Magha: Sisupalavadha 19

अथोत्तस्थे रणाटव्यामसुहृद्वेणुदारिणा । नृपाङ्घ्रिपौघसंघर्षादग्निवद्वेणुदारिणा

athottasthe raṇāṭavyāmasuhṛdveṇudāriṇā / nṛpāṅghripaughasaṃgharṣādagnivadveṇudāriṇā

Sanskrit only: no published translation is held for this verse.

आपतन्तममुन्दूरादूरीकृतपराक्रमः । बलो ऽवलोकयामास मातङ्गमिव केसरी

āpatantamamundūrādūrīkṛtaparākramaḥ / balo 'valokayāmāsa mātaṅgamiva kesarī

Sanskrit only: no published translation is held for this verse.

जजौजोजाजिजिज्जाजी तं ततो ऽतिततातितुत् । भाभो ऽभीभाभिभूभारारारिररिरीररः

jajaujojājijijjājī taṃ tato 'titatātitut / bhābho 'bhībhābhibhūbhārārārirarirīraraḥ

Sanskrit only: no published translation is held for this verse.

भवन्भवाय लोकानामाकम्पितमहीतलः । निर्घात इव निर्घोषभीमस्तस्यापतद्रथः

bhavanbhavāya lokānāmākampitamahītalaḥ / nirghāta iva nirghoṣabhīmastasyāpatadrathaḥ

Sanskrit only: no published translation is held for this verse.

रामे रिपुः शरानाजिमहेष्वास विचक्षणे । कोपादथैनं शितमा महेष्वा स विचक्षणे

rāme ripuḥ śarānājimaheṣvāsa vicakṣaṇe / kopādathainaṃ śitamā maheṣvā sa vicakṣaṇe

Sanskrit only: no published translation is held for this verse.

दिशमर्कमिवावाचीम् मूर्च्छागतमपाहरत् । मन्दप्रतापं तं सूतः शीघ्रमाजिविहायसः

diśamarkamivāvācīm mūrcchāgatamapāharat / mandapratāpaṃ taṃ sūtaḥ śīghramājivihāyasaḥ

Sanskrit only: no published translation is held for this verse.

कृत्वा शिनेः शाल्वचमूं सप्रभावा चमूर्जिताम् । ससर्ज वक्त्रैः फुल्लाब्जसप्रभा वाचमूर्जिताम्

kṛtvā śineḥ śālvacamūṃ saprabhāvā camūrjitām / sasarja vaktraiḥ phullābjasaprabhā vācamūrjitām

Sanskrit only: no published translation is held for this verse.

उल्मुकेन द्रुमं प्राप्य संकुचत्पत्रसंपदम् । तेजः प्रकिरता दिक्षु सप्रतापमदीप्यत

ulmukena drumaṃ prāpya saṃkucatpatrasaṃpadam / tejaḥ prakiratā dikṣu sapratāpamadīpyata

Sanskrit only: no published translation is held for this verse.

पृथोरध्यक्षिपधृद्रुक्मी यया चापमुदायुधः । तयैव वाचापगमं ययाचापमुदायुधः

pṛthoradhyakṣipadhṛdrukmī yayā cāpamudāyudhaḥ / tayaiva vācāpagamaṃ yayācāpamudāyudhaḥ

Sanskrit only: no published translation is held for this verse.

समं समन्ततो राज्ञामापतन्तीरनीकिनीः । कार्ष्णिः प्रत्यग्रहीदेकः सारस्वानिव निम्नगाः

samaṃ samantato rājñāmāpatantīranīkinīḥ / kārṣṇiḥ pratyagrahīdekaḥ sārasvāniva nimnagāḥ

Sanskrit only: no published translation is held for this verse.

दधानैर्घनसादृश्यं लसदायसदंशनैः । तत्र काञ्चनसच्छाया ससृजे तैः शराशनिः

dadhānairghanasādṛśyaṃ lasadāyasadaṃśanaiḥ / tatra kāñcanasacchāyā sasṛje taiḥ śarāśaniḥ

Sanskrit only: no published translation is held for this verse.

नखांशुमञ्जरीकीर्णमसौतरुरिवोच्चकैः । बभौ विभ्रमद्धनुःशाखामधिरूढशिलीमुखाम्

nakhāṃśumañjarīkīrṇamasautarurivoccakaiḥ / babhau vibhramaddhanuḥśākhāmadhirūḍhaśilīmukhām

Sanskrit only: no published translation is held for this verse.

प्रप्य भीममसौ जन्यं सौजन्यं दधदानते । विध्यन्मुमोच न रिपूनरिपूगान्तकः शरैः

prapya bhīmamasau janyaṃ saujanyaṃ dadhadānate / vidhyanmumoca na ripūnaripūgāntakaḥ śaraiḥ

Sanskrit only: no published translation is held for this verse.

कृतस्य सर्वक्षितिपैर्विजयाशंसया पुरः । अनेकस्य चकारासौ बाणैर्बाणस्य खण्डनम्

kṛtasya sarvakṣitipairvijayāśaṃsayā puraḥ / anekasya cakārāsau bāṇairbāṇasya khaṇḍanam

Sanskrit only: no published translation is held for this verse.

याबभार कृतानेकमाया सेना ससारताम् । धनुः स कर्षन्रहितमायासेनाससार ताम्

yābabhāra kṛtānekamāyā senā sasāratām / dhanuḥ sa karṣanrahitamāyāsenāsasāra tām

Sanskrit only: no published translation is held for this verse.

ओजो महौजाः कृत्वाधस्तत्क्षणादुत्तमौजसः । कुर्वन्नाजावमुख्यत्वमनमन्नाम मुख्यताम्

ojo mahaujāḥ kṛtvādhastatkṣaṇāduttamaujasaḥ / kurvannājāvamukhyatvamanamannāma mukhyatām

Sanskrit only: no published translation is held for this verse.

दूरादेव चमूर्भल्लैः कुमारो हन्ति स स्म याः । न पुनः सांयुगीं ताः स्म कुमारो हन्ति सस्मयाः

dūrādeva camūrbhallaiḥ kumāro hanti sa sma yāḥ / na punaḥ sāṃyugīṃ tāḥ sma kumāro hanti sasmayāḥ

Sanskrit only: no published translation is held for this verse.

निपीड्य तरसा तेन मुक्ताः काममनास्थया । उपाययुर्विलक्षत्वं विद्विषो न शिलीमुखाः

nipīḍya tarasā tena muktāḥ kāmamanāsthayā / upāyayurvilakṣatvaṃ vidviṣo na śilīmukhāḥ

Sanskrit only: no published translation is held for this verse.

तस्यावदानैः समरे सहसा रोमहर्षिभिः । सुरैरशंसि व्योमस्थैः सह सारो महर्षिभिः

tasyāvadānaiḥ samare sahasā romaharṣibhiḥ / surairaśaṃsi vyomasthaiḥ saha sāro maharṣibhiḥ

Sanskrit only: no published translation is held for this verse.

सुगन्धयद्दिशः शुभ्रमम्लानि कुसुमं दिवः । भूरि तत्रापतत्तस्मादुत्पपात दिवं यशः

sugandhayaddiśaḥ śubhramamlāni kusumaṃ divaḥ / bhūri tatrāpatattasmādutpapāta divaṃ yaśaḥ

Sanskrit only: no published translation is held for this verse.

सोढुं तस्य द्विषो नालमवयोधरवा रणम् । ऊर्णुनाव यशश्च द्यामपयोधरवारणम्

soḍhuṃ tasya dviṣo nālamavayodharavā raṇam / ūrṇunāva yaśaśca dyāmapayodharavāraṇam

Sanskrit only: no published translation is held for this verse.

केशप्रचुरलोकस्य पर्यस्कारि विकासिना । शेखरेणेव युद्धस्य शिरः कुसुमलक्ष्मणा

keśapracuralokasya paryaskāri vikāsinā / śekhareṇeva yuddhasya śiraḥ kusumalakṣmaṇā

Sanskrit only: no published translation is held for this verse.

सादरं युद्धमानापि तेनान्यनरसादरम् । सा दरं पृतना निन्ये हीयमाना रसादरम्

sādaraṃ yuddhamānāpi tenānyanarasādaram / sā daraṃ pṛtanā ninye hīyamānā rasādaram

Sanskrit only: no published translation is held for this verse.

इत्यालिङ्गतामालोक्य जयलक्ष्म्या झषध्वजम् । क्रुद्धयेव क्रुधा सद्यः प्रपेदे चेदिभूपतिः

ityāliṅgatāmālokya jayalakṣmyā jhaṣadhvajam / kruddhayeva krudhā sadyaḥ prapede cedibhūpatiḥ

Sanskrit only: no published translation is held for this verse.

अहितानभि वाहिन्या स मानी चतुरङ्गया । चचाल वल्ल्गत्कलभसमानीचतुरङ्गया

ahitānabhi vāhinyā sa mānī caturaṅgayā / cacāla vallgatkalabhasamānīcaturaṅgayā

Sanskrit only: no published translation is held for this verse.

ततस्ततधनुर्मौर्वीविस्फारस्फारिनिःस्वनैः । तूर्यैर्युगक्षये क्षुभ्यदकूपारानुकारिणी

tatastatadhanurmaurvīvisphārasphāriniḥsvanaiḥ / tūryairyugakṣaye kṣubhyadakūpārānukāriṇī

Sanskrit only: no published translation is held for this verse.

सकारनानारकास कायसाददसायका । रसाहवावाहसार नादवाददवादना

sakāranānārakāsa kāyasādadasāyakā / rasāhavāvāhasāra nādavādadavādanā

Sanskrit only: no published translation is held for this verse.

लोलासिकालियकुला यमस्यैव स्वसा स्वयम् । चिकीर्षुरुल्लसल्लोहवर्मश्यामा सहायताम्

lolāsikāliyakulā yamasyaiva svasā svayam / cikīrṣurullasallohavarmaśyāmā sahāyatām

Sanskrit only: no published translation is held for this verse.

सासेनागमनारम्भे रसेनासीदनारता । तारनादजनामत्त धीरनागमनामया

sāsenāgamanārambhe rasenāsīdanāratā / tāranādajanāmatta dhīranāgamanāmayā

Sanskrit only: no published translation is held for this verse.

धूतधौतासयः प्रष्ठाः प्रतिष्ठन्तक्षमाभृताम् । शौर्यनुरागनिकषः सा हि वेलानुजीविनाम्

dhūtadhautāsayaḥ praṣṭhāḥ pratiṣṭhantakṣamābhṛtām / śauryanurāganikaṣaḥ sā hi velānujīvinām

Sanskrit only: no published translation is held for this verse.

दिवमिन्युधा गन्तुं कोमलामलसम्पदम् । दधौ दधानो ऽसिलतां को ऽमलामलसम्पदम्

divaminyudhā gantuṃ komalāmalasampadam / dadhau dadhāno 'silatāṃ ko 'malāmalasampadam

Sanskrit only: no published translation is held for this verse.

कृतोरुवेगं युगपद्व्यजिगीषन्त सैनिकाः । विपक्षं बाहुपरिघैर्जङ्घाभिरितरेतरम्

kṛtoruvegaṃ yugapadvyajigīṣanta sainikāḥ / vipakṣaṃ bāhuparighairjaṅghābhiritaretaram

Sanskrit only: no published translation is held for this verse.

वाहनाजनि मानासे साराजावनमा ततः । मत्तसारगराजेभे भारीहावज्जनध्वनि

vāhanājani mānāse sārājāvanamā tataḥ / mattasāragarājebhe bhārīhāvajjanadhvani

Sanskrit only: no published translation is held for this verse.

निध्वनज्जवहारीभा भेजे रागरसात्तमः । ततमानवजारासा सेना मानिजनाहवा

nidhvanajjavahārībhā bheje rāgarasāttamaḥ / tatamānavajārāsā senā mānijanāhavā

Sanskrit only: no published translation is held for this verse.

अभग्नवृत्ताः प्रसभादाकृष्टा यौवनोद्धतैः । चक्रन्दुरुच्चकैर्मुष्टिग्राह्यमध्या धनुर्लताः

abhagnavṛttāḥ prasabhādākṛṣṭā yauvanoddhataiḥ / cakranduruccakairmuṣṭigrāhyamadhyā dhanurlatāḥ

Sanskrit only: no published translation is held for this verse.

करेणुः प्रम्थितो ऽनेको रेणुर्घण्टाः सहस्रशः । करेणुः शीकरो जज्ञे रेणुस्तेन शमं ययौ

kareṇuḥ pramthito 'neko reṇurghaṇṭāḥ sahasraśaḥ / kareṇuḥ śīkaro jajñe reṇustena śamaṃ yayau

Sanskrit only: no published translation is held for this verse.

धृतप्रत्यग्रशृङ्गाररसरागरपि द्विपैः । सरोषसम्भ्रमैर्बर्भ्रे रौद्र एव रणे रसः

dhṛtapratyagraśṛṅgārarasarāgarapi dvipaiḥ / saroṣasambhramairbarbhre raudra eva raṇe rasaḥ

Sanskrit only: no published translation is held for this verse.

न तस्थौ भर्तृतः प्राप्तमानसम्प्रतिपत्तिषु । रणैकसर्गेषु भयं मानसं प्रति पत्तिषु

na tasthau bhartṛtaḥ prāptamānasampratipattiṣu / raṇaikasargeṣu bhayaṃ mānasaṃ prati pattiṣu

Sanskrit only: no published translation is held for this verse.

बाणाहितपूर्णतूणीरकोटरैर्धन्विशाखिभिः । गोधाश्लिष्टभुजाशाखैरभूद्भीमा रणाटवी

bāṇāhitapūrṇatūṇīrakoṭarairdhanviśākhibhiḥ / godhāśliṣṭabhujāśākhairabhūdbhīmā raṇāṭavī

Sanskrit only: no published translation is held for this verse.

नानाजाववजानाना सा जनौघघनौजसा । परानिहऽहानिराप तान्वियाततयान्विता

nānājāvavajānānā sā janaughaghanaujasā / parāniha'hānirāpa tānviyātatayānvitā

Sanskrit only: no published translation is held for this verse.

विषमं सर्वतोभद्रचक्रगोमूत्रिकादिभिः । श्लोकैरिवमहाकाव्यं व्यूहैस्तदभवद्बलम्

viṣamaṃ sarvatobhadracakragomūtrikādibhiḥ / ślokairivamahākāvyaṃ vyūhaistadabhavadbalam

Sanskrit only: no published translation is held for this verse.

संहत्या सात्वतां चैद्यं प्रति भास्वरसेनया । ववले योद्धुमुत्पन्नप्रतिमा स्वरसेन या

saṃhatyā sātvatāṃ caidyaṃ prati bhāsvarasenayā / vavale yoddhumutpannapratimā svarasena yā

Sanskrit only: no published translation is held for this verse.

विस्तीर्णमायामवती लोललोकनिरन्तरा । नरेन्द्रमार्गं रथ्येव पपात द्विषतां बलम्

vistīrṇamāyāmavatī lolalokanirantarā / narendramārgaṃ rathyeva papāta dviṣatāṃ balam

Sanskrit only: no published translation is held for this verse.

वारणागगभीरा सा साराभीगगणारवा । कारितारिवधा सेना नासेधा वारितारिका

vāraṇāgagabhīrā sā sārābhīgagaṇāravā / kāritārivadhā senā nāsedhā vāritārikā

Sanskrit only: no published translation is held for this verse.

अधिनागं प्रजविनो विकसत्पिच्छचारवः । पेतुर्बर्हिणदेशीयाः शङ्कवः प्राणहारिणः

adhināgaṃ prajavino vikasatpicchacāravaḥ / peturbarhiṇadeśīyāḥ śaṅkavaḥ prāṇahāriṇaḥ

Sanskrit only: no published translation is held for this verse.

प्रवृत्तेविकसद्ध्वानंसाधनेप्यविषादिभिः । ववृषेविकसद्दानंयुधमाप्यविषाणिभिः

pravṛttevikasaddhvānaṃsādhanepyaviṣādibhiḥ / vavṛṣevikasaddānaṃyudhamāpyaviṣāṇibhiḥ

Sanskrit only: no published translation is held for this verse.

पुरः प्रयुक्तैर्युद्धं तच्चलितैर्लब्धशुद्धिभिः । आलापैरिव गान्धर्वमदीप्यत पदातिभिः

puraḥ prayuktairyuddhaṃ taccalitairlabdhaśuddhibhiḥ / ālāpairiva gāndharvamadīpyata padātibhiḥ

Sanskrit only: no published translation is held for this verse.

केनचित्स्वासिनान्येषां मण्डलाग्रानवद्यता । प्रापे कीर्तिप्लुतमहीमण्डलाग्रानवद्यत

kenacitsvāsinānyeṣāṃ maṇḍalāgrānavadyatā / prāpe kīrtiplutamahīmaṇḍalāgrānavadyata

Sanskrit only: no published translation is held for this verse.

विहन्तुं विद्विषस्तीक्ष्णः सममेव सुसंहतेः । परिवारात्पृथक्चक्रे खड्गश्चात्मा च केनचित्

vihantuṃ vidviṣastīkṣṇaḥ samameva susaṃhateḥ / parivārātpṛthakcakre khaḍgaścātmā ca kenacit

Sanskrit only: no published translation is held for this verse.

अन्येन विदधे ऽरीणामतिमात्रा विलासिना । उद्गूर्णेन चमूस्तूर्णमतिमात्राविलासिना

anyena vidadhe 'rīṇāmatimātrā vilāsinā / udgūrṇena camūstūrṇamatimātrāvilāsinā

Sanskrit only: no published translation is held for this verse.

सहस्रपूरणः कश्चिल्लूनमूर्धासिना द्विषः । तथोर्ध्व एव काबन्धीमभजन्नर्तनक्रियाम्

sahasrapūraṇaḥ kaścillūnamūrdhāsinā dviṣaḥ / tathordhva eva kābandhīmabhajannartanakriyām

Sanskrit only: no published translation is held for this verse.

शस्त्रव्रणमयश्रीमदलङ्करणभूषषितः । ददृशे ऽन्यो रावणवदलङ्करणभूषितः

śastravraṇamayaśrīmadalaṅkaraṇabhūṣaṣitaḥ / dadṛśe 'nyo rāvaṇavadalaṅkaraṇabhūṣitaḥ

Sanskrit only: no published translation is held for this verse.

द्विषद्विशसनच्छेदनिरस्तोरुयुगो ऽपरः । सिक्तश्चास्त्रैरुभयथा बभूवारुणविग्रहः

dviṣadviśasanacchedanirastoruyugo 'paraḥ / siktaścāstrairubhayathā babhūvāruṇavigrahaḥ

Sanskrit only: no published translation is held for this verse.

भीमतामपरो ऽम्भोधिसमे ऽधित महाहवे । दाक्षे कोपः शिवस्येव समेधितमहा हवे

bhīmatāmaparo 'mbhodhisame 'dhita mahāhave / dākṣe kopaḥ śivasyeva samedhitamahā have

Sanskrit only: no published translation is held for this verse.

दन्तौश्चिच्छिदिरे कोपात्प्रतिपक्षं गजा इव । परनिस्त्रिंशनिर्लूनकरवालाः पदातयः

dantauścicchidire kopātpratipakṣaṃ gajā iva / paranistriṃśanirlūnakaravālāḥ padātayaḥ

Sanskrit only: no published translation is held for this verse.

रणे रभसनिर्भिन्नद्विपपाटविकासिनि । न तत्र गतभीः कश्चिद्विपपाट विकासिनि

raṇe rabhasanirbhinnadvipapāṭavikāsini / na tatra gatabhīḥ kaścidvipapāṭa vikāsini

Sanskrit only: no published translation is held for this verse.

यावन्न सत्कृतैर्भर्तुः स्नेहस्यानृण्यमिच्छुभिः । अमर्षादितरैस्तावत्तत्यजे युधि जीवितम्

yāvanna satkṛtairbhartuḥ snehasyānṛṇyamicchubhiḥ / amarṣāditaraistāvattatyaje yudhi jīvitam

Sanskrit only: no published translation is held for this verse.

अयशोभिदुरालोके कोपधामरणादृते । अयशोभिदुरा लोके कोपधा मरणादृते

ayaśobhidurāloke kopadhāmaraṇādṛte / ayaśobhidurā loke kopadhā maraṇādṛte

Sanskrit only: no published translation is held for this verse.

स्खलन्ती नक्वचित्तैक्ष्णादभ्यग्रफलशालिनी । अमोचि शक्तिः शक्तिकैर्लोहजा न शरीरजा

skhalantī nakvacittaikṣṇādabhyagraphalaśālinī / amoci śaktiḥ śaktikairlohajā na śarīrajā

Sanskrit only: no published translation is held for this verse.

अपादि व्यापृतनयांस्तथा युयुधिरे नृपाः । आप दिव्या पृतनया विस्मयं जनता यथा

apādi vyāpṛtanayāṃstathā yuyudhire nṛpāḥ / āpa divyā pṛtanayā vismayaṃ janatā yathā

Sanskrit only: no published translation is held for this verse.

स्वगुणैराफलप्राप्तेराकृष्य गणिका इव । कामुकानिव नालीकांस्त्रिणन्ताः सहसामुचन्

svaguṇairāphalaprāpterākṛṣya gaṇikā iva / kāmukāniva nālīkāṃstriṇantāḥ sahasāmucan

Sanskrit only: no published translation is held for this verse.

वाजिनः शत्रुसैन्यस्य समारब्धनवाजिनः । वाजिनश्च शरा मध्यमविशन्द्रुतवाजिनः

vājinaḥ śatrusainyasya samārabdhanavājinaḥ / vājinaśca śarā madhyamaviśandrutavājinaḥ

Sanskrit only: no published translation is held for this verse.

पुरस्कृत्य फलं प्राप्तैः सत्पक्षाश्रययशालिभिः । कृतपुङ्खतया लेभे लक्षमप्याशु मार्गणैः

puraskṛtya phalaṃ prāptaiḥ satpakṣāśrayayaśālibhiḥ / kṛtapuṅkhatayā lebhe lakṣamapyāśu mārgaṇaiḥ

Sanskrit only: no published translation is held for this verse.

रक्तश्रुतिं जपासूनसमरागामिषुव्यधात् । कश्चित्पुरः सपत्नेषु समरागमिषुव्यधात्

raktaśrutiṃ japāsūnasamarāgāmiṣuvyadhāt / kaścitpuraḥ sapatneṣu samarāgamiṣuvyadhāt

Sanskrit only: no published translation is held for this verse.

रयेण रणकाम्यन्तौ दूरादुपगतविभौ । गतासुरन्तरा दन्ती वरण्डक इवाभवत्

rayeṇa raṇakāmyantau dūrādupagatavibhau / gatāsurantarā dantī varaṇḍaka ivābhavat

Sanskrit only: no published translation is held for this verse.

भूरिभिर्भारिभिर्भीरैर्भूभारैरभिरेभिरे । भेरीरेभिभिरभ्राभैरभीरुभिरिभैरिभाः

bhūribhirbhāribhirbhīrairbhūbhārairabhirebhire / bherīrebhibhirabhrābhairabhīrubhiribhairibhāḥ

Sanskrit only: no published translation is held for this verse.

निशितासिलतालूनैस्तथा हस्तैर्न हस्तिनः । युध्यमाना यथा दन्तैर्भग्नैरापुर्विहस्ततां

niśitāsilatālūnaistathā hastairna hastinaḥ / yudhyamānā yathā dantairbhagnairāpurvihastatāṃ

Sanskrit only: no published translation is held for this verse.

निपीडनादिव मिथो दानतोयनारतम् । वपुषामदयापातादिभानामभितो ऽगलत्

nipīḍanādiva mitho dānatoyanāratam / vapuṣāmadayāpātādibhānāmabhito 'galat

Sanskrit only: no published translation is held for this verse.

रणाङ्गणं सर इव प्लावितं मदवारिभिः । गजः पृथुकराकृष्टशतपत्रमलोडयत्

raṇāṅgaṇaṃ sara iva plāvitaṃ madavāribhiḥ / gajaḥ pṛthukarākṛṣṭaśatapatramaloḍayat

Sanskrit only: no published translation is held for this verse.

शरक्षते गजे भृङ्गैः सविषादिविषादिनि । रुतव्याजेन रुदितं तत्रासीदतिसीदति

śarakṣate gaje bhṛṅgaiḥ saviṣādiviṣādini / rutavyājena ruditaṃ tatrāsīdatisīdati

Sanskrit only: no published translation is held for this verse.

अन्तकस्य पृथौ तत्र शयनीय इवाहवे । दशनव्यसनादीयुर्मत्कुणत्वं मतङ्गजाः

antakasya pṛthau tatra śayanīya ivāhave / daśanavyasanādīyurmatkuṇatvaṃ mataṅgajāḥ

Sanskrit only: no published translation is held for this verse.

अभीकमतिकेनेद्धे भीतानन्दस्यनाशने । कनत्सकामसेनाके मन्दकामकमस्यति

abhīkamatikeneddhe bhītānandasyanāśane / kanatsakāmasenāke mandakāmakamasyati

Sanskrit only: no published translation is held for this verse.

दधतो ऽपि रणे भीममभीक्ष्णं भावमासुरम् । हताः परैरभिमुखाः सुरभूयमुपाययुः

dadhato 'pi raṇe bhīmamabhīkṣṇaṃ bhāvamāsuram / hatāḥ parairabhimukhāḥ surabhūyamupāyayuḥ

Sanskrit only: no published translation is held for this verse.

येनाङ्गमूहे व्रणवत्सरुचा परतो ऽमरैः । समत्वं स ययौ खड्गत्सरुचापरतो ऽमरैः

yenāṅgamūhe vraṇavatsarucā parato 'maraiḥ / samatvaṃ sa yayau khaḍgatsarucāparato 'maraiḥ

Sanskrit only: no published translation is held for this verse.

निपातितसुहृत्स्वामिपितृव्यभ्रातृमातुलम् । पाणिनीयमिवावलोकि धीरैस्तत्समराजिरम्

nipātitasuhṛtsvāmipitṛvyabhrātṛmātulam / pāṇinīyamivāvaloki dhīraistatsamarājiram

Sanskrit only: no published translation is held for this verse.

अभावि सिन्ध्वा सन्ध्याभ्रसदृग्रुधिरतोयया । हृते योद्धुं जनः पांशौ स दृग्रुधि रतो यथा

abhāvi sindhvā sandhyābhrasadṛgrudhiratoyayā / hṛte yoddhuṃ janaḥ pāṃśau sa dṛgrudhi rato yathā

Sanskrit only: no published translation is held for this verse.

विदलत्पुष्कराकीर्णाः पतच्छङ्खकुलाकुलाः । तरत्पत्ररथा नद्यः प्रासर्पन्रक्तवारिजाः

vidalatpuṣkarākīrṇāḥ patacchaṅkhakulākulāḥ / taratpatrarathā nadyaḥ prāsarpanraktavārijāḥ

Sanskrit only: no published translation is held for this verse.

असृग्जनो ऽस्त्रक्षतिमानवमज्जवसादनम् । रक्षःपिशाचं मुमुदे नवमज्जवसादनम्

asṛgjano 'strakṣatimānavamajjavasādanam / rakṣaḥpiśācaṃ mumude navamajjavasādanam

Sanskrit only: no published translation is held for this verse.

चित्रं चापैरपेतज्यैः स्फुरद्रक्तशतहृदम् । पयोदजालमिव तद्वीराशंसनमाबभौ

citraṃ cāpairapetajyaiḥ sphuradraktaśatahṛdam / payodajālamiva tadvīrāśaṃsanamābabhau

Sanskrit only: no published translation is held for this verse.

बन्धौ विपन्ने ऽनेकेन नरेणेह तदन्तिके । अशोचि सैन्ये घण्टाभिर्न रेणे हतदन्तिके

bandhau vipanne 'nekena nareṇeha tadantike / aśoci sainye ghaṇṭābhirna reṇe hatadantike

Sanskrit only: no published translation is held for this verse.

कृत्तैः कीर्णा मही रेजे दन्तैर्गात्रैश्च दन्तिनाम् । क्षुण्णलोकासुभिर्मृत्योर्मुसलोलूखलैरिव

kṛttaiḥ kīrṇā mahī reje dantairgātraiśca dantinām / kṣuṇṇalokāsubhirmṛtyormusalolūkhalairiva

Sanskrit only: no published translation is held for this verse.

युद्धमित्थं विधूतान्यमानवानभियो गतः । चैद्यः परान्पराजिग्ये मानवानभियोगतः

yuddhamitthaṃ vidhūtānyamānavānabhiyo gataḥ / caidyaḥ parānparājigye mānavānabhiyogataḥ

Sanskrit only: no published translation is held for this verse.

अथ वक्षोमणिच्छायाच्छुरितापीतवाससा । स्फुरदिन्द्रधनुर्भिन्नतडितेव तडित्त्वता

atha vakṣomaṇicchāyācchuritāpītavāsasā / sphuradindradhanurbhinnataḍiteva taḍittvatā

Sanskrit only: no published translation is held for this verse.

नीलेनानालनलिननिलीनोल्ललनालिना । ललनालालनेनालं लीलालोलेन लालिना

nīlenānālanalinanilīnollalanālinā / lalanālālanenālaṃ līlālolena lālinā

Sanskrit only: no published translation is held for this verse.

अपूर्वयेव तत्कालसमागमसकामया । दृष्टेन राजन्वपुषा कटाक्षैर्विजयश्रिया

apūrvayeva tatkālasamāgamasakāmayā / dṛṣṭena rājanvapuṣā kaṭākṣairvijayaśriyā

Sanskrit only: no published translation is held for this verse.

विभावी विभवी भाभो विभाभावी विवो विभीः । भवाभिभावी भावावो भवाभावो भुवो विभुः

vibhāvī vibhavī bhābho vibhābhāvī vivo vibhīḥ / bhavābhibhāvī bhāvāvo bhavābhāvo bhuvo vibhuḥ

Sanskrit only: no published translation is held for this verse.

उपैतुकामैस्तत्पारं निश्चितैर्योगिभिः परैः । देहत्यागकृतोद्योगैरदृश्यत परः पुमान्

upaitukāmaistatpāraṃ niścitairyogibhiḥ paraiḥ / dehatyāgakṛtodyogairadṛśyata paraḥ pumān

Sanskrit only: no published translation is held for this verse.

तं श्रिया घनयानस्तरुचा सारतया तया । यातया तरसा चारुस्तनयानघया श्रितम्

taṃ śriyā ghanayānastarucā sāratayā tayā / yātayā tarasā cārustanayānaghayā śritam

Sanskrit only: no published translation is held for this verse.

विद्विषो ऽद्विषुरुद्वीक्ष्य तथाप्यासन्निरेनसः । अरुच्यमपि रोगघ्नं निसर्गादेव भेषजम्

vidviṣo 'dviṣurudvīkṣya tathāpyāsannirenasaḥ / arucyamapi rogaghnaṃ nisargādeva bheṣajam

Sanskrit only: no published translation is held for this verse.

विदितं दिवि के ऽनीके तं यातं निजिताजिनि । विगदं गवि रोद्धारो योद्धा यो नतिमेति नः

viditaṃ divi ke 'nīke taṃ yātaṃ nijitājini / vigadaṃ gavi roddhāro yoddhā yo natimeti naḥ

Sanskrit only: no published translation is held for this verse.

नियुज्यमानेन पुरः कर्मण्यतिगरीयसि । आरोप्यमाणोरुगुणं भर्त्रा कार्मुकमानमत्

niyujyamānena puraḥ karmaṇyatigarīyasi / āropyamāṇoruguṇaṃ bhartrā kārmukamānamat

Sanskrit only: no published translation is held for this verse.

तत्र बाणाः सुपरुषः समधीयन्त चारवः । द्विषामभूत्सुपरुषस्तस्याकृष्टस्य चारवः

tatra bāṇāḥ suparuṣaḥ samadhīyanta cāravaḥ / dviṣāmabhūtsuparuṣastasyākṛṣṭasya cāravaḥ

Sanskrit only: no published translation is held for this verse.

पश्चात्कृतानामप्यस्य नराणामिव पत्रिणाम् । योयो गुणेन संयुक्तः स स कर्णान्तमाययौ

paścātkṛtānāmapyasya narāṇāmiva patriṇām / yoyo guṇena saṃyuktaḥ sa sa karṇāntamāyayau

Sanskrit only: no published translation is held for this verse.

प्रपे रूपी पुरारेपाः परिपूरी परः परैः । रोपैरपारैरुपरि पुपूरे ऽपि पुरो ऽपरैः

prape rūpī purārepāḥ paripūrī paraḥ paraiḥ / ropairapārairupari pupūre 'pi puro 'paraiḥ

Sanskrit only: no published translation is held for this verse.

दिङ्मुखव्यापिनस्तीक्ष्णान्ह्रदिनो मर्मभेदिनः । चिक्षेपैकक्षणेनैव सायकानहितांश्च सः

diṅmukhavyāpinastīkṣṇānhradino marmabhedinaḥ / cikṣepaikakṣaṇenaiva sāyakānahitāṃśca saḥ

Sanskrit only: no published translation is held for this verse.

शरवर्षी महानादः स्फुरत्कार्मुककेतनः । नीलच्छविरसौ रेजे केशवच्छलनीरदः

śaravarṣī mahānādaḥ sphuratkārmukaketanaḥ / nīlacchavirasau reje keśavacchalanīradaḥ

Sanskrit only: no published translation is held for this verse.

न केवलं जनैस्तस्य लघुसंधायिनो धनुः । मण्डलीकृतमोकान्ताद्बलमैक्षि द्विषामपि

na kevalaṃ janaistasya laghusaṃdhāyino dhanuḥ / maṇḍalīkṛtamokāntādbalamaikṣi dviṣāmapi

Sanskrit only: no published translation is held for this verse.

लोकालोकी कलो ऽकल्ककलिलो ऽलिकुलालकः । कालो ऽकलो ऽकलिः काले कोलकेलिकिलः किल

lokālokī kalo 'kalkakalilo 'likulālakaḥ / kālo 'kalo 'kaliḥ kāle kolakelikilaḥ kila

Sanskrit only: no published translation is held for this verse.

अक्षितारासु विव्याध द्विषतः स तनुत्रिणः । दानेषु स्थूललक्ष्यत्वं न हि तस्य शरासने

akṣitārāsu vivyādha dviṣataḥ sa tanutriṇaḥ / dāneṣu sthūlalakṣyatvaṃ na hi tasya śarāsane

Sanskrit only: no published translation is held for this verse.

वररो ऽविवरो वैरिविवारी वारिरारवः । विववार वरो वैरं वीरो रविरिवौर्वरः

vararo 'vivaro vairivivārī vārirāravaḥ / vivavāra varo vairaṃ vīro ravirivaurvaraḥ

Sanskrit only: no published translation is held for this verse.

मुक्तानेकशरं प्रणानहरद्भूयसां द्विषां । तदीयं धनुरन्यस्य न हि सेहे सजीवताम्

muktānekaśaraṃ praṇānaharadbhūyasāṃ dviṣāṃ / tadīyaṃ dhanuranyasya na hi sehe sajīvatām

Sanskrit only: no published translation is held for this verse.

राजराजी रुरोजाजेरजिरे ऽजो ऽजरो ऽरजाः । रेजारिजूरजोर्जार्जी रराजर्जुरजर्जरः

rājarājī rurojājerajire 'jo 'jaro 'rajāḥ / rejārijūrajorjārjī rarājarjurajarjaraḥ

Sanskrit only: no published translation is held for this verse.

उद्धतान्द्विषतस्तस्य निध्नतो द्वितयं ययुः । पानार्थे रुधिरं धातौ रक्षार्थे भुवनं शराः

uddhatāndviṣatastasya nidhnato dvitayaṃ yayuḥ / pānārthe rudhiraṃ dhātau rakṣārthe bhuvanaṃ śarāḥ

Sanskrit only: no published translation is held for this verse.

क्रूरारिकारि कीरेककारकः कारिकाकरः । कोरकाकारकरकः करीरः कर्करोर्ऽकरुक्

krūrārikāri kīrekakārakaḥ kārikākaraḥ / korakākārakarakaḥ karīraḥ karkaror'karuk

Sanskrit only: no published translation is held for this verse.

विधातुमवतीर्णो ऽपि लघिमानमसौ भुवः । अनेकमरिसंघातमकरोद्भूमिवर्धनम्

vidhātumavatīrṇo 'pi laghimānamasau bhuvaḥ / anekamarisaṃghātamakarodbhūmivardhanam

Sanskrit only: no published translation is held for this verse.

दारी दरदरिद्रो ऽरिदारूदारो ऽद्रिदूरदः । दूरादरौद्राददरद्रोदोरुद्दारुरादरी

dārī daradaridro 'ridārūdāro 'dridūradaḥ / dūrādaraudrādadaradrodoruddārurādarī

Sanskrit only: no published translation is held for this verse.

एकेषुणा सङ्घतिथान्द्विषो भिन्दन्द्रुमानिव । स जन्मान्तररामस्य चक्रे सदृशमात्मनः

ekeṣuṇā saṅghatithāndviṣo bhindandrumāniva / sa janmāntararāmasya cakre sadṛśamātmanaḥ

Sanskrit only: no published translation is held for this verse.

शूरः शौरिरशिशिरैराशाशैराशु राशिशः । शरारुः श्रीशरीरेशः शुशूरे ऽरिशिरः शरैः

śūraḥ śauriraśiśirairāśāśairāśu rāśiśaḥ / śarāruḥ śrīśarīreśaḥ śuśūre 'riśiraḥ śaraiḥ

Sanskrit only: no published translation is held for this verse.

व्क्तासीदरितारिणां यत्तदीयास्तदा मुहुः । मनोहृतो ऽपि हृदये लेगुरेषां न पत्रिणः

vktāsīdaritāriṇāṃ yattadīyāstadā muhuḥ / manohṛto 'pi hṛdaye legureṣāṃ na patriṇaḥ

Sanskrit only: no published translation is held for this verse.

नामाक्षराणां मलना मा भूद्भर्तुरतः स्फुटम् । अगृह्णत पराङ्गनामसूनस्रं न मार्गणाः

nāmākṣarāṇāṃ malanā mā bhūdbharturataḥ sphuṭam / agṛhṇata parāṅganāmasūnasraṃ na mārgaṇāḥ

Sanskrit only: no published translation is held for this verse.

आच्छिद्य योधसार्थस्य प्राणसर्वस्वमाशुगाः । ऐकागारिकवद्भूमौ दूराज्जग्मुरदर्शनम्

ācchidya yodhasārthasya prāṇasarvasvamāśugāḥ / aikāgārikavadbhūmau dūrājjagmuradarśanam

Sanskrit only: no published translation is held for this verse.

भीमास्त्रराजिनस्तस्य बलस्य ध्वजराजिनः । कृतघोराजिनश्चक्रे भुवः सरुधिरा जिनः

bhīmāstrarājinastasya balasya dhvajarājinaḥ / kṛtaghorājinaścakre bhuvaḥ sarudhirā jinaḥ

Sanskrit only: no published translation is held for this verse.

मांसव्यधोचितमुखैः शून्यतां दधदक्रियम् । शकुन्तिभिः शत्रुबलं व्यापि तस्येषुभिर्नभः

māṃsavyadhocitamukhaiḥ śūnyatāṃ dadhadakriyam / śakuntibhiḥ śatrubalaṃ vyāpi tasyeṣubhirnabhaḥ

Sanskrit only: no published translation is held for this verse.

दाददो दद्ददुद्दादी दादादो दूददीददोः । दुद्दादं दददे दुद्दे ददाददददो ऽददः

dādado daddaduddādī dādādo dūdadīdadoḥ / duddādaṃ dadade dudde dadādadadado 'dadaḥ

Sanskrit only: no published translation is held for this verse.

प्लुतेभकुम्भोरसिजैर्हृदयक्षतिजन्मभिः । प्रावर्तयन्नदीरस्रैर्द्विषां तद्योषितां च सः

plutebhakumbhorasijairhṛdayakṣatijanmabhiḥ / prāvartayannadīrasrairdviṣāṃ tadyoṣitāṃ ca saḥ

Sanskrit only: no published translation is held for this verse.

सदामदबलप्रायः समुद्धृरसो बभौ । प्रतीतविक्रमः श्रीमन्हारिर्हरिरिवापरः

sadāmadabalaprāyaḥ samuddhṛraso babhau / pratītavikramaḥ śrīmanhārirharirivāparaḥ

Sanskrit only: no published translation is held for this verse.

द्विधा त्रिधा चतुर्धा च तमेकमपि शत्रवः । पश्यन्तः स्पर्धया सद्यः स्वयं पञ्चत्वमाययुः

dvidhā tridhā caturdhā ca tamekamapi śatravaḥ / paśyantaḥ spardhayā sadyaḥ svayaṃ pañcatvamāyayuḥ

Sanskrit only: no published translation is held for this verse.

सदैव संपन्नवपू रणेषु स दैवसंपन्नवपूरणेषु । महो दधे ऽस्तारि महानितान्तं महोदधेस्तारिमहा नितान्तम्

sadaiva saṃpannavapū raṇeṣu sa daivasaṃpannavapūraṇeṣu / maho dadhe 'stāri mahānitāntaṃ mahodadhestārimahā nitāntam

Sanskrit only: no published translation is held for this verse.

इष्टं कृत्वार्थं पत्रिणः शार्ङ्गपाणेर् एत्याधोमुख्यं प्रविशन्भूमिमाशु । शुद्धया युक्तानां वैरिवर्गस्य मध्ये भर्त्रा क्षिप्तानामेतदेवानुरूपम्

iṣṭaṃ kṛtvārthaṃ patriṇaḥ śārṅgapāṇer etyādhomukhyaṃ praviśanbhūmimāśu / śuddhayā yuktānāṃ vairivargasya madhye bhartrā kṣiptānāmetadevānurūpam

Sanskrit only: no published translation is held for this verse.

सत्वं मानविशिष्टमाजिरभसादालम्ब्य भव्यः पुरो लब्धाघक्षयशुद्धिरुद्धरतरश्रीवत्सभूमिर्मुदा । मुक्त्वा काममपास्तभीः परमृगव्याधः स नादं हरेर् एकौघैः समकालमभ्रमुदयी रोपैस्तदा तस्तरे

satvaṃ mānaviśiṣṭamājirabhasādālambya bhavyaḥ puro labdhāghakṣayaśuddhiruddharataraśrīvatsabhūmirmudā / muktvā kāmamapāstabhīḥ paramṛgavyādhaḥ sa nādaṃ harer ekaughaiḥ samakālamabhramudayī ropaistadā tastare

Sanskrit only: no published translation is held for this verse.