Moksopaya with Bhaskarakantha's Tika 5.11

इति सञ्चिन्त्य जनको यथाप्राप्तां क्रियाम् असौ । असक्तः कर्तुम् उत्तस्थौ दिनं दिनपतिर् यथा

iti sañcintya janako yathāprāptāṃ kriyām asau / asaktaḥ kartum uttasthau dinaṃ dinapatir yathā

Sanskrit only: no published translation is held for this verse.

इष्टानिष्टाः परित्यज्य चेतसा वासनास् स्वयम् । यथाप्राप्तं चकारासौ जाग्रद् एव सुषुप्तवत्

iṣṭāniṣṭāḥ parityajya cetasā vāsanās svayam / yathāprāptaṃ cakārāsau jāgrad eva suṣuptavat

Sanskrit only: no published translation is held for this verse.

सम्पाद्य तद् अहःकार्यम् आर्यावर्जनपूर्वकम् । अनयच् छर्वरीम् एकस् तथैव ध्यानलीलया

sampādya tad ahaḥkāryam āryāvarjanapūrvakam / anayac charvarīm ekas tathaiva dhyānalīlayā

Sanskrit only: no published translation is held for this verse.

मनस् समरसं कृत्वा संशान्तविषयभ्रमम् । शर्वर्यां क्षीयमाणायाम् इत्थं चित्तम् अबोधयत्

manas samarasaṃ kṛtvā saṃśāntaviṣayabhramam / śarvaryāṃ kṣīyamāṇāyām itthaṃ cittam abodhayat

Sanskrit only: no published translation is held for this verse.

चित्त चञ्चलविस्तार आत्मनो न सुखाय ते । शमम् एहि शमात् तात सुखं सारम् अवाप्य ते

citta cañcalavistāra ātmano na sukhāya te / śamam ehi śamāt tāta sukhaṃ sāram avāpya te

Sanskrit only: no published translation is held for this verse.

यथा यथा विकल्पौघं सङ्कल्पयसि हेलया । तथा तथैति स्फारत्वं संसारस् तव चित्तक

yathā yathā vikalpaughaṃ saṅkalpayasi helayā / tathā tathaiti sphāratvaṃ saṃsāras tava cittaka

Sanskrit only: no published translation is held for this verse.

शतशाखत्वम् आयाति सेकेन विटपी यथा । अनन्ताधित्वम् आयासि शठ भोगेच्छया तथा

śataśākhatvam āyāti sekena viṭapī yathā / anantādhitvam āyāsi śaṭha bhogecchayā tathā

Sanskrit only: no published translation is held for this verse.

चिन्ताजालविलासोत्था इमास् संसारसृष्टयः । तस्मात् त्यक्त्वा विचित्रां त्वं चिन्ताम् उपशमं व्रज

cintājālavilāsotthā imās saṃsārasṛṣṭayaḥ / tasmāt tyaktvā vicitrāṃ tvaṃ cintām upaśamaṃ vraja

Sanskrit only: no published translation is held for this verse.

संसारसृष्टिं तरलाम् इमां तुलय सुन्दर । अस्याश् चेत् सारम् आप्नोषि तद् एनाम् एव संश्रय

saṃsārasṛṣṭiṃ taralām imāṃ tulaya sundara / asyāś cet sāram āpnoṣi tad enām eva saṃśraya

Sanskrit only: no published translation is held for this verse.

आस्थाम् अस्मात् परित्यज्य दृश्याद् दर्शनलालस । मैतद् गृहाण मा मुञ्च शुद्धया विहरेच्छया

āsthām asmāt parityajya dṛśyād darśanalālasa / maitad gṛhāṇa mā muñca śuddhayā viharecchayā

Sanskrit only: no published translation is held for this verse.

इदं दृश्यम् असत् सद् वाप्य् उदेत्व् अस्तम् उपैतु वा । साधो विवशतां गच्छ मैतदीयैर् गुणागुणैः

idaṃ dṛśyam asat sad vāpy udetv astam upaitu vā / sādho vivaśatāṃ gaccha maitadīyair guṇāguṇaiḥ

Sanskrit only: no published translation is held for this verse.

मनाग् अपि न सम्बन्धस् तव दृश्येन वस्तुना । अविद्यमानरूपेण सम्बन्धः किल कीदृशः

manāg api na sambandhas tava dṛśyena vastunā / avidyamānarūpeṇa sambandhaḥ kila kīdṛśaḥ

Sanskrit only: no published translation is held for this verse.

असत् त्वम् एतच् च न सद् द्वयोर् एवासतोस् सतोः । सम्बन्ध इति चित्रेयम् अपूर्वैवाक्षरावली

asat tvam etac ca na sad dvayor evāsatos satoḥ / sambandha iti citreyam apūrvaivākṣarāvalī

Sanskrit only: no published translation is held for this verse.

असद् एतद् भवत् सच् चेत् तथापि किल सुन्दर । सङ्गस् सदसतोः कीदृग् वद त्वं मृतजीवतोः

asad etad bhavat sac cet tathāpi kila sundara / saṅgas sadasatoḥ kīdṛg vada tvaṃ mṛtajīvatoḥ

Sanskrit only: no published translation is held for this verse.

चित्त त्वम् अथ दृश्यं च द्वे एव यदि सन्मये । सदा स्थिते तत् प्रसरः कुतो हर्षविषादयोः

citta tvam atha dṛśyaṃ ca dve eva yadi sanmaye / sadā sthite tat prasaraḥ kuto harṣaviṣādayoḥ

Sanskrit only: no published translation is held for this verse.

तस्मान् मा भव मूढं त्वं मा समुल्लासम् आहर । अक्षुब्धां बुद्धिम् आतिष्ठ भव्य त्यज भवस्थितिम्

tasmān mā bhava mūḍhaṃ tvaṃ mā samullāsam āhara / akṣubdhāṃ buddhim ātiṣṭha bhavya tyaja bhavasthitim

Sanskrit only: no published translation is held for this verse.

तिन्दुकालातवद् व्यर्थम् आत्मन्य् एव परिज्वलत् । मा मोहमलम् आसाद्य मन्दतां गच्छ दुर्मते

tindukālātavad vyartham ātmany eva parijvalat / mā mohamalam āsādya mandatāṃ gaccha durmate

Sanskrit only: no published translation is held for this verse.

न तद् इहास्ति समुन्नतम् उत्तमं व्रजसि येन परां परिपूर्णताम् । तद् अवलम्ब्य बलाद् अतिधीरतां जहिहि चञ्चलतां शठ रे मनः

na tad ihāsti samunnatam uttamaṃ vrajasi yena parāṃ paripūrṇatām / tad avalambya balād atidhīratāṃ jahihi cañcalatāṃ śaṭha re manaḥ

Sanskrit only: no published translation is held for this verse.