Moksopaya with Bhaskarakantha's Tika 5.10

इति चिन्तयतस् तस्य पुरस् सम्प्रविवेश ह । प्रतीहारः प्रगे भानोस् स्यन्दनाग्रम् इवारुणः

iti cintayatas tasya puras sampraviveśa ha / pratīhāraḥ prage bhānos syandanāgram ivāruṇaḥ

Sanskrit only: no published translation is held for this verse.

देव दोस्स्तम्भविश्रान्तसमस्तवसुधाभर । सम्पादयोत्तिष्ठ दिनव्यापारं नृपतोचितम्

deva dosstambhaviśrāntasamastavasudhābhara / sampādayottiṣṭha dinavyāpāraṃ nṛpatocitam

Sanskrit only: no published translation is held for this verse.

एताः कुसुमकर्पूरकुङ्कुमाम्बुघटास् स्त्रियः । स्नानभूमौ स्थितास् सज्जा नद्यो मूर्तियुता इव

etāḥ kusumakarpūrakuṅkumāmbughaṭās striyaḥ / snānabhūmau sthitās sajjā nadyo mūrtiyutā iva

Sanskrit only: no published translation is held for this verse.

एषा कमलकल्हारकाननभ्रान्तषट्पदा । कृता कमलिनी स्त्र्यर्थं रचितांशुकमण्डपा

eṣā kamalakalhārakānanabhrāntaṣaṭpadā / kṛtā kamalinī stryarthaṃ racitāṃśukamaṇḍapā

Sanskrit only: no published translation is held for this verse.

एताः कमलिनीतीरभुवश् छत्त्रैः प्रपूरिताः । सचामररथेभाश्वैस् स्नानावसरसेविनाम्

etāḥ kamalinītīrabhuvaś chattraiḥ prapūritāḥ / sacāmararathebhāśvais snānāvasarasevinām

Sanskrit only: no published translation is held for this verse.

समग्रसुमनःपूर्णै रत्नौषधिपरिप्लुतैः । सज्जीकृताः पटलकैर् देवार्चनभुवस् तव

samagrasumanaḥpūrṇai ratnauṣadhipariplutaiḥ / sajjīkṛtāḥ paṭalakair devārcanabhuvas tava

Sanskrit only: no published translation is held for this verse.

स्नातः पवित्रहस्तश् च परिजप्ताघमर्षणम् । त्वाम् एव प्रेक्षते देव दक्षिणार्हो द्विजव्रजः

snātaḥ pavitrahastaś ca parijaptāghamarṣaṇam / tvām eva prekṣate deva dakṣiṇārho dvijavrajaḥ

Sanskrit only: no published translation is held for this verse.

चलच्चामरहस्ताभिः पाल्यन्ते परमेश्वर । सज्जीकृतास् तु कान्ताभिश् शीता भोजनभूमयः

calaccāmarahastābhiḥ pālyante parameśvara / sajjīkṛtās tu kāntābhiś śītā bhojanabhūmayaḥ

Sanskrit only: no published translation is held for this verse.

शीघ्रम् उत्तिष्ठ भद्रं ते नियतं कार्यम् आचर । न कालम् अतिवर्तन्ते महान्तस् स्वेषु कर्मसु

śīghram uttiṣṭha bhadraṃ te niyataṃ kāryam ācara / na kālam ativartante mahāntas sveṣu karmasu

Sanskrit only: no published translation is held for this verse.

प्रतीहारपताव् इत्थम् उक्तवत्य् अथ पार्थिवः । तथैव चिन्तयाम् आस चित्रां संसारसंस्थितिम्

pratīhārapatāv ittham uktavaty atha pārthivaḥ / tathaiva cintayām āsa citrāṃ saṃsārasaṃsthitim

Sanskrit only: no published translation is held for this verse.

कियन्मात्रम् इदं नाम राज्यं सुखम् इति स्थितम् । न प्रयोजनम् एतेन ममेह क्षणभङ्गिना

kiyanmātram idaṃ nāma rājyaṃ sukham iti sthitam / na prayojanam etena mameha kṣaṇabhaṅginā

Sanskrit only: no published translation is held for this verse.

सर्वम् एव परित्यज्य मिथ्याडम्बरसम्भ्रमम् । एकान्त एव तिष्ठामि संशान्त इव वारिधिः

sarvam eva parityajya mithyāḍambarasambhramam / ekānta eva tiṣṭhāmi saṃśānta iva vāridhiḥ

Sanskrit only: no published translation is held for this verse.

अलम् एभिर् असत्प्रायैर् मम भोगविजृम्भितैः । त्यक्त्वा सर्वाणि कर्माणि सुखं तिष्ठामि केवलः

alam ebhir asatprāyair mama bhogavijṛmbhitaiḥ / tyaktvā sarvāṇi karmāṇi sukhaṃ tiṣṭhāmi kevalaḥ

Sanskrit only: no published translation is held for this verse.

चित्त चातुर्यम् एतस्माद् भोगाभ्यासकुसम्भ्रमात् । त्यज जन्मजराजाड्यजालजम्बालशान्तये

citta cāturyam etasmād bhogābhyāsakusambhramāt / tyaja janmajarājāḍyajālajambālaśāntaye

Sanskrit only: no published translation is held for this verse.

दशासु यासु यास्व् एव सम्भ्रमं चित्त पश्यसि । ताभ्य एवातिविरतं परमं सुखम् एष्यसि

daśāsu yāsu yāsv eva sambhramaṃ citta paśyasi / tābhya evātivirataṃ paramaṃ sukham eṣyasi

Sanskrit only: no published translation is held for this verse.

प्रवृत्तं सन् निवृत्तं सद् भूयो भूयश् चिरं चिरम् । भोगभूमिषु सर्वासु चित्त तृप्तिं न गच्छसि

pravṛttaṃ san nivṛttaṃ sad bhūyo bhūyaś ciraṃ ciram / bhogabhūmiṣu sarvāsu citta tṛptiṃ na gacchasi

Sanskrit only: no published translation is held for this verse.

तस्मात् तवालम् अनया तुच्छया भोगचिन्तया । भवत्य् अकृत्रिमा तृप्तिर् येनाभिपत तत् ततम्

tasmāt tavālam anayā tucchayā bhogacintayā / bhavaty akṛtrimā tṛptir yenābhipata tat tatam

Sanskrit only: no published translation is held for this verse.

इति सञ्चिन्त्य जनकस् तूष्णीम् एव बभूव ह । शान्तचापलचेतस्त्वाल् लिपिकर्मार्पितोपमः

iti sañcintya janakas tūṣṇīm eva babhūva ha / śāntacāpalacetastvāl lipikarmārpitopamaḥ

Sanskrit only: no published translation is held for this verse.

प्रतीहारो ऽपि नोवाच गौरवेण भयेन च । पुनर्वाक्यं महीपानां चित्तवृत्तिष्व् अशीलितम्

pratīhāro 'pi novāca gauraveṇa bhayena ca / punarvākyaṃ mahīpānāṃ cittavṛttiṣv aśīlitam

Sanskrit only: no published translation is held for this verse.

तूष्णीम् अथ क्षणं स्थित्वा जनको जनजीवितम् । पुनस् सञ्चिन्तयाम् आस मनसा शमशालिना

tūṣṇīm atha kṣaṇaṃ sthitvā janako janajīvitam / punas sañcintayām āsa manasā śamaśālinā

Sanskrit only: no published translation is held for this verse.

किम् उपादेयम् अस्तीह यत्नात् संसाधयामि यत् । कस्मिन् वस्तुनि बध्नामि धृतिं नाशविवर्जिते

kim upādeyam astīha yatnāt saṃsādhayāmi yat / kasmin vastuni badhnāmi dhṛtiṃ nāśavivarjite

Sanskrit only: no published translation is held for this verse.

किं मे क्रियापरतया किं निष्क्रियतयापि वा । न तद् अस्ति विनाशेन वर्जितं यत् किलोदितम्

kiṃ me kriyāparatayā kiṃ niṣkriyatayāpi vā / na tad asti vināśena varjitaṃ yat kiloditam

Sanskrit only: no published translation is held for this verse.

क्रियावान् अक्रियो वास्तु कायो ऽयम् असदुत्थितः । सतस् स्थिरस्य शुद्धस्य चितः का नाम मे क्षतिः

kriyāvān akriyo vāstu kāyo 'yam asadutthitaḥ / satas sthirasya śuddhasya citaḥ kā nāma me kṣatiḥ

Sanskrit only: no published translation is held for this verse.

नाभिवाञ्छाम्य् असम्प्राप्तं सम्प्राप्तं न त्यजाम्य् अहम् । स्वस्थ आत्मनि तिष्ठामि यन् ममास्ति तद् अस्तु मे

nābhivāñchāmy asamprāptaṃ samprāptaṃ na tyajāmy aham / svastha ātmani tiṣṭhāmi yan mamāsti tad astu me

Sanskrit only: no published translation is held for this verse.

न ममेह कृतेनार्थो नाकृतेनेह कश्चन । क्रिययाक्रियया वापि यत् प्राप्यं सद् असत् सतः

na mameha kṛtenārtho nākṛteneha kaścana / kriyayākriyayā vāpi yat prāpyaṃ sad asat sataḥ

Sanskrit only: no published translation is held for this verse.

अकुर्वतः कुर्वतो वा युक्तायुक्ताः क्रिया मम । नाभिवाञ्छितम् अस्तीह यद् उपादेयतां गतम्

akurvataḥ kurvato vā yuktāyuktāḥ kriyā mama / nābhivāñchitam astīha yad upādeyatāṃ gatam

Sanskrit only: no published translation is held for this verse.

तद् उत्थाय क्रमप्राप्तां कायो ऽयं प्रकृतां क्रियाम् । करोत्व् अस्पन्दिताङ्गस् तु किम् अयं साधयिष्यति

tad utthāya kramaprāptāṃ kāyo 'yaṃ prakṛtāṃ kriyām / karotv aspanditāṅgas tu kim ayaṃ sādhayiṣyati

Sanskrit only: no published translation is held for this verse.

स्थिते मनसि निष्कामे समे विगतरञ्जने । कायावयवजौ कार्यस्पन्दास्पन्दौ फले समौ

sthite manasi niṣkāme same vigatarañjane / kāyāvayavajau kāryaspandāspandau phale samau

Sanskrit only: no published translation is held for this verse.

कर्मजासु फलश्रीषु मनसः कर्तृभोक्तृते । तस्मिन् प्रशमम् आयाते कृतम् अप्य् अकृतं नृणाम्

karmajāsu phalaśrīṣu manasaḥ kartṛbhoktṛte / tasmin praśamam āyāte kṛtam apy akṛtaṃ nṛṇām

Sanskrit only: no published translation is held for this verse.

यो निश्चयो ऽन्तः पुरुषस्य रूढः क्रियास्व् असौ तन्मयताम् उपैति । अनामयं मे पदम् आगता धीर् अधीरताम् अन्तर् अलं त्यजामि

yo niścayo 'ntaḥ puruṣasya rūḍhaḥ kriyāsv asau tanmayatām upaiti / anāmayaṃ me padam āgatā dhīr adhīratām antar alaṃ tyajāmi

Sanskrit only: no published translation is held for this verse.