Moksopaya with Bhaskarakantha's Tika 5.33

गर्जन्तम् अतिसंरब्धं सुरलोकम् अथारिहा । उवाच माधवो वाक्यं शिखिवृन्दम् इवाम्बुदः

garjantam atisaṃrabdhaṃ suralokam athārihā / uvāca mādhavo vākyaṃ śikhivṛndam ivāmbudaḥ

Sanskrit only: no published translation is held for this verse.

विबुधा मा विषण्णास् स्थ प्रह्लादो भक्तिमान् इति । पाश्चात्यं जन्म तस्येदं मोक्षार्हो ऽसाव् अरिन्दमः

vibudhā mā viṣaṇṇās stha prahlādo bhaktimān iti / pāścātyaṃ janma tasyedaṃ mokṣārho 'sāv arindamaḥ

Sanskrit only: no published translation is held for this verse.

इत उत्तरम् एतेन गर्भता दनुसूनुना । न कर्तव्या प्रदग्धेन बीजेनेवाङ्कुरक्रिया

ita uttaram etena garbhatā danusūnunā / na kartavyā pradagdhena bījenevāṅkurakriyā

Sanskrit only: no published translation is held for this verse.

गुणवान् निर्गुणो जात इत्य् अनर्थक्रमं विदुः । निर्गुणो गुणवाञ् जात इत्य् आहुस् सिद्धिदं क्रमम्

guṇavān nirguṇo jāta ity anarthakramaṃ viduḥ / nirguṇo guṇavāñ jāta ity āhus siddhidaṃ kramam

Sanskrit only: no published translation is held for this verse.

आत्मीयानि विचित्राणि भुवनान्य् अमरोत्तमाः । प्रयात नासुखायैषा प्राह्लादी गुणितेह वः

ātmīyāni vicitrāṇi bhuvanāny amarottamāḥ / prayāta nāsukhāyaiṣā prāhlādī guṇiteha vaḥ

Sanskrit only: no published translation is held for this verse.

इत्य् उक्त्वा विबुधांस् तत्र क्षीरोदार्णववीचिषु । अन्तर्धानं ययौ देवस् तटतापिञ्छगुच्छवत्

ity uktvā vibudhāṃs tatra kṣīrodārṇavavīciṣu / antardhānaṃ yayau devas taṭatāpiñchagucchavat

Sanskrit only: no published translation is held for this verse.

सो ऽपि सम्पूजितहरिस् सुरौघो ऽव्रजद् अम्बरम् । पुनर् मन्दरनिर्धूतात् कणजालम् इवार्णवात्

so 'pi sampūjitaharis suraugho 'vrajad ambaram / punar mandaranirdhūtāt kaṇajālam ivārṇavāt

Sanskrit only: no published translation is held for this verse.

प्रह्लादं प्रति गीर्वाणास् ततस् स्निग्धत्वम् आययुः । महान्तो यत्र नोद्विग्नास् तत्र विश्वासवन् मनः

prahlādaṃ prati gīrvāṇās tatas snigdhatvam āyayuḥ / mahānto yatra nodvignās tatra viśvāsavan manaḥ

Sanskrit only: no published translation is held for this verse.

प्रत्यहं पूजयाम् आस देवदेवं जनार्दनम् । मनसा कर्मणा वाचा प्रह्लादो भक्तिमान् इति

pratyahaṃ pūjayām āsa devadevaṃ janārdanam / manasā karmaṇā vācā prahlādo bhaktimān iti

Sanskrit only: no published translation is held for this verse.

अथ पूजापरस्यास्य समवर्धन्त कालतः । विवेकानन्दवैराग्यविभवप्रमुखा गुणाः

atha pūjāparasyāsya samavardhanta kālataḥ / vivekānandavairāgyavibhavapramukhā guṇāḥ

Sanskrit only: no published translation is held for this verse.

नाभ्यनन्दद् असौ भोगपूगं शुष्कम् इव द्रुमम् । न चारमत कान्तासु मृगो मरुमहीष्व् इव

nābhyanandad asau bhogapūgaṃ śuṣkam iva drumam / na cāramata kāntāsu mṛgo marumahīṣv iva

Sanskrit only: no published translation is held for this verse.

न रेमे लोकचर्चासु शास्त्रार्थकथनाद् ऋते । नाजायत रतिस् तस्य दृश्ये स्थल इवाब्जिनी

na reme lokacarcāsu śāstrārthakathanād ṛte / nājāyata ratis tasya dṛśye sthala ivābjinī

Sanskrit only: no published translation is held for this verse.

न विशश्राम चेतो ऽस्य भोगरोगानुरञ्जने । मुक्ताफलम् असंश्लिष्टं मुक्ताफल इवातले

na viśaśrāma ceto 'sya bhogarogānurañjane / muktāphalam asaṃśliṣṭaṃ muktāphala ivātale

Sanskrit only: no published translation is held for this verse.

त्यक्तभोगाभिकलनं विश्रान्तिम् अथ नागतम् । चेतः केवलम् अस्यासीद् दोलायाम् इव योजितम्

tyaktabhogābhikalanaṃ viśrāntim atha nāgatam / cetaḥ kevalam asyāsīd dolāyām iva yojitam

Sanskrit only: no published translation is held for this verse.

प्राह्लादीं तां स्थितिं कृष्णदेहः क्षीरोदकोटरात् । विवेद सर्वगतया तया परमकान्तया

prāhlādīṃ tāṃ sthitiṃ kṛṣṇadehaḥ kṣīrodakoṭarāt / viveda sarvagatayā tayā paramakāntayā

Sanskrit only: no published translation is held for this verse.

अथ पातालमार्गेण विष्णुर् आह्लादिताग्रगः । पूजादेवगृहं तस्य प्रह्लादस्य समाययौ

atha pātālamārgeṇa viṣṇur āhlāditāgragaḥ / pūjādevagṛhaṃ tasya prahlādasya samāyayau

Sanskrit only: no published translation is held for this verse.

विज्ञायाभ्यागतं देवं पूजया द्विगुणेद्धया । दैत्येन्द्रः पुण्डरीकाक्षम् आदरात् पर्यपूजयत्

vijñāyābhyāgataṃ devaṃ pūjayā dviguṇeddhayā / daityendraḥ puṇḍarīkākṣam ādarāt paryapūjayat

Sanskrit only: no published translation is held for this verse.

पूजागृहगतं देवं प्रत्यक्षावस्थितं हरिम् । प्रह्लादः परमप्रीतो गिरा तुष्टाव पुष्टया

pūjāgṛhagataṃ devaṃ pratyakṣāvasthitaṃ harim / prahlādaḥ paramaprīto girā tuṣṭāva puṣṭayā

Sanskrit only: no published translation is held for this verse.

त्रिभुवनभवनाभिरामकोशं सकलकलङ्कहरं परं प्रकाशम् । अशरणशरणं शरण्यम् ईशं हरिम् अजम् ईश्वरम् अच्युतं प्रपद्ये

tribhuvanabhavanābhirāmakośaṃ sakalakalaṅkaharaṃ paraṃ prakāśam / aśaraṇaśaraṇaṃ śaraṇyam īśaṃ harim ajam īśvaram acyutaṃ prapadye

Sanskrit only: no published translation is held for this verse.

कुवलयदलशैलसन्निकाशं शरदमलाम्बरकोटरोपमानम् । भ्रमरतिमिरकज्जलाञ्जनाभं सरसिजचक्रगदाधरं प्रपद्ये

kuvalayadalaśailasannikāśaṃ śaradamalāmbarakoṭaropamānam / bhramaratimirakajjalāñjanābhaṃ sarasijacakragadādharaṃ prapadye

Sanskrit only: no published translation is held for this verse.

विचलदलिकलापकोमलाङ्गं सितदलपङ्कजकुट्मलाभशङ्खम् । श्रुतिरणितविरिञ्चचञ्चरीकं स्वहृदयपद्मजलाशयं प्रपद्ये

vicaladalikalāpakomalāṅgaṃ sitadalapaṅkajakuṭmalābhaśaṅkham / śrutiraṇitaviriñcacañcarīkaṃ svahṛdayapadmajalāśayaṃ prapadye

Sanskrit only: no published translation is held for this verse.

सितमणिगणतारकावकीर्णं स्मितधवलाननपीवरेन्दुबिम्बम् । हृदयमणिमरीचिजालगङ्गं हरिशरदम्बरम् आततं प्रपद्ये

sitamaṇigaṇatārakāvakīrṇaṃ smitadhavalānanapīvarendubimbam / hṛdayamaṇimarīcijālagaṅgaṃ hariśaradambaram ātataṃ prapadye

Sanskrit only: no published translation is held for this verse.

त्रिभुवननलिनीसितारविन्दं तिमिरसमानविमोहदीपम् अग्र्यम् । जडतरम् अजडं चिदात्मतत्त्वं जगदखिलार्तिहरं हरिं प्रपद्ये

tribhuvananalinīsitāravindaṃ timirasamānavimohadīpam agryam / jaḍataram ajaḍaṃ cidātmatattvaṃ jagadakhilārtiharaṃ hariṃ prapadye

Sanskrit only: no published translation is held for this verse.

नवविकसितपद्मरेणुगौरं स्फुटकमलावपुषोपरूषिताङ्गम् । दिनगमसमयारुणाम्बराभं कनकनिभाम्बरसुन्दरं प्रपद्ये

navavikasitapadmareṇugauraṃ sphuṭakamalāvapuṣoparūṣitāṅgam / dinagamasamayāruṇāmbarābhaṃ kanakanibhāmbarasundaraṃ prapadye

Sanskrit only: no published translation is held for this verse.

अविरतहतसृष्टसर्गलीलं सततम् अजातम् अवर्धनं विशालम् । युगशतजरढाभिजातदेहं तरुतलशायिनम् अर्भकं प्रपद्ये

aviratahatasṛṣṭasargalīlaṃ satatam ajātam avardhanaṃ viśālam / yugaśatajaraḍhābhijātadehaṃ tarutalaśāyinam arbhakaṃ prapadye

Sanskrit only: no published translation is held for this verse.

दितिसुतनलिनीतुषारपातं सुरनलिनीसततोदितार्कबिम्बम् । कमलजनलिनीजलावपूरं हृदि नलिनीनिलयं विभुं प्रपद्ये

ditisutanalinītuṣārapātaṃ suranalinīsatatoditārkabimbam / kamalajanalinījalāvapūraṃ hṛdi nalinīnilayaṃ vibhuṃ prapadye

Sanskrit only: no published translation is held for this verse.

इति गुणबहुलाभिर् वाग्भिर् अभ्यर्चितो ऽसौ हरिर् असुरविनाशश् श्रीनिषण्णांसदेशः । जलद इव मयूरं प्रीतिमान् प्रीयमाणं कुवलयदलदेहः प्रत्युवाचासुरेन्द्रम्

iti guṇabahulābhir vāgbhir abhyarcito 'sau harir asuravināśaś śrīniṣaṇṇāṃsadeśaḥ / jalada iva mayūraṃ prītimān prīyamāṇaṃ kuvalayadaladehaḥ pratyuvācāsurendram

Sanskrit only: no published translation is held for this verse.