Moksopaya with Bhaskarakantha's Tika 3.19

वित्तवेशवयःकर्मविद्याविभवचेष्टितैः । वसिष्ठस्येव सदृशो न तु वासिष्ठचेतनः

vittaveśavayaḥkarmavidyāvibhavaceṣṭitaiḥ / vasiṣṭhasyeva sadṛśo na tu vāsiṣṭhacetanaḥ

Sanskrit only: no published translation is held for this verse.

वसिष्ठ इति नाम्नाभूत् तस्याभूद् इन्दुसुन्दरी । नाम्ना त्व् अरुन्धती भार्या भूमिव्योमन्य् अरुन्धती

vasiṣṭha iti nāmnābhūt tasyābhūd indusundarī / nāmnā tv arundhatī bhāryā bhūmivyomany arundhatī

Sanskrit only: no published translation is held for this verse.

वित्तवेशवयःकर्मविद्याविभवचेष्टितैः । समेव साप्य् अरुन्धत्या न तु चेतनसत्तया

vittaveśavayaḥkarmavidyāvibhavaceṣṭitaiḥ / sameva sāpy arundhatyā na tu cetanasattayā

Sanskrit only: no published translation is held for this verse.

अकृत्रिमप्रेमरसा विलासालसगामिनी । सास्य संसारसर्वस्वम् आसीत् कुमुदहासिनी

akṛtrimapremarasā vilāsālasagāminī / sāsya saṃsārasarvasvam āsīt kumudahāsinī

Sanskrit only: no published translation is held for this verse.

स विप्रस् तस्य शैलस्य सानौ सरसशाद्वले । कदाचिद् उपविष्टस् सन् ददर्शाधो महीपतिम्

sa vipras tasya śailasya sānau sarasaśādvale / kadācid upaviṣṭas san dadarśādho mahīpatim

Sanskrit only: no published translation is held for this verse.

समग्रपरिवारेण यान्तम् आखेटकेच्छया । महता सैन्यघोषेण मेरोर् इव बिभित्सया

samagraparivāreṇa yāntam ākheṭakecchayā / mahatā sainyaghoṣeṇa meror iva bibhitsayā

Sanskrit only: no published translation is held for this verse.

चामरैः कीर्णचन्द्रांशु पताकाभिर् लतावनम् । कुर्वाणं खं सितच्छत्रमण्डलै रौप्यकुट्टिमम्

cāmaraiḥ kīrṇacandrāṃśu patākābhir latāvanam / kurvāṇaṃ khaṃ sitacchatramaṇḍalai raupyakuṭṭimam

Sanskrit only: no published translation is held for this verse.

अश्वीयाग्निपृषत्पूरपूर्णरेण्वभ्रवर्णवत् । हास्तिकोत्तम्भितकरवाटाट्टालकगोपितम्

aśvīyāgnipṛṣatpūrapūrṇareṇvabhravarṇavat / hāstikottambhitakaravāṭāṭṭālakagopitam

Sanskrit only: no published translation is held for this verse.

महाकलकलावर्तद्रवद्दिग्भूतमण्डलम् । कचत्काञ्चनमाणिक्यहारकेयूरकुण्डलम्

mahākalakalāvartadravaddigbhūtamaṇḍalam / kacatkāñcanamāṇikyahārakeyūrakuṇḍalam

Sanskrit only: no published translation is held for this verse.

तम् आलोक्य महीपालम् इदं चिन्तितवान् असौ । अहो नु रम्या नृपता सर्वसौभाग्यभासिता

tam ālokya mahīpālam idaṃ cintitavān asau / aho nu ramyā nṛpatā sarvasaubhāgyabhāsitā

Sanskrit only: no published translation is held for this verse.

पदातिरथहस्त्यश्वपताकाच्छत्रचामरैः । कदा स्यां दशदिक्कुञ्जपूरको ऽहं महीपतिः

padātirathahastyaśvapatākācchatracāmaraiḥ / kadā syāṃ daśadikkuñjapūrako 'haṃ mahīpatiḥ

Sanskrit only: no published translation is held for this verse.

कदा मे वायवः कुन्दमकरन्दसुगन्धयः । पास्यन्त्य् अन्तःपुरस्त्रीणां सुरतश्रमशीकरान्

kadā me vāyavaḥ kundamakarandasugandhayaḥ / pāsyanty antaḥpurastrīṇāṃ surataśramaśīkarān

Sanskrit only: no published translation is held for this verse.

कर्पूरेण पुरन्ध्रीणां कीर्णेन यशसा दिशाम् । इन्दूदयावदातानि कदा कुर्यां मुखान्य् अहम्

karpūreṇa purandhrīṇāṃ kīrṇena yaśasā diśām / indūdayāvadātāni kadā kuryāṃ mukhāny aham

Sanskrit only: no published translation is held for this verse.

इत्थं ततःप्रभृत्य् एव विप्रस् सङ्कल्पवान् अभूत् । स्वधर्मनिरतो नित्यं यावज्जीवम् अतन्द्रितः

itthaṃ tataḥprabhṛty eva vipras saṅkalpavān abhūt / svadharmanirato nityaṃ yāvajjīvam atandritaḥ

Sanskrit only: no published translation is held for this verse.

हिमाशनिर् इवाम्भोजं जर्जरीकर्तुम् आदृता । जरा हार्दान्वितेवैनं जवाद् द्विजम् उपाययौ

himāśanir ivāmbhojaṃ jarjarīkartum ādṛtā / jarā hārdānvitevainaṃ javād dvijam upāyayau

Sanskrit only: no published translation is held for this verse.

आसन्नमरणस्यात्र भार्या म्लानिम् उपाययौ । तस्य शाम्यति पुष्पर्तौ लतेव ग्रीष्मभीतितः

āsannamaraṇasyātra bhāryā mlānim upāyayau / tasya śāmyati puṣpartau lateva grīṣmabhītitaḥ

Sanskrit only: no published translation is held for this verse.

माम् अथाराधितवती सा ततस् त्वम् इवाङ्गना । अमरत्वं सुदुष्प्रापं बुद्ध्वेमं सावृणोद् वरम्

mām athārādhitavatī sā tatas tvam ivāṅganā / amaratvaṃ suduṣprāpaṃ buddhvemaṃ sāvṛṇod varam

Sanskrit only: no published translation is held for this verse.

देवि स्वमण्डपाद् एव जीवो भर्तुर् मृतस्य मे । मा यासीद् इत्य् अतस् तस्यास् स एवाङ्गीकृतो मया

devi svamaṇḍapād eva jīvo bhartur mṛtasya me / mā yāsīd ity atas tasyās sa evāṅgīkṛto mayā

Sanskrit only: no published translation is held for this verse.

अथ कालवशाद् विप्रस् स पञ्चत्वम् उपाययौ । तस्मिन्न् एव गृहाकाशे जीवाकाशतया स्थितः

atha kālavaśād vipras sa pañcatvam upāyayau / tasminn eva gṛhākāśe jīvākāśatayā sthitaḥ

Sanskrit only: no published translation is held for this verse.

सम्पन्नः प्राक्तनानल्पसङ्कल्पवशतस् स्वयम् । आकाशवपुर् एवोर्वीपतिः परमशक्तिमान्

sampannaḥ prāktanānalpasaṅkalpavaśatas svayam / ākāśavapur evorvīpatiḥ paramaśaktimān

Sanskrit only: no published translation is held for this verse.

प्रभावाज् जितभूपीठः प्रतापाक्रान्तविष्टपः । कृपापालितपातालस् त्रिलोकविजयी नृपः

prabhāvāj jitabhūpīṭhaḥ pratāpākrāntaviṣṭapaḥ / kṛpāpālitapātālas trilokavijayī nṛpaḥ

Sanskrit only: no published translation is held for this verse.

कालाग्निर् अरिपक्षाणां स्त्रीणां मकरकेतनः । मेरुर् विषयवायूनां साध्वब्जानां दिवाकरः

kālāgnir aripakṣāṇāṃ strīṇāṃ makaraketanaḥ / merur viṣayavāyūnāṃ sādhvabjānāṃ divākaraḥ

Sanskrit only: no published translation is held for this verse.

आदर्शस् सर्वशास्त्राणाम् अर्थिनां कल्पपादपः । पादपीठं द्विजाग्र्याणां राका धर्मामृतत्विषः

ādarśas sarvaśāstrāṇām arthināṃ kalpapādapaḥ / pādapīṭhaṃ dvijāgryāṇāṃ rākā dharmāmṛtatviṣaḥ

Sanskrit only: no published translation is held for this verse.

स्वगृहाभ्यन्तराकाशे चित्ताकाशमयात्मनि । तस्मिन् द्विजे शवीभूते भूताकाशशरीरिणि

svagṛhābhyantarākāśe cittākāśamayātmani / tasmin dvije śavībhūte bhūtākāśaśarīriṇi

Sanskrit only: no published translation is held for this verse.

सा तस्य ब्राह्मणी भार्या शोकेणात्यन्तकर्षिता । शुष्केव माषशिमिका हृदयेन द्विधागमत्

sā tasya brāhmaṇī bhāryā śokeṇātyantakarṣitā / śuṣkeva māṣaśimikā hṛdayena dvidhāgamat

Sanskrit only: no published translation is held for this verse.

भर्त्रा सह शवीभूता देहम् उत्सृज्य दूरतः । आतिवाहिकदेहेन भर्तारं समुपाययौ

bhartrā saha śavībhūtā deham utsṛjya dūrataḥ / ātivāhikadehena bhartāraṃ samupāyayau

Sanskrit only: no published translation is held for this verse.

नदी निखातम् इव तं भर्तारम् अनुसृत्य सा । आजगाम विशोकत्वं सवसन्तेव मञ्जरी

nadī nikhātam iva taṃ bhartāram anusṛtya sā / ājagāma viśokatvaṃ savasanteva mañjarī

Sanskrit only: no published translation is held for this verse.

तत्रास्य विप्रस्य सुता गृहाणि भूस्थावरादीनि घनानि सन्ति । अद्याष्टमं वासरम् आप्तमृत्योर् जीवो गिरिग्रामकमन्दिरस्थः

tatrāsya viprasya sutā gṛhāṇi bhūsthāvarādīni ghanāni santi / adyāṣṭamaṃ vāsaram āptamṛtyor jīvo girigrāmakamandirasthaḥ

Sanskrit only: no published translation is held for this verse.