Mahayanasutralamkara 7

महायानसूत्रालंकारे तत्वाधिकारः षष्ठः सप्तमो ऽधिकारः प्रभावलक्षणविभागे श्लोकः । उत्पत्तिवाक् चित्तशुभाशुभाधि तत्स्थाननिःसारपदा परोक्षम् । ज्ञानं हि सर्वत्रगसप्रभेदेष्वव्याहतं धीरगतः प्रभावः

mahāyānasūtrālaṃkāre tatvādhikāraḥ ṣaṣṭhaḥ saptamo 'dhikāraḥ prabhāvalakṣaṇavibhāge ślokaḥ / utpattivāk cittaśubhāśubhādhi tatsthānaniḥsārapadā parokṣam / jñānaṃ hi sarvatragasaprabhedeṣvavyāhataṃ dhīragataḥ prabhāvaḥ

Sanskrit only: no published translation is held for this verse.

ध्यानं चतुर्थं सुविशुद्धमेत्य निष्कल्पनाज्ञानपरिग्रहेण । यथाव्यवस्थानमनस्क्रियातः प्रभावसिद्धिं परमां परैति

dhyānaṃ caturthaṃ suviśuddhametya niṣkalpanājñānaparigraheṇa / yathāvyavasthānamanaskriyātaḥ prabhāvasiddhiṃ paramāṃ paraiti

Sanskrit only: no published translation is held for this verse.

येनार्यदिव्याप्रतिमैर्विहारैर् ब्राह्मैश्च नित्यं विहरत्युदारैः । बुद्धांश्च सत्त्वांश्च स दिक्षु गत्वा संमानयत्यानयते विशुद्धिम्

yenāryadivyāpratimairvihārair brāhmaiśca nityaṃ viharatyudāraiḥ / buddhāṃśca sattvāṃśca sa dikṣu gatvā saṃmānayatyānayate viśuddhim

Sanskrit only: no published translation is held for this verse.

मायोपमान्पश्यति लोकधातून्सर्वान्ससत्त्वान्सविवर्तनाशान् । संदर्शयत्येव च तान्यथेष्टं वशी विचित्रैरपि स प्रकारैः

māyopamānpaśyati lokadhātūnsarvānsasattvānsavivartanāśān / saṃdarśayatyeva ca tānyatheṣṭaṃ vaśī vicitrairapi sa prakāraiḥ

Sanskrit only: no published translation is held for this verse.

रश्मिप्रमोक्षैर्भृशदुःखितांश्च आपायिकान्स्वर्गगतान्करोति । मारान्वयान् क्षुब्धविमानशोभान् संकम्पयंस्रासयते समारान्

raśmipramokṣairbhṛśaduḥkhitāṃśca āpāyikānsvargagatānkaroti / mārānvayān kṣubdhavimānaśobhān saṃkampayaṃsrāsayate samārān

Sanskrit only: no published translation is held for this verse.

समाधिविक्रीडितमप्रमेयं संदर्शयत्यग्रगणस्यमध्ये । सकर्मजन्मोत्तमनिर्मितैश्च सत्त्वार्थमातिष्ठति सर्वकालम्

samādhivikrīḍitamaprameyaṃ saṃdarśayatyagragaṇasyamadhye / sakarmajanmottamanirmitaiśca sattvārthamātiṣṭhati sarvakālam

Sanskrit only: no published translation is held for this verse.

ज्ञानवशित्वात्समुपैति शुद्धिं क्षेत्रं यथाकामनिदर्शनाय अबुद्धनामेषु[?] च बुद्धनाम संश्रावणात्तान्क्षिपते ऽन्यधातौ

jñānavaśitvātsamupaiti śuddhiṃ kṣetraṃ yathākāmanidarśanāya abuddhanāmeṣu[?] ca buddhanāma saṃśrāvaṇāttānkṣipate 'nyadhātau

Sanskrit only: no published translation is held for this verse.

शक्तो भवत्येव च सत्वपाके संजातपक्षः शकुनिर्यथैव । बुद्धात्प्रशंसां लभते ऽतिमात्राम् आदेयवाक्यो भवति प्रजानाम्

śakto bhavatyeva ca satvapāke saṃjātapakṣaḥ śakuniryathaiva / buddhātpraśaṃsāṃ labhate 'timātrām ādeyavākyo bhavati prajānām

Sanskrit only: no published translation is held for this verse.

षड्धाप्यभिज्ञा त्रिविधा च विद्या अष्टौ विमोक्षा ऽभिभुवस्तथाऽष्टौ । दशापि कृत्स्नायतनान्यमेयाः समाधयो धीरगतः प्रभावः

ṣaḍdhāpyabhijñā trividhā ca vidyā aṣṭau vimokṣā 'bhibhuvastathā'ṣṭau / daśāpi kṛtsnāyatanānyameyāḥ samādhayo dhīragataḥ prabhāvaḥ

Sanskrit only: no published translation is held for this verse.

स हि परमवशित्वलब्धबुद्धिर्जगदवशं स्ववशे विधाय नित्यम् । परहितकरणैकताभिरामश्चरति भवेषु हि सिंहवत्सुधीरः

sa hi paramavaśitvalabdhabuddhirjagadavaśaṃ svavaśe vidhāya nityam / parahitakaraṇaikatābhirāmaścarati bhaveṣu hi siṃhavatsudhīraḥ

Sanskrit only: no published translation is held for this verse.