Moksopaya with Bhaskarakantha's Tika 4.40

अत्रैव वस्तुन्य् उचिते शृणु राघव पूर्वजाः । कचेन गाथा या गीता बार्हस्पत्येन पावनीः

atraiva vastuny ucite śṛṇu rāghava pūrvajāḥ / kacena gāthā yā gītā bārhaspatyena pāvanīḥ

Sanskrit only: no published translation is held for this verse.

कस्मिंश्चिन् मेरुगहने तिष्ठन् सुरगुरोस् सुतः । कदाचिद् अभ्यासवशाद् विश्रान्तिं प्रापद् आत्मनि

kasmiṃścin merugahane tiṣṭhan suraguros sutaḥ / kadācid abhyāsavaśād viśrāntiṃ prāpad ātmani

Sanskrit only: no published translation is held for this verse.

सम्यग्ज्ञानामृतापूर्णा मतिर् नारमतास्य सा । पञ्चभूतमये म्लाने दृश्ये ऽस्मिन् पेलवात्मनि

samyagjñānāmṛtāpūrṇā matir nāramatāsya sā / pañcabhūtamaye mlāne dṛśye 'smin pelavātmani

Sanskrit only: no published translation is held for this verse.

तेन निर्विण्ण इव स आत्मतत्त्वाद् ऋते परम् । अपश्यन् समुवाचेदम् एको गद्गदया गिरा

tena nirviṇṇa iva sa ātmatattvād ṛte param / apaśyan samuvācedam eko gadgadayā girā

Sanskrit only: no published translation is held for this verse.

किं करोमि क्व गच्छामि किं गृह्णामि त्यजामि किम् । आत्मना पूरितं विश्वं महाकल्पाम्बुना यथा

kiṃ karomi kva gacchāmi kiṃ gṛhṇāmi tyajāmi kim / ātmanā pūritaṃ viśvaṃ mahākalpāmbunā yathā

Sanskrit only: no published translation is held for this verse.

दुःखम् आत्मा सुखं चैव खम् आशास् त्वम् अहं तथा । सर्वम् आत्ममयं जातं कष्टं नष्टो ऽहम् आत्मना

duḥkham ātmā sukhaṃ caiva kham āśās tvam ahaṃ tathā / sarvam ātmamayaṃ jātaṃ kaṣṭaṃ naṣṭo 'ham ātmanā

Sanskrit only: no published translation is held for this verse.

सबाह्याभ्यन्तरं देहेष्व् अध ऊर्ध्वं च दिक्षु च । इत आत्मा तथेहात्मा नास्त्य् अनात्ममयं क्वचित्

sabāhyābhyantaraṃ deheṣv adha ūrdhvaṃ ca dikṣu ca / ita ātmā tathehātmā nāsty anātmamayaṃ kvacit

Sanskrit only: no published translation is held for this verse.

सर्वत्रैव स्थितो ह्य् आत्मा सर्वम् आत्मनि संस्थितम् । सर्वम् एवेदम् आत्मैवम् आत्मन्य् एव नमाम्य् अहम्

sarvatraiva sthito hy ātmā sarvam ātmani saṃsthitam / sarvam evedam ātmaivam ātmany eva namāmy aham

Sanskrit only: no published translation is held for this verse.

न तद् अस्ति न यत्राहं न तद् अस्ति न यन् मयि । किम् अन्यद् अभिवाञ्छामि केवलं प्रशमाम्य् अहम्

na tad asti na yatrāhaṃ na tad asti na yan mayi / kim anyad abhivāñchāmi kevalaṃ praśamāmy aham

Sanskrit only: no published translation is held for this verse.

आत्मनात्मनि येनाहं नमाम्य् आपूरितात्मना । उपशाम्यामि तेनान्तः क्वान्यत्राभिपताम्य् अहम्

ātmanātmani yenāhaṃ namāmy āpūritātmanā / upaśāmyāmi tenāntaḥ kvānyatrābhipatāmy aham

Sanskrit only: no published translation is held for this verse.

अहम् अग्निर् अहं वायुर् अहं भूर् अहम् अम्बरम् । यन् नाहं नास्ति तत् किञ्चित् सर्वम् एवाहम् आततम्

aham agnir ahaṃ vāyur ahaṃ bhūr aham ambaram / yan nāhaṃ nāsti tat kiñcit sarvam evāham ātatam

Sanskrit only: no published translation is held for this verse.

आपूरितापारनभोमहाभैरवरूपवान् । सर्वसंविन्मयः पूर्णस् तिष्ठाम्य् एकार्णवोपमः

āpūritāpāranabhomahābhairavarūpavān / sarvasaṃvinmayaḥ pūrṇas tiṣṭhāmy ekārṇavopamaḥ

Sanskrit only: no published translation is held for this verse.

इत्य् एवं भावयन् भावं कनकाचलकुञ्जके । उच्चारयन्न् अथोङ्कारं घण्टास्वनम् इव क्रमात्

ity evaṃ bhāvayan bhāvaṃ kanakācalakuñjake / uccārayann athoṅkāraṃ ghaṇṭāsvanam iva kramāt

Sanskrit only: no published translation is held for this verse.

ओङ्कारस्य कलाम् अर्धां पाश्चात्यां वालकोमलाम् । नान्तरस्थेन बाह्ये न भावयन् परमे हृदि

oṅkārasya kalām ardhāṃ pāścātyāṃ vālakomalām / nāntarasthena bāhye na bhāvayan parame hṛdi

Sanskrit only: no published translation is held for this verse.

व्यपगतकलनाकलङ्कशुद्धो हृदयनिरन्तरलीनवातवृत्तिः । गतघनशरदम्बरोपमानः कच उपलाचलमूर्तिमान् अतिष्ठत्

vyapagatakalanākalaṅkaśuddho hṛdayanirantaralīnavātavṛttiḥ / gataghanaśaradambaropamānaḥ kaca upalācalamūrtimān atiṣṭhat

Sanskrit only: no published translation is held for this verse.