Moksopaya with Bhaskarakantha's Tika 3.105

मुहूर्तद्वितयेनाथ बोधम् आप महीपतिः । प्रावृषेण्याम्बुनिर्मुक्तम् अम्भोरुहम् इवोत्तमम्

muhūrtadvitayenātha bodham āpa mahīpatiḥ / prāvṛṣeṇyāmbunirmuktam ambhoruham ivottamam

Sanskrit only: no published translation is held for this verse.

आसनात् साङ्गदोत्तंसः प्रबुद्धो ऽसाव् अकम्पत । सवनाभोगशृङ्गाग्रो भूकम्प इव पर्वतः

āsanāt sāṅgadottaṃsaḥ prabuddho 'sāv akampata / savanābhogaśṛṅgāgro bhūkampa iva parvataḥ

Sanskrit only: no published translation is held for this verse.

बभाव् अर्धप्रबुद्धो ऽसाव् आसने परिकम्पितः । विक्षुब्ध इव पातालावरणे मन्दराचलः

babhāv ardhaprabuddho 'sāv āsane parikampitaḥ / vikṣubdha iva pātālāvaraṇe mandarācalaḥ

Sanskrit only: no published translation is held for this verse.

पतन्तं धारयाम् आसुस् तं पुरोगा नृपं भुजैः । मेरुं प्रलयविक्षुब्धं कुलशैलास् तटैर् इव

patantaṃ dhārayām āsus taṃ purogā nṛpaṃ bhujaiḥ / meruṃ pralayavikṣubdhaṃ kulaśailās taṭair iva

Sanskrit only: no published translation is held for this verse.

पुरोगैर् धार्यमाणो ऽसौ पर्याकुलमतिर् नृपः । वीचिविक्षोभितस्येन्दोर् बभार वदने श्रियम्

purogair dhāryamāṇo 'sau paryākulamatir nṛpaḥ / vīcivikṣobhitasyendor babhāra vadane śriyam

Sanskrit only: no published translation is held for this verse.

को ऽयं प्रदेशः कस्येयं सभेति स नृपश् शनैः । दध्वान मज्जदम्भोजकोशस्थ इव षट्पदः

ko 'yaṃ pradeśaḥ kasyeyaṃ sabheti sa nṛpaś śanaiḥ / dadhvāna majjadambhojakośastha iva ṣaṭpadaḥ

Sanskrit only: no published translation is held for this verse.

अथोवाच सभा देव किम् एतद् इति सादरम् । रणन्मधुकरी भानुं दृष्टराहुम् इवाब्जिनी

athovāca sabhā deva kim etad iti sādaram / raṇanmadhukarī bhānuṃ dṛṣṭarāhum ivābjinī

Sanskrit only: no published translation is held for this verse.

अथैनं परिपप्रच्छुः पुरोगा मन्त्रिणस् तथा । प्रलयोल्लाससन्त्रस्तं मार्काण्डेयम् इवामराः

athainaṃ paripapracchuḥ purogā mantriṇas tathā / pralayollāsasantrastaṃ mārkāṇḍeyam ivāmarāḥ

Sanskrit only: no published translation is held for this verse.

त्वयीत्थं संस्थिते देव वयम् अत्यन्तम् आकुलाः । अभेद्यम् अपि भिन्दन्ति निर्निमित्तभ्रमा मनः

tvayītthaṃ saṃsthite deva vayam atyantam ākulāḥ / abhedyam api bhindanti nirnimittabhramā manaḥ

Sanskrit only: no published translation is held for this verse.

आपातरमणीयेषु पर्यन्तविरसेषु च । भोगेष्व् इव विकल्पेषु केषु ते लुठितं मनः

āpātaramaṇīyeṣu paryantaviraseṣu ca / bhogeṣv iva vikalpeṣu keṣu te luṭhitaṃ manaḥ

Sanskrit only: no published translation is held for this verse.

सततोदारवृत्तासु कथासु परिशीलितम् । मनस् ते निर्मलं कस्मात् सम्भ्रमेषु निमज्जति

satatodāravṛttāsu kathāsu pariśīlitam / manas te nirmalaṃ kasmāt sambhrameṣu nimajjati

Sanskrit only: no published translation is held for this verse.

तुच्छालम्बनम् आलूनविशीर्णं लोकवृत्तिषु । मनो मोहम् उपादत्ते न महत्त्वविजृम्भितम्

tucchālambanam ālūnaviśīrṇaṃ lokavṛttiṣu / mano moham upādatte na mahattvavijṛmbhitam

Sanskrit only: no published translation is held for this verse.

सातत्येन हि यैवास्य मनसो वृत्तिर् उत्थिता । शरीरमदमत्तासु ताम् एवानुविधावति

sātatyena hi yaivāsya manaso vṛttir utthitā / śarīramadamattāsu tām evānuvidhāvati

Sanskrit only: no published translation is held for this verse.

अतुच्छालम्बनं शुद्धं प्रबुद्धं गुणहारि च । तवापि हि मनश् चित्रम् आलूनम् इव लक्ष्यते

atucchālambanaṃ śuddhaṃ prabuddhaṃ guṇahāri ca / tavāpi hi manaś citram ālūnam iva lakṣyate

Sanskrit only: no published translation is held for this verse.

अनभ्यस्तविवेकं हि देशकालवशानुगम् । मन्त्रौषधवशं याति मनो नोदारवृत्तिमत्

anabhyastavivekaṃ hi deśakālavaśānugam / mantrauṣadhavaśaṃ yāti mano nodāravṛttimat

Sanskrit only: no published translation is held for this verse.

नित्यम् आत्तविवेकस्य कथम् आलूनशीर्णता । दुनोति विततं चेतो वात्येव विबुधाचलम्

nityam āttavivekasya katham ālūnaśīrṇatā / dunoti vitataṃ ceto vātyeva vibudhācalam

Sanskrit only: no published translation is held for this verse.

इति जातासु गीर्ष्व् अस्य भूपतेः कान्तिर् आननम् । भूषयाम् आस शीतांशुं मासान्त इव पूर्णता

iti jātāsu gīrṣv asya bhūpateḥ kāntir ānanam / bhūṣayām āsa śītāṃśuṃ māsānta iva pūrṇatā

Sanskrit only: no published translation is held for this verse.

रराज राजा साश्चर्यम् उन्मीलितविलोचनः । गते हिमर्तौ प्रोल्लासिपुष्पौघ इव माधवः

rarāja rājā sāścaryam unmīlitavilocanaḥ / gate himartau prollāsipuṣpaugha iva mādhavaḥ

Sanskrit only: no published translation is held for this verse.

अथातिसम्भ्रमाश्चर्यखिन्नस्मितमुखो बभौ । आसन्नमृत्युम् आलोक्य राहुम् इन्दुर् इवाम्बरे

athātisambhramāścaryakhinnasmitamukho babhau / āsannamṛtyum ālokya rāhum indur ivāmbare

Sanskrit only: no published translation is held for this verse.

ऐन्द्रजालिकम् आलोक्य प्रोवाचाथ हसन्न् इव । बभ्रुं हिंसात्मकं दृष्ट्वा सर्परूपीव तक्षकः

aindrajālikam ālokya provācātha hasann iva / babhruṃ hiṃsātmakaṃ dṛṣṭvā sarparūpīva takṣakaḥ

Sanskrit only: no published translation is held for this verse.

जाल्म जालं जटालेन किम् एतद् भवता कृतम् । मीनस्पन्दाप्रसन्नो ऽब्धिः क्षणाद् एति प्रसन्नताम्

jālma jālaṃ jaṭālena kim etad bhavatā kṛtam / mīnaspandāprasanno 'bdhiḥ kṣaṇād eti prasannatām

Sanskrit only: no published translation is held for this verse.

चित्रं चित्रा हि देवस्य पदार्थशतशक्तयः । सुशक्तम् अपि मे चित्तम् आभिर् मोहे निवेशितम्

citraṃ citrā hi devasya padārthaśataśaktayaḥ / suśaktam api me cittam ābhir mohe niveśitam

Sanskrit only: no published translation is held for this verse.

क्व वयं लोकपर्यायवृत्तान्तपरिदेविनः । क्व मनोमोहदायिन्यो वितताः प्राकृतापदः

kva vayaṃ lokaparyāyavṛttāntaparidevinaḥ / kva manomohadāyinyo vitatāḥ prākṛtāpadaḥ

Sanskrit only: no published translation is held for this verse.

अप्य् अभ्यस्तमहाज्ञानं मनस् तिष्ठति देहके । कदाचिन् मोहम् आदत्ते क्षणं मतिमताम् अपि

apy abhyastamahājñānaṃ manas tiṣṭhati dehake / kadācin moham ādatte kṣaṇaṃ matimatām api

Sanskrit only: no published translation is held for this verse.

इदम् आश्चर्यम् आख्यानं शृणुताथ सभासदः । मम शाम्बरिकेणेह यन् मुहूर्तं प्रदर्शितम्

idam āścaryam ākhyānaṃ śṛṇutātha sabhāsadaḥ / mama śāmbarikeṇeha yan muhūrtaṃ pradarśitam

Sanskrit only: no published translation is held for this verse.

दृष्टवान् अहम् एतस्मिन् बह्वीः कार्यदशाश् चलाः । मुहूर्ते प्रोत्थितध्वस्तशक्रास् सृष्टीर् इवाब्जजः

dṛṣṭavān aham etasmin bahvīḥ kāryadaśāś calāḥ / muhūrte protthitadhvastaśakrās sṛṣṭīr ivābjajaḥ

Sanskrit only: no published translation is held for this verse.

इत्य् उक्त्वोन्मुखनेत्रेषु सभ्येषु स हसन्न् इव । राजा वर्णयितुं चित्रं वृत्तान्तम् उपचक्रमे

ity uktvonmukhanetreṣu sabhyeṣu sa hasann iva / rājā varṇayituṃ citraṃ vṛttāntam upacakrame

Sanskrit only: no published translation is held for this verse.

इह विविधपदार्थसङ्कुलायां ह्रदनदपर्वतपत्तनाकुलायाम् । कुलशिखरिसमुद्रसङ्कटायां भुवि विभवावलितो ऽस्त्य् अयं प्रदेशः

iha vividhapadārthasaṅkulāyāṃ hradanadaparvatapattanākulāyām / kulaśikharisamudrasaṅkaṭāyāṃ bhuvi vibhavāvalito 'sty ayaṃ pradeśaḥ

Sanskrit only: no published translation is held for this verse.