Moksopaya with Bhaskarakantha's Tika 3.120

हेमोर्मिकादिवन् मिथ्या कचितायाः क्षयोन्मुखम् । त्वम् अहन्त्वम् अविद्यायाश् शृणु राघव कीदृशम्

hemormikādivan mithyā kacitāyāḥ kṣayonmukham / tvam ahantvam avidyāyāś śṛṇu rāghava kīdṛśam

Sanskrit only: no published translation is held for this verse.

लवणो ऽसौ महीपालस् तदा दृष्ट्वा तथा भ्रमम् । द्वितीये दिवसे गन्तुं प्रवृत्तस् तां महाटवीम्

lavaṇo 'sau mahīpālas tadā dṛṣṭvā tathā bhramam / dvitīye divase gantuṃ pravṛttas tāṃ mahāṭavīm

Sanskrit only: no published translation is held for this verse.

यत् तद् दृष्टं मया दुःखम् अरण्यानीं स्मरामि ताम् । चित्तादर्शगता चित्त्वात् कदाचिल् लभ्यते च सा

yat tad dṛṣṭaṃ mayā duḥkham araṇyānīṃ smarāmi tām / cittādarśagatā cittvāt kadācil labhyate ca sā

Sanskrit only: no published translation is held for this verse.

इति निश्चित्य सचिवैस् स ययौ दक्षिणापथम् । पुनर् दिग्विजयायैव प्राप विन्ध्यमहीधरम्

iti niścitya sacivais sa yayau dakṣiṇāpatham / punar digvijayāyaiva prāpa vindhyamahīdharam

Sanskrit only: no published translation is held for this verse.

पूर्वदक्षिणपाश्चात्यमहार्णवतटस्थलीम् । बभ्राम कौतुकात् सर्वां व्योमवीथीम् इवोष्णरुक्

pūrvadakṣiṇapāścātyamahārṇavataṭasthalīm / babhrāma kautukāt sarvāṃ vyomavīthīm ivoṣṇaruk

Sanskrit only: no published translation is held for this verse.

अथैकस्मिन् प्रदेशे तां भित्ताव् इव पुरोगताम् । ददर्शोग्राम् अरण्यानीं परलोकमहीम् इव

athaikasmin pradeśe tāṃ bhittāv iva purogatām / dadarśogrām araṇyānīṃ paralokamahīm iva

Sanskrit only: no published translation is held for this verse.

सर्वत्र विहरंस् तांस् तान् वृत्तान्तान् सकलान् अपि । दृष्टवान् दृष्टवांश् चैव ज्ञातवांश् च विसिस्मये

sarvatra viharaṃs tāṃs tān vṛttāntān sakalān api / dṛṣṭavān dṛṣṭavāṃś caiva jñātavāṃś ca visismaye

Sanskrit only: no published translation is held for this verse.

तान् परिज्ञातवांश् चासीद् व्याधान् पुक्कसजान् पुरः । विस्मयाकुलया बुद्ध्या भूयो बभ्राम सम्भ्रमी

tān parijñātavāṃś cāsīd vyādhān pukkasajān puraḥ / vismayākulayā buddhyā bhūyo babhrāma sambhramī

Sanskrit only: no published translation is held for this verse.

अथ प्राप महाटव्याः पर्यन्ते धूमधूसरम् । तम् एव ग्रामकं यस्मिन् सो ऽभवत् पुष्टपुक्कसः

atha prāpa mahāṭavyāḥ paryante dhūmadhūsaram / tam eva grāmakaṃ yasmin so 'bhavat puṣṭapukkasaḥ

Sanskrit only: no published translation is held for this verse.

तत्रापश्यज् जनांस् तांस् तांस् स्त्रियस् तास् ताः कुटीरिकाः । तान् आरामाञ् जलाधारांस् तांस् तांश् च वसुधातटान्

tatrāpaśyaj janāṃs tāṃs tāṃs striyas tās tāḥ kuṭīrikāḥ / tān ārāmāñ jalādhārāṃs tāṃs tāṃś ca vasudhātaṭān

Sanskrit only: no published translation is held for this verse.

तं चाकाण्डपरिभ्रंशं तान् वृक्षांस् तान् वृतिव्रजान् । तांस् तथैव समुद्देशांस् तद्वृत्तान्तैकलाञ्छितान्

taṃ cākāṇḍaparibhraṃśaṃ tān vṛkṣāṃs tān vṛtivrajān / tāṃs tathaiva samuddeśāṃs tadvṛttāntaikalāñchitān

Sanskrit only: no published translation is held for this verse.

अन्यासु वृद्धासु सबाष्पनेत्रास्व् आर्त्याभियुक्तासु च वर्णयन्ती । अकालकान्तारविशीर्णबन्धुदुःखान्य् असङ्ख्यानि सखी सखीषु

anyāsu vṛddhāsu sabāṣpanetrāsv ārtyābhiyuktāsu ca varṇayantī / akālakāntāraviśīrṇabandhuduḥkhāny asaṅkhyāni sakhī sakhīṣu

Sanskrit only: no published translation is held for this verse.

वृद्धा प्रवृद्धोज्ज्वलबाष्पानेत्र कन्थावृता शुष्ककुचा कृशाङ्गी । अवग्रहोग्राशनिदग्धदेशे तत्रान्तरान्ता परिरोदितीयम्

vṛddhā pravṛddhojjvalabāṣpānetra kanthāvṛtā śuṣkakucā kṛśāṅgī / avagrahogrāśanidagdhadeśe tatrāntarāntā pariroditīyam

Sanskrit only: no published translation is held for this verse.

हा पुत्र पुत्रावृतसर्वगात्र दिनत्रयाभोजनजर्जराङ्ग । कृत्तेशुना चर्मणि जीर्णदेहात् कथं क्व मुक्ता भवतासवस् ते

hā putra putrāvṛtasarvagātra dinatrayābhojanajarjarāṅga / kṛtteśunā carmaṇi jīrṇadehāt kathaṃ kva muktā bhavatāsavas te

Sanskrit only: no published translation is held for this verse.

तालीलतालम्बनम् अम्बुदार्द्रदन्तान्तरस्थारुणसत्फलस्य । स्मरामि गुञ्जाफलदामहेतोः पुरस् स्ववध्वा रसहासिनस् ते

tālīlatālambanam ambudārdradantāntarasthāruṇasatphalasya / smarāmi guñjāphaladāmahetoḥ puras svavadhvā rasahāsinas te

Sanskrit only: no published translation is held for this verse.

कदम्बजम्बीरलवङ्गगुञ्जकुञ्जान्तर् अत्रस्ततरत्तरक्षोः । पश्यामि पुत्रस्य कदा नु भूयो भयङ्कराण्य् आप्लुतिवल्गितानि

kadambajambīralavaṅgaguñjakuñjāntar atrastatarattarakṣoḥ / paśyāmi putrasya kadā nu bhūyo bhayaṅkarāṇy āplutivalgitāni

Sanskrit only: no published translation is held for this verse.

न तानि ताम्बूलविलासिनीनां मुखेषु शोभललितानि सन्ति । तमालनीले चिबुकैकदेशे सुतस्य यान्य् आस्यगतामिषस्य

na tāni tāmbūlavilāsinīnāṃ mukheṣu śobhalalitāni santi / tamālanīle cibukaikadeśe sutasya yāny āsyagatāmiṣasya

Sanskrit only: no published translation is held for this verse.

सुतापि नीता सह तेन भर्त्रा यमेन यास्या यमुना समाना । तमालवल्ली सहपुष्पगुच्छा समीरणेनेव वनेचरेण

sutāpi nītā saha tena bhartrā yamena yāsyā yamunā samānā / tamālavallī sahapuṣpagucchā samīraṇeneva vanecareṇa

Sanskrit only: no published translation is held for this verse.

हा पुत्रि गुञ्जाफलदामहारे समुन्नताभोगपयोधराङ्गि । वातोल्लसत्कज्जलनीलवर्णे पर्णाम्बरे ऽबाधरजे ऽम्बुदन्ते

hā putri guñjāphaladāmahāre samunnatābhogapayodharāṅgi / vātollasatkajjalanīlavarṇe parṇāmbare 'bādharaje 'mbudante

Sanskrit only: no published translation is held for this verse.

हा राजपुत्रेन्दुसमान कान्त सन्त्यज्य शुद्धान्तविलासिनीस् ताः । रतिं प्रयातो ऽसि ममात्मजायां न सापि ते सुस्थिरताम् उपेता

hā rājaputrendusamāna kānta santyajya śuddhāntavilāsinīs tāḥ / ratiṃ prayāto 'si mamātmajāyāṃ na sāpi te susthiratām upetā

Sanskrit only: no published translation is held for this verse.

संसारनद्यास् स्वतरङ्गभङ्गैः क्रियाविलासैर् विहितोपहासैः । किं नाम तुच्छं न कृतं नृपो ऽसौ यद् योजितः पुक्कसकन्यकायाम्

saṃsāranadyās svataraṅgabhaṅgaiḥ kriyāvilāsair vihitopahāsaiḥ / kiṃ nāma tucchaṃ na kṛtaṃ nṛpo 'sau yad yojitaḥ pukkasakanyakāyām

Sanskrit only: no published translation is held for this verse.

सा त्रस्तसारङ्गसमाननेत्रा स तृप्तशार्दूलसमानवीर्यः । उभौ गताव् एकपदेन नाशम् आशा सहार्थेन यथा च हेम

sā trastasāraṅgasamānanetrā sa tṛptaśārdūlasamānavīryaḥ / ubhau gatāv ekapadena nāśam āśā sahārthena yathā ca hema

Sanskrit only: no published translation is held for this verse.

मृतेश्वरास्म्य् अस्तमितात्मजास्मि दुर्देशयातास्मि च दुर्गतास्मि । दुर्जातजातास्मि महापदास्मि साक्षात् स्वयं वोन्नमितापदास्मि

mṛteśvarāsmy astamitātmajāsmi durdeśayātāsmi ca durgatāsmi / durjātajātāsmi mahāpadāsmi sākṣāt svayaṃ vonnamitāpadāsmi

Sanskrit only: no published translation is held for this verse.

नीचावमानप्रभवस्य मन्योः क्षुधावसन्नस्य कलत्रकस्य । शोकस्य वेगाद् अनिवार्यवृत्तेर् नार्यस् सदैकायतनं विनाथाः

nīcāvamānaprabhavasya manyoḥ kṣudhāvasannasya kalatrakasya / śokasya vegād anivāryavṛtter nāryas sadaikāyatanaṃ vināthāḥ

Sanskrit only: no published translation is held for this verse.

दैवोपतप्तस्य विबान्धवस्य मूढस्य रूढस्य महाधिभूमौ । यत् प्राणनं तन् मरणं महापद् या स्यान् मृतिर् जीवितम् उत्तमं तत्

daivopataptasya vibāndhavasya mūḍhasya rūḍhasya mahādhibhūmau / yat prāṇanaṃ tan maraṇaṃ mahāpad yā syān mṛtir jīvitam uttamaṃ tat

Sanskrit only: no published translation is held for this verse.

जनैर् विहीनस्य विदेशवृत्तेर् दुःखान्य् अनन्तानि समुल्लसन्ति । सहस्रशाखारससङ्कुलानि तृणानि वर्षास्व् इव पर्वतस्य

janair vihīnasya videśavṛtter duḥkhāny anantāni samullasanti / sahasraśākhārasasaṅkulāni tṛṇāni varṣāsv iva parvatasya

Sanskrit only: no published translation is held for this verse.

एवं लपन्तीं स्वकलत्रवृद्धां दासिभिर् आश्वास्य नृपस् स्त्रियं ताम् । पप्रच्छ किं वृत्तम् इहासि का च का ते सुता कश् च पतिस् तवेति

evaṃ lapantīṃ svakalatravṛddhāṃ dāsibhir āśvāsya nṛpas striyaṃ tām / papraccha kiṃ vṛttam ihāsi kā ca kā te sutā kaś ca patis taveti

Sanskrit only: no published translation is held for this verse.

उवाच सोद्बाष्पविलोचनाथ ग्रामस् त्व् अयं पुक्कसघोषनामा । इहाभवत् पुक्कसकः पतिर् मे बभूव तस्येन्दुसमा सुतैका

uvāca sodbāṣpavilocanātha grāmas tv ayaṃ pukkasaghoṣanāmā / ihābhavat pukkasakaḥ patir me babhūva tasyendusamā sutaikā

Sanskrit only: no published translation is held for this verse.

सा दैवयोगात् पतिम् इन्दुतुल्यम् इहागतं दैववशेन भूपम् । शून्ये विशीर्णं मधुकुम्भम् आप वने वराकी करभी यथैका

sā daivayogāt patim indutulyam ihāgataṃ daivavaśena bhūpam / śūnye viśīrṇaṃ madhukumbham āpa vane varākī karabhī yathaikā

Sanskrit only: no published translation is held for this verse.

सा तेन सार्धं सुचिरं सुखानि भुक्त्वा प्रसूता तनयां सुतांश् च । वृद्धिं गता काननकोटरे ऽस्मिंस् तुम्बीलता पादपसंवृतेव

sā tena sārdhaṃ suciraṃ sukhāni bhuktvā prasūtā tanayāṃ sutāṃś ca / vṛddhiṃ gatā kānanakoṭare 'smiṃs tumbīlatā pādapasaṃvṛteva

Sanskrit only: no published translation is held for this verse.