Moksopaya with Bhaskarakantha's Tika 4.43

ये हि राजससत्त्वस्था एता भुवि महागुणाः । ते नित्यम् एव मुदिता उदिताः ख इवेन्दवः

ye hi rājasasattvasthā etā bhuvi mahāguṇāḥ / te nityam eva muditā uditāḥ kha ivendavaḥ

Sanskrit only: no published translation is held for this verse.

न खेदम् अधिगच्छन्ति व्योमभागा मलं यथा । नापदि म्लानिम् आयान्ति निशि हेमाम्बुजा यथा

na khedam adhigacchanti vyomabhāgā malaṃ yathā / nāpadi mlānim āyānti niśi hemāmbujā yathā

Sanskrit only: no published translation is held for this verse.

नेहन्ते प्राकृताद् अन्यद् दिनान्यद् भास्करो यथा । रमन्ते स्वे सदाचारे स्वार्तवे पादपा यथा

nehante prākṛtād anyad dinānyad bhāskaro yathā / ramante sve sadācāre svārtave pādapā yathā

Sanskrit only: no published translation is held for this verse.

नित्यम् आपूर्णताम् अन्तर् अक्षुब्धाम् इन्दुसुन्दरीम् । आपद्य् अपि न मुञ्चन्ति शशिनश् शीतताम् इव

nityam āpūrṇatām antar akṣubdhām indusundarīm / āpady api na muñcanti śaśinaś śītatām iva

Sanskrit only: no published translation is held for this verse.

आकृत्यैव विराजन्ते मैत्र्यादिगुणकान्तया । नवस्तबकहासिन्या लतयेव महाद्रुमाः

ākṛtyaiva virājante maitryādiguṇakāntayā / navastabakahāsinyā latayeva mahādrumāḥ

Sanskrit only: no published translation is held for this verse.

समास् समरसास् सोम्यास् सततं साधुसाधवः । अब्धिवद् धृतमर्यादा भवन्ति वितताशयाः

samās samarasās somyās satataṃ sādhusādhavaḥ / abdhivad dhṛtamaryādā bhavanti vitatāśayāḥ

Sanskrit only: no published translation is held for this verse.

अतस् तेषां महाबाहो पदम् आपदपासनम् । सर्वदैवानुगन्तव्यं मङ्क्तव्यं नापदर्णवे

atas teṣāṃ mahābāho padam āpadapāsanam / sarvadaivānugantavyaṃ maṅktavyaṃ nāpadarṇave

Sanskrit only: no published translation is held for this verse.

तथा तथेह जगति विहर्तव्यम् अखेदिना । आत्मोदयाय वर्तन्ते यथा राजससात्त्विकाः

tathā tatheha jagati vihartavyam akhedinā / ātmodayāya vartante yathā rājasasāttvikāḥ

Sanskrit only: no published translation is held for this verse.

अधिगम्यार्य सच्छास्त्रं विचार्य च पुनः पुनः । अनित्यतां स्वमनसा विविक्तेनाशु भावयेत्

adhigamyārya sacchāstraṃ vicārya ca punaḥ punaḥ / anityatāṃ svamanasā viviktenāśu bhāvayet

Sanskrit only: no published translation is held for this verse.

आदाव् अन्ते च यन् नित्यं रूपं त्रैलोक्यवर्तिनाम् । पदार्थानां तद् एवाशु भावयेन् नेतरन् मुधा

ādāv ante ca yan nityaṃ rūpaṃ trailokyavartinām / padārthānāṃ tad evāśu bhāvayen netaran mudhā

Sanskrit only: no published translation is held for this verse.

असम्यग्दर्शनं त्यक्त्वा व्यर्थसन्तानम् अन्तवत् । स्मर्तव्यं सम्यग् एवेदं ज्ञानसार्थम् अनन्तकम्

asamyagdarśanaṃ tyaktvā vyarthasantānam antavat / smartavyaṃ samyag evedaṃ jñānasārtham anantakam

Sanskrit only: no published translation is held for this verse.

को ऽहं कथम् इदं वेति संसारम् इदम् आततम् । प्रविचार्यं प्रयत्नेन प्राज्ञेन सह साधुना

ko 'haṃ katham idaṃ veti saṃsāram idam ātatam / pravicāryaṃ prayatnena prājñena saha sādhunā

Sanskrit only: no published translation is held for this verse.

नाकर्मसु निमङ्क्तव्यं नानार्येण सहावसेत् । द्रष्टव्यस् सर्वविच्छेत्ता न मृत्युर् अवहेलया

nākarmasu nimaṅktavyaṃ nānāryeṇa sahāvaset / draṣṭavyas sarvavicchettā na mṛtyur avahelayā

Sanskrit only: no published translation is held for this verse.

उच्चैःपदस्थस् तज्ज्ञेन सुमहाञ् शीतलाशयः । साधुर् एवानुगन्तव्यो मयूरेणाम्बुदो यथा

uccaiḥpadasthas tajjñena sumahāñ śītalāśayaḥ / sādhur evānugantavyo mayūreṇāmbudo yathā

Sanskrit only: no published translation is held for this verse.

अहङ्कारस्य देहस्य संसारस्योद्भवस्य च । विचारम् अमलं कृत्वा सत्यम् एवाश्रयेन् नरः

ahaṅkārasya dehasya saṃsārasyodbhavasya ca / vicāram amalaṃ kṛtvā satyam evāśrayen naraḥ

Sanskrit only: no published translation is held for this verse.

शरीरम् अस्थिमांसं च त्यक्त्वा रक्ताद्य् अशोभनम् । भूतमुक्तावलीतन्तुं चिन्मात्रम् अवलोकयेत्

śarīram asthimāṃsaṃ ca tyaktvā raktādy aśobhanam / bhūtamuktāvalītantuṃ cinmātram avalokayet

Sanskrit only: no published translation is held for this verse.

सत्ये नित्ये तते शुद्धे सर्वगे सर्वभावने । शिवे सर्वम् इदं प्रोतं सूत्रे मणिगणो यथा

satye nitye tate śuddhe sarvage sarvabhāvane / śive sarvam idaṃ protaṃ sūtre maṇigaṇo yathā

Sanskrit only: no published translation is held for this verse.

यैव चिद् भुवनाभोगभूषणे व्योम्नि भास्करे । धराविवरकोशस्थे सैव चित् कीटकोदरे

yaiva cid bhuvanābhogabhūṣaṇe vyomni bhāskare / dharāvivarakośasthe saiva cit kīṭakodare

Sanskrit only: no published translation is held for this verse.

कुम्भव्योम्नां न भेदो ऽस्ति यथेह परमार्थतः । चितां शरीरसंस्थानां न भेदो ऽस्ति तथानघ

kumbhavyomnāṃ na bhedo 'sti yatheha paramārthataḥ / citāṃ śarīrasaṃsthānāṃ na bhedo 'sti tathānagha

Sanskrit only: no published translation is held for this verse.

सर्वेषाम् एव भूतानां तिक्तं कटु च नान्यथा । एकत्वाद् अनुभूतेर् हि कुतश् चिन्मात्रभिन्नता

sarveṣām eva bhūtānāṃ tiktaṃ kaṭu ca nānyathā / ekatvād anubhūter hi kutaś cinmātrabhinnatā

Sanskrit only: no published translation is held for this verse.

एकस्मिन्न् एव सततं स्थिते चिन्मात्रवस्तुनि । जातो ऽयम् अयम् उन्नष्ट इति कैषाज्ञतेह वः

ekasminn eva satataṃ sthite cinmātravastuni / jāto 'yam ayam unnaṣṭa iti kaiṣājñateha vaḥ

Sanskrit only: no published translation is held for this verse.

नेह तन् नाम वस्त्व् अस्ति यद् अभूत्वा प्रजायते । न च तन् नाम वस्त्व् अस्ति यद् भूत्वा प्रविलीयते

neha tan nāma vastv asti yad abhūtvā prajāyate / na ca tan nāma vastv asti yad bhūtvā pravilīyate

Sanskrit only: no published translation is held for this verse.

आभासमात्रम् एवेदं न सन् नासच् च राघव । उत्प्लुतेनाप्रशान्तेन चेतसा सद् इव स्थितम्

ābhāsamātram evedaṃ na san nāsac ca rāghava / utplutenāpraśāntena cetasā sad iva sthitam

Sanskrit only: no published translation is held for this verse.

मेह मोहो ऽस्तु वो मौर्ख्यान् नेदं सद् यत् प्रणश्यति । न चासद् इत्य् एव दृढं निर्णीयाशोकितास्तु वः

meha moho 'stu vo maurkhyān nedaṃ sad yat praṇaśyati / na cāsad ity eva dṛḍhaṃ nirṇīyāśokitāstu vaḥ

Sanskrit only: no published translation is held for this verse.

असति जगति किं किलेह मोहस् सति च किम् अङ्ग विमोहकारणं तत् । जननमरणसंस्थितिष्व् अतस् त्वं भव खम् इवातिसमस् सदोपशान्तः

asati jagati kiṃ kileha mohas sati ca kim aṅga vimohakāraṇaṃ tat / jananamaraṇasaṃsthitiṣv atas tvaṃ bhava kham ivātisamas sadopaśāntaḥ

Sanskrit only: no published translation is held for this verse.