Moksopaya with Bhaskarakantha's Tika 3.65

एतस्मात् कारणाद् एवं मनः प्रथमम् उत्थितम् । मननात्मकम् आभोगि तत्स्थम् एव स्थितिं गतम्

etasmāt kāraṇād evaṃ manaḥ prathamam utthitam / mananātmakam ābhogi tatstham eva sthitiṃ gatam

Sanskrit only: no published translation is held for this verse.

भावाभावर्द्धिमद्दोलस् तेनायम् अवलोक्यते । सर्गस् सदसदाभासः पूर् गन्धर्वेच्छया यथा

bhāvābhāvarddhimaddolas tenāyam avalokyate / sargas sadasadābhāsaḥ pūr gandharvecchayā yathā

Sanskrit only: no published translation is held for this verse.

न कश्चिद् विद्यते भेदो द्वैतैक्यकलनात्मकः । ब्रह्मजीवमनोमायाकर्तृकर्मजगद्दृशाम्

na kaścid vidyate bhedo dvaitaikyakalanātmakaḥ / brahmajīvamanomāyākartṛkarmajagaddṛśām

Sanskrit only: no published translation is held for this verse.

अपारवानविस्तारसंवित्सलिलवल्गनैः । चिदेकार्णव एवायं स्वयम् आत्मा विजृम्भते

apāravānavistārasaṃvitsalilavalganaiḥ / cidekārṇava evāyaṃ svayam ātmā vijṛmbhate

Sanskrit only: no published translation is held for this verse.

असत्यम् अस्थैर्यवशात् सत्यं स्वप्रतिभासतः । यथा स्वप्नस् तथा चित्ते जगत् सदसदात्मकम्

asatyam asthairyavaśāt satyaṃ svapratibhāsataḥ / yathā svapnas tathā citte jagat sadasadātmakam

Sanskrit only: no published translation is held for this verse.

न सन् नासन्न् अयं जातश् चेतसो जागतो भ्रमः । ओषधीसमवायानाम् इन्द्रजालम् इवोत्थितम्

na san nāsann ayaṃ jātaś cetaso jāgato bhramaḥ / oṣadhīsamavāyānām indrajālam ivotthitam

Sanskrit only: no published translation is held for this verse.

दीर्घस् स्वप्नस् स्थितिं यातस् संसाराख्यो मनोवशात् । असम्यग्दर्शनात् स्थाणाव् इव पुम्प्रत्ययो मुधा

dīrghas svapnas sthitiṃ yātas saṃsārākhyo manovaśāt / asamyagdarśanāt sthāṇāv iva pumpratyayo mudhā

Sanskrit only: no published translation is held for this verse.

अनात्मालोकनाच् चित्तं चित्तत्वेनानुशोचति । वेतालकल्पनाद् बाल इव सङ्कल्पिते भये

anātmālokanāc cittaṃ cittatvenānuśocati / vetālakalpanād bāla iva saṅkalpite bhaye

Sanskrit only: no published translation is held for this verse.

अनाख्यस्य स्वरूपस्य सर्वांशातिगतात्मनः । चेत्योन्मुखतया चित्त्वं चित्त्वाज् जीवत्वकल्पनम्

anākhyasya svarūpasya sarvāṃśātigatātmanaḥ / cetyonmukhatayā cittvaṃ cittvāj jīvatvakalpanam

Sanskrit only: no published translation is held for this verse.

जीवत्वाद् अप्य् अहम्भावस् त्व् अहम्भावाच् च चित्तता । चित्तत्वाद् इन्द्रियादित्वं ततो देहादिविभ्रमः

jīvatvād apy ahambhāvas tv ahambhāvāc ca cittatā / cittatvād indriyāditvaṃ tato dehādivibhramaḥ

Sanskrit only: no published translation is held for this verse.

देहादिमोहतस् स्वर्गनरकौ मोक्षबन्धने । बीजाङ्कुरवद् आरम्भस् संरूढो देहकर्मणोः

dehādimohatas svarganarakau mokṣabandhane / bījāṅkuravad ārambhas saṃrūḍho dehakarmaṇoḥ

Sanskrit only: no published translation is held for this verse.

द्वैतं यथा नास्ति चिदात्मतत्त्वयोस् तथैव भेदो ऽस्ति न जीवचित्तयोः । यथैव भेदो ऽस्ति न जीवचित्तयोस् तथैव भेदो ऽस्ति न देहकर्मणोः

dvaitaṃ yathā nāsti cidātmatattvayos tathaiva bhedo 'sti na jīvacittayoḥ / yathaiva bhedo 'sti na jīvacittayos tathaiva bhedo 'sti na dehakarmaṇoḥ

Sanskrit only: no published translation is held for this verse.

कर्मैव देहो ननु देह एव चित्तं तद् एवाहम् इतीव जीवः । स जीव एवेश्वरचित् स आत्मा सर्वं शिवात् त्व् एकपदोत्थम् एतत्

karmaiva deho nanu deha eva cittaṃ tad evāham itīva jīvaḥ / sa jīva eveśvaracit sa ātmā sarvaṃ śivāt tv ekapadottham etat

Sanskrit only: no published translation is held for this verse.