Magha: Sisupalavadha 9

अभितापसंपदमथोष्णरुचिर्निजतेसामसहमान इव । पयसि प्रपित्सुरपराम्बुनिधेरधिरोढुमस्तगिरिमभ्यपतत्

abhitāpasaṃpadamathoṣṇarucirnijatesāmasahamāna iva / payasi prapitsuraparāmbunidheradhiroḍhumastagirimabhyapatat

Sanskrit only: no published translation is held for this verse.

गतया पुरः प्रतिगवाक्षमुखं दधती रतेन भृशमुत्सुकतां । मुहुरन्तारालभुवमस्तगिरेः सवितुश्च योषिदमिमीत दृशा

gatayā puraḥ pratigavākṣamukhaṃ dadhatī ratena bhṛśamutsukatāṃ / muhurantārālabhuvamastagireḥ savituśca yoṣidamimīta dṛśā

Sanskrit only: no published translation is held for this verse.

विरलात पच्छविरनुष्णवपुः परितो विपाण्डु दधदभ्रशिरः । अभवद्गतः परिणतिं शिथिलः परमन्दसूर्यनयनो दिवसः

viralāta pacchaviranuṣṇavapuḥ parito vipāṇḍu dadhadabhraśiraḥ / abhavadgataḥ pariṇatiṃ śithilaḥ paramandasūryanayano divasaḥ

Sanskrit only: no published translation is held for this verse.

अपराह्नशीतलतरेण शनैरनिलेन लोलितलताङ्गुलये । निलयाय शाखिन इवाह्रयते दुदुराकुलाः खगकुलानि गिरः

aparāhnaśītalatareṇa śanairanilena lolitalatāṅgulaye / nilayāya śākhina ivāhrayate dudurākulāḥ khagakulāni giraḥ

Sanskrit only: no published translation is held for this verse.

उपसंध्यमास्त तनु सानुमतः शिखरेषु तत्क्षणमशीतरुचः । करजालमस्तमये ऽपि सतामुतितं खलूच्चतरमेव पदम्

upasaṃdhyamāsta tanu sānumataḥ śikhareṣu tatkṣaṇamaśītarucaḥ / karajālamastamaye 'pi satāmutitaṃ khalūccatarameva padam

Sanskrit only: no published translation is held for this verse.

प्रतिकूलमुपगते हि विधौ विफलत्वमेति बहुसाधनता । अवलम्बनाय दिनभर्तुरभून्न पतिष्यतः करसहस्रमपि

pratikūlamupagate hi vidhau viphalatvameti bahusādhanatā / avalambanāya dinabharturabhūnna patiṣyataḥ karasahasramapi

Sanskrit only: no published translation is held for this verse.

नवकुङ्कुमारुणपयोधरया स्वकरावसक्तरुचिराम्बरया । अतिसक्तिमेत्य वरुणस्य दिशा भृशमन्वरज्यदतुषारकरः

navakuṅkumāruṇapayodharayā svakarāvasaktarucirāmbarayā / atisaktimetya varuṇasya diśā bhṛśamanvarajyadatuṣārakaraḥ

Sanskrit only: no published translation is held for this verse.

गतवत्यराजत जपाकुसुमस्तबकद्युतौ दिनकरे ऽवनतिम् । बहलानुरागकुरुविन्ददलप्रतिबद्धमध्यमिव दिग्वलयम्

gatavatyarājata japākusumastabakadyutau dinakare 'vanatim / bahalānurāgakuruvindadalapratibaddhamadhyamiva digvalayam

Sanskrit only: no published translation is held for this verse.

द्रुतशातकुम्भनिभमंशुमतो वपुरर्धमग्नवपुषः पयसि । रुरुचे विरिञ्चिनखभिन्नबृहद्दणडकैकतरखण्डमिव

drutaśātakumbhanibhamaṃśumato vapurardhamagnavapuṣaḥ payasi / ruruce viriñcinakhabhinnabṛhaddaṇaḍakaikatarakhaṇḍamiva

Sanskrit only: no published translation is held for this verse.

अनुरागवन्तमपि लोचनयोर्दधतं वपुः सुखमतापकरम् । निरकासयद्रविमपेतवसुं वियदालयादपरदिग्गणिका

anurāgavantamapi locanayordadhataṃ vapuḥ sukhamatāpakaram / nirakāsayadravimapetavasuṃ viyadālayādaparadiggaṇikā

Sanskrit only: no published translation is held for this verse.

अभितिग्मरश्मि चिरमविरमादवधानखिन्नमनिमेषतया । विगलन्नमधुव्रतकुलाश्रुजलं न्ममीलदब्जनयनं नलिनी

abhitigmaraśmi ciramaviramādavadhānakhinnamanimeṣatayā / vigalannamadhuvratakulāśrujalaṃ nmamīladabjanayanaṃ nalinī

Sanskrit only: no published translation is held for this verse.

अविभाव्यतारकमदृष्टहिमद्युतिबिम्बमस्तमितभानु नभः । अवसन्नतापमतमिस्रमभादपदोषतैव विगुणस्य गुणः

avibhāvyatārakamadṛṣṭahimadyutibimbamastamitabhānu nabhaḥ / avasannatāpamatamisramabhādapadoṣataiva viguṇasya guṇaḥ

Sanskrit only: no published translation is held for this verse.

रुचिधाम्नि भर्तरि भृशं विमलाः परलोकमभ्युपगते विवशुः । ज्वलनं त्विषः कथमितरथा सुलभो ऽन्यजन्मनि स एव पतिः

rucidhāmni bhartari bhṛśaṃ vimalāḥ paralokamabhyupagate vivaśuḥ / jvalanaṃ tviṣaḥ kathamitarathā sulabho 'nyajanmani sa eva patiḥ

Sanskrit only: no published translation is held for this verse.

विहिताञ्जलिर्जनतया दधती विकसत्कुसुम्भकुसुमारुणताम् । चिरमुज्झितापि तनुरौज्झदसौ न पितृप्रसूः प्रकृतिमात्मभुवः

vihitāñjalirjanatayā dadhatī vikasatkusumbhakusumāruṇatām / ciramujjhitāpi tanuraujjhadasau na pitṛprasūḥ prakṛtimātmabhuvaḥ

Sanskrit only: no published translation is held for this verse.

अथ सान्द्रसान्ध्यकिरणारुणितं हरिहेतिहूति मिथुनं पततोः । पृथगुत्पपात विरहार्तिदलद्धृदयस्रुतासृगनुलिप्तमिव

atha sāndrasāndhyakiraṇāruṇitaṃ harihetihūti mithunaṃ patatoḥ / pṛthagutpapāta virahārtidaladdhṛdayasrutāsṛganuliptamiva

Sanskrit only: no published translation is held for this verse.

निलयः श्रियः सततमेतदिति प्रथितं यदेव जलजन्म तया । दिवसात्ययात्तदपि मुक्तमहो चपलाजनं प्रति न चोद्यमदः

nilayaḥ śriyaḥ satatametaditi prathitaṃ yadeva jalajanma tayā / divasātyayāttadapi muktamaho capalājanaṃ prati na codyamadaḥ

Sanskrit only: no published translation is held for this verse.

दिवसो ऽनुमित्रमगमद्वलयं किमिहास्यते बत मयाबलया । रुचिभर्तुरस्य विरहाधिगमादिति संध्ययापि सपदि व्यगमि

divaso 'numitramagamadvalayaṃ kimihāsyate bata mayābalayā / rucibharturasya virahādhigamāditi saṃdhyayāpi sapadi vyagami

Sanskrit only: no published translation is held for this verse.

पतिते पतङ्गमृगराजि निजप्रतिबिम्बरोषित इवाम्बुनिधौ । अथ नागयूथमलिनानि जगत्परितस्तमांसि परितस्तरिरे

patite pataṅgamṛgarāji nijapratibimbaroṣita ivāmbunidhau / atha nāgayūthamalināni jagatparitastamāṃsi paritastarire

Sanskrit only: no published translation is held for this verse.

व्यसरन्नु भूधरगुहान्तरतः पचलं बहिर्भहलपङ्करुचि । दिवसावसानपटुनस्तमसो बहिरेत्य चाधिकमभक्त गुहाः

vyasarannu bhūdharaguhāntarataḥ pacalaṃ bahirbhahalapaṅkaruci / divasāvasānapaṭunastamaso bahiretya cādhikamabhakta guhāḥ

Sanskrit only: no published translation is held for this verse.

किमलम्बताम्बरविलग्नमधः किमवर्धतोर्ध्वमवनीतलतः । विससार तिर्यगथ दिग्भ्य इति प्रचुरीभवन्न निरधारि तमः

kimalambatāmbaravilagnamadhaḥ kimavardhatordhvamavanītalataḥ / visasāra tiryagatha digbhya iti pracurībhavanna niradhāri tamaḥ

Sanskrit only: no published translation is held for this verse.

स्थगिताम्बरक्षितितले परितस्तिमिरे जनस्य दृशमन्धयति । दधिरे रसाञ्जनमपूर्वतः प्रियवेश्मवर्त्म सुदृशो ददृशुः

sthagitāmbarakṣititale paritastimire janasya dṛśamandhayati / dadhire rasāñjanamapūrvataḥ priyaveśmavartma sudṛśo dadṛśuḥ

Sanskrit only: no published translation is held for this verse.

अवधार्य कार्यगुरुतामभवन्न भयाय सान्द्रतमसन्तमसम् । सुतनोः स्तनौ च दयितोपगमे तनुरोमराजिपथवेपथवे

avadhārya kāryagurutāmabhavanna bhayāya sāndratamasantamasam / sutanoḥ stanau ca dayitopagame tanuromarājipathavepathave

Sanskrit only: no published translation is held for this verse.

ददृशे ऽपि भास्कररुचाह्नि न यः स तमीं तमोबिरभिगम्य तताम् । द्युतिमग्रहीद्ग्रहगणो लघवः प्रकटीभवन्ति मलिनाश्रयतः

dadṛśe 'pi bhāskararucāhni na yaḥ sa tamīṃ tamobirabhigamya tatām / dyutimagrahīdgrahagaṇo laghavaḥ prakaṭībhavanti malināśrayataḥ

Sanskrit only: no published translation is held for this verse.

अनुलेपनानि कुसुमान्यबलाः कृतमन्यवः पतिषु धीपशिखाः । समयेन तेन चिरसुप्तमनोभवबोधनं सममबोधिषत

anulepanāni kusumānyabalāḥ kṛtamanyavaḥ patiṣu dhīpaśikhāḥ / samayena tena cirasuptamanobhavabodhanaṃ samamabodhiṣata

Sanskrit only: no published translation is held for this verse.

वसुधान्तनिःसृतमिवाहिपतेः पटलं फणामणिसहस्ररुचाम् । स्फुरदंशुजालमथ शीतरुचः ककुभं समस्कुरुत माधवनीम्

vasudhāntaniḥsṛtamivāhipateḥ paṭalaṃ phaṇāmaṇisahasrarucām / sphuradaṃśujālamatha śītarucaḥ kakubhaṃ samaskuruta mādhavanīm

Sanskrit only: no published translation is held for this verse.

विशदप्रभापरिगतं विबभावुदयाचलव्यवहितेन्दुवपुः । मुखमप्रकाशदशनं शनकैः सविलासहासमिव शक्रदिशः

viśadaprabhāparigataṃ vibabhāvudayācalavyavahitenduvapuḥ / mukhamaprakāśadaśanaṃ śanakaiḥ savilāsahāsamiva śakradiśaḥ

Sanskrit only: no published translation is held for this verse.

कलया तुषारकिरणस्य पुरः परिमन्दभिन्नतिमिरौघजटम् । क्षणमभ्यपद्यत जनैर्न मृषा गगनं गणादिपतिमूर्तिरिति

kalayā tuṣārakiraṇasya puraḥ parimandabhinnatimiraughajaṭam / kṣaṇamabhyapadyata janairna mṛṣā gaganaṃ gaṇādipatimūrtiriti

Sanskrit only: no published translation is held for this verse.

नवचन्द्रकाकुसुमकीर्णतमःकबरीभृतो मलयजार्द्रमिव । ददृशे ललाटतटहारि हरेर्हरितो मुखे तुहिनरश्मिदलम्

navacandrakākusumakīrṇatamaḥkabarībhṛto malayajārdramiva / dadṛśe lalāṭataṭahāri harerharito mukhe tuhinaraśmidalam

Sanskrit only: no published translation is held for this verse.

प्रथमं कलाभवदथार्धमथो हिमदीधितिर्महदभूदुदितः । दधति ध्रुवं क्रमश एव न तु द्युतिशालिनो ऽपि सहसोपचयम्

prathamaṃ kalābhavadathārdhamatho himadīdhitirmahadabhūduditaḥ / dadhati dhruvaṃ kramaśa eva na tu dyutiśālino 'pi sahasopacayam

Sanskrit only: no published translation is held for this verse.

उदमज्जि कैटभजितः शयनादपनिद्रपाण्डुरसरोजरुचा । प्रथमप्रबुद्धनदराजसुतावदनेन्दुनेव तुहिनद्युतिना

udamajji kaiṭabhajitaḥ śayanādapanidrapāṇḍurasarojarucā / prathamaprabuddhanadarājasutāvadanenduneva tuhinadyutinā

Sanskrit only: no published translation is held for this verse.

अथ लक्षमणागतकान्तवपुर्जलधिं विलङ्घ्य शशिदाशरथिः । परिवारितः परित ऋक्षगणैस्तिरौघराक्षसकुलं बिभिदे

atha lakṣamaṇāgatakāntavapurjaladhiṃ vilaṅghya śaśidāśarathiḥ / parivāritaḥ parita ṛkṣagaṇaistiraugharākṣasakulaṃ bibhide

Sanskrit only: no published translation is held for this verse.

उपजीवति स्म सततं दधतः परिमुग्धतां वणिगिवोडुपतेः । घनवीथवीथिमवतीर्णवतो निधिरम्भसामुपचयाय कलाः

upajīvati sma satataṃ dadhataḥ parimugdhatāṃ vaṇigivoḍupateḥ / ghanavīthavīthimavatīrṇavato nidhirambhasāmupacayāya kalāḥ

Sanskrit only: no published translation is held for this verse.

रजनीमवाप्य रुचमाप शशी सपदि व्यभूषयदसावपि ताम् । अविलम्बितक्रममहो महतामितरेतरकृतिमच्चरितम्

rajanīmavāpya rucamāpa śaśī sapadi vyabhūṣayadasāvapi tām / avilambitakramamaho mahatāmitaretarakṛtimaccaritam

Sanskrit only: no published translation is held for this verse.

दिवसं भृशोष्णरुचिपादहतां रुदतीमिवानवरतलिरुतैः । मुहुरामृशन् मृगधरो ऽग्रकरैरुदशिस्वसत् कुमुदिनीवनिताम्

divasaṃ bhṛśoṣṇarucipādahatāṃ rudatīmivānavaratalirutaiḥ / muhurāmṛśan mṛgadharo 'grakarairudaśisvasat kumudinīvanitām

Sanskrit only: no published translation is held for this verse.

प्रतिकामिनीति ददृशुश्चकिताः स्मरजन्मघर्मपयसोपचिताम् । सुदृशोभिभर्तृशशैरश्मिगलज्जलबिन्दुमिन्दुमणिदारुवधूम्

pratikāminīti dadṛśuścakitāḥ smarajanmagharmapayasopacitām / sudṛśobhibhartṛśaśairaśmigalajjalabindumindumaṇidāruvadhūm

Sanskrit only: no published translation is held for this verse.

अमृतद्रवैर्विदधब्जदृशाममपमार्गमोषधिपतिः स्म करैः । परितो विसर्पि परितापि भृशं वपुषो ऽवतारयति मानविषम्

amṛtadravairvidadhabjadṛśāmamapamārgamoṣadhipatiḥ sma karaiḥ / parito visarpi paritāpi bhṛśaṃ vapuṣo 'vatārayati mānaviṣam

Sanskrit only: no published translation is held for this verse.

अमलात्मसु प्रतिफलन्नभितस्तरुणीकपोलफलकेषु मुहुः । विससार सान्द्रतरमिन्दुरुचामधिकावभासितदिशां निकरः

amalātmasu pratiphalannabhitastaruṇīkapolaphalakeṣu muhuḥ / visasāra sāndrataramindurucāmadhikāvabhāsitadiśāṃ nikaraḥ

Sanskrit only: no published translation is held for this verse.

उपगूढवेलमलघूर्मिभुजैः सरितामचुक्षुपदधीशमपि । रजनीकरः किमिव चित्रमदो यदुरागिणां गणमनङ्गलघुम्

upagūḍhavelamalaghūrmibhujaiḥ saritāmacukṣupadadhīśamapi / rajanīkaraḥ kimiva citramado yadurāgiṇāṃ gaṇamanaṅgalaghum

Sanskrit only: no published translation is held for this verse.

भवनोदरेषु परिमन्दतया शयितो ऽलसः स्फटिकयष्टिरुचः । अवलम्ब्य जालकमुखोपगतानुदतिष्ठदिन्दुकिरणान्मदनः

bhavanodareṣu parimandatayā śayito 'lasaḥ sphaṭikayaṣṭirucaḥ / avalambya jālakamukhopagatānudatiṣṭhadindukiraṇānmadanaḥ

Sanskrit only: no published translation is held for this verse.

अविभावितेषुविषयः प्रथमं मदनो ऽपि नूनमभवत्तमसा । उदिते दिशः प्रकटयत्यमुना यदघर्मधाम्नि धनुराचकृषे

avibhāviteṣuviṣayaḥ prathamaṃ madano 'pi nūnamabhavattamasā / udite diśaḥ prakaṭayatyamunā yadagharmadhāmni dhanurācakṛṣe

Sanskrit only: no published translation is held for this verse.

युगपद्विकासमुदयाद्गमिते शशिनः शिलीमुखगणो ऽलभत । द्रुतमेत्य पुष्पधनुषो धनुषः कुमुदे ऽङ्गनामनसि चावसरम्

yugapadvikāsamudayādgamite śaśinaḥ śilīmukhagaṇo 'labhata / drutametya puṣpadhanuṣo dhanuṣaḥ kumude 'ṅganāmanasi cāvasaram

Sanskrit only: no published translation is held for this verse.

ककुभां मुखानि सहसोज्ज्वलयन् दधदाकुलत्वमधिकं रतये । अदिदीपदिन्दुरपरो दहनः कुसुमेषुमत्रिनयनप्रभवः

kakubhāṃ mukhāni sahasojjvalayan dadhadākulatvamadhikaṃ rataye / adidīpadinduraparo dahanaḥ kusumeṣumatrinayanaprabhavaḥ

Sanskrit only: no published translation is held for this verse.

इति निश्चितप्रियतमागतयः सितदीधितावदयवत्यबलाः । प्रतिकर्म कर्तुमुचक्रमिरे समये हि सर्वमुपकारि कृतम्

iti niścitapriyatamāgatayaḥ sitadīdhitāvadayavatyabalāḥ / pratikarma kartumucakramire samaye hi sarvamupakāri kṛtam

Sanskrit only: no published translation is held for this verse.

सममेकमेव दधतुः सुतनोरु हारभूषणमुरोजतटौ । घटते हि संहततया जनितामिदमेव निर्विरतां दधतोः

samamekameva dadhatuḥ sutanoru hārabhūṣaṇamurojataṭau / ghaṭate hi saṃhatatayā janitāmidameva nirviratāṃ dadhatoḥ

Sanskrit only: no published translation is held for this verse.

कदलीप्रकाण्डरुचिरोरुतरौ जघनस्थलीपरिसरे महति । रशनाकलापकगुणेन वधूर्मकरध्वजद्विरदमाकलयत्

kadalīprakāṇḍarucirorutarau jaghanasthalīparisare mahati / raśanākalāpakaguṇena vadhūrmakaradhvajadviradamākalayat

Sanskrit only: no published translation is held for this verse.

अदरेष्वलक्तकरसः सुदृशां विशदं कपोलभुवि लोध्ररजः । नवमञ्जनं नयनपङ्कजयोर्बिभिदे न शङ्खनिहितात्पयसः

adareṣvalaktakarasaḥ sudṛśāṃ viśadaṃ kapolabhuvi lodhrarajaḥ / navamañjanaṃ nayanapaṅkajayorbibhide na śaṅkhanihitātpayasaḥ

Sanskrit only: no published translation is held for this verse.

स्फुरदुज्वलाधरदलैर्विसद्दशनांशुकेशकरैः परितः । धृतमुग्धगण्डफलकैर्विबभुविकसद्भिरास्यकमलैः प्रमदाः

sphuradujvalādharadalairvisaddaśanāṃśukeśakaraiḥ paritaḥ / dhṛtamugdhagaṇḍaphalakairvibabhuvikasadbhirāsyakamalaiḥ pramadāḥ

Sanskrit only: no published translation is held for this verse.

भजते विदेशमधिकेन जितस्तदनुप्रवेशमथवा कुशलः । मुखमिन्दुरुज्ज्वलकपोलमतः प्रतिमाच्छलेन सुदृशामविशत्

bhajate videśamadhikena jitastadanupraveśamathavā kuśalaḥ / mukhamindurujjvalakapolamataḥ pratimācchalena sudṛśāmaviśat

Sanskrit only: no published translation is held for this verse.

ध्रुवमागताः प्रतिहतिं कठिने मदनेषवः कुचतटेमहति । इतराङ्गवन्न यदिदं गरिमग्लपितावलग्नमगमत्तनुतां

dhruvamāgatāḥ pratihatiṃ kaṭhine madaneṣavaḥ kucataṭemahati / itarāṅgavanna yadidaṃ garimaglapitāvalagnamagamattanutāṃ

Sanskrit only: no published translation is held for this verse.

न मनोरमास्वपि विशेषविदां निरचेष्ट योग्यमिदमिति । गृहमेष्यति प्रियतमे सुदृशां वसनाङ्गरागसुमनःसु मनः

na manoramāsvapi viśeṣavidāṃ niraceṣṭa yogyamidamiti / gṛhameṣyati priyatame sudṛśāṃ vasanāṅgarāgasumanaḥsu manaḥ

Sanskrit only: no published translation is held for this verse.

वपुरन्वलिप्त परिरम्भसुखव्यवधानभीरुकतया न वधूः । क्षमस्य वाढमिदमेव हि यत्प्रियसंगमेष्वनवलेपमदः

vapuranvalipta parirambhasukhavyavadhānabhīrukatayā na vadhūḥ / kṣamasya vāḍhamidameva hi yatpriyasaṃgameṣvanavalepamadaḥ

Sanskrit only: no published translation is held for this verse.

निजपाणिपल्लवतलस्खलनादभिनासिकविवरमुत्पतितैः । अपरा परीक्ष्य शनकैर्मुमुदे मुखवासमास्यकमलश्वसनैः

nijapāṇipallavatalaskhalanādabhināsikavivaramutpatitaiḥ / aparā parīkṣya śanakairmumude mukhavāsamāsyakamalaśvasanaiḥ

Sanskrit only: no published translation is held for this verse.

विधृते दिवा सवयसा च पुरः परिपूर्णमण्डलविकाशभृति । हिमधाम्नि दर्पणतले च मुहुः स्वमुखश्रियं मृगदृशो ददृशुः

vidhṛte divā savayasā ca puraḥ paripūrṇamaṇḍalavikāśabhṛti / himadhāmni darpaṇatale ca muhuḥ svamukhaśriyaṃ mṛgadṛśo dadṛśuḥ

Sanskrit only: no published translation is held for this verse.

अधिजानु बाहुमुपधाय नमत्करपल्लवार्पितकपोलतलम् । उदकण्ठि कण्ठपरिवर्तिकलस्वरसून्यगानपयापरया

adhijānu bāhumupadhāya namatkarapallavārpitakapolatalam / udakaṇṭhi kaṇṭhaparivartikalasvarasūnyagānapayāparayā

Sanskrit only: no published translation is held for this verse.

प्रणयप्रकाशनविदो मधुराः सुतरामभीष्टजनचित्तहृतः । प्रजिघाय कान्तमनु मुग्धतरस्तरुणीजनो दृश इवाथ सखीः

praṇayaprakāśanavido madhurāḥ sutarāmabhīṣṭajanacittahṛtaḥ / prajighāya kāntamanu mugdhatarastaruṇījano dṛśa ivātha sakhīḥ

Sanskrit only: no published translation is held for this verse.

न च मे ऽवगच्छति यथा लघुतां करुणां यथा च कुरुते स मयि । निपुणं तथैनमुपगम्य वदेरभिदूति काचिदिति संदिदिशे

na ca me 'vagacchati yathā laghutāṃ karuṇāṃ yathā ca kurute sa mayi / nipuṇaṃ tathainamupagamya vaderabhidūti kāciditi saṃdidiśe

Sanskrit only: no published translation is held for this verse.

दयितया मानपरयापरया त्वरितं ययावगदितापि सखी । किमु चोदिताः प्रियहितार्थकृतः कृतिनो भवन्ति सुहृदः सुहृदाम्

dayitayā mānaparayāparayā tvaritaṃ yayāvagaditāpi sakhī / kimu coditāḥ priyahitārthakṛtaḥ kṛtino bhavanti suhṛdaḥ suhṛdām

Sanskrit only: no published translation is held for this verse.

प्रतिभिद्य कान्तमपराधकृतं यदि तावदस्य पुनरेव मया । क्रियते ऽनुवृत्तिरुचितैव ततः कलयेदमानमनसं सखि माम्

pratibhidya kāntamaparādhakṛtaṃ yadi tāvadasya punareva mayā / kriyate 'nuvṛttirucitaiva tataḥ kalayedamānamanasaṃ sakhi mām

Sanskrit only: no published translation is held for this verse.

अवधीर्य धैर्यकलिता दयितं विदधे विरोधमथ तेन सह । तव गोप्यते किमिव कर्तुमिदं न सहास्मि साहसमसाहसिकी

avadhīrya dhairyakalitā dayitaṃ vidadhe virodhamatha tena saha / tava gopyate kimiva kartumidaṃ na sahāsmi sāhasamasāhasikī

Sanskrit only: no published translation is held for this verse.

तदुपेत्य मा स्म तमुपालभथाः क्ल दोषमस्य न हि विद्म वयम् । इति सम्प्रधार्य रमणाय वधूर्विहितागसे ऽपि विससर्ज सखीं

tadupetya mā sma tamupālabhathāḥ kla doṣamasya na hi vidma vayam / iti sampradhārya ramaṇāya vadhūrvihitāgase 'pi visasarja sakhīṃ

Sanskrit only: no published translation is held for this verse.

ननु सन्दिशेति सुदृशोदितया त्रपया न किञ्चन किलाभिदधे । निजमैक्षि मन्दमनिशं निशितैः क्रशितं शरीरमशीरशरैः

nanu sandiśeti sudṛśoditayā trapayā na kiñcana kilābhidadhe / nijamaikṣi mandamaniśaṃ niśitaiḥ kraśitaṃ śarīramaśīraśaraiḥ

Sanskrit only: no published translation is held for this verse.

ब्रुवते स्म दूत्य उपसृत्य नरान्तरवत्प्रगल्भमतिगर्भगिरः । सुहृदर्थमीहितमजिह्मधियां प्रकृतेर्विराजति विरुद्धमपि

bruvate sma dūtya upasṛtya narāntaravatpragalbhamatigarbhagiraḥ / suhṛdarthamīhitamajihmadhiyāṃ prakṛtervirājati viruddhamapi

Sanskrit only: no published translation is held for this verse.

मम रूपकीर्तिमहरद्भुवि यस्तदनु प्रविष्टहृदयेयमिति । त्वयि मत्सरादिव निरस्तदयः सुतरां क्षिणोति खलु तां मदनः

mama rūpakīrtimaharadbhuvi yastadanu praviṣṭahṛdayeyamiti / tvayi matsarādiva nirastadayaḥ sutarāṃ kṣiṇoti khalu tāṃ madanaḥ

Sanskrit only: no published translation is held for this verse.

तव सा कथासु परिघट्टयति श्रवणं यदङ्गुलिमुखेन मुहुः । घनतां ध्रुवं नयति तेन भवद्गुणपूगपूरितमतृप्ततया

tava sā kathāsu parighaṭṭayati śravaṇaṃ yadaṅgulimukhena muhuḥ / ghanatāṃ dhruvaṃ nayati tena bhavadguṇapūgapūritamatṛptatayā

Sanskrit only: no published translation is held for this verse.

उपतप्यमानमलघूष्णिभिः श्वसितैः सितेतरसरोजदृशः । द्रवतां न नेतुमधरं क्षमते नवनागवल्लिदलरागरसः

upatapyamānamalaghūṣṇibhiḥ śvasitaiḥ sitetarasarojadṛśaḥ / dravatāṃ na netumadharaṃ kṣamate navanāgavallidalarāgarasaḥ

Sanskrit only: no published translation is held for this verse.

दधति स्फुटं रत्पतेरिषवः शिततां यदुत्पलपलाशदृशः । हृदयं निरन्तरबृहत्कठिनस्तनमणडलावरणमप्यभिदन्

dadhati sphuṭaṃ ratpateriṣavaḥ śitatāṃ yadutpalapalāśadṛśaḥ / hṛdayaṃ nirantarabṛhatkaṭhinastanamaṇaḍalāvaraṇamapyabhidan

Sanskrit only: no published translation is held for this verse.

कुसुमादपि स्मितदृशः सुतरां सुकुमारमङ्गमिति नापरथा । अनिशं निजैरकरुणः करुणं कुसुमेषुरुत्तपाति यद्विशिखैः

kusumādapi smitadṛśaḥ sutarāṃ sukumāramaṅgamiti nāparathā / aniśaṃ nijairakaruṇaḥ karuṇaṃ kusumeṣuruttapāti yadviśikhaiḥ

Sanskrit only: no published translation is held for this verse.

विषतां निषेवितमपक्रियया समुपैति सर्वमिति सत्यमदः । अमृतुतस्रुऽपि विरहाद्भवतो यदमूं दहन्ति हिमरश्मिरुचः

viṣatāṃ niṣevitamapakriyayā samupaiti sarvamiti satyamadaḥ / amṛtutasru'pi virahādbhavato yadamūṃ dahanti himaraśmirucaḥ

Sanskrit only: no published translation is held for this verse.

उदितं प्रियां प्रति सहार्दमिति श्रदधीयत प्रियतमेन वचः । विदितेङ्गिते हि पुर एव जने सपदीरिताः खलु लगन्ति गिरः

uditaṃ priyāṃ prati sahārdamiti śradadhīyata priyatamena vacaḥ / viditeṅgite hi pura eva jane sapadīritāḥ khalu laganti giraḥ

Sanskrit only: no published translation is held for this verse.

दयिताहृतस्य युवभिर्मनसः परिमूढतामिव गतैः प्रथमम् । उदिते ततः सपदि लब्धपदैः क्षणदाकरे ऽनुपदिभिः प्रयये

dayitāhṛtasya yuvabhirmanasaḥ parimūḍhatāmiva gataiḥ prathamam / udite tataḥ sapadi labdhapadaiḥ kṣaṇadākare 'nupadibhiḥ prayaye

Sanskrit only: no published translation is held for this verse.

निपपात सम्भ्रमभृतः श्रवणादसितभ्रुवः प्रणदितासिकुलम् । दयितावलोकविकसन्नयनप्रसरप्रणुन्नमिव वारिरुहम्

nipapāta sambhramabhṛtaḥ śravaṇādasitabhruvaḥ praṇaditāsikulam / dayitāvalokavikasannayanaprasarapraṇunnamiva vāriruham

Sanskrit only: no published translation is held for this verse.

उपनेतुमुन्नतिमतेव दिवं कुचयोर्युगेन तरसा कलितां । रभसोत्थितामुपगतः सहसा परिरभ्य कञ्चन वधूमरुधत्

upanetumunnatimateva divaṃ kucayoryugena tarasā kalitāṃ / rabhasotthitāmupagataḥ sahasā parirabhya kañcana vadhūmarudhat

Sanskrit only: no published translation is held for this verse.

अनुदेहमागतवतः प्रतिमां परिणायकस्य गुरुमुद्वहता । मुकुरेण वेपथुभृतो ऽतिभरात् कथमप्यपाति न वधूकरतः

anudehamāgatavataḥ pratimāṃ pariṇāyakasya gurumudvahatā / mukureṇa vepathubhṛto 'tibharāt kathamapyapāti na vadhūkarataḥ

Sanskrit only: no published translation is held for this verse.

अवनम्य वक्षसि निमग्नकुचद्वितयेन गाढमुपगूढवता । दयितेन तत्क्षणचलद्रशनाकलकिङ्किणीरवमुदासि वधूः

avanamya vakṣasi nimagnakucadvitayena gāḍhamupagūḍhavatā / dayitena tatkṣaṇacaladraśanākalakiṅkiṇīravamudāsi vadhūḥ

Sanskrit only: no published translation is held for this verse.

कररुद्धनीवि दयितोपगतौ गलितं त्वराविरहितासनया । क्षणदृष्टहाटकशिलासदृशस्फुरदूरुभित्ति वसनं ववसे

kararuddhanīvi dayitopagatau galitaṃ tvarāvirahitāsanayā / kṣaṇadṛṣṭahāṭakaśilāsadṛśasphuradūrubhitti vasanaṃ vavase

Sanskrit only: no published translation is held for this verse.

पिदधानमन्वगुपगम्य दृशौ ब्रुवते जनाय वद को ऽयमिति । अभिधातुमध्यवससौ न गिरा पुलकैः प्रियं नववधून्यगदत्

pidadhānamanvagupagamya dṛśau bruvate janāya vada ko 'yamiti / abhidhātumadhyavasasau na girā pulakaiḥ priyaṃ navavadhūnyagadat

Sanskrit only: no published translation is held for this verse.

उदितोरुसादमतिवेपथुमत्सुदृशो ऽभिभर्तृ विधुरं त्रपया । वपुरादरातिशयशंसि पुनः प्रतिपत्तिमूढमपि वाढमभूत्

uditorusādamativepathumatsudṛśo 'bhibhartṛ vidhuraṃ trapayā / vapurādarātiśayaśaṃsi punaḥ pratipattimūḍhamapi vāḍhamabhūt

Sanskrit only: no published translation is held for this verse.

पिमन्धराभिरलघूरुभरादधिवेश्म पत्युरुपचारविधौ । स्खलिताभिरप्यनुपदं प्रमदाः प्रणयातिभूमिमगमन्गतिभिः

pimandharābhiralaghūrubharādadhiveśma patyurupacāravidhau / skhalitābhirapyanupadaṃ pramadāḥ praṇayātibhūmimagamangatibhiḥ

Sanskrit only: no published translation is held for this verse.

मधुरान्नतभ्रू ललितं च दृशोः सकरप्रयोगचतुरं च वचः । प्रकृति स्थमेव निपुणागमितं स्फुचनृत्तलीलमभवत्सुतनोः

madhurānnatabhrū lalitaṃ ca dṛśoḥ sakaraprayogacaturaṃ ca vacaḥ / prakṛti sthameva nipuṇāgamitaṃ sphucanṛttalīlamabhavatsutanoḥ

Sanskrit only: no published translation is held for this verse.

तदयुक्तमङ्ग तव विश्वसृजा न कृतं यदीक्षणसहस्रतयम् । प्रकटीकृता जगति येन खलु स्फुटमिन्द्रताद्य मयि गोत्रभिदा

tadayuktamaṅga tava viśvasṛjā na kṛtaṃ yadīkṣaṇasahasratayam / prakaṭīkṛtā jagati yena khalu sphuṭamindratādya mayi gotrabhidā

Sanskrit only: no published translation is held for this verse.

न विभावयत्यनिशमक्षिगतामपि मां भवानतिसमीपतया । हृदयस्थितामपि पुनः परितः कथमीक्षते बहिरभीष्टतामाम्

na vibhāvayatyaniśamakṣigatāmapi māṃ bhavānatisamīpatayā / hṛdayasthitāmapi punaḥ paritaḥ kathamīkṣate bahirabhīṣṭatāmām

Sanskrit only: no published translation is held for this verse.

इति गन्तुमिच्छुमभिधाय पुरः क्षणदृष्टिपातविकसद्वदनाम् । स्वकरावलम्बनविमुक्तगलत्कलकाञञ्चि काञ्चिदरुणत्तरुणः

iti gantumicchumabhidhāya puraḥ kṣaṇadṛṣṭipātavikasadvadanām / svakarāvalambanavimuktagalatkalakāñañci kāñcidaruṇattaruṇaḥ

Sanskrit only: no published translation is held for this verse.

अपयाति सरोषया निरस्ते कृतकं कामिनि चुक्षुषे मृगाक्ष्या । कलयन्नपि सव्यथो ऽवतस्थे ऽशकुनेन स्खलितः किलेतरो ऽपि

apayāti saroṣayā niraste kṛtakaṃ kāmini cukṣuṣe mṛgākṣyā / kalayannapi savyatho 'vatasthe 'śakunena skhalitaḥ kiletaro 'pi

Sanskrit only: no published translation is held for this verse.

आलोक्य प्रियतममंशुके विनीवौ यत्तस्थे नामितमुखेन्दु मानवत्या । तन्नूनं पदमवलोकयांबभूवे मानस्य द्रुतमपयानमास्थितस्य

ālokya priyatamamaṃśuke vinīvau yattasthe nāmitamukhendu mānavatyā / tannūnaṃ padamavalokayāṃbabhūve mānasya drutamapayānamāsthitasya

Sanskrit only: no published translation is held for this verse.

सुदृशः सरसव्यलीक तप्तस्तरसास्लष्टवतः सयौवनोष्मा । कथमप्यभवत्स्मरानलोष्मणः स्तनभारो न नखंपचः प्रियस्य

sudṛśaḥ sarasavyalīka taptastarasāslaṣṭavataḥ sayauvanoṣmā / kathamapyabhavatsmarānaloṣmaṇaḥ stanabhāro na nakhaṃpacaḥ priyasya

Sanskrit only: no published translation is held for this verse.

दधत्युरोजद्वयमुर्वशीतलं भुवो गतेव स्वयमुर्वशी तलम् । बभौ मुखेनाप्रतिमेन काचन श्रियाधिका तां प्रति मेनका च न

dadhatyurojadvayamurvaśītalaṃ bhuvo gateva svayamurvaśī talam / babhau mukhenāpratimena kācana śriyādhikā tāṃ prati menakā ca na

Sanskrit only: no published translation is held for this verse.

इत्थं नारीर्घटयितुमलं कामिभिः काममासन् प्रालेयांशोः सपदि रुचयः शान्तमानान्तरायाः । आचार्यत्वं रतिषु विलसन्मन्मथश्रीविलासा ह्रीप्रत्यूहप्रशमकुशलाः शीधवश्चक्रुरासाम्

itthaṃ nārīrghaṭayitumalaṃ kāmibhiḥ kāmamāsan prāleyāṃśoḥ sapadi rucayaḥ śāntamānāntarāyāḥ / ācāryatvaṃ ratiṣu vilasanmanmathaśrīvilāsā hrīpratyūhapraśamakuśalāḥ śīdhavaścakrurāsām

Sanskrit only: no published translation is held for this verse.