Moksopaya with Bhaskarakantha's Tika 3.70

अथ वैडूर्यशृङ्गाभा सा महाकृष्णा राक्षसी । कज्जलाम्बुदलेखेव तानवं गन्तुम् उद्यता

atha vaiḍūryaśṛṅgābhā sā mahākṛṣṇā rākṣasī / kajjalāmbudalekheva tānavaṃ gantum udyatā

Sanskrit only: no published translation is held for this verse.

बभूवाभ्रोपमाकारत्यागे विटपिरूपिणी । पुम्प्रमाणा ततो ऽप्य् आसीत् ततो ऽभूद् धस्तमात्रकम्

babhūvābhropamākāratyāge viṭapirūpiṇī / pumpramāṇā tato 'py āsīt tato 'bhūd dhastamātrakam

Sanskrit only: no published translation is held for this verse.

ततः प्रादेशमात्राभा ततो ऽप्य् अङ्गुलरूपिणी । ततो माषशिमीतुल्या ततस् सूची बभूव ह

tataḥ prādeśamātrābhā tato 'py aṅgularūpiṇī / tato māṣaśimītulyā tatas sūcī babhūva ha

Sanskrit only: no published translation is held for this verse.

ततः कौशेयसूचीत्वं पद्मकेसरसुन्दरम् । प्राप्ता सा शिखराकारा सङ्कल्पाद्रिर् इवातता

tataḥ kauśeyasūcītvaṃ padmakesarasundaram / prāptā sā śikharākārā saṅkalpādrir ivātatā

Sanskrit only: no published translation is held for this verse.

रराज सूचिका कृष्णा श्लक्ष्णायसकलामयी । पुर्यष्टकेन वलिता व्योमगा वातवाहिनी

rarāja sūcikā kṛṣṇā ślakṣṇāyasakalāmayī / puryaṣṭakena valitā vyomagā vātavāhinī

Sanskrit only: no published translation is held for this verse.

सूचिर् दृश्यत एवासौ न त्व् अयो नाम विद्यते । संविद्भ्रमकलैवैषा स्वप्नसूचीव लक्ष्यते

sūcir dṛśyata evāsau na tv ayo nāma vidyate / saṃvidbhramakalaivaiṣā svapnasūcīva lakṣyate

Sanskrit only: no published translation is held for this verse.

रत्नसूचीव मसृणा मनोमननसंयुता । वैडूर्यरश्मिलेखेव दण्डसन्तानसुन्दरी

ratnasūcīva masṛṇā manomananasaṃyutā / vaiḍūryaraśmilekheva daṇḍasantānasundarī

Sanskrit only: no published translation is held for this verse.

कज्जलाम्भोजकिञ्जल्कलतेव पवनाहृता । सूक्ष्मरन्ध्रेक्षणस्वच्छदृष्टव्योमकनीनिका

kajjalāmbhojakiñjalkalateva pavanāhṛtā / sūkṣmarandhrekṣaṇasvacchadṛṣṭavyomakanīnikā

Sanskrit only: no published translation is held for this verse.

स्वमुखग्राह्यसूत्रेण श्लक्ष्णपुच्छशिखाणुना । दृश्या वैपुल्यशान्त्यर्थं परं मौनव्रतं गता

svamukhagrāhyasūtreṇa ślakṣṇapucchaśikhāṇunā / dṛśyā vaipulyaśāntyarthaṃ paraṃ maunavrataṃ gatā

Sanskrit only: no published translation is held for this verse.

सुदूराद् दीपवद् दृष्टं सुतन्मात्रत्वम् आगतम् । दूराद् एव मनोज्ञेन प्रोद्गिरन्ती मुखेन खम्

sudūrād dīpavad dṛṣṭaṃ sutanmātratvam āgatam / dūrād eva manojñena prodgirantī mukhena kham

Sanskrit only: no published translation is held for this verse.

कुञ्चितेक्षणसन्दृश्यदीर्घदीपांशुकोमला । सद्यस्स्नानसमुच्छूनभालबालविलासिनी

kuñcitekṣaṇasandṛśyadīrghadīpāṃśukomalā / sadyassnānasamucchūnabhālabālavilāsinī

Sanskrit only: no published translation is held for this verse.

तन्तुर् बिसाद् इवोड्डीना बाह्यसञ्चारकौतुकात् । ब्रह्मनाडिर् इवोद्युक्ता बहिर् इन्द्वंशसुन्दरी

tantur bisād ivoḍḍīnā bāhyasañcārakautukāt / brahmanāḍir ivodyuktā bahir indvaṃśasundarī

Sanskrit only: no published translation is held for this verse.

नियतेन्द्रियशक्तिस् स्वा जीवेनेव बहिष्कृता । बौद्धतीर्थिकविज्ञानसन्तानवद् अलक्षिता

niyatendriyaśaktis svā jīveneva bahiṣkṛtā / bauddhatīrthikavijñānasantānavad alakṣitā

Sanskrit only: no published translation is held for this verse.

शून्यसिद्धान्तशिसिका रन्ध्रानिललवाभया । क्षीणदीपांशुसूच्येव तीक्ष्णयानुपलभ्यया

śūnyasiddhāntaśisikā randhrānilalavābhayā / kṣīṇadīpāṃśusūcyeva tīkṣṇayānupalabhyayā

Sanskrit only: no published translation is held for this verse.

ग्रासार्थं सूचितां याता स चास्या नोपयुज्यते । विचारितं तया नैतद् अहो मौर्ख्यविजृम्भितम्

grāsārthaṃ sūcitāṃ yātā sa cāsyā nopayujyate / vicāritaṃ tayā naitad aho maurkhyavijṛmbhitam

Sanskrit only: no published translation is held for this verse.

साग्रा सञ्चिन्तयाम् आस न सूची तुच्छरूपताम् । चैत्तम् ईहितम् एवैकं पश्यन्त्य् आस्ते यथासुखम्

sāgrā sañcintayām āsa na sūcī tuccharūpatām / caittam īhitam evaikaṃ paśyanty āste yathāsukham

Sanskrit only: no published translation is held for this verse.

अविचार्यैव सूचित्वं तया मूढधियार्थितम् । नानार्थबुद्धेस् स्फुरति पूर्वापरविचारणा

avicāryaiva sūcitvaṃ tayā mūḍhadhiyārthitam / nānārthabuddhes sphurati pūrvāparavicāraṇā

Sanskrit only: no published translation is held for this verse.

सार्थक्रियो ऽग्र्यसामर्थ्यो याति भावनयान्यताम् । पदार्थो ऽभिमतार्थाढ्यां निश्श्वासेनेव दर्पणः

sārthakriyo 'gryasāmarthyo yāti bhāvanayānyatām / padārtho 'bhimatārthāḍhyāṃ niśśvāseneva darpaṇaḥ

Sanskrit only: no published translation is held for this verse.

सूचीभावं प्रपन्नायास् त्यजन्त्याः पीवरं वपुः । महामरणम् अप्य् अस्या राक्षस्यास् सुसुखं स्थितम्

sūcībhāvaṃ prapannāyās tyajantyāḥ pīvaraṃ vapuḥ / mahāmaraṇam apy asyā rākṣasyās susukhaṃ sthitam

Sanskrit only: no published translation is held for this verse.

एकवस्त्वनुरागाणाम् अहो नु विषमा गतिः । देहो ऽपि तृणवत् त्यक्तो राक्षस्या निजयेच्छया

ekavastvanurāgāṇām aho nu viṣamā gatiḥ / deho 'pi tṛṇavat tyakto rākṣasyā nijayecchayā

Sanskrit only: no published translation is held for this verse.

एकवस्त्वतिगर्वेण नश्यन्त्य् अन्या हि संविदः । राक्सस्या ग्रासगर्वेण देहनाशो ऽपि नेक्षितः

ekavastvatigarveṇa naśyanty anyā hi saṃvidaḥ / rāksasyā grāsagarveṇa dehanāśo 'pi nekṣitaḥ

Sanskrit only: no published translation is held for this verse.

नाशो ऽपि सुखयत्य् अज्ञम् एकवस्त्वतिरागिणम् । सूचीभूता विदेहापि परितुष्टैव राक्षसी

nāśo 'pi sukhayaty ajñam ekavastvatirāgiṇam / sūcībhūtā videhāpi parituṣṭaiva rākṣasī

Sanskrit only: no published translation is held for this verse.

अन्या बभूव तल्लग्ना सा तथा जीवसूचिका । व्योमात्मिका निराकारा व्योमवृत्तिशरीरका

anyā babhūva tallagnā sā tathā jīvasūcikā / vyomātmikā nirākārā vyomavṛttiśarīrakā

Sanskrit only: no published translation is held for this verse.

तेजस्तन्तुप्रवाहाभा प्राणतन्तुमयात्मिका । शूलसंवेदनाकारा तद्रन्ध्रार्कांशुसुन्दरी

tejastantupravāhābhā prāṇatantumayātmikā / śūlasaṃvedanākārā tadrandhrārkāṃśusundarī

Sanskrit only: no published translation is held for this verse.

पृथक्स्थेवासिधारा सा परमाण्वावलीव च । कौसुमी गन्धलेखेव कलाकलनरूपिणी

pṛthaksthevāsidhārā sā paramāṇvāvalīva ca / kausumī gandhalekheva kalākalanarūpiṇī

Sanskrit only: no published translation is held for this verse.

पापात्मिका मनोवृत्तिस् सा हि तस्यास् तथा स्थिता । परप्राणदशावेधपरमार्थपरायणा

pāpātmikā manovṛttis sā hi tasyās tathā sthitā / paraprāṇadaśāvedhaparamārthaparāyaṇā

Sanskrit only: no published translation is held for this verse.

एवम् अस्यास् तनुर् जाता सूचिद्वयमयी हि सा । नीवारशूकवत् तन्वी कर्पासांशुसुपेलवा

evam asyās tanur jātā sūcidvayamayī hi sā / nīvāraśūkavat tanvī karpāsāṃśusupelavā

Sanskrit only: no published translation is held for this verse.

तनुद्वयेन तेनासौ प्रविश्य हृदयं नृणाम् । वेधयन्ती ततः क्रूरा प्रबभ्राम दिशो दश

tanudvayena tenāsau praviśya hṛdayaṃ nṛṇām / vedhayantī tataḥ krūrā prababhrāma diśo daśa

Sanskrit only: no published translation is held for this verse.

सर्वस् स्वसङ्कल्पवशाल् लघुर् भवति वा गुरुः । कर्कट्योग्रं वपुस् त्यक्त्वा सूचीत्वम् उररीकृतम्

sarvas svasaṅkalpavaśāl laghur bhavati vā guruḥ / karkaṭyograṃ vapus tyaktvā sūcītvam urarīkṛtam

Sanskrit only: no published translation is held for this verse.

तुच्छो ऽप्य् अर्थो ऽल्पसत्त्वानां यात्य् अतिप्रार्थनीयताम् । सूचीवृत्तपिशाचीत्वं राक्षस्या तपसार्जितम्

tuccho 'py artho 'lpasattvānāṃ yāty atiprārthanīyatām / sūcīvṛttapiśācītvaṃ rākṣasyā tapasārjitam

Sanskrit only: no published translation is held for this verse.

अपि पुण्यशरीराणां जातिबन्धो न शाम्यति । अनुसूचि पिशाचीत्वं राक्षस्या समुपार्जितम्

api puṇyaśarīrāṇāṃ jātibandho na śāmyati / anusūci piśācītvaṃ rākṣasyā samupārjitam

Sanskrit only: no published translation is held for this verse.

तस्यां दिगन्तभ्रमणे प्रवृत्तायां सहानिलैः । तत्रैव सा तनुस् स्थूला गलिता शारदाभ्रवत्

tasyāṃ digantabhramaṇe pravṛttāyāṃ sahānilaiḥ / tatraiva sā tanus sthūlā galitā śāradābhravat

Sanskrit only: no published translation is held for this verse.

कस्यचिद् विवशाङ्गस्य क्षीवस्य विपुलस्य वा । प्रविश्यान्तर् वातसूची भवत्य् अति विषूचिका

kasyacid vivaśāṅgasya kṣīvasya vipulasya vā / praviśyāntar vātasūcī bhavaty ati viṣūcikā

Sanskrit only: no published translation is held for this verse.

कस्यचित् तनुदेहस्य स्वच्छस्य सुधियो ऽपि च । प्रविश्य जीवसूचित्वे भवत्य् अन्तर् विषूचिका

kasyacit tanudehasya svacchasya sudhiyo 'pi ca / praviśya jīvasūcitve bhavaty antar viṣūcikā

Sanskrit only: no published translation is held for this verse.

एवं क्वचित् तृप्यति सा दुर्बुद्धिहृदयस्थिता । क्वचिद् उच्छिद्यते पुण्यैर् मन्त्रौषधिकृतक्रमैः

evaṃ kvacit tṛpyati sā durbuddhihṛdayasthitā / kvacid ucchidyate puṇyair mantrauṣadhikṛtakramaiḥ

Sanskrit only: no published translation is held for this verse.

आसीद् बहूनि वर्षाणि भ्रमणैकपरायणा । देहद्वयेन गच्छन्ती व्योम्नि भूमितले तथा

āsīd bahūni varṣāṇi bhramaṇaikaparāyaṇā / dehadvayena gacchantī vyomni bhūmitale tathā

Sanskrit only: no published translation is held for this verse.

रजस्तिरोहिता भूमौ हस्ते ऽङ्गुलितिरोहिता । प्रभातिरोहिता व्योम्नि वस्त्रे सूत्रतिरोहिता

rajastirohitā bhūmau haste 'ṅgulitirohitā / prabhātirohitā vyomni vastre sūtratirohitā

Sanskrit only: no published translation is held for this verse.

अन्तस्स्था स्नायुसरिति दुर्भगे पांसुपाण्डुनि । शुष्करेखासरित्खाते सूक्ष्मरेखाजरत्तृणे

antassthā snāyusariti durbhage pāṃsupāṇḍuni / śuṣkarekhāsaritkhāte sūkṣmarekhājarattṛṇe

Sanskrit only: no published translation is held for this verse.

अर्थहीने गतच्छाये शून्ये उच्छ्वासकारिणि । मक्षिकावातहरणे श्रीवृक्षपरिवर्जिते

arthahīne gatacchāye śūnye ucchvāsakāriṇi / makṣikāvātaharaṇe śrīvṛkṣaparivarjite

Sanskrit only: no published translation is held for this verse.

स्थूलास्थिग्रन्थिवलिते नित्यकम्पस्फुरत्तले । अनात्मीयाच्छनीहारशुद्धांशुककृतभ्रमे

sthūlāsthigranthivalite nityakampasphurattale / anātmīyācchanīhāraśuddhāṃśukakṛtabhrame

Sanskrit only: no published translation is held for this verse.

किणस्थाण्वग्रविश्रान्तमक्षिकाविङ्कवायसे । रौक्ष्यरूढरसद्वाते विलोलाङ्गुलिशाखिनि

kiṇasthāṇvagraviśrāntamakṣikāviṅkavāyase / raukṣyarūḍharasadvāte vilolāṅguliśākhini

Sanskrit only: no published translation is held for this verse.

मलाभ्रलेखासंसारे स्वाङ्गुलिव्रणगर्तके । स्वेदावश्यायदुष्ष्ठ्यूते पर्ववाल्मीकपर्वते

malābhralekhāsaṃsāre svāṅgulivraṇagartake / svedāvaśyāyaduṣṣṭhyūte parvavālmīkaparvate

Sanskrit only: no published translation is held for this verse.

कचत्पांसुजलभ्रान्तौ नखाजगरकर्कशे । क्वचित् क्वचित् सरिद्भीतभीतयूकाकुपान्थके

kacatpāṃsujalabhrāntau nakhājagarakarkaśe / kvacit kvacit saridbhītabhītayūkākupānthake

Sanskrit only: no published translation is held for this verse.

विरला शुष्कसन्दृष्टपिटकापूतपल्वले । मध्यस्थलेखामार्गौघे शीतश्वसनगोचरे

viralā śuṣkasandṛṣṭapiṭakāpūtapalvale / madhyasthalekhāmārgaughe śītaśvasanagocare

Sanskrit only: no published translation is held for this verse.

ग्रस्तयूकानरौघासृक्पूर्णसृक्विनखास्यताम् । दधताङ्गुष्ठयक्षेण क्रान्ते सर्वत्र पातिना

grastayūkānaraughāsṛkpūrṇasṛkvinakhāsyatām / dadhatāṅguṣṭhayakṣeṇa krānte sarvatra pātinā

Sanskrit only: no published translation is held for this verse.

नानाविरचना चित्रपटपत्तनगामिनी । गमागमपरिश्रान्ता तत्रात्यन्तचिराश्वगा

nānāviracanā citrapaṭapattanagāminī / gamāgamapariśrāntā tatrātyantacirāśvagā

Sanskrit only: no published translation is held for this verse.

नगरान् नगरे न्यस्तसूत्रभाण्डिकभारिणी । प्राप्ते करतलारण्ये बलीवर्दविवर्तिनी

nagarān nagare nyastasūtrabhāṇḍikabhāriṇī / prāpte karatalāraṇye balīvardavivartinī

Sanskrit only: no published translation is held for this verse.

गुप्ते विश्रमणायैव मनाक् करपरिच्युता । तन्तुप्रोतमुखाकृष्टिखिन्ना क्वापि विशीर्यते

gupte viśramaṇāyaiva manāk karaparicyutā / tantuprotamukhākṛṣṭikhinnā kvāpi viśīryate

Sanskrit only: no published translation is held for this verse.

वेधनं कर्णसंश्लिष्टा कठिनापि न साकरोत् । न हि तीक्ष्णो बहिः कार्ये नीचत्वं विजहाति चेत्

vedhanaṃ karṇasaṃśliṣṭā kaṭhināpi na sākarot / na hi tīkṣṇo bahiḥ kārye nīcatvaṃ vijahāti cet

Sanskrit only: no published translation is held for this verse.

सायस्सूची मनस्सूच्या वलिता विजहार ह । दिक्ष्व् अप्स्व् इव शिलागुर्वी नावङ्गवलिता सती

sāyassūcī manassūcyā valitā vijahāra ha / dikṣv apsv iva śilāgurvī nāvaṅgavalitā satī

Sanskrit only: no published translation is held for this verse.

विससार दिगन्तेषु सान्तःकरणसत्तया । तृणलेखेव पवनशक्त्या संसृतिरूपया

visasāra diganteṣu sāntaḥkaraṇasattayā / tṛṇalekheva pavanaśaktyā saṃsṛtirūpayā

Sanskrit only: no published translation is held for this verse.

मुखेन सूक्ष्मसूत्रान्तं त्यजन्ती सुशिरोम्भने । परापूरोद्यमेनाशु जातेव हृदयान्विता

mukhena sūkṣmasūtrāntaṃ tyajantī suśirombhane / parāpūrodyamenāśu jāteva hṛdayānvitā

Sanskrit only: no published translation is held for this verse.

परापूररसेनेव सूच्या हृत् सुविकासितम् । अनारतवमत् सूक्ष्मसूत्रान्तम् इव सूम्भने

parāpūraraseneva sūcyā hṛt suvikāsitam / anāratavamat sūkṣmasūtrāntam iva sūmbhane

Sanskrit only: no published translation is held for this verse.

तीक्ष्णैर् अपि चिरक्षीणः पूर्यते निर्विचारणम् । दृष्टान्तो ऽत्र क्षणात् सूच्या पूरितो जर्जरः पटः

tīkṣṇair api cirakṣīṇaḥ pūryate nirvicāraṇam / dṛṣṭānto 'tra kṣaṇāt sūcyā pūrito jarjaraḥ paṭaḥ

Sanskrit only: no published translation is held for this verse.

सूत्रांशुनिर्गतैर् योग्यं सूच्या हृदयम् अर्जितम् । परपूरणयैवाशु तेजश् च कचितार्करुक्

sūtrāṃśunirgatair yogyaṃ sūcyā hṛdayam arjitam / parapūraṇayaivāśu tejaś ca kacitārkaruk

Sanskrit only: no published translation is held for this verse.

अकस्मात् तेन रूढेण क्षीणपूरणरूपिणा । हृदये राक्षसी सूची कर्मणातप्यतेव सा

akasmāt tena rūḍheṇa kṣīṇapūraṇarūpiṇā / hṛdaye rākṣasī sūcī karmaṇātapyateva sā

Sanskrit only: no published translation is held for this verse.

वेधं खुररवेणैव करोतीषत्प्रचारिता । प्रकृतेन निजेनापि खेदाय व्यवहारिता

vedhaṃ khuraraveṇaiva karotīṣatpracāritā / prakṛtena nijenāpi khedāya vyavahāritā

Sanskrit only: no published translation is held for this verse.

सञ्चारयति वस्त्रेषु सूत्रं चतुरवेधना । आदीर्घं वासनातन्तुं शरीरेष्व् इव वेदना

sañcārayati vastreṣu sūtraṃ caturavedhanā / ādīrghaṃ vāsanātantuṃ śarīreṣv iva vedanā

Sanskrit only: no published translation is held for this verse.

सञ्चार्यमाणा वेगेन धावतीवाक्षिपाटने । अदर्शितमुखा एव दुर्जना मर्मवेधिनः

sañcāryamāṇā vegena dhāvatīvākṣipāṭane / adarśitamukhā eva durjanā marmavedhinaḥ

Sanskrit only: no published translation is held for this verse.

स्कन्धवस्त्रजवप्रोता वेधाक्ष्णा सुखम् ईक्षते । कथम् एनं भिनद्मीति तीक्ष्णानाम् एतद् ईप्सितम्

skandhavastrajavaprotā vedhākṣṇā sukham īkṣate / katham enaṃ bhinadmīti tīkṣṇānām etad īpsitam

Sanskrit only: no published translation is held for this verse.

समम् एव च कौशेये क्षौमे च वसने शिता । जडः क इव वा नाम गुणागुणम् उपेक्षते

samam eva ca kauśeye kṣaume ca vasane śitā / jaḍaḥ ka iva vā nāma guṇāguṇam upekṣate

Sanskrit only: no published translation is held for this verse.

सा दधानोज्ज्वलं सूत्रम् अङ्गुष्ठाङ्गुलिपीडिता । अन्त्रतन्तुम् इवानन्तम् उद्गिरन्ती निरीक्षते

sā dadhānojjvalaṃ sūtram aṅguṣṭhāṅgulipīḍitā / antratantum ivānantam udgirantī nirīkṣate

Sanskrit only: no published translation is held for this verse.

तीक्ष्णास्यहृदयत्वेन सरसेषु न केषुचित् । सूत्रितापि पदार्थेषु विशत्य् अलसगामिनी

tīkṣṇāsyahṛdayatvena saraseṣu na keṣucit / sūtritāpi padārtheṣu viśaty alasagāminī

Sanskrit only: no published translation is held for this verse.

अगर्दभीमुखप्रोता सुतीक्ष्णापि न चापि धीः । अवेधिताप्य् अहृदया राजपुत्र्य् अपि दुर्भगा

agardabhīmukhaprotā sutīkṣṇāpi na cāpi dhīḥ / avedhitāpy ahṛdayā rājaputry api durbhagā

Sanskrit only: no published translation is held for this verse.

विना परापकारेण तीक्ष्णे सरणम् ईहते । वेधनाद् रोधिता सूचिः कर्णपाशे प्रलम्बते

vinā parāpakāreṇa tīkṣṇe saraṇam īhate / vedhanād rodhitā sūciḥ karṇapāśe pralambate

Sanskrit only: no published translation is held for this verse.

शेते किं चारु मैत्र्येव बुसे करपरिच्युता । स्वरूपसदृशं मित्रं कस्मै नाम न रोचते

śete kiṃ cāru maitryeva buse karaparicyutā / svarūpasadṛśaṃ mitraṃ kasmai nāma na rocate

Sanskrit only: no published translation is held for this verse.

मिश्रिता मूढचित्तानां वृत्तिभिः प्राकृते जने । तिष्ठत्य् आत्मसमां को हि सङ्गतिं त्यक्तुम् इच्छति

miśritā mūḍhacittānāṃ vṛttibhiḥ prākṛte jane / tiṣṭhaty ātmasamāṃ ko hi saṅgatiṃ tyaktum icchati

Sanskrit only: no published translation is held for this verse.

भवत्य् अयस्कारचितौ सन्त्यक्तान्तर्धिगामिनी । भस्त्रावातैर् विवलिता गगनोड्डयनोन्मुखी

bhavaty ayaskāracitau santyaktāntardhigāminī / bhastrāvātair vivalitā gaganoḍḍayanonmukhī

Sanskrit only: no published translation is held for this verse.

प्राणापानप्रवाहस्था हृत्पद्मान्तरगामिनी । दुःखशक्तिर् महाघोरा जीवशक्तिर् इवोद्यता

prāṇāpānapravāhasthā hṛtpadmāntaragāminī / duḥkhaśaktir mahāghorā jīvaśaktir ivodyatā

Sanskrit only: no published translation is held for this verse.

समानवैपरीत्येन समानसमगामिनी । उदानविपरीतत्वाद् उदानसमगामिनी

samānavaiparītyena samānasamagāminī / udānaviparītatvād udānasamagāminī

Sanskrit only: no published translation is held for this verse.

व्यानस्था व्याधिजननी सर्वाङ्गरसचारिणी । हृत्कण्टशूलोत्प्लवनवैवर्ण्योन्मादकारिणी

vyānasthā vyādhijananī sarvāṅgarasacāriṇī / hṛtkaṇṭaśūlotplavanavaivarṇyonmādakāriṇī

Sanskrit only: no published translation is held for this verse.

प्रायस् सौचिकहस्तस्था सुप्तोर्णागण्डकोटरे । बालहस्ते ऽङ्गुलीतल्पवेधनैकविलासिनी

prāyas saucikahastasthā suptorṇāgaṇḍakoṭare / bālahaste 'ṅgulītalpavedhanaikavilāsinī

Sanskrit only: no published translation is held for this verse.

पादप्रविष्टा रुधिरपानपाजिरविस्तृता । तुष्यत्य् अतितरां तुच्छभोजना तुच्छभोजनैः

pādapraviṣṭā rudhirapānapājiravistṛtā / tuṣyaty atitarāṃ tucchabhojanā tucchabhojanaiḥ

Sanskrit only: no published translation is held for this verse.

शेते कर्दमकोशस्था चिरकालम् अधोमुखी । इच्छानुरूपम् आसाद्य क इवास्पदम् उज्झति

śete kardamakośasthā cirakālam adhomukhī / icchānurūpam āsādya ka ivāspadam ujjhati

Sanskrit only: no published translation is held for this verse.

क्रौर्येणापहृतात्मानं दर्शयत्य् उपवेधनैः । उत्सवाद् अपि नीचानां कलहो हि सुखायते

krauryeṇāpahṛtātmānaṃ darśayaty upavedhanaiḥ / utsavād api nīcānāṃ kalaho hi sukhāyate

Sanskrit only: no published translation is held for this verse.

कपर्दिका वलभ्यान्तरात्मानं बहु मन्यते । दुरुच्छेदा हि भूतानाम् अहङ्कारचमत्कृतिः

kapardikā valabhyāntarātmānaṃ bahu manyate / durucchedā hi bhūtānām ahaṅkāracamatkṛtiḥ

Sanskrit only: no published translation is held for this verse.

श्वेतिकायुग्मलभ्येन साहृतेनात्मना नृणाम् । मृतिम् आधास्यते चित्रा स्वार्थे नोदेति मूढता

śvetikāyugmalabhyena sāhṛtenātmanā nṛṇām / mṛtim ādhāsyate citrā svārthe nodeti mūḍhatā

Sanskrit only: no published translation is held for this verse.

वस्त्रतन्तुविभेदेन परमारणम् आशु मे । इदं सम्पद्यत इति भवत्य् अत्यन्तनिर्मला

vastratantuvibhedena paramāraṇam āśu me / idaṃ sampadyata iti bhavaty atyantanirmalā

Sanskrit only: no published translation is held for this verse.

स्थापिता मलम् आदत्ते सूची यद् घर्षणं विना । परापवेधविरहाद् व्याधिस् सो ऽस्याः प्रवर्तते

sthāpitā malam ādatte sūcī yad gharṣaṇaṃ vinā / parāpavedhavirahād vyādhis so 'syāḥ pravartate

Sanskrit only: no published translation is held for this verse.

सूक्ष्मदृश्या वेधदात्री क्षणाद् विस्मृतिम् एति वा । तीक्ष्णा भेदकरी क्रूरा सूचिचेष्टेव दैविकी

sūkṣmadṛśyā vedhadātrī kṣaṇād vismṛtim eti vā / tīkṣṇā bhedakarī krūrā sūciceṣṭeva daivikī

Sanskrit only: no published translation is held for this verse.

तन्तुवेधनमात्रेण हतो ऽन्य इति तोषिता । दुर्जनो येन तेनैव नाशितो वेत्ति दुष्टताम्

tantuvedhanamātreṇa hato 'nya iti toṣitā / durjano yena tenaiva nāśito vetti duṣṭatām

Sanskrit only: no published translation is held for this verse.

पङ्के मज्जति याति खे विहरति व्योमानिलैर् दिक्तटाञ् शेते पांसुषु भूतले पथि गृहे हट्टे वने ऽन्तःपुरे । हस्ते श्रोत्रसरोरुहे ऽथ मृदुनि स्वस्थोर्णिकागण्डके रन्ध्रे काष्ठमृदां च नाडिहृदये द्रव्यात्मसत्तैव सा

paṅke majjati yāti khe viharati vyomānilair diktaṭāñ śete pāṃsuṣu bhūtale pathi gṛhe haṭṭe vane 'ntaḥpure / haste śrotrasaroruhe 'tha mṛduni svasthorṇikāgaṇḍake randhre kāṣṭhamṛdāṃ ca nāḍihṛdaye dravyātmasattaiva sā

Sanskrit only: no published translation is held for this verse.

इत्य् उक्तवत्य् अथ मुनौ दिवसो जगाम सायन्तनाय विधये ऽस्तम् इनो जगाम । स्नातुं सभा कृतनमस्करणा जगाम श्यामाक्षये रविकरैश् च सहाजगाम

ity uktavaty atha munau divaso jagāma sāyantanāya vidhaye 'stam ino jagāma / snātuṃ sabhā kṛtanamaskaraṇā jagāma śyāmākṣaye ravikaraiś ca sahājagāma

Sanskrit only: no published translation is held for this verse.