Moksopaya with Bhaskarakantha's Tika 3.77

एतस्मिन्न् अन्तरे तत्र किरातजनमण्डले । हस्तहार्यतमःपिण्डा बभूवासितयामिनी

etasminn antare tatra kirātajanamaṇḍale / hastahāryatamaḥpiṇḍā babhūvāsitayāminī

Sanskrit only: no published translation is held for this verse.

नीलमेघपटच्छन्ननिरिन्दुगगनान्तरा । तमालवनसम्पिण्डमण्डलोड्डीनकज्जला

nīlameghapaṭacchannanirindugaganāntarā / tamālavanasampiṇḍamaṇḍaloḍḍīnakajjalā

Sanskrit only: no published translation is held for this verse.

लताघनतया ग्रामकोटरैकान्ध्यमन्थरा । गृहचत्वरसम्बाधनगरे नवयौवना

latāghanatayā grāmakoṭaraikāndhyamantharā / gṛhacatvarasambādhanagare navayauvanā

Sanskrit only: no published translation is held for this verse.

चत्वरेषु तमःपिण्डप्रजिह्मीकृतदीपिका । कुञ्चिकाच्छिद्रनिष्क्रान्तदीपिकारोमराजिका

catvareṣu tamaḥpiṇḍaprajihmīkṛtadīpikā / kuñcikācchidraniṣkrāntadīpikāromarājikā

Sanskrit only: no published translation is held for this verse.

स्ववयस्येव कर्कट्याः परिनृत्यत्पिशाचिका । मत्तकङ्कालवेताला काष्ठमौनम् इव स्थिता

svavayasyeva karkaṭyāḥ parinṛtyatpiśācikā / mattakaṅkālavetālā kāṣṭhamaunam iva sthitā

Sanskrit only: no published translation is held for this verse.

सुषुप्तमृतभूतौघा घननीहारहारिणी । मन्दमन्दमरुत्स्पन्दशरत्प्रालेयशीकरा

suṣuptamṛtabhūtaughā ghananīhārahāriṇī / mandamandamarutspandaśaratprāleyaśīkarā

Sanskrit only: no published translation is held for this verse.

सरस्सु विरटद्वारिकोकभेकतरङ्गिका । अन्तःपुरेषु रमणरणन्नारीनरानना

sarassu viraṭadvārikokabhekataraṅgikā / antaḥpureṣu ramaṇaraṇannārīnarānanā

Sanskrit only: no published translation is held for this verse.

जङ्गलेषु ज्वलज्ज्वालजटालज्वलनोज्ज्वला । केदारेष्व् अम्बुसंसेकपुष्टपाकमिलत्सिला

jaṅgaleṣu jvalajjvālajaṭālajvalanojjvalā / kedāreṣv ambusaṃsekapuṣṭapākamilatsilā

Sanskrit only: no published translation is held for this verse.

नभस्य् अलक्षितस्पन्दपरिवृत्तर्क्षचक्रका । वनेषु विसरद्वातपतत्पुष्पफलद्रुमा

nabhasy alakṣitaspandaparivṛttarkṣacakrakā / vaneṣu visaradvātapatatpuṣpaphaladrumā

Sanskrit only: no published translation is held for this verse.

श्वभ्रेषु कौशिकास्यात्तवायस्याद्याहृतारवा । तस्कराक्रान्तपर्यन्तग्राम्याक्रन्दनकर्कशा

śvabhreṣu kauśikāsyāttavāyasyādyāhṛtāravā / taskarākrāntaparyantagrāmyākrandanakarkaśā

Sanskrit only: no published translation is held for this verse.

ग्रामेष्व् अचेतनग्राम्या नगरे सुप्तनागरा । वनेषु विसरद्वाता नीडेष्व् अस्पन्दपक्षिणी

grāmeṣv acetanagrāmyā nagare suptanāgarā / vaneṣu visaradvātā nīḍeṣv aspandapakṣiṇī

Sanskrit only: no published translation is held for this verse.

गुहासु सुप्तसिंहौघा कुञ्जेषूच्छ्वसितैणका । खे सावश्यायनिकरा विपिने मौनधारिणी

guhāsu suptasiṃhaughā kuñjeṣūcchvasitaiṇakā / khe sāvaśyāyanikarā vipine maunadhāriṇī

Sanskrit only: no published translation is held for this verse.

कज्जलाम्भोदमध्याभा काचशैलोदरोपमा । पङ्कपिण्डान्तरघना खड्गच्छेद्यान्ध्यमांसला

kajjalāmbhodamadhyābhā kācaśailodaropamā / paṅkapiṇḍāntaraghanā khaḍgacchedyāndhyamāṃsalā

Sanskrit only: no published translation is held for this verse.

प्रलयानिलविक्षुब्धा कज्जलाचलचञ्चला । एकार्णवमहापङ्कपर्वतोदरमेदुरा

pralayānilavikṣubdhā kajjalācalacañcalā / ekārṇavamahāpaṅkaparvatodaramedurā

Sanskrit only: no published translation is held for this verse.

अङ्गारकोटिनखरा सौषुप्तपदसुन्दरी । अज्ञाननिद्रानिविडा भृङ्गपृष्ठच्छविच्छविः

aṅgārakoṭinakharā sauṣuptapadasundarī / ajñānanidrāniviḍā bhṛṅgapṛṣṭhacchavicchaviḥ

Sanskrit only: no published translation is held for this verse.

तस्यां रजन्यां भीमायां किरातजनमण्डले । मन्त्रिणा सह भूपालस् तस्मिन्न् अवसरे तदा

tasyāṃ rajanyāṃ bhīmāyāṃ kirātajanamaṇḍale / mantriṇā saha bhūpālas tasminn avasare tadā

Sanskrit only: no published translation is held for this verse.

निर्जगाम सुधीरात्मा नगरात् सुप्तनागरात् । अटवीं विक्रमो नाम विषमां वीरचर्यया

nirjagāma sudhīrātmā nagarāt suptanāgarāt / aṭavīṃ vikramo nāma viṣamāṃ vīracaryayā

Sanskrit only: no published translation is held for this verse.

अटव्यां कर्कटी सा तौ चरन्तौ राजमन्त्रिणौ । अपश्यद् धृतधैर्यांशौ वेतालालोकनोन्मुखौ

aṭavyāṃ karkaṭī sā tau carantau rājamantriṇau / apaśyad dhṛtadhairyāṃśau vetālālokanonmukhau

Sanskrit only: no published translation is held for this verse.

अथ सा चिन्तयाम् आस लब्धो भक्षो ऽद्य हो मया । मूढाव् एताव् अनात्मज्ञौ भारो देहः किलानयोः

atha sā cintayām āsa labdho bhakṣo 'dya ho mayā / mūḍhāv etāv anātmajñau bhāro dehaḥ kilānayoḥ

Sanskrit only: no published translation is held for this verse.

इहामुत्र च नाशाय मूढो दुःखाय जीवति । यत्नाद् विनाशनीयो ऽसौ नानर्थः परिपाल्यते

ihāmutra ca nāśāya mūḍho duḥkhāya jīvati / yatnād vināśanīyo 'sau nānarthaḥ paripālyate

Sanskrit only: no published translation is held for this verse.

अपश्यतस् स्वम् आत्मानं मृतिर् मूढस्य जीवितम् । मरणेनोदयो ऽस्यास्ति पापसम्पत्तिहेतुतः

apaśyatas svam ātmānaṃ mṛtir mūḍhasya jīvitam / maraṇenodayo 'syāsti pāpasampattihetutaḥ

Sanskrit only: no published translation is held for this verse.

आदिसर्गे च नियमः कृतः पङ्कजजन्मना । हिंस्राभिभोजनायास्तु मूढात्मा नात्मवान् इति

ādisarge ca niyamaḥ kṛtaḥ paṅkajajanmanā / hiṃsrābhibhojanāyāstu mūḍhātmā nātmavān iti

Sanskrit only: no published translation is held for this verse.

तस्माद् इमौ मयैवाद्य भोक्तव्यौ भोज्यतां गतौ । अभव्य एव निर्दोषं प्राप्तम् अर्थम् उपेक्षते

tasmād imau mayaivādya bhoktavyau bhojyatāṃ gatau / abhavya eva nirdoṣaṃ prāptam artham upekṣate

Sanskrit only: no published translation is held for this verse.

मा कदाचिद् इमौ स्यातां गुणयुक्तौ महाशयौ । तादृङ्नरविनाशो हि स्वभावान् मे न रोचते

mā kadācid imau syātāṃ guṇayuktau mahāśayau / tādṛṅnaravināśo hi svabhāvān me na rocate

Sanskrit only: no published translation is held for this verse.

तद् एतौ सम्परीक्षे ऽहं यदि तावद् गुणान्वितौ । तद् भक्ष्यं न करोम्य् एतौ न हिंस्या गुणिनः क्वचित्

tad etau samparīkṣe 'haṃ yadi tāvad guṇānvitau / tad bhakṣyaṃ na karomy etau na hiṃsyā guṇinaḥ kvacit

Sanskrit only: no published translation is held for this verse.

अकृत्रिमं सुखं कीर्तिम् आयुश् चैवाभिवाञ्छता । सर्वाभिमतदानेन पूजनीया गुणान्विताः

akṛtrimaṃ sukhaṃ kīrtim āyuś caivābhivāñchatā / sarvābhimatadānena pūjanīyā guṇānvitāḥ

Sanskrit only: no published translation is held for this verse.

यदि नश्यामि देहेन तन् न भोक्ष्ये गुणान्वितम् । सुखयन्ति हि चेतांसि जीविताद् अपि साधवः

yadi naśyāmi dehena tan na bhokṣye guṇānvitam / sukhayanti hi cetāṃsi jīvitād api sādhavaḥ

Sanskrit only: no published translation is held for this verse.

अपि जीवितदानेन गुणिनं परिपालयेत् । गुणवत्सङ्गमौषध्या मृत्युर् अप्य् एति मित्रताम्

api jīvitadānena guṇinaṃ paripālayet / guṇavatsaṅgamauṣadhyā mṛtyur apy eti mitratām

Sanskrit only: no published translation is held for this verse.

यत्राहम् अपि रक्षामि राक्षसी गुणशालिनम् । तत्रान्यश् चानुकुर्यात् तं हृद्विचारम् इवामलम्

yatrāham api rakṣāmi rākṣasī guṇaśālinam / tatrānyaś cānukuryāt taṃ hṛdvicāram ivāmalam

Sanskrit only: no published translation is held for this verse.

उदारगुणयुक्ता ये विहरन्तीह देहिनः । धरातलेन्दवस् सङ्गाद् भृशं शीतलयन्ति ते

udāraguṇayuktā ye viharantīha dehinaḥ / dharātalendavas saṅgād bhṛśaṃ śītalayanti te

Sanskrit only: no published translation is held for this verse.

मृतिर् गुणतिरस्कारो जीवितं गुणिसंश्रयः । फलं स्वर्गापवर्गादि जीविताद् गुणिसंश्रयात्

mṛtir guṇatiraskāro jīvitaṃ guṇisaṃśrayaḥ / phalaṃ svargāpavargādi jīvitād guṇisaṃśrayāt

Sanskrit only: no published translation is held for this verse.

तस्माद् इमौ परीक्षे ऽहं कदाचित् प्रश्नलीलया । किं मानज्ञानकाव् एताव् इति तामरसेक्षणौ

tasmād imau parīkṣe 'haṃ kadācit praśnalīlayā / kiṃ mānajñānakāv etāv iti tāmarasekṣaṇau

Sanskrit only: no published translation is held for this verse.

आदौ विचार्य सुगुणागुणलेशयुक्तिम् आगस् ततो ऽधिकतरं च गुणाद् यादि स्यात् । कुर्यात् ततस् समुपपत्तिवशेन दण्डं दण्ड्यस्य लघ्व् अथ दृढं धनसम्भवे वा

ādau vicārya suguṇāguṇaleśayuktim āgas tato 'dhikataraṃ ca guṇād yādi syāt / kuryāt tatas samupapattivaśena daṇḍaṃ daṇḍyasya laghv atha dṛḍhaṃ dhanasambhave vā

Sanskrit only: no published translation is held for this verse.