Moksopaya with Bhaskarakantha's Tika 5.27

सुरासुरसभापूज्ये तस्मिन् भृगुसुते गते । मनसा चिन्तयाम् आस बडिर् बलवतां वरः

surāsurasabhāpūjye tasmin bhṛgusute gate / manasā cintayām āsa baḍir balavatāṃ varaḥ

Sanskrit only: no published translation is held for this verse.

युक्तम् उक्तं भगवता चिद् एवेदं जगत्त्रयम् । चिद् अहं चिद् इमे लोकाश् चिद् आशा चिद् इयं क्रिया

yuktam uktaṃ bhagavatā cid evedaṃ jagattrayam / cid ahaṃ cid ime lokāś cid āśā cid iyaṃ kriyā

Sanskrit only: no published translation is held for this verse.

सबाह्याभ्यन्तरं सर्वं चिद् एव परमार्थतः । अस्ति चिद्व्यतिरेकेण नेह किञ्चन कुत्रचित्

sabāhyābhyantaraṃ sarvaṃ cid eva paramārthataḥ / asti cidvyatirekeṇa neha kiñcana kutracit

Sanskrit only: no published translation is held for this verse.

अयम् आदित्य इत्य् अर्को न चिता चेत्यते यदि । तद् अर्कतमसोर् भेदः क इवेहोपलभ्यते

ayam āditya ity arko na citā cetyate yadi / tad arkatamasor bhedaḥ ka ivehopalabhyate

Sanskrit only: no published translation is held for this verse.

इयं भूर् इति भूर् एषा चिता यदि न चेत्यते । भूमेः किं नाम भूमित्वं तद् भवेद् भव्यतां गतम्

iyaṃ bhūr iti bhūr eṣā citā yadi na cetyate / bhūmeḥ kiṃ nāma bhūmitvaṃ tad bhaved bhavyatāṃ gatam

Sanskrit only: no published translation is held for this verse.

इमा दिशो दिश इति चेत्यन्ते न चिता यदि । तत् किं नाम दिशां दिक्त्वं शैलानां वापि काद्रिता

imā diśo diśa iti cetyante na citā yadi / tat kiṃ nāma diśāṃ diktvaṃ śailānāṃ vāpi kādritā

Sanskrit only: no published translation is held for this verse.

इदं जगद् इति जगच् चिता यदि न चेत्यते । तत् किं जगत्त्वं जगतो नभस्त्वं नभसो ऽथ किम्

idaṃ jagad iti jagac citā yadi na cetyate / tat kiṃ jagattvaṃ jagato nabhastvaṃ nabhaso 'tha kim

Sanskrit only: no published translation is held for this verse.

कायो ऽयं पर्वताकारश् चिता यदि न चेत्यते । तत् किं नाम शरीरत्वं शरीरस्य शरीरिणाम्

kāyo 'yaṃ parvatākāraś citā yadi na cetyate / tat kiṃ nāma śarīratvaṃ śarīrasya śarīriṇām

Sanskrit only: no published translation is held for this verse.

चिद् इन्द्रियाणि चित् कायश् चिन् मनश् चित् तदेषणा । चिद् अन्तश् चिद् बहिश् चित् खं चिद् भावश् चिद् भवस्थितिः

cid indriyāṇi cit kāyaś cin manaś cit tadeṣaṇā / cid antaś cid bahiś cit khaṃ cid bhāvaś cid bhavasthitiḥ

Sanskrit only: no published translation is held for this verse.

चिद् एवैकम् अहं सर्वं स्पर्शनैषणपूर्वकम् । करोमि मात्रासंस्पर्शं शरीरेण न किञ्चन

cid evaikam ahaṃ sarvaṃ sparśanaiṣaṇapūrvakam / karomi mātrāsaṃsparśaṃ śarīreṇa na kiñcana

Sanskrit only: no published translation is held for this verse.

किम् अनेन शरीरेण काष्ठलोष्टसमेन मे । अशेषजगदेकात्मा चिद् अहं चेतनात्मकः

kim anena śarīreṇa kāṣṭhaloṣṭasamena me / aśeṣajagadekātmā cid ahaṃ cetanātmakaḥ

Sanskrit only: no published translation is held for this verse.

अहं चिद् अम्बरे भानाव् अहं चिद् भूतपञ्जरे । सुरासुरेषु चिद् अहं स्थावरेषु चरेषु च

ahaṃ cid ambare bhānāv ahaṃ cid bhūtapañjare / surāsureṣu cid ahaṃ sthāvareṣu careṣu ca

Sanskrit only: no published translation is held for this verse.

चिद् अस्तीह द्वितीया हि कल्पनैव न विद्यते । द्वित्वस्यासम्भवाल् लोके कश् शत्रुः कश् च वा सुहृत्

cid astīha dvitīyā hi kalpanaiva na vidyate / dvitvasyāsambhavāl loke kaś śatruḥ kaś ca vā suhṛt

Sanskrit only: no published translation is held for this verse.

बडिनाम्नश् शरीरस्य च्छिन्ने शिरसि भासुरे । चितस् तत् किं भवेच् छिन्नं सर्वलोकावपूरणात्

baḍināmnaś śarīrasya cchinne śirasi bhāsure / citas tat kiṃ bhavec chinnaṃ sarvalokāvapūraṇāt

Sanskrit only: no published translation is held for this verse.

चिता सञ्चेतितो द्वेषो द्वेषो भवति नान्यथा । तस्माद् द्वेषादयस् सर्वे भावाभावाश् चिदात्मकाः

citā sañcetito dveṣo dveṣo bhavati nānyathā / tasmād dveṣādayas sarve bhāvābhāvāś cidātmakāḥ

Sanskrit only: no published translation is held for this verse.

न चितो व्यतिरेकेण प्रविचार्यापि किञ्चन । अन्यद् आसाद्यते स्फाराद् अस्मात् त्रिभुवनोदरात्

na cito vyatirekeṇa pravicāryāpi kiñcana / anyad āsādyate sphārād asmāt tribhuvanodarāt

Sanskrit only: no published translation is held for this verse.

न द्वेषो ऽस्ति न रागो ऽस्ति न मनो नास्य वृत्तयः । चिन्मात्रस्यातिशुद्धस्य विकल्पकलना कुतः

na dveṣo 'sti na rāgo 'sti na mano nāsya vṛttayaḥ / cinmātrasyātiśuddhasya vikalpakalanā kutaḥ

Sanskrit only: no published translation is held for this verse.

चिद् अहं सर्वगो व्यापी नित्यानन्दमयात्मकः । विकल्पकलनातीतो विकल्पांशविवर्जितः

cid ahaṃ sarvago vyāpī nityānandamayātmakaḥ / vikalpakalanātīto vikalpāṃśavivarjitaḥ

Sanskrit only: no published translation is held for this verse.

चितश् चिद् इति यन् नाम निर्नामाया न नाम तत् । शब्दात्मिकैषा चिच्छक्तिः परिस्फुरति सर्वगा

citaś cid iti yan nāma nirnāmāyā na nāma tat / śabdātmikaiṣā cicchaktiḥ parisphurati sarvagā

Sanskrit only: no published translation is held for this verse.

दृश्यदर्शननिर्मुक्तः केवलामलमूर्तिमान् । नित्योदितो निराभासो द्रष्टास्मि परमेश्वरः

dṛśyadarśananirmuktaḥ kevalāmalamūrtimān / nityodito nirābhāso draṣṭāsmi parameśvaraḥ

Sanskrit only: no published translation is held for this verse.

न कर्तास्मि न भोक्तास्मि द्रष्टैवास्मि निरामयः । कल्पनाविकलाकारकालकान्तकलामयः

na kartāsmi na bhoktāsmi draṣṭaivāsmi nirāmayaḥ / kalpanāvikalākārakālakāntakalāmayaḥ

Sanskrit only: no published translation is held for this verse.

आभासमात्रम् उदितो नित्य आभास्यवर्जितः । भारूपैकस्वरूपो ऽस्मि स्वरूपेण जयाम्य् अहम्

ābhāsamātram udito nitya ābhāsyavarjitaḥ / bhārūpaikasvarūpo 'smi svarūpeṇa jayāmy aham

Sanskrit only: no published translation is held for this verse.

चेत्यरञ्जनरिक्ताय विमुक्ताय महात्मने । प्रत्यक्चेतनरूपाय स्वरूपाय नमो ऽस्तु मे

cetyarañjanariktāya vimuktāya mahātmane / pratyakcetanarūpāya svarūpāya namo 'stu me

Sanskrit only: no published translation is held for this verse.

चितये चेत्यमुक्ताय युक्त्या युक्ताय योग्यया । सर्वावभासरूपाय मह्यम् एव नमो नमः

citaye cetyamuktāya yuktyā yuktāya yogyayā / sarvāvabhāsarūpāya mahyam eva namo namaḥ

Sanskrit only: no published translation is held for this verse.

चेत्यनिर्मुक्तचिद्रूपं विष्वग्विश्वावपूरकम् । संशान्तसर्वसंवेद्यं संविन्मात्रम् अहं ततम्

cetyanirmuktacidrūpaṃ viṣvagviśvāvapūrakam / saṃśāntasarvasaṃvedyaṃ saṃvinmātram ahaṃ tatam

Sanskrit only: no published translation is held for this verse.

आकाशवद् अनन्तो ऽहम् अप्य् अणोर् अणुर् आततः । नासादयन्ति माम् एतास् सुखदुःखदशादृशः

ākāśavad ananto 'ham apy aṇor aṇur ātataḥ / nāsādayanti mām etās sukhaduḥkhadaśādṛśaḥ

Sanskrit only: no published translation is held for this verse.

संवेदनम् असंवेद्यम् अचेत्यं चेतनं ततम् । न शक्ता मां परिच्छेत्तुम् भावाभावा जगद्गताः

saṃvedanam asaṃvedyam acetyaṃ cetanaṃ tatam / na śaktā māṃ paricchettum bhāvābhāvā jagadgatāḥ

Sanskrit only: no published translation is held for this verse.

अथ वैते जगद्भावाः परिच्छिन्दन्तु माम् इमम् । यथाभिमतम् एते हि मत्तो न व्यतिरेकिणः

atha vaite jagadbhāvāḥ paricchindantu mām imam / yathābhimatam ete hi matto na vyatirekiṇaḥ

Sanskrit only: no published translation is held for this verse.

यदि स्वभावभूतेन वस्तुना वस्तु मीयते । ह्रियते दीयते वापि तत् किं कस्य किल क्षतम्

yadi svabhāvabhūtena vastunā vastu mīyate / hriyate dīyate vāpi tat kiṃ kasya kila kṣatam

Sanskrit only: no published translation is held for this verse.

सर्वदा सर्वम् एवाहं सर्वकृत् सर्वसङ्गतः । चेत्यम् अस्त्य् अहम् एवैतन् न किञ्चिद् अपि चोदितम्

sarvadā sarvam evāhaṃ sarvakṛt sarvasaṅgataḥ / cetyam asty aham evaitan na kiñcid api coditam

Sanskrit only: no published translation is held for this verse.

किं सङ्कल्पविकल्पाभ्यां चिद् अचिच् चाहम् एकभाः । सङ्क्षोभयाम्य् अहं तावच् छाम्याम्य् आत्मनि पावने

kiṃ saṅkalpavikalpābhyāṃ cid acic cāham ekabhāḥ / saṅkṣobhayāmy ahaṃ tāvac chāmyāmy ātmani pāvane

Sanskrit only: no published translation is held for this verse.

इति सञ्चिन्तयन्न् एव बडिः परमकोविदः । अकारार्धार्धमात्रार्थं भावयन् ध्यानम् आस्थितः

iti sañcintayann eva baḍiḥ paramakovidaḥ / akārārdhārdhamātrārthaṃ bhāvayan dhyānam āsthitaḥ

Sanskrit only: no published translation is held for this verse.

संशान्तसर्वसङ्कल्पः प्रशान्तकलनागणः । निश्शङ्कम् अतिदूरास्तचेत्यचिन्तकचिन्तनः

saṃśāntasarvasaṅkalpaḥ praśāntakalanāgaṇaḥ / niśśaṅkam atidūrāstacetyacintakacintanaḥ

Sanskrit only: no published translation is held for this verse.

ध्यातृध्येयध्यानहीनो निर्मनाश् शान्तवासनः । बभूवावातदीपाभो बडिः प्राप्तमहापदः

dhyātṛdhyeyadhyānahīno nirmanāś śāntavāsanaḥ / babhūvāvātadīpābho baḍiḥ prāptamahāpadaḥ

Sanskrit only: no published translation is held for this verse.

उपशान्तमनास् तत्र रत्नवातायने बडिः । अवसद् बहुकालं स समुत्कीर्ण इवोपलात्

upaśāntamanās tatra ratnavātāyane baḍiḥ / avasad bahukālaṃ sa samutkīrṇa ivopalāt

Sanskrit only: no published translation is held for this verse.

प्रशमितैषणया परिपूर्णया मननदोषदशोज्झितयोच्चया । बडिर् अराजत निर्मलसत्तया विघनम् अच्छतयेव शरन्नभः

praśamitaiṣaṇayā paripūrṇayā mananadoṣadaśojjhitayoccayā / baḍir arājata nirmalasattayā vighanam acchatayeva śarannabhaḥ

Sanskrit only: no published translation is held for this verse.