Moksopaya with Bhaskarakantha's Tika 3.76

अथाभवद् असौ सूची कर्कटी राक्षसी पुनः । सूक्ष्मैव स्थौल्यम् आयाता मेघलेखेव वार्षिकी

athābhavad asau sūcī karkaṭī rākṣasī punaḥ / sūkṣmaiva sthaulyam āyātā meghalekheva vārṣikī

Sanskrit only: no published translation is held for this verse.

निजम् आकारम् आसाद्य किञ्चित् प्रमुदिता सती । बृहद्राक्षसगर्वं तद्बोधात् कञ्चुकवज् जहौ

nijam ākāram āsādya kiñcit pramuditā satī / bṛhadrākṣasagarvaṃ tadbodhāt kañcukavaj jahau

Sanskrit only: no published translation is held for this verse.

तत्रैव ध्यायिनी तस्थौ बद्धपद्मासनस्थितिः । आलम्ब्य संविदं शुद्धां संस्थिता गिरिकूटवत्

tatraiva dhyāyinī tasthau baddhapadmāsanasthitiḥ / ālambya saṃvidaṃ śuddhāṃ saṃsthitā girikūṭavat

Sanskrit only: no published translation is held for this verse.

अथ सा मासषट्केन ध्यानाद् बोधम् उपागता । महाजलदनादेन प्रावृषीव शिखण्डिनी

atha sā māsaṣaṭkena dhyānād bodham upāgatā / mahājaladanādena prāvṛṣīva śikhaṇḍinī

Sanskrit only: no published translation is held for this verse.

प्रबुद्धा सा बहिर्वृत्तिर् बभूव क्षुत्परायणा । यावज्जीवं स्वभावो ऽस्य देहस्य न निवर्तते

prabuddhā sā bahirvṛttir babhūva kṣutparāyaṇā / yāvajjīvaṃ svabhāvo 'sya dehasya na nivartate

Sanskrit only: no published translation is held for this verse.

अथ सा किं ग्रस इति चिन्तयाम् आस चिन्तया । भोक्तव्यं परकीयं च न्यायेन न विना मया

atha sā kiṃ grasa iti cintayām āsa cintayā / bhoktavyaṃ parakīyaṃ ca nyāyena na vinā mayā

Sanskrit only: no published translation is held for this verse.

यद् आर्यगर्हितं यद् वा न्यायेन न समर्जितम् । तस्माद् ग्रासाद् वरं मन्ये मरणं देहिनाम् इह

yad āryagarhitaṃ yad vā nyāyena na samarjitam / tasmād grāsād varaṃ manye maraṇaṃ dehinām iha

Sanskrit only: no published translation is held for this verse.

यदि देहं त्यजामीमं तन् न्यायोपार्जितं विना । न किञ्चिद् अद्मि निर्न्यायं भुक्तो ऽर्थो हि गरायते

yadi dehaṃ tyajāmīmaṃ tan nyāyopārjitaṃ vinā / na kiñcid admi nirnyāyaṃ bhukto 'rtho hi garāyate

Sanskrit only: no published translation is held for this verse.

यन् न लोकक्रमप्राप्तं तेन भुक्तेन किं भवेत् । न जीवितेन नो मृत्या किञ्चित् कारणम् अस्ति मे

yan na lokakramaprāptaṃ tena bhuktena kiṃ bhavet / na jīvitena no mṛtyā kiñcit kāraṇam asti me

Sanskrit only: no published translation is held for this verse.

मनोमात्रम् अहं ह्य् आसं देहादिभ्रममात्रकम् । तच् छान्तं स्वावबोधेन देहादेहदृशौ कुतः

manomātram ahaṃ hy āsaṃ dehādibhramamātrakam / tac chāntaṃ svāvabodhena dehādehadṛśau kutaḥ

Sanskrit only: no published translation is held for this verse.

एवं स्थिता मौनवती शुश्राव गगनाद् गिरम् । रक्षस्स्वभावसन्त्यागतुष्टेनोक्तां नभस्वता

evaṃ sthitā maunavatī śuśrāva gaganād giram / rakṣassvabhāvasantyāgatuṣṭenoktāṃ nabhasvatā

Sanskrit only: no published translation is held for this verse.

गच्छ कर्कटि मूढांस् त्वं ज्ञानेनाश्व् अवबोधय । मूढोत्तारणम् एवेह स्वभावो महताम् इति

gaccha karkaṭi mūḍhāṃs tvaṃ jñānenāśv avabodhaya / mūḍhottāraṇam eveha svabhāvo mahatām iti

Sanskrit only: no published translation is held for this verse.

बोध्यमानो भवत्यापि यो न बोधम् उपैष्यति । स्वनाशायैव जातो ऽसौ न्याय्यो ग्रासो भवेत् तव

bodhyamāno bhavatyāpi yo na bodham upaiṣyati / svanāśāyaiva jāto 'sau nyāyyo grāso bhavet tava

Sanskrit only: no published translation is held for this verse.

श्रुत्वेत्य् अनुगृहीतास्मि त्वयेत्य् उक्तवती शनैः । उत्तस्थौ शैलशिखरात् क्रमाद् अवरुरोह च

śrutvety anugṛhītāsmi tvayety uktavatī śanaiḥ / uttasthau śailaśikharāt kramād avaruroha ca

Sanskrit only: no published translation is held for this verse.

अधित्यकाम् अतीत्याशु गत्वा चोपत्यकातटात् । विवेश शैलपादस्थं किरातजनमण्डलम्

adhityakām atītyāśu gatvā copatyakātaṭāt / viveśa śailapādasthaṃ kirātajanamaṇḍalam

Sanskrit only: no published translation is held for this verse.

बह्वन्नपशुलोकौघद्रव्यसस्यौषधामिषम् । अनन्तमूलपानान्नमृगकीटखगादिकम्

bahvannapaśulokaughadravyasasyauṣadhāmiṣam / anantamūlapānānnamṛgakīṭakhagādikam

Sanskrit only: no published translation is held for this verse.

प्रचलितगलिताञ्जनाचलाभा हिमगिरिपादनिषेवितं सुदेशम् । तदनु गतवती निशाचरी सा निशि सुघनान्धतमिस्रमार्गभूमौ

pracalitagalitāñjanācalābhā himagiripādaniṣevitaṃ sudeśam / tadanu gatavatī niśācarī sā niśi sughanāndhatamisramārgabhūmau

Sanskrit only: no published translation is held for this verse.