Moksopaya with Bhaskarakantha's Tika 3.121

केनचित् त्व् अथ कालेन ग्रामके ऽस्मिञ् जनेश्वर । अवृष्टिदुःखम् अभवद् भीषणं भग्नमानवम्

kenacit tv atha kālena grāmake 'smiñ janeśvara / avṛṣṭiduḥkham abhavad bhīṣaṇaṃ bhagnamānavam

Sanskrit only: no published translation is held for this verse.

महतानेन दुःखेन सर्वे ते ग्रामकाज् जनाः । विनिर्गत्य गता दूरं तत्र पञ्चत्वम् आगताः

mahatānena duḥkhena sarve te grāmakāj janāḥ / vinirgatya gatā dūraṃ tatra pañcatvam āgatāḥ

Sanskrit only: no published translation is held for this verse.

तेनेमा दुःखभागिन्यश् शून्या वयम् इह प्रभो । शोच्याश् शोचाम उद्बाष्पम् आचान्तेक्षणवारयः

tenemā duḥkhabhāginyaś śūnyā vayam iha prabho / śocyāś śocāma udbāṣpam ācāntekṣaṇavārayaḥ

Sanskrit only: no published translation is held for this verse.

इत्य् आकर्ण्याङ्गनावक्त्राद् राजा विस्मयम् आगतः । मन्त्रिणां मुखम् आलोक्य चित्रार्पित इवाभवत्

ity ākarṇyāṅganāvaktrād rājā vismayam āgataḥ / mantriṇāṃ mukham ālokya citrārpita ivābhavat

Sanskrit only: no published translation is held for this verse.

भूयो विचारयाम् आस तद् आश्चर्यम् अनुत्तमम् । भूयो भूयश् च पप्रच्छ बभूवाश्चर्यवान् अति

bhūyo vicārayām āsa tad āścaryam anuttamam / bhūyo bhūyaś ca papraccha babhūvāścaryavān ati

Sanskrit only: no published translation is held for this verse.

तेषां समुचितैर् मानसम्मानैर् दुःखसङ्क्षयम् । कृत्वा करुणयाविद्धो दृष्टलोकपरावरः

teṣāṃ samucitair mānasammānair duḥkhasaṅkṣayam / kṛtvā karuṇayāviddho dṛṣṭalokaparāvaraḥ

Sanskrit only: no published translation is held for this verse.

स्थित्वा तत्र चिरं कालं विमृश्य नियतेर् गतीः । आजगाम पुरं पौरैर् वन्दितः प्रविवेश च

sthitvā tatra ciraṃ kālaṃ vimṛśya niyater gatīḥ / ājagāma puraṃ paurair vanditaḥ praviveśa ca

Sanskrit only: no published translation is held for this verse.

प्रातस् तत्र सभास्थाने माम् अपृच्छद् असौ नृपः । कथम् एष मुने स्वप्नः प्रत्यक्ष इति विस्मितः

prātas tatra sabhāsthāne mām apṛcchad asau nṛpaḥ / katham eṣa mune svapnaḥ pratyakṣa iti vismitaḥ

Sanskrit only: no published translation is held for this verse.

यथावस्तु मया तस्य तत्तद्युक्त्या स तादृशः । संशयो हृदयान् नुन्नो वातेनेवाम्बुदोदयः

yathāvastu mayā tasya tattadyuktyā sa tādṛśaḥ / saṃśayo hṛdayān nunno vātenevāmbudodayaḥ

Sanskrit only: no published translation is held for this verse.

इतीयं राघवाविद्या महती भ्रमदायिनी । असत् सत्तां नयत्य् आशु सच् चासत्तां नयत्य् अलम्

itīyaṃ rāghavāvidyā mahatī bhramadāyinī / asat sattāṃ nayaty āśu sac cāsattāṃ nayaty alam

Sanskrit only: no published translation is held for this verse.

कथम् एवं वद ब्रह्मन् स्वप्नस् सत्यत्वम् आगतः । भ्रमभार इवैषो ऽर्थो न मे लगति चेतसि

katham evaṃ vada brahman svapnas satyatvam āgataḥ / bhramabhāra ivaiṣo 'rtho na me lagati cetasi

Sanskrit only: no published translation is held for this verse.

सर्वम् एतद् अविद्यायां सम्भवत्य् एव राघव । घटेषु पटता दृष्टा स्वप्नसम्भ्रमणादिवत्

sarvam etad avidyāyāṃ sambhavaty eva rāghava / ghaṭeṣu paṭatā dṛṣṭā svapnasambhramaṇādivat

Sanskrit only: no published translation is held for this verse.

दूरं निकटवद् भाति मकुरे ऽन्तर् इवाचलः । चिरं शीघ्रत्वम् आयाति यूनस् सेष्टेव यामिनी

dūraṃ nikaṭavad bhāti makure 'ntar ivācalaḥ / ciraṃ śīghratvam āyāti yūnas seṣṭeva yāminī

Sanskrit only: no published translation is held for this verse.

असम्भवं सम्भवति स्वप्ने स्वमरणं यथा । असच् च सद् इवोदेति स्वप्नेष्व् इव नभोगतिः

asambhavaṃ sambhavati svapne svamaraṇaṃ yathā / asac ca sad ivodeti svapneṣv iva nabhogatiḥ

Sanskrit only: no published translation is held for this verse.

सुस्थिरं सुष्ठु चलति भ्रमे भूमिविवर्तवत् । अबलो बलम् आयाति मदविक्षुब्धचित्तवत्

susthiraṃ suṣṭhu calati bhrame bhūmivivartavat / abalo balam āyāti madavikṣubdhacittavat

Sanskrit only: no published translation is held for this verse.

वासनावलितं चेतो यद् यथा भावयत्य् अलम् । तत् तथानुभवत्य् आशु न सद् अस्ति न चाप्य् असत्

vāsanāvalitaṃ ceto yad yathā bhāvayaty alam / tat tathānubhavaty āśu na sad asti na cāpy asat

Sanskrit only: no published translation is held for this verse.

यदैवाभ्युदिताविद्या त्व् अहन्तादिमयी मुधा । तदैवानादिमध्यान्ता भ्रमस्यानन्ततोदिता

yadaivābhyuditāvidyā tv ahantādimayī mudhā / tadaivānādimadhyāntā bhramasyānantatoditā

Sanskrit only: no published translation is held for this verse.

प्रतिभासवशाद् एव सर्वं विपरिवर्तते । क्षणः कल्पत्वम् आयाति कल्पश् च भवति क्षणः

pratibhāsavaśād eva sarvaṃ viparivartate / kṣaṇaḥ kalpatvam āyāti kalpaś ca bhavati kṣaṇaḥ

Sanskrit only: no published translation is held for this verse.

विपर्यस्तमतिर् जन्तुः काम् अवस्थां न वापतेत् । बिभर्ति सिंहताम् एणो वासनावशतस् स्वयम्

viparyastamatir jantuḥ kām avasthāṃ na vāpatet / bibharti siṃhatām eṇo vāsanāvaśatas svayam

Sanskrit only: no published translation is held for this verse.

विषभ्रममदाविद्यामोहाहन्तादयस् समाः । सर्वे चित्तविपर्यासात् फलसम्पत्तिहेतवः

viṣabhramamadāvidyāmohāhantādayas samāḥ / sarve cittaviparyāsāt phalasampattihetavaḥ

Sanskrit only: no published translation is held for this verse.

काकतलीयवच् चेतोवासनावशतस् स्वतः । संविशन्ति महारम्भा व्यवहाराः परस्परम्

kākatalīyavac cetovāsanāvaśatas svataḥ / saṃviśanti mahārambhā vyavahārāḥ parasparam

Sanskrit only: no published translation is held for this verse.

वृत्तं प्राक् पक्कणे राज्ञः कस्यचिल् लवणस्य यत् । प्रतिभातं तद् एतस्य सद् वासद् वा मनोगतम्

vṛttaṃ prāk pakkaṇe rājñaḥ kasyacil lavaṇasya yat / pratibhātaṃ tad etasya sad vāsad vā manogatam

Sanskrit only: no published translation is held for this verse.

विस्मरत्य् अपि विस्तीर्णां क्रियां चेतःकृतां यथा । तथा कृताम् अप्य् अकृताम् इति स्मरति निश्चितम्

vismaraty api vistīrṇāṃ kriyāṃ cetaḥkṛtāṃ yathā / tathā kṛtām apy akṛtām iti smarati niścitam

Sanskrit only: no published translation is held for this verse.

तथाप्य् अभुक्तवान् अस्मि भुक्तवान् इति वेत्ति हि । स्वप्ने देशान्तरगमश् चाकृतो ऽप्य् अवबुध्यते

tathāpy abhuktavān asmi bhuktavān iti vetti hi / svapne deśāntaragamaś cākṛto 'py avabudhyate

Sanskrit only: no published translation is held for this verse.

विन्ध्यपुक्कसक्तग्रामव्यवहारो ऽयम् ईदृशः । प्रतिभासागतस् तस्य स्वप्ने पूर्वकथा यथा

vindhyapukkasaktagrāmavyavahāro 'yam īdṛśaḥ / pratibhāsāgatas tasya svapne pūrvakathā yathā

Sanskrit only: no published translation is held for this verse.

अथ वा लवणेनाशु दृष्टो यस् स्वप्नविभ्रमः । स एव संविदं प्राप्तो विन्ध्यपुक्कसचेतसः

atha vā lavaṇenāśu dṛṣṭo yas svapnavibhramaḥ / sa eva saṃvidaṃ prāpto vindhyapukkasacetasaḥ

Sanskrit only: no published translation is held for this verse.

विन्ध्यपुक्कससंविद् वारूढा पार्थिवचेतसि । यथा बहूनां सदृशं वचनं नाम चाननम्

vindhyapukkasasaṃvid vārūḍhā pārthivacetasi / yathā bahūnāṃ sadṛśaṃ vacanaṃ nāma cānanam

Sanskrit only: no published translation is held for this verse.

तथा स्वप्नो ऽपि भवति कालो देशः क्रियापि च । व्यवहारगतेस् त्व् अस्यास् सत्तास्ति प्रतिभासतः

tathā svapno 'pi bhavati kālo deśaḥ kriyāpi ca / vyavahāragates tv asyās sattāsti pratibhāsataḥ

Sanskrit only: no published translation is held for this verse.

सत्ता सर्वपदार्थानां नान्या संवेदनाद् ऋते । संवेदने ऽन्तर् आभाति विचित्रा सर्गसन्ततिः

sattā sarvapadārthānāṃ nānyā saṃvedanād ṛte / saṃvedane 'ntar ābhāti vicitrā sargasantatiḥ

Sanskrit only: no published translation is held for this verse.

भूतभव्यभविष्यत्स्था तरुबीजे तरुर् यथा । तस्यास् सत्त्वम् असत्त्वं च न सन् नासद् इति स्थितम्

bhūtabhavyabhaviṣyatsthā tarubīje tarur yathā / tasyās sattvam asattvaṃ ca na san nāsad iti sthitam

Sanskrit only: no published translation is held for this verse.

सत् सद् एव हि संवित्तेर् असंवित्तेर् न सन्मयम् । नाविद्या विद्यते किञ्चित् तैलादि सिकतास्व् इव

sat sad eva hi saṃvitter asaṃvitter na sanmayam / nāvidyā vidyate kiñcit tailādi sikatāsv iva

Sanskrit only: no published translation is held for this verse.

हेम्नः किं कटुकत्वं तद् अन्यत् स्याद् धेमतां विना । अविद्ययात्मनो ऽच्छस्य सम्बन्धो नोपपद्यते

hemnaḥ kiṃ kaṭukatvaṃ tad anyat syād dhematāṃ vinā / avidyayātmano 'cchasya sambandho nopapadyate

Sanskrit only: no published translation is held for this verse.

सम्बन्धस् सदृशानां यस् स स्फुटस् सो ऽनुभूतिदः । जतुकाष्ठादिसम्बन्धो यस् स नो समयोर् अतः

sambandhas sadṛśānāṃ yas sa sphuṭas so 'nubhūtidaḥ / jatukāṣṭhādisambandho yas sa no samayor ataḥ

Sanskrit only: no published translation is held for this verse.

नान्योऽन्यानुभवात्मासौ तद् एकास्पदमात्रकम् । परमार्थमयं सर्वं यदा तेनोपलादयः

nānyo'nyānubhavātmāsau tad ekāspadamātrakam / paramārthamayaṃ sarvaṃ yadā tenopalādayaḥ

Sanskrit only: no published translation is held for this verse.

चिता समभिचेत्यन्ते सम्बन्धवशतस् समात् । यदा चिन्मात्रसन्मात्रमयास् सर्वे जगद्गताः

citā samabhicetyante sambandhavaśatas samāt / yadā cinmātrasanmātramayās sarve jagadgatāḥ

Sanskrit only: no published translation is held for this verse.

भावास् तदा विभान्त्य् एते मिथस् स्वानुभवस्थितौ । न सम्भवति सम्बन्धो विषमाणां निरन्तरः

bhāvās tadā vibhānty ete mithas svānubhavasthitau / na sambhavati sambandho viṣamāṇāṃ nirantaraḥ

Sanskrit only: no published translation is held for this verse.

न परस्परसम्बन्धाद् विनानुभवनं मिथः । सदृशे सदृशं वस्तु क्षणाद् गत्वैकताम् अलम्

na parasparasambandhād vinānubhavanaṃ mithaḥ / sadṛśe sadṛśaṃ vastu kṣaṇād gatvaikatām alam

Sanskrit only: no published translation is held for this verse.

रूपम् आस्फारयत्य् एकम् एकत्वाद् एव नान्यथा । चिच् चिता मिलिता दृश्यरूपयोदेति चेतनम्

rūpam āsphārayaty ekam ekatvād eva nānyathā / cic citā militā dṛśyarūpayodeti cetanam

Sanskrit only: no published translation is held for this verse.

जडं जडेन मिलितं जडं सम्पद्यते घनम् । न च चिज्जडयोर् ऐक्यं वैलक्षण्यात् क्वचिद् भवेत्

jaḍaṃ jaḍena militaṃ jaḍaṃ sampadyate ghanam / na ca cijjaḍayor aikyaṃ vailakṣaṇyāt kvacid bhavet

Sanskrit only: no published translation is held for this verse.

चिज्जडौ चेत् स्त एकत्र न तौ सम्मिलतः क्वचित् । चिन्मयत्वाच् चिदालेहे चिदालेहेन वेदनम्

cijjaḍau cet sta ekatra na tau sammilataḥ kvacit / cinmayatvāc cidālehe cidālehena vedanam

Sanskrit only: no published translation is held for this verse.

दारुपाषाणभेदानां न तु ह्य् एते चिदात्मकाः । पदार्थो हि पदार्थेन परिणम्यानुभूयते

dārupāṣāṇabhedānāṃ na tu hy ete cidātmakāḥ / padārtho hi padārthena pariṇamyānubhūyate

Sanskrit only: no published translation is held for this verse.

जिह्वयेव रसस् सा च सजातीयोदया चला । ऐक्यं च विद्धि सम्बन्धं नास्त्य् असारससारयोः

jihvayeva rasas sā ca sajātīyodayā calā / aikyaṃ ca viddhi sambandhaṃ nāsty asārasasārayoḥ

Sanskrit only: no published translation is held for this verse.

जडचेतनयोस् तेन नोपलादि जडं मतम् । चिद् एवोपलकुड्यादिरूपिणी मिलिता चिता

jaḍacetanayos tena nopalādi jaḍaṃ matam / cid evopalakuḍyādirūpiṇī militā citā

Sanskrit only: no published translation is held for this verse.

एकीभावं गता द्रष्टृदृश्यादि कुरुते भ्रमम् । काष्ठोपलाद्य् अशेषं हि परमार्थमयं यदा

ekībhāvaṃ gatā draṣṭṛdṛśyādi kurute bhramam / kāṣṭhopalādy aśeṣaṃ hi paramārthamayaṃ yadā

Sanskrit only: no published translation is held for this verse.

तदात्मनान्तस्सम्बद्धं दृश्यत्वेनोपलभ्यते । सर्वं सर्वप्रकाराढ्यम् अनन्तम् इव यत् ततम्

tadātmanāntassambaddhaṃ dṛśyatvenopalabhyate / sarvaṃ sarvaprakārāḍhyam anantam iva yat tatam

Sanskrit only: no published translation is held for this verse.

विश्वं सन्मात्रम् एवैतद् विद्धि तत्त्वविदां वर । असताप्य् अङ्ग विश्वेन विश्वलक्षशतभ्रमैः

viśvaṃ sanmātram evaitad viddhi tattvavidāṃ vara / asatāpy aṅga viśvena viśvalakṣaśatabhramaiḥ

Sanskrit only: no published translation is held for this verse.

पूरितश् चिच्चमत्कारो न च किञ्चन पूरितम् । सङ्कल्पनगरा नॄणां मिथः पश्यति नो यथा

pūritaś ciccamatkāro na ca kiñcana pūritam / saṅkalpanagarā nṝṇāṃ mithaḥ paśyati no yathā

Sanskrit only: no published translation is held for this verse.

न देशकालबोधाय तथा सर्गाश् चिति स्थिताः । भेदबोधो हि सर्गत्वम् अहन्तादिभ्रमोदयः

na deśakālabodhāya tathā sargāś citi sthitāḥ / bhedabodho hi sargatvam ahantādibhramodayaḥ

Sanskrit only: no published translation is held for this verse.

हेमसंवित्परित्यागे कटकादिभ्रमो यथा । कटकादिभ्रमो हेम्नि देशादेस् सम्भवाद् भवेत्

hemasaṃvitparityāge kaṭakādibhramo yathā / kaṭakādibhramo hemni deśādes sambhavād bhavet

Sanskrit only: no published translation is held for this verse.

त्वद्दर्शनपरीतात् तु नाविद्यास्ति पृथक् परा । कटकादिमहाभेदम् एकं ब्रह्म तथामलम्

tvaddarśanaparītāt tu nāvidyāsti pṛthak parā / kaṭakādimahābhedam ekaṃ brahma tathāmalam

Sanskrit only: no published translation is held for this verse.

बोधैकत्वाद् अयं सर्गस् सत्तैवासद् भवत्य् अलम् । सेना मृत्संविदा चित्रा मृण्मात्रम् इव मृण्मयी

bodhaikatvād ayaṃ sargas sattaivāsad bhavaty alam / senā mṛtsaṃvidā citrā mṛṇmātram iva mṛṇmayī

Sanskrit only: no published translation is held for this verse.

जलम् एकं तरङ्गादि दार्व् एकं सालभञ्जिकाः । मृण्मात्रम् एकं कुम्भादि ब्रह्मैकं त्रिजगद्भ्रमः

jalam ekaṃ taraṅgādi dārv ekaṃ sālabhañjikāḥ / mṛṇmātram ekaṃ kumbhādi brahmaikaṃ trijagadbhramaḥ

Sanskrit only: no published translation is held for this verse.

सम्बन्धे द्रष्टृदृश्यानां मध्ये द्रष्टुर् हि यद् वपुः । द्रष्टृदर्शनदृश्यादिवर्जितं तद् इदं परम्

sambandhe draṣṭṛdṛśyānāṃ madhye draṣṭur hi yad vapuḥ / draṣṭṛdarśanadṛśyādivarjitaṃ tad idaṃ param

Sanskrit only: no published translation is held for this verse.

देशाद् देशं गते चित्ते मध्ये यश् चेतसो वपुः । अजाड्यसंविन्मननं तन्मयो भव सर्वदा

deśād deśaṃ gate citte madhye yaś cetaso vapuḥ / ajāḍyasaṃvinmananaṃ tanmayo bhava sarvadā

Sanskrit only: no published translation is held for this verse.

अजाग्रत्स्वप्ननिद्रस्य यत् ते रूपं सनातनम् । अचेतनं चाजडं च तन्मयो भव सर्वदा

ajāgratsvapnanidrasya yat te rūpaṃ sanātanam / acetanaṃ cājaḍaṃ ca tanmayo bhava sarvadā

Sanskrit only: no published translation is held for this verse.

जडतां वर्जयित्वैकां शिलाया हृदयं हि यत् । अक्षुब्धो वाथवा क्षुब्धस् तन्मयो भव राघव

jaḍatāṃ varjayitvaikāṃ śilāyā hṛdayaṃ hi yat / akṣubdho vāthavā kṣubdhas tanmayo bhava rāghava

Sanskrit only: no published translation is held for this verse.

कस्यचित् किञ्चनापीह नोदेति न विलीयते । अक्षुब्धो वाथवा क्षुब्धस् स्वस्थस् तिष्ठ यथासुखम्

kasyacit kiñcanāpīha nodeti na vilīyate / akṣubdho vāthavā kṣubdhas svasthas tiṣṭha yathāsukham

Sanskrit only: no published translation is held for this verse.

नाभिवाञ्छति न द्वेष्टि देहे किञ्चित् क्वचित् पुमान् । स्वस्थस् तिष्ठ निराशङ्कं देहवृत्तिम् उपागतः

nābhivāñchati na dveṣṭi dehe kiñcit kvacit pumān / svasthas tiṣṭha nirāśaṅkaṃ dehavṛttim upāgataḥ

Sanskrit only: no published translation is held for this verse.

भविष्यद्ग्रामकग्राम्यकार्ये तिष्ठसि नो यथा । चित्तवृत्तिषु मा तिष्ठ तथा तथ्यात्मतां गतः

bhaviṣyadgrāmakagrāmyakārye tiṣṭhasi no yathā / cittavṛttiṣu mā tiṣṭha tathā tathyātmatāṃ gataḥ

Sanskrit only: no published translation is held for this verse.

यथा देशान्तरनरो यथा काष्ठं यथोपलः । तथैव पश्य चित्तं त्वम् अचित्तैव यथात्मता

yathā deśāntaranaro yathā kāṣṭhaṃ yathopalaḥ / tathaiva paśya cittaṃ tvam acittaiva yathātmatā

Sanskrit only: no published translation is held for this verse.

यथा दृषदि नास्त्य् अम्बु यथाम्भस्य् अनलस् तथा । स्वात्मन्य् एवास्ति नो चित्तं परमात्मनि तत् कुतः

yathā dṛṣadi nāsty ambu yathāmbhasy analas tathā / svātmany evāsti no cittaṃ paramātmani tat kutaḥ

Sanskrit only: no published translation is held for this verse.

प्रेक्ष्यमाणं न यत् किञ्चित् तेन यत् क्रियते क्वचित् । कृतं भवति तन् नेति मत्वा चित्तातिगो भव

prekṣyamāṇaṃ na yat kiñcit tena yat kriyate kvacit / kṛtaṃ bhavati tan neti matvā cittātigo bhava

Sanskrit only: no published translation is held for this verse.

अत्यन्तानात्मभूतस्य चेच् चित्तस्यानुवर्तसे । पर्यन्तवासिनः कस्मान् न म्लेच्छस्यानुवर्तसे

atyantānātmabhūtasya cec cittasyānuvartase / paryantavāsinaḥ kasmān na mlecchasyānuvartase

Sanskrit only: no published translation is held for this verse.

निरन्तरम् अनादृत्य त्वम् आराच् चित्तपुक्कसम् । स्वस्थम् आस्स्व निराशङ्कं पङ्केनेव कृतो जडः

nirantaram anādṛtya tvam ārāc cittapukkasam / svastham āssva nirāśaṅkaṃ paṅkeneva kṛto jaḍaḥ

Sanskrit only: no published translation is held for this verse.

चित्तं नास्त्य् एव मे भूतं मृतम् एवाद्य वेति च । भव निश्चयवान् भूत्वा शिलापुरुषनिश्चलः

cittaṃ nāsty eva me bhūtaṃ mṛtam evādya veti ca / bhava niścayavān bhūtvā śilāpuruṣaniścalaḥ

Sanskrit only: no published translation is held for this verse.

प्रेक्षायाम् अस्ति नो चित्तं तद्विहीनो ऽसि तत्त्वतः । तत् किमर्थम् अनर्थेन तदर्थेन कदर्थ्यसे

prekṣāyām asti no cittaṃ tadvihīno 'si tattvataḥ / tat kimartham anarthena tadarthena kadarthyase

Sanskrit only: no published translation is held for this verse.

असता चित्तयक्षेण ये ऽथवातिवशीकृताः । तेषां पेलवबुद्धीनां चन्द्राद् अशनिर् उत्थिता

asatā cittayakṣeṇa ye 'thavātivaśīkṛtāḥ / teṣāṃ pelavabuddhīnāṃ candrād aśanir utthitā

Sanskrit only: no published translation is held for this verse.

चित्तं दूरे परित्यज्य यो ऽसि सो ऽसि स्थिरो भव । भव भावनया मुक्तो युक्त्या परमयान्वितः

cittaṃ dūre parityajya yo 'si so 'si sthiro bhava / bhava bhāvanayā mukto yuktyā paramayānvitaḥ

Sanskrit only: no published translation is held for this verse.

असतो ये ऽनुवर्तन्ते चेतसो ऽसत्त्वरूपिणः । व्योमकाननकर्मैकनीतकालान् धिग् अस्तु तान्

asato ye 'nuvartante cetaso 'sattvarūpiṇaḥ / vyomakānanakarmaikanītakālān dhig astu tān

Sanskrit only: no published translation is held for this verse.

व्यपगलितमना महानुभावो भव भवपारम् उपागतामलात्मा । सुचिरम् अपि विचारितं न लब्धमलम् अलम् आत्मनि मानसात्म किञ्चित्

vyapagalitamanā mahānubhāvo bhava bhavapāram upāgatāmalātmā / suciram api vicāritaṃ na labdhamalam alam ātmani mānasātma kiñcit

Sanskrit only: no published translation is held for this verse.