Magha: Sisupalavadha 17

इतीरिते वचसि वचस्विनामुना युगक्षयक्षुभितमरुद्गरीयसि । प्रचक्षुभे सपदि तदम्बुराशिना समं महाप्रलयसमुद्यतं सदः

itīrite vacasi vacasvināmunā yugakṣayakṣubhitamarudgarīyasi / pracakṣubhe sapadi tadamburāśinā samaṃ mahāpralayasamudyataṃ sadaḥ

Sanskrit only: no published translation is held for this verse.

सरागया स्रुतघनघर्मतोयया कराहतिध्वनितपृथूरुपीठया । मुहुर्मुहुर्दशनविखण्डितोष्ठया रुषा नृपाः प्रियतमयेव भेजिरे

sarāgayā srutaghanagharmatoyayā karāhatidhvanitapṛthūrupīṭhayā / muhurmuhurdaśanavikhaṇḍitoṣṭhayā ruṣā nṛpāḥ priyatamayeva bhejire

Sanskrit only: no published translation is held for this verse.

अलक्ष्यत क्षणदलिताङ्गदे गदे करोदरप्रहितनिजांसधामनि । समुल्लसच्छकलितपाटलोपलैः स्फुलिङ्गवान्स्फुटमिव कोपपावकः

alakṣyata kṣaṇadalitāṅgade gade karodaraprahitanijāṃsadhāmani / samullasacchakalitapāṭalopalaiḥ sphuliṅgavānsphuṭamiva kopapāvakaḥ

Sanskrit only: no published translation is held for this verse.

अवज्ञया यदहसदुच्चकैर्बलः समुल्लसद्दशनमयूखमण्डलः । रुषारुणीकृतमपि तेन तत्क्षणं निजं वपुः पुनरयन्निजां रुचिम्

avajñayā yadahasaduccakairbalaḥ samullasaddaśanamayūkhamaṇḍalaḥ / ruṣāruṇīkṛtamapi tena tatkṣaṇaṃ nijaṃ vapuḥ punarayannijāṃ rucim

Sanskrit only: no published translation is held for this verse.

यदुत्पतत्पृथुतरहारमण्डलं व्यवर्तत द्रुतमभिदूतमुल्मुकः । बृहच्छिलातलकठिनांसघट्टितं ततो ऽभवद्भ्रमितामिवाखिलं सदः

yadutpatatpṛthutarahāramaṇḍalaṃ vyavartata drutamabhidūtamulmukaḥ / bṛhacchilātalakaṭhināṃsaghaṭṭitaṃ tato 'bhavadbhramitāmivākhilaṃ sadaḥ

Sanskrit only: no published translation is held for this verse.

प्रकुप्यतः श्वसनसमीरणाहतिस्फुटोष्मभिस्तनुवसनान्तमारुतैः । युधाजितः कृतपरितूर्णवीजनं पुनस्तरां वदनसरोजमस्विदत्

prakupyataḥ śvasanasamīraṇāhatisphuṭoṣmabhistanuvasanāntamārutaiḥ / yudhājitaḥ kṛtaparitūrṇavījanaṃ punastarāṃ vadanasarojamasvidat

Sanskrit only: no published translation is held for this verse.

प्रजापतिक्रतुनिधनार्थमुत्थितंव्यतर्कयज्ज्वरमिव रौद्रमुद्धतम् । समुद्यतं सपदि वधाय विद्विषामतिक्रुधं निषधमनौषधं जनः

prajāpatikratunidhanārthamutthitaṃvyatarkayajjvaramiva raudramuddhatam / samudyataṃ sapadi vadhāya vidviṣāmatikrudhaṃ niṣadhamanauṣadhaṃ janaḥ

Sanskrit only: no published translation is held for this verse.

परस्परं परिकुपितस्य पिंषतः क्षतोर्मिकाकनकपरागपङ्किलम् । करद्वयं सपदि सुधन्वनो निजैरनारतस्रुतिभिरधाव्यताम्बुभिः

parasparaṃ parikupitasya piṃṣataḥ kṣatormikākanakaparāgapaṅkilam / karadvayaṃ sapadi sudhanvano nijairanāratasrutibhiradhāvyatāmbubhiḥ

Sanskrit only: no published translation is held for this verse.

निरायतामनलशिखोज्ज्वलां ज्वलन्नखप्रभाकृतपरिवेषसंपदं । अविभ्रमद्भ्रमदनलोल्मुकाकृतिं प्रदेशिनीं जगदिव दग्धुमाहुकिः

nirāyatāmanalaśikhojjvalāṃ jvalannakhaprabhākṛtapariveṣasaṃpadaṃ / avibhramadbhramadanalolmukākṛtiṃ pradeśinīṃ jagadiva dagdhumāhukiḥ

Sanskrit only: no published translation is held for this verse.

दुरीक्षतामभजत मन्मथस्तथा यथा पुरा परिचितदाहधार्ष्ट्याया । ध्रुवं पुरः सशरममुं तृतीयया हरो ऽपि न व्यसहत वीक्षितुं दृशा

durīkṣatāmabhajata manmathastathā yathā purā paricitadāhadhārṣṭyāyā / dhruvaṃ puraḥ saśaramamuṃ tṛtīyayā haro 'pi na vyasahata vīkṣituṃ dṛśā

Sanskrit only: no published translation is held for this verse.

विचिन्तयन्नुपनतमाहवं रसादुरः स्फुरत्तनुरुहमग्रपाणिना । परामृशत्कठिनकठोरकामिनीकुचस्थलप्रमुषितचन्दनं पृथुः

vicintayannupanatamāhavaṃ rasāduraḥ sphurattanuruhamagrapāṇinā / parāmṛśatkaṭhinakaṭhorakāminīkucasthalapramuṣitacandanaṃ pṛthuḥ

Sanskrit only: no published translation is held for this verse.

विलङ्घितस्थितिमभिवीक्ष्य रुक्षया रिपोर्गिरागुरुमपि गान्दिनीसुतम् । जनैस्तदा युगपरिवर्तवायुभिर्विवर्तिता गिरिपतयः प्रतीयिरे

vilaṅghitasthitimabhivīkṣya rukṣayā riporgirāgurumapi gāndinīsutam / janaistadā yugaparivartavāyubhirvivartitā giripatayaḥ pratīyire

Sanskrit only: no published translation is held for this verse.

विवर्तयन्मदकलुषीकृते दृशौ कराहतक्षितिकृतभैरवावरवः । क्रुधा दधत्तनुमतिलोहिनीमभूत्प्रसेनजिद्गज इव गैरिकारुणः

vivartayanmadakaluṣīkṛte dṛśau karāhatakṣitikṛtabhairavāvaravaḥ / krudhā dadhattanumatilohinīmabhūtprasenajidgaja iva gairikāruṇaḥ

Sanskrit only: no published translation is held for this verse.

सकुङ्कुमैरविरलमम्बुबिन्दुभिर्गवेषणः परिणतदाडिमारुणैः । स मत्सरस्फुटितवपुर्विनिःसृतैर्बभौ चिरं निचित इवासृजां लवैः

sakuṅkumairaviralamambubindubhirgaveṣaṇaḥ pariṇatadāḍimāruṇaiḥ / sa matsarasphuṭitavapurviniḥsṛtairbabhau ciraṃ nicita ivāsṛjāṃ lavaiḥ

Sanskrit only: no published translation is held for this verse.

ससंभ्रमं चरणतलाभिताडनस्फुटन्महीविवरवितीर्णवर्त्मभिः । रवेः करैरनुचिततापितोरगं प्रकाशतां शिनिरनयद्रसातलम्

sasaṃbhramaṃ caraṇatalābhitāḍanasphuṭanmahīvivaravitīrṇavartmabhiḥ / raveḥ karairanucitatāpitoragaṃ prakāśatāṃ śiniranayadrasātalam

Sanskrit only: no published translation is held for this verse.

प्रतिक्षणं विधुवति शारणे शिरः शिखिद्युतः कनककिरीटरश्मयः । अशङ्कितं युधमधुना विशन्त्वमी क्षमापतीनिति निरराजयन्निव

pratikṣaṇaṃ vidhuvati śāraṇe śiraḥ śikhidyutaḥ kanakakirīṭaraśmayaḥ / aśaṅkitaṃ yudhamadhunā viśantvamī kṣamāpatīniti nirarājayanniva

Sanskrit only: no published translation is held for this verse.

दधौ चलत्पृथुरसनं विवक्षया विदारितं विततबृहद्भुजालतः । विदूरथः प्रतिभयमास्यकन्दरं चलत्फणाधरमिव कोटरं तरुः

dadhau calatpṛthurasanaṃ vivakṣayā vidāritaṃ vitatabṛhadbhujālataḥ / vidūrathaḥ pratibhayamāsyakandaraṃ calatphaṇādharamiva koṭaraṃ taruḥ

Sanskrit only: no published translation is held for this verse.

समाकुले सदसि तथापि विक्रियां मनो ऽगमन्न मुरभिदः परोदितैः । घनाम्बुभिर्बहुलितनिम्नगाजलैर्जलं न हि व्रजति विकारमम्बुधेः

samākule sadasi tathāpi vikriyāṃ mano 'gamanna murabhidaḥ paroditaiḥ / ghanāmbubhirbahulitanimnagājalairjalaṃ na hi vrajati vikāramambudheḥ

Sanskrit only: no published translation is held for this verse.

परानमी यदपवदन्त आत्मनः स्तुवन्ति च स्थितिरसतामसाविति । निनाय नो विकृतिमविस्मितः स्मितं मुखं शरच्छशधरमुग्धमुद्धवः

parānamī yadapavadanta ātmanaḥ stuvanti ca sthitirasatāmasāviti / nināya no vikṛtimavismitaḥ smitaṃ mukhaṃ śaracchaśadharamugdhamuddhavaḥ

Sanskrit only: no published translation is held for this verse.

निराकृते यदुभिरिति प्रकोपिभिः स्पशे शनैर्गतवति तत्र विद्विषाम् । मुरद्विषः स्वनितभयानकानकं बलं क्षणादथ समनह्यताजये

nirākṛte yadubhiriti prakopibhiḥ spaśe śanairgatavati tatra vidviṣām / muradviṣaḥ svanitabhayānakānakaṃ balaṃ kṣaṇādatha samanahyatājaye

Sanskrit only: no published translation is held for this verse.

मुहुः प्रतिस्खलितपरायुधा युधि स्थवीयसीरचलनितम्बनिर्भराः । अदंशयन्नरहितशौर्यदंशनास्तनूरयं नय इति वृष्णिभूभृतः

muhuḥ pratiskhalitaparāyudhā yudhi sthavīyasīracalanitambanirbharāḥ / adaṃśayannarahitaśauryadaṃśanāstanūrayaṃ naya iti vṛṣṇibhūbhṛtaḥ

Sanskrit only: no published translation is held for this verse.

दुरुद्वहाः क्षणमपरैस्तदन्तरे रणश्रवादुपचयमाशु बिभ्रति । महीभुजां महिमभृतां न संममुर्मुदो ऽन्तरावपुषि बहिश्च कञ्चुकाः

durudvahāḥ kṣaṇamaparaistadantare raṇaśravādupacayamāśu bibhrati / mahībhujāṃ mahimabhṛtāṃ na saṃmamurmudo 'ntarāvapuṣi bahiśca kañcukāḥ

Sanskrit only: no published translation is held for this verse.

संकल्पं द्विरदगणं वरूथिनस्तुरङ्गिणो जयनयुजश्च वाजिनः । त्वरायुजः स्वयमपि कुर्वतो नृपाः पुनः पुनस्तदधिकृतानतत्वरन्

saṃkalpaṃ dviradagaṇaṃ varūthinasturaṅgiṇo jayanayujaśca vājinaḥ / tvarāyujaḥ svayamapi kurvato nṛpāḥ punaḥ punastadadhikṛtānatatvaran

Sanskrit only: no published translation is held for this verse.

युधे परैः सह दृढबद्धकक्षया कलक्वणन्मधुपकुलोपगीतया । अदीयत द्विपघटया सवारिभिः करोदरैः स्वयमथ दानमक्षयम्

yudhe paraiḥ saha dṛḍhabaddhakakṣayā kalakvaṇanmadhupakulopagītayā / adīyata dvipaghaṭayā savāribhiḥ karodaraiḥ svayamatha dānamakṣayam

Sanskrit only: no published translation is held for this verse.

सुमेखलाः सिततरदन्तचारवः समुल्लसत्तनुपरिधानसंपदः । रणैषिणां पुलकभृतो ऽधिकन्धरं ललम्बिरे सदसिलताः प्रिया इव

sumekhalāḥ sitataradantacāravaḥ samullasattanuparidhānasaṃpadaḥ / raṇaiṣiṇāṃ pulakabhṛto 'dhikandharaṃ lalambire sadasilatāḥ priyā iva

Sanskrit only: no published translation is held for this verse.

मनोहरैः प्रकृतिमनोरमाकृतिर्भयप्रदैः समितिषु भीमदर्शनः । सदैवतैः सततमथानपायिभिर्निजाङ्गवन्मुरजिदसेव्यतायुधैः

manoharaiḥ prakṛtimanoramākṛtirbhayapradaiḥ samitiṣu bhīmadarśanaḥ / sadaivataiḥ satatamathānapāyibhirnijāṅgavanmurajidasevyatāyudhaiḥ

Sanskrit only: no published translation is held for this verse.

अवारितं गतमुभयेषु भूरिशः क्षमाभृतामथ कटकान्तरेष्वपि । मुहुर्युधि क्षतसुरशत्रुशोणितप्लुतप्रधिं रथमधिरोहति स्म सः

avāritaṃ gatamubhayeṣu bhūriśaḥ kṣamābhṛtāmatha kaṭakāntareṣvapi / muhuryudhi kṣatasuraśatruśoṇitaplutapradhiṃ rathamadhirohati sma saḥ

Sanskrit only: no published translation is held for this verse.

उपेत्यच स्वनगुरुपक्षमारुतं दिवस्त्विषा कपिशितदूरदिङ्मुखः । प्रकम्पितस्थिरतरयष्टि तत्क्षणं पतत्पतिः पदमधिकेतनं दधौ

upetyaca svanagurupakṣamārutaṃ divastviṣā kapiśitadūradiṅmukhaḥ / prakampitasthiratarayaṣṭi tatkṣaṇaṃ patatpatiḥ padamadhiketanaṃ dadhau

Sanskrit only: no published translation is held for this verse.

गभीरताविजितमृदङ्गनादया स्वनश्रिया हतरिपुहंसहर्षया । प्रमोदयन्नथ मुखरान्कलापिनः प्रतिष्ठते नवघनवद्रथः स्म सः

gabhīratāvijitamṛdaṅganādayā svanaśriyā hataripuhaṃsaharṣayā / pramodayannatha mukharānkalāpinaḥ pratiṣṭhate navaghanavadrathaḥ sma saḥ

Sanskrit only: no published translation is held for this verse.

निरन्तरस्थगितदिगन्तरं ततः समुच्चलद्बलमवलोकयञ्जनः । विकौतुकः प्रकृतमहाप्लवे ऽभवद्विशृङ्खलं प्रचलितसिन्धुवारिणि

nirantarasthagitadigantaraṃ tataḥ samuccaladbalamavalokayañjanaḥ / vikautukaḥ prakṛtamahāplave 'bhavadviśṛṅkhalaṃ pracalitasindhuvāriṇi

Sanskrit only: no published translation is held for this verse.

बबृंहिरे गजपतयो महानकाः प्रदध्वनुर्जयतुरगा जिहेषिरे । असंभवद्गिरिवरगह्वरैरभूत्तदा रवैर्दलित इव स्व आश्रयः

babṛṃhire gajapatayo mahānakāḥ pradadhvanurjayaturagā jiheṣire / asaṃbhavadgirivaragahvarairabhūttadā ravairdalita iva sva āśrayaḥ

Sanskrit only: no published translation is held for this verse.

अनारतं रसति जयाय दुन्दुभौ मधुद्विषः फलदलघुप्रतिस्वनैः । विनिष्पतन्मृगपतिभिर्गुहामुखैर्गताः परां मुदमहसन्निवाद्रयः

anārataṃ rasati jayāya dundubhau madhudviṣaḥ phaladalaghupratisvanaiḥ / viniṣpatanmṛgapatibhirguhāmukhairgatāḥ parāṃ mudamahasannivādrayaḥ

Sanskrit only: no published translation is held for this verse.

जडीकृतश्रवणपथे दिवौकसां चमूरवे विशति सुराद्रिकन्दराः । अनर्थकैरजनि विदग्धकामिनीरतान्तरक्वणितविलासकौशलैः

jaḍīkṛtaśravaṇapathe divaukasāṃ camūrave viśati surādrikandarāḥ / anarthakairajani vidagdhakāminīratāntarakvaṇitavilāsakauśalaiḥ

Sanskrit only: no published translation is held for this verse.

अरातिभिर्युधि सहयुध्वनो हताञ्जिघृक्षवः श्रुतरणतूर्यनिःस्वनाः । अकुर्वत प्रथमसमागमोचितं चिरोज्झितं सुरगणिकाः प्रसाधनम्

arātibhiryudhi sahayudhvano hatāñjighṛkṣavaḥ śrutaraṇatūryaniḥsvanāḥ / akurvata prathamasamāgamocitaṃ cirojjhitaṃ suragaṇikāḥ prasādhanam

Sanskrit only: no published translation is held for this verse.

प्रचोदिताः परिचितयन्तृकर्मभिर्निषादिभिर्विदितयताङ्कुशक्रियैः । गजाः सकृत्करतललोलनालिकाहता मुहुः प्रणदितघण्डमाययुः

pracoditāḥ paricitayantṛkarmabhirniṣādibhirviditayatāṅkuśakriyaiḥ / gajāḥ sakṛtkaratalalolanālikāhatā muhuḥ praṇaditaghaṇḍamāyayuḥ

Sanskrit only: no published translation is held for this verse.

सविक्रमक्रमणचलैरितस्ततः प्रकीर्णकैः क्षिपत इव क्षिते रजः । व्यरंसिषुर्न खलु जनस्य दृष्टयस्तुरङ्गमादभिनवभाण्डभारिणः

savikramakramaṇacalairitastataḥ prakīrṇakaiḥ kṣipata iva kṣite rajaḥ / vyaraṃsiṣurna khalu janasya dṛṣṭayasturaṅgamādabhinavabhāṇḍabhāriṇaḥ

Sanskrit only: no published translation is held for this verse.

चलाङ्गुलीकिसलयमुद्धतैः करैरनृत्यत स्फुटकृतकर्णतालया । मदोदकद्रवकटभित्तिसङ्गिभिः कलस्वरं मधुपगणैरगीयत

calāṅgulīkisalayamuddhataiḥ karairanṛtyata sphuṭakṛtakarṇatālayā / madodakadravakaṭabhittisaṅgibhiḥ kalasvaraṃ madhupagaṇairagīyata

Sanskrit only: no published translation is held for this verse.

असिच्यत प्रशमितपांशुभिर्मही मदाम्बुभिर्धृतनवपूर्णकुम्भया । अवाद्यत श्रवणसुखं समुन्नमत्पयोधरध्वनिगुरु तूर्यमाननैः

asicyata praśamitapāṃśubhirmahī madāmbubhirdhṛtanavapūrṇakumbhayā / avādyata śravaṇasukhaṃ samunnamatpayodharadhvaniguru tūryamānanaiḥ

Sanskrit only: no published translation is held for this verse.

उदासिरे पवनविधूतवाससस्ततस्ततो गगनलिहश्च केतवः । यतः पुरः प्रतिरिपु शार्ङ्गिणः स्वयं व्यधीयत द्विपघटयेति मङ्गलम्

udāsire pavanavidhūtavāsasastatastato gaganalihaśca ketavaḥ / yataḥ puraḥ pratiripu śārṅgiṇaḥ svayaṃ vyadhīyata dvipaghaṭayeti maṅgalam

Sanskrit only: no published translation is held for this verse.

न शून्यतामगमदसौ निवेशभूः प्रभूततां दधति बले चलत्यपि । पयस्यभिद्रवति भुवं युगावधौ सरित्पतिर्न हि समुपैति रिक्तताम्

na śūnyatāmagamadasau niveśabhūḥ prabhūtatāṃ dadhati bale calatyapi / payasyabhidravati bhuvaṃ yugāvadhau saritpatirna hi samupaiti riktatām

Sanskrit only: no published translation is held for this verse.

यियासितामथ मधुभिद्विवस्वता जनो जरन्महिषविषाणधूसराम् । पुरः पतत्परबलरेणुमालिनीमलक्षयद्दिशमभिधूमितामिव

yiyāsitāmatha madhubhidvivasvatā jano jaranmahiṣaviṣāṇadhūsarām / puraḥ patatparabalareṇumālinīmalakṣayaddiśamabhidhūmitāmiva

Sanskrit only: no published translation is held for this verse.

मनस्विनामुदितगुरुप्रतिश्रुतिः श्रुतस्तथा न निजमृदङ्गनिःस्वनः । यथा पुरःसमरसमुद्यतद्विषद्वलानकध्वनिरुदकर्षयन्मनः

manasvināmuditagurupratiśrutiḥ śrutastathā na nijamṛdaṅganiḥsvanaḥ / yathā puraḥsamarasamudyatadviṣadvalānakadhvanirudakarṣayanmanaḥ

Sanskrit only: no published translation is held for this verse.

यथा यथा पटहरवः समीपतामुपागमत्स हरिवराग्रतः सरः । तथा तथा हृषितवपुर्मुदाकुला द्विषां चमूरजनि जनीव चेतसा

yathā yathā paṭaharavaḥ samīpatāmupāgamatsa harivarāgrataḥ saraḥ / tathā tathā hṛṣitavapurmudākulā dviṣāṃ camūrajani janīva cetasā

Sanskrit only: no published translation is held for this verse.

प्रसारिणि सपदि नभस्तले ततः समीरणभ्रमितपरागरूषिता । व्यभाव्यत प्रलयजकालिकाकृतिर्विदूरतः प्रतिबलकेतनावलिः

prasāriṇi sapadi nabhastale tataḥ samīraṇabhramitaparāgarūṣitā / vyabhāvyata pralayajakālikākṛtirvidūrataḥ pratibalaketanāvaliḥ

Sanskrit only: no published translation is held for this verse.

क्षणेन च प्रतिमुखतिग्मदीधितिप्रतिप्रभास्फुरदसिदुःखदर्शना । भयङ्करा भृशमपि दर्शनीयतां ययावसावसुरचमूश्च भूभृताम्

kṣaṇena ca pratimukhatigmadīdhitipratiprabhāsphuradasiduḥkhadarśanā / bhayaṅkarā bhṛśamapi darśanīyatāṃ yayāvasāvasuracamūśca bhūbhṛtām

Sanskrit only: no published translation is held for this verse.

पयोमुचामभिपततां दिवि द्रुतं विपर्ययः परित इवातपस्य सः । समक्रमः समविषमेष्वथ क्षणात्क्षमातलं बलजलराशिरानशे

payomucāmabhipatatāṃ divi drutaṃ viparyayaḥ parita ivātapasya saḥ / samakramaḥ samaviṣameṣvatha kṣaṇātkṣamātalaṃ balajalarāśirānaśe

Sanskrit only: no published translation is held for this verse.

ममौ पुरः क्षणमिव पश्यतो महत्तनूदरस्थितभुवनत्रयस्य तत् । विशालतां दधति नितान्तमायते बलं द्विषां मधुमथनस्य चक्षुषि

mamau puraḥ kṣaṇamiva paśyato mahattanūdarasthitabhuvanatrayasya tat / viśālatāṃ dadhati nitāntamāyate balaṃ dviṣāṃ madhumathanasya cakṣuṣi

Sanskrit only: no published translation is held for this verse.

भृशस्विदः पुलकविकासिमूर्तयो रसाधिके मनसि निविष्टसाहसाः । मुखे युधः सपदि रतेरिवाभवन्ससम्भ्रमाः क्षितिपचमूवधूगणाः

bhṛśasvidaḥ pulakavikāsimūrtayo rasādhike manasi niviṣṭasāhasāḥ / mukhe yudhaḥ sapadi raterivābhavansasambhramāḥ kṣitipacamūvadhūgaṇāḥ

Sanskrit only: no published translation is held for this verse.

ध्वजांशुकैर्ध्रुवमनुकूलमारुतप्रसारितैः प्रसभकृतोपहूतयः । यदूनभि द्रुततरमुद्यतायुधाः क्रुधा परं रयमरयः प्रपेदिरे

dhvajāṃśukairdhruvamanukūlamārutaprasāritaiḥ prasabhakṛtopahūtayaḥ / yadūnabhi drutataramudyatāyudhāḥ krudhā paraṃ rayamarayaḥ prapedire

Sanskrit only: no published translation is held for this verse.

हरेरपि प्रति परकीयवाहिनीरधिस्यदं प्रववृतिरे चमूचराः । विलम्बितुं न खलु सहा मनस्विनो विधित्सतः कलहमवेक्ष्य विद्विषः

harerapi prati parakīyavāhinīradhisyadaṃ pravavṛtire camūcarāḥ / vilambituṃ na khalu sahā manasvino vidhitsataḥ kalahamavekṣya vidviṣaḥ

Sanskrit only: no published translation is held for this verse.

उपाहितैर्वपुषि निवातवर्मभिः स्फुरन्मणिप्रसृतमरीचिसूचिभिः । निरन्तरं नरपतयो रणाजिरे रराजिरे शरनिकराचिता इव

upāhitairvapuṣi nivātavarmabhiḥ sphuranmaṇiprasṛtamarīcisūcibhiḥ / nirantaraṃ narapatayo raṇājire rarājire śaranikarācitā iva

Sanskrit only: no published translation is held for this verse.

अथोच्चकैर्जरठकपोतकन्धरातनूरुहप्रकरविपाण्डुरद्युति । वलैश्चलच्चरणविधूतमुच्चरद्धनावलीरुदचरत क्षमारजः

athoccakairjaraṭhakapotakandharātanūruhaprakaravipāṇḍuradyuti / valaiścalaccaraṇavidhūtamuccaraddhanāvalīrudacarata kṣamārajaḥ

Sanskrit only: no published translation is held for this verse.

विषङ्गिभिर्भृशमितरेतरं क्वचित्तुरङ्गमैरुपरि निरुद्धनिर्गमाः । चलाचलैरनुपदमाहताः खुरैर्विबभ्रमुश्चिरमध एव धूलयः

viṣaṅgibhirbhṛśamitaretaraṃ kvacitturaṅgamairupari niruddhanirgamāḥ / calācalairanupadamāhatāḥ khurairvibabhramuściramadha eva dhūlayaḥ

Sanskrit only: no published translation is held for this verse.

गरीयसः प्रचुरमुखस्य रागिणो रजो ऽभवद्व्यवहितसत्वमुत्कटम् । सिसृक्षतः सरसिजजन्मनो जगद्बलस्य तु क्षयमपनेतुमिच्छतः

garīyasaḥ pracuramukhasya rāgiṇo rajo 'bhavadvyavahitasatvamutkaṭam / sisṛkṣataḥ sarasijajanmano jagadbalasya tu kṣayamapanetumicchataḥ

Sanskrit only: no published translation is held for this verse.

पुरा शरक्षतिजनितानि संयुगे नयन्ति नः प्रसभमसृञ्जि पङ्कताम् । इति ध्रुवं व्यलगिषुरात्तभीतयः खमुच्चकैरनलसखस्य केतवः

purā śarakṣatijanitāni saṃyuge nayanti naḥ prasabhamasṛñji paṅkatām / iti dhruvaṃ vyalagiṣurāttabhītayaḥ khamuccakairanalasakhasya ketavaḥ

Sanskrit only: no published translation is held for this verse.

क्वचिल्लसद्घननिकुरम्बकर्बुरः क्वचिद्धिरण्मयकणपुञ्जपिञ्जरः । क्वचिच्छरच्छशधरखण्डपाण्डुरः खुरक्षतक्षितितलरेणुरुद्ययौ

kvacillasadghananikurambakarburaḥ kvaciddhiraṇmayakaṇapuñjapiñjaraḥ / kvaciccharacchaśadharakhaṇḍapāṇḍuraḥ khurakṣatakṣititalareṇurudyayau

Sanskrit only: no published translation is held for this verse.

महीयसा महति दिगन्तदन्तिनामनीकजे रजसि मुखानुषङ्गिणि । विसारितामजिहत कोकिलावलीमलीमसा जलदमदाम्बुराजयः

mahīyasā mahati digantadantināmanīkaje rajasi mukhānuṣaṅgiṇi / visāritāmajihata kokilāvalīmalīmasā jaladamadāmburājayaḥ

Sanskrit only: no published translation is held for this verse.

शिरोरुहैरलिकुलकोमलैरमी मुधा मृधे मृषत युवान एव मा । बलोद्धतं धवलितमूर्धजानिति ध्रुवं जनाञ्जरत इवाकरोद्रजः

śiroruhairalikulakomalairamī mudhā mṛdhe mṛṣata yuvāna eva mā / baloddhataṃ dhavalitamūrdhajāniti dhruvaṃ janāñjarata ivākarodrajaḥ

Sanskrit only: no published translation is held for this verse.

सुसंहतैर्दधदपि धाम नीयते तिरस्कृतिं बहुभिरसंशयं परैः । यतः क्षितेरवयवसंपदो ऽणवस्त्विषां निधेरपि वपुरावरीषत

susaṃhatairdadhadapi dhāma nīyate tiraskṛtiṃ bahubhirasaṃśayaṃ paraiḥ / yataḥ kṣiteravayavasaṃpado 'ṇavastviṣāṃ nidherapi vapurāvarīṣata

Sanskrit only: no published translation is held for this verse.

द्रुतद्रवद्रथचरणक्षतक्षमातलोल्लसद्बहुलरजो ऽवगुण्ठितम् । युगक्षयक्षणनिरवग्रहे जगत्पयोनिधेर्जल इव मग्नमाबभौ

drutadravadrathacaraṇakṣatakṣamātalollasadbahularajo 'vaguṇṭhitam / yugakṣayakṣaṇaniravagrahe jagatpayonidherjala iva magnamābabhau

Sanskrit only: no published translation is held for this verse.

समुल्लसद्दिनकरवक्त्रकान्तयो रजस्वलाः परिमलिताम्बरश्रियः । दिगङ्गनाः क्षणमविलोकनक्षमाः शरीरिणां परिहरणीयतां ययुः

samullasaddinakaravaktrakāntayo rajasvalāḥ parimalitāmbaraśriyaḥ / digaṅganāḥ kṣaṇamavilokanakṣamāḥ śarīriṇāṃ pariharaṇīyatāṃ yayuḥ

Sanskrit only: no published translation is held for this verse.

निरीक्षितुं वियति समेत्यकौतुकात्पराक्रमं समरमुखे महीभृताम् । रजस्ततावनिमिषलोचनोत्पलव्यथाकृति त्रिदशगणैः पलाय्यत

nirīkṣituṃ viyati sametyakautukātparākramaṃ samaramukhe mahībhṛtām / rajastatāvanimiṣalocanotpalavyathākṛti tridaśagaṇaiḥ palāyyata

Sanskrit only: no published translation is held for this verse.

विषङ्गिणि प्रतिपदमापिबत्यपो हताचिरद्युतिनि समीरलक्ष्मणि । शनैःशनैरुपचितपङ्कभारिकाः पयोमुचः प्रययुरपेतवृष्टयः

viṣaṅgiṇi pratipadamāpibatyapo hatāciradyutini samīralakṣmaṇi / śanaiḥśanairupacitapaṅkabhārikāḥ payomucaḥ prayayurapetavṛṣṭayaḥ

Sanskrit only: no published translation is held for this verse.

नभोनदीव्यतिकरधौतमूर्तिभिर्वियद्गतैरनधिगतानि लेभिरे । चलच्चमूतुरगखुराहतोत्पतन्महीरजःस्नपनसुखानि दिग्गजैः

nabhonadīvyatikaradhautamūrtibhirviyadgatairanadhigatāni lebhire / calaccamūturagakhurāhatotpatanmahīrajaḥsnapanasukhāni diggajaiḥ

Sanskrit only: no published translation is held for this verse.

गजव्रजाक्रमणभरावनम्रया रसातलं यदखिलमानशे भुवा । नभस्तलं भहुलतरेण रेणुना ततो ऽगमत्त्रिजगदिवैकतां स्फुटम्

gajavrajākramaṇabharāvanamrayā rasātalaṃ yadakhilamānaśe bhuvā / nabhastalaṃ bhahulatareṇa reṇunā tato 'gamattrijagadivaikatāṃ sphuṭam

Sanskrit only: no published translation is held for this verse.

समस्थलीकृतविवरेण पूरिता महीभृतां बलरजसा महागुहाः । रहस्त्रपाविधुरवघूरतार्थिनां नभःसदामुपकरणीयतां ययुः

samasthalīkṛtavivareṇa pūritā mahībhṛtāṃ balarajasā mahāguhāḥ / rahastrapāvidhuravaghūratārthināṃ nabhaḥsadāmupakaraṇīyatāṃ yayuḥ

Sanskrit only: no published translation is held for this verse.

गते मुखच्छदपटसादृशीं दृशः पथस्थिरो दधति घने रजस्यपि । मदानिलैरधिमधुचूतगन्धिभिर्द्विपा द्विपानभिययुरेव रंहसा

gate mukhacchadapaṭasādṛśīṃ dṛśaḥ pathasthiro dadhati ghane rajasyapi / madānilairadhimadhucūtagandhibhirdvipā dvipānabhiyayureva raṃhasā

Sanskrit only: no published translation is held for this verse.

मदाम्भसा परिगलितेन सप्तधा गजाञ्जनः शमितरजश्चयानधः । उपर्यवस्थितघनपांशुमण्डलानलोकयत्ततपटमण्डपानिव

madāmbhasā parigalitena saptadhā gajāñjanaḥ śamitarajaścayānadhaḥ / uparyavasthitaghanapāṃśumaṇḍalānalokayattatapaṭamaṇḍapāniva

Sanskrit only: no published translation is held for this verse.

अन्यूनोन्नतयो ऽतिमात्रपृथवः पृथ्वीधरश्रीभृतः स्तन्वन्तः कनकावलीभिरुपमां सौदामनीदामभिः । वर्षन्तः शममानयन्नुपलसच्छृङ्गारलेखायुधाः काले कालियकायकालवपुषः पांसून्गजाम्भोमुचः

anyūnonnatayo 'timātrapṛthavaḥ pṛthvīdharaśrībhṛtaḥ stanvantaḥ kanakāvalībhirupamāṃ saudāmanīdāmabhiḥ / varṣantaḥ śamamānayannupalasacchṛṅgāralekhāyudhāḥ kāle kāliyakāyakālavapuṣaḥ pāṃsūngajāmbhomucaḥ

Sanskrit only: no published translation is held for this verse.