Moksopaya with Bhaskarakantha's Tika 5.30

अथेमम् अपरं राम विज्ञानाधिगमे क्रमम् । शृणु दैत्येश्वरस् सिद्धः प्रह्लादस् स्वात्मना यथा

athemam aparaṃ rāma vijñānādhigame kramam / śṛṇu daityeśvaras siddhaḥ prahlādas svātmanā yathā

Sanskrit only: no published translation is held for this verse.

आसीत् पातालजठरे विद्रावितसुरो ऽसुरः । हिरण्यकशिपुर् नाम नारायणपराक्रमः

āsīt pātālajaṭhare vidrāvitasuro 'suraḥ / hiraṇyakaśipur nāma nārāyaṇaparākramaḥ

Sanskrit only: no published translation is held for this verse.

आक्रान्तभुवनाभोगस् स जहार हरेर् जगत् । षट्पदस्य बृहत्पत्त्रं राजहंस इवाम्बुजम्

ākrāntabhuvanābhogas sa jahāra harer jagat / ṣaṭpadasya bṛhatpattraṃ rājahaṃsa ivāmbujam

Sanskrit only: no published translation is held for this verse.

चकार जगतां राज्यं समाक्रान्तसुरासुरः । दन्ती निरस्तहंसौघो नलिन्याम् अलिनाम् इव

cakāra jagatāṃ rājyaṃ samākrāntasurāsuraḥ / dantī nirastahaṃsaugho nalinyām alinām iva

Sanskrit only: no published translation is held for this verse.

अथासाव् असुराधीशः कुर्वंस् त्रिभुवनेशताम् । कालेन सुषुवे पुत्रान् अङ्कुरान् इव माधवः

athāsāv asurādhīśaḥ kurvaṃs tribhuvaneśatām / kālena suṣuve putrān aṅkurān iva mādhavaḥ

Sanskrit only: no published translation is held for this verse.

ते ऽवर्धन्ताचिरेणैव तेजस्तर्जिततारकाः । दशार्कांशुशतानीव व्योमाक्रान्तिविलासिनः

te 'vardhantācireṇaiva tejastarjitatārakāḥ / daśārkāṃśuśatānīva vyomākrāntivilāsinaḥ

Sanskrit only: no published translation is held for this verse.

प्रह्लादो नाम भगवान् प्रधानात्मा बभूव ह । तेषां मध्ये महार्हाणां मणीनाम् इव कौस्तुभः

prahlādo nāma bhagavān pradhānātmā babhūva ha / teṣāṃ madhye mahārhāṇāṃ maṇīnām iva kaustubhaḥ

Sanskrit only: no published translation is held for this verse.

तेनाराजत पुत्रेण हिरण्यकशिपुर् भृशम् । सर्वसौन्दर्ययुक्तेन वसन्तेनेव वत्सरः

tenārājata putreṇa hiraṇyakaśipur bhṛśam / sarvasaundaryayuktena vasanteneva vatsaraḥ

Sanskrit only: no published translation is held for this verse.

अथ पुत्रसहायो ऽसौ बलकोशसमन्वितः । आजगाम मदं दैत्यस् त्रिगण्डगलितेभवत्

atha putrasahāyo 'sau balakośasamanvitaḥ / ājagāma madaṃ daityas trigaṇḍagalitebhavat

Sanskrit only: no published translation is held for this verse.

ततापाक्रान्तितापेन त्रिजगन्ति विकासिना । कल्पान्तसूर्यगणवन् नवयैव करश्रिया

tatāpākrāntitāpena trijaganti vikāsinā / kalpāntasūryagaṇavan navayaiva karaśriyā

Sanskrit only: no published translation is held for this verse.

अखिद्यन्तास्य तेनाथ सूर्येन्दुप्रमुखास् सुराः । दुर्विलासविलोलस्य बालस्येव स्वबन्धवः

akhidyantāsya tenātha sūryendupramukhās surāḥ / durvilāsavilolasya bālasyeva svabandhavaḥ

Sanskrit only: no published translation is held for this verse.

ते ऽर्थयां चक्रिरे शौरिं दैत्येन्द्रेभपतेर् वधे । न क्षमन्ते महान्तो ऽपि पौनःपुण्येन दुष्क्रियाम्

te 'rthayāṃ cakrire śauriṃ daityendrebhapater vadhe / na kṣamante mahānto 'pi paunaḥpuṇyena duṣkriyām

Sanskrit only: no published translation is held for this verse.

ततः प्रलयपर्यस्तजगद्घर्घरजृम्भितम् । दिग्दन्तिदशनप्रख्यनखवज्राश्रिसूम्भितम्

tataḥ pralayaparyastajagadghargharajṛmbhitam / digdantidaśanaprakhyanakhavajrāśrisūmbhitam

Sanskrit only: no published translation is held for this verse.

स्थिरविद्युल्लताजालभासुरोर्ध्वजमण्डलम् । दशदिक्कोटरोद्वान्तज्वलज्ज्वलनकुण्डलम्

sthiravidyullatājālabhāsurordhvajamaṇḍalam / daśadikkoṭarodvāntajvalajjvalanakuṇḍalam

Sanskrit only: no published translation is held for this verse.

समस्तकुलशैलेन्द्रपिण्डपीठोद्भटोदरम् । दोर्द्रुमाधूननोद्धूतस्फुटद्ब्रह्माण्डकर्परम्

samastakulaśailendrapiṇḍapīṭhodbhaṭodaram / dordrumādhūnanoddhūtasphuṭadbrahmāṇḍakarparam

Sanskrit only: no published translation is held for this verse.

वदनोदरनिष्क्रान्तवातोत्सारितपर्वतं । त्रिजगद्दहनोद्युक्तकोपकल्पाग्निगर्वितम्

vadanodaraniṣkrāntavātotsāritaparvataṃ / trijagaddahanodyuktakopakalpāgnigarvitam

Sanskrit only: no published translation is held for this verse.

सटाविकटपीनांसस्पन्दप्रेरितभास्करम् । रोमकूपलसद्वह्निपुञ्जपिञ्जरपर्वतम्

saṭāvikaṭapīnāṃsaspandapreritabhāskaram / romakūpalasadvahnipuñjapiñjaraparvatam

Sanskrit only: no published translation is held for this verse.

कुलाचलमहाकुड्यकुट्टनोद्भटदृक्पुटम् । सर्वावयवनिष्ठ्यूतपट्टिसप्रासतोमरम्

kulācalamahākuḍyakuṭṭanodbhaṭadṛkpuṭam / sarvāvayavaniṣṭhyūtapaṭṭisaprāsatomaram

Sanskrit only: no published translation is held for this verse.

नारसिंहं वपुः कृत्वा माधवो ऽहन् महासुरम् । लसत्कटकटारावं तुरङ्गमम् इव द्विपः

nārasiṃhaṃ vapuḥ kṛtvā mādhavo 'han mahāsuram / lasatkaṭakaṭārāvaṃ turaṅgamam iva dvipaḥ

Sanskrit only: no published translation is held for this verse.

पुरम् आसुरम् उद्वान्तैर् ददाहेक्षणवह्निभिः । ससर्वभूतं कल्पान्ते जगज्जालम् इवानलः

puram āsuram udvāntair dadāhekṣaṇavahnibhiḥ / sasarvabhūtaṃ kalpānte jagajjālam ivānalaḥ

Sanskrit only: no published translation is held for this verse.

नृसिंहमारुते तस्मिन् भृशं क्षोभम् उपागते । विस्फूर्जति घनास्फोटैर् एकार्णव इवाकुले

nṛsiṃhamārute tasmin bhṛśaṃ kṣobham upāgate / visphūrjati ghanāsphoṭair ekārṇava ivākule

Sanskrit only: no published translation is held for this verse.

दुद्रुवुर् दानवौघास् ते दिक्ष्व् अलं मषका इव । उपाययुर् अदृश्यत्वं दीपा इव गतत्विषः

dudruvur dānavaughās te dikṣv alaṃ maṣakā iva / upāyayur adṛśyatvaṃ dīpā iva gatatviṣaḥ

Sanskrit only: no published translation is held for this verse.

अथ विद्रुतदैत्येन्द्रं दग्धान्तःपुरमण्डलम् । बभूव पातालतलं कल्पक्षुण्णजगत्समम्

atha vidrutadaityendraṃ dagdhāntaḥpuramaṇḍalam / babhūva pātālatalaṃ kalpakṣuṇṇajagatsamam

Sanskrit only: no published translation is held for this verse.

अकालकल्पान्तविधौ शनैः प्रशमिते विभौ । क्वापि याते समाश्वस्तसुरसंरम्भपूजिते

akālakalpāntavidhau śanaiḥ praśamite vibhau / kvāpi yāte samāśvastasurasaṃrambhapūjite

Sanskrit only: no published translation is held for this verse.

मृतशिष्टा दनुसुताः प्रह्लादपरिपालिताः । दग्धं स्वं देशम् आजग्मुस् सरश् शुष्कम् इवाण्डजाः

mṛtaśiṣṭā danusutāḥ prahlādaparipālitāḥ / dagdhaṃ svaṃ deśam ājagmus saraś śuṣkam ivāṇḍajāḥ

Sanskrit only: no published translation is held for this verse.

तत्र कालोचितां कृत्वा स्वनाशपरिदेवनाम् । और्ध्वदैहिकसत्कारं चक्रुः प्रभुषु बन्धुषु

tatra kālocitāṃ kṛtvā svanāśaparidevanām / aurdhvadaihikasatkāraṃ cakruḥ prabhuṣu bandhuṣu

Sanskrit only: no published translation is held for this verse.

हृतबन्दीजनं प्लुष्टबन्धुबान्धवमण्डलम् । शनैर् आश्वासयाम् आसुर् मृतशिष्टं स्वकं जनम्

hṛtabandījanaṃ pluṣṭabandhubāndhavamaṇḍalam / śanair āśvāsayām āsur mṛtaśiṣṭaṃ svakaṃ janam

Sanskrit only: no published translation is held for this verse.

चित्रार्पितोपमदुराकृतयो निरीहा दीनाशया हिमहताम्बुरुहोपमानाः । शोकोपतप्तमनसो ऽसुरनायकास् ते दग्धद्रुमा इव निरस्तविकासम् आसन्

citrārpitopamadurākṛtayo nirīhā dīnāśayā himahatāmburuhopamānāḥ / śokopataptamanaso 'suranāyakās te dagdhadrumā iva nirastavikāsam āsan

Sanskrit only: no published translation is held for this verse.