Moksopaya with Bhaskarakantha's Tika 3.32

अथ वीरवरोत्कण्ठनृत्यदप्सरसि स्थिता । लीला विलोकयाम् आस व्योम्नि विद्यान्वितावनौ

atha vīravarotkaṇṭhanṛtyadapsarasi sthitā / līlā vilokayām āsa vyomni vidyānvitāvanau

Sanskrit only: no published translation is held for this verse.

सुराष्ट्रमण्डले भर्तृपालिते वनमालिते । कस्मिंश्चिद् विततारण्ये द्वितीयाकाशभीषणे

surāṣṭramaṇḍale bhartṛpālite vanamālite / kasmiṃścid vitatāraṇye dvitīyākāśabhīṣaṇe

Sanskrit only: no published translation is held for this verse.

सेनाद्वितयम् अक्षुब्धं सौम्याब्धिद्वितयोपमम् । महारम्भघनं मत्तं स्थिरं राजद्वयान्वितम्

senādvitayam akṣubdhaṃ saumyābdhidvitayopamam / mahārambhaghanaṃ mattaṃ sthiraṃ rājadvayānvitam

Sanskrit only: no published translation is held for this verse.

युद्धसज्जं सुसन्नद्धसिद्धम् अग्निम् इवाहुतम् । पूर्वप्रहारसम्पातप्रेक्षाक्षुब्धाक्षिलक्षकम्

yuddhasajjaṃ susannaddhasiddham agnim ivāhutam / pūrvaprahārasampātaprekṣākṣubdhākṣilakṣakam

Sanskrit only: no published translation is held for this verse.

उद्यतामलनिस्त्रिंशधारासारब्रुडज्जनम् । कचत्परश्वधप्रासभिण्डिपालर्द्धिसङ्कुलम्

udyatāmalanistriṃśadhārāsārabruḍajjanam / kacatparaśvadhaprāsabhiṇḍipālarddhisaṅkulam

Sanskrit only: no published translation is held for this verse.

गरुत्मत्पक्षविक्षुब्धवनसम्पातकम्पितम् । उद्यद्दिनकरालोककचत्कनककङ्कटम्

garutmatpakṣavikṣubdhavanasampātakampitam / udyaddinakarālokakacatkanakakaṅkaṭam

Sanskrit only: no published translation is held for this verse.

परस्परमुखालोककोपप्रोद्धासितायुधम् । अन्योऽन्यबद्धदृष्टित्वाच् चित्रभित्ताव् इवार्पितम्

parasparamukhālokakopaproddhāsitāyudham / anyo'nyabaddhadṛṣṭitvāc citrabhittāv ivārpitam

Sanskrit only: no published translation is held for this verse.

लेखामर्यादया दीर्घबद्धया स्थापितस्थिति । अनिवार्यमहाहार्यझाङ्काराश्रुतसङ्कथम्

lekhāmaryādayā dīrghabaddhayā sthāpitasthiti / anivāryamahāhāryajhāṅkārāśrutasaṅkatham

Sanskrit only: no published translation is held for this verse.

पूर्वप्रहारस्मयतश् चिरसंशान्तदुन्दुभि । निबद्धयोधसंस्थाननिश्चलानीकमन्थरम्

pūrvaprahārasmayataś cirasaṃśāntadundubhi / nibaddhayodhasaṃsthānaniścalānīkamantharam

Sanskrit only: no published translation is held for this verse.

धनुर्द्वितयमात्रात्मशून्यमध्यैकसेतुना । विभक्तं कल्पवातेन मत्तम् एकार्णवं यथा

dhanurdvitayamātrātmaśūnyamadhyaikasetunā / vibhaktaṃ kalpavātena mattam ekārṇavaṃ yathā

Sanskrit only: no published translation is held for this verse.

कार्यसङ्कटसंरम्भचिन्तापरवशेश्वरम् । रववद्भेककण्ठत्वग्भङ्गुरातुरहृद्गुहम्

kāryasaṅkaṭasaṃrambhacintāparavaśeśvaram / ravavadbhekakaṇṭhatvagbhaṅgurāturahṛdguham

Sanskrit only: no published translation is held for this verse.

प्राणसर्वस्वसन्न्याससोद्योगासङ्ख्यसैनिकम् । कर्णस्थसशरज्यौघत्यागोन्मुखधनुर्धरम्

prāṇasarvasvasannyāsasodyogāsaṅkhyasainikam / karṇasthasaśarajyaughatyāgonmukhadhanurdharam

Sanskrit only: no published translation is held for this verse.

प्रहारपातसम्प्रेक्षानिस्स्पन्दासङ्ख्यसैनिकम् । अन्योऽन्योत्कटकाठिन्यभटभ्रूकुटिसङ्कटम्

prahārapātasamprekṣānisspandāsaṅkhyasainikam / anyo'nyotkaṭakāṭhinyabhaṭabhrūkuṭisaṅkaṭam

Sanskrit only: no published translation is held for this verse.

परस्परांससङ्घट्टकटुटाङ्कारकङ्कटम् । वीरयोधदुराधर्षभीरुप्रोज्झितकोटरम्

parasparāṃsasaṅghaṭṭakaṭuṭāṅkārakaṅkaṭam / vīrayodhadurādharṣabhīruprojjhitakoṭaram

Sanskrit only: no published translation is held for this verse.

मिथस्संस्थानकालोकमात्रसन्दिग्धजीवितम् । समस्ताङ्गरुहासक्तपांसुवृद्धाभमानवम्

mithassaṃsthānakālokamātrasandigdhajīvitam / samastāṅgaruhāsaktapāṃsuvṛddhābhamānavam

Sanskrit only: no published translation is held for this verse.

पूर्वप्रहारसम्प्रेक्षाव्यग्रप्राणितया तया । संशान्तकल्लोलरवं निद्रामुद्रपुरोपमम्

pūrvaprahārasamprekṣāvyagraprāṇitayā tayā / saṃśāntakallolaravaṃ nidrāmudrapuropamam

Sanskrit only: no published translation is held for this verse.

संशान्तशङ्खसङ्घाततूर्यनिर्ह्राददुन्दुभि । भूतलावशसंलीनसर्वपांसुपयोधरम्

saṃśāntaśaṅkhasaṅghātatūryanirhrādadundubhi / bhūtalāvaśasaṃlīnasarvapāṃsupayodharam

Sanskrit only: no published translation is held for this verse.

पलायनपरैः पश्चात् त्यक्तम् अङ्गुलम् अङ्गुलम् । विसारिमकरव्यूहमत्स्यसंस्थाब्धिभासुरम्

palāyanaparaiḥ paścāt tyaktam aṅgulam aṅgulam / visārimakaravyūhamatsyasaṃsthābdhibhāsuram

Sanskrit only: no published translation is held for this verse.

पताकामञ्जरीपुञ्जवीजितद्रुमनायकम् । हास्तिकोत्तम्भितकरकाननीकृतखान्तरम्

patākāmañjarīpuñjavījitadrumanāyakam / hāstikottambhitakarakānanīkṛtakhāntaram

Sanskrit only: no published translation is held for this verse.

तरत्तरलभापूरसपक्षसकलायुधम् । धमद् धम् इति शब्दैश् च श्वासोत्थैर् व्याप्तखान्तरम्

tarattaralabhāpūrasapakṣasakalāyudham / dhamad dham iti śabdaiś ca śvāsotthair vyāptakhāntaram

Sanskrit only: no published translation is held for this verse.

चक्रव्यूहकराक्रान्तदुर्वृत्तसुभटासुरम् । गरुडव्यूहसंरम्भविवलन्नागसञ्चयम्

cakravyūhakarākrāntadurvṛttasubhaṭāsuram / garuḍavyūhasaṃrambhavivalannāgasañcayam

Sanskrit only: no published translation is held for this verse.

श्येनव्यूहाविभिन्नोग्रसन्निवेशोन्नमद्ध्वनि । अन्योऽन्यस्फोटनिष्पेषप्रपतच्छूरवृन्दकम्

śyenavyūhāvibhinnograsanniveśonnamaddhvani / anyo'nyasphoṭaniṣpeṣaprapatacchūravṛndakam

Sanskrit only: no published translation is held for this verse.

विविधव्यूहविन्यासम् आन्तरारावभैरवम् । करप्रतोलनोल्लासमत्तमुद्गरमन्दिरम्

vividhavyūhavinyāsam āntarārāvabhairavam / karapratolanollāsamattamudgaramandiram

Sanskrit only: no published translation is held for this verse.

कृष्णायुधांशुजालेन श्यामीकृतदिवाकरम् । अनिलाधूतशल्मीलशूत्कराभशरध्वनि

kṛṣṇāyudhāṃśujālena śyāmīkṛtadivākaram / anilādhūtaśalmīlaśūtkarābhaśaradhvani

Sanskrit only: no published translation is held for this verse.

अनेककल्पकल्पान्तसधर्मम् इव संस्थितम् । प्रलयानिलसङ्क्षुब्धम् एकार्णवम् इवोत्थितम्

anekakalpakalpāntasadharmam iva saṃsthitam / pralayānilasaṅkṣubdham ekārṇavam ivotthitam

Sanskrit only: no published translation is held for this verse.

पातालकुहराक्षुब्धम् अन्धकारम् इवोत्थितम् । लोकालोकम् इवोन्मत्तनृत्तलोललसत्तटम् । महानरकसङ्घातं भित्त्वावनिम् इवोत्थितम्

pātālakuharākṣubdham andhakāram ivotthitam / lokālokam ivonmattanṛttalolalasattaṭam / mahānarakasaṅghātaṃ bhittvāvanim ivotthitam

Sanskrit only: no published translation is held for this verse.

आलोलकुन्तमुसुलासिपरश्वधांशुश्यामायमानम् इव सातपवारिपूरैः । एकार्णवं भुवनकोशम् इवाचिरेण कर्तुं समुद्यतम् अगाधम् अनन्तपूरैः

ālolakuntamusulāsiparaśvadhāṃśuśyāmāyamānam iva sātapavāripūraiḥ / ekārṇavaṃ bhuvanakośam ivācireṇa kartuṃ samudyatam agādham anantapūraiḥ

Sanskrit only: no published translation is held for this verse.