṇivida ṛcaudgrabhaṇaṃ juhvaty ekā hy enam ṛg ayachat
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.