Moksopaya with Bhaskarakantha's Tika 5.38

अथाखिलजगज्जालक्रमपालनदेवनः । क्षीरोदनगरे शेषशय्यासनगतो हरिः

athākhilajagajjālakramapālanadevanaḥ / kṣīrodanagare śeṣaśayyāsanagato hariḥ

Sanskrit only: no published translation is held for this verse.

प्रावृण्निद्राव्युपरमे देवार्थम् अरिसूदनः । धिया विलोकयाम् आस कदाचिज् जागतीं स्थितिम्

prāvṛṇnidrāvyuparame devārtham arisūdanaḥ / dhiyā vilokayām āsa kadācij jāgatīṃ sthitim

Sanskrit only: no published translation is held for this verse.

त्रैविष्टपं स्वमनसा पार्थिवं चावलोक्य सः । आचारम् आजगामाशु पातालम् अरिपालितम्

traiviṣṭapaṃ svamanasā pārthivaṃ cāvalokya saḥ / ācāram ājagāmāśu pātālam aripālitam

Sanskrit only: no published translation is held for this verse.

तत्र स्थिरसमाधानस्थिते प्रह्लाददानवे । दृष्ट्वापदम् अरीन्द्रस्य पुरे प्रौढिम् उपागताम्

tatra sthirasamādhānasthite prahlādadānave / dṛṣṭvāpadam arīndrasya pure prauḍhim upāgatām

Sanskrit only: no published translation is held for this verse.

व्यालतल्पतलस्थस्य क्षीरोदार्णवशायिनः । शङ्खचक्रगदापाणेर् देहस्यान्तरचारिणा

vyālatalpatalasthasya kṣīrodārṇavaśāyinaḥ / śaṅkhacakragadāpāṇer dehasyāntaracāriṇā

Sanskrit only: no published translation is held for this verse.

पद्मासनस्थस्य मनश्शरीरेणातिभास्वता । इदं सञ्चिन्तयाम् आस त्रैलोक्याब्जमहालिना

padmāsanasthasya manaśśarīreṇātibhāsvatā / idaṃ sañcintayām āsa trailokyābjamahālinā

Sanskrit only: no published translation is held for this verse.

प्रह्लादे पदविश्रान्ते पाताले गतनायके । कष्टं सृष्टिर् इयं प्रायो निर्दैत्यत्वम् उपागता

prahlāde padaviśrānte pātāle gatanāyake / kaṣṭaṃ sṛṣṭir iyaṃ prāyo nirdaityatvam upāgatā

Sanskrit only: no published translation is held for this verse.

दैत्याभावे सुरश्रेणी निर्जिगीषुपदं गता । शमम् एष्यत्य् अदृष्टाब्दपटलेव सरिद् वरा

daityābhāve suraśreṇī nirjigīṣupadaṃ gatā / śamam eṣyaty adṛṣṭābdapaṭaleva sarid varā

Sanskrit only: no published translation is held for this verse.

मोक्षाख्यं विगतद्वन्द्वं ततो यास्यति तत् पदम् । क्षीणाभिमाना विरसा लतेव परिशुष्कताम्

mokṣākhyaṃ vigatadvandvaṃ tato yāsyati tat padam / kṣīṇābhimānā virasā lateva pariśuṣkatām

Sanskrit only: no published translation is held for this verse.

देवौघे शान्तिम् आयाते भुवि यज्ञतपःक्रियाः । अदेवत्वफलास् सर्वाश् शमम् एष्यन्त्य् असंशयम्

devaughe śāntim āyāte bhuvi yajñatapaḥkriyāḥ / adevatvaphalās sarvāś śamam eṣyanty asaṃśayam

Sanskrit only: no published translation is held for this verse.

क्रियास्व् अथोपशान्तासु भूलोको ऽस्तम् उपैष्यति । असंसारप्रसङ्गो ऽथ शेषो ऽप्य् अर्थो भविष्यति

kriyāsv athopaśāntāsu bhūloko 'stam upaiṣyati / asaṃsāraprasaṅgo 'tha śeṣo 'py artho bhaviṣyati

Sanskrit only: no published translation is held for this verse.

आकल्पान्तं त्रिभुवनं यद् इदं निर्मितं मया । लयम् एष्यत्य् अकाले तत् तापे हिमकणो यथा

ākalpāntaṃ tribhuvanaṃ yad idaṃ nirmitaṃ mayā / layam eṣyaty akāle tat tāpe himakaṇo yathā

Sanskrit only: no published translation is held for this verse.

किम् एवम् अस्मिन्न् आभासे विलीय क्षयम् आगते । कृतं मयेह भवति स्वलीलाक्षयकारिणा

kim evam asminn ābhāse vilīya kṣayam āgate / kṛtaṃ mayeha bhavati svalīlākṣayakāriṇā

Sanskrit only: no published translation is held for this verse.

ततो ऽहम् अपि शून्ये ऽस्मिन् नष्टचन्द्रार्कतारके । वपुःप्रशान्तिम् आदाय स्थितिम् एष्यामि तत्पदे

tato 'ham api śūnye 'smin naṣṭacandrārkatārake / vapuḥpraśāntim ādāya sthitim eṣyāmi tatpade

Sanskrit only: no published translation is held for this verse.

अकाण्ड एवम् एवं हि जगत्य् उपशमं गते । नेह श्रेयो ऽनुपश्यामि मन्ये जीवन्तु दानवाः

akāṇḍa evam evaṃ hi jagaty upaśamaṃ gate / neha śreyo 'nupaśyāmi manye jīvantu dānavāḥ

Sanskrit only: no published translation is held for this verse.

दैत्योद्वेगेन विबुधास् ततो यज्ञतपःक्रियाः । तेन संसारसंस्थानम् असंसारक्रमो ऽन्यथा

daityodvegena vibudhās tato yajñatapaḥkriyāḥ / tena saṃsārasaṃsthānam asaṃsārakramo 'nyathā

Sanskrit only: no published translation is held for this verse.

तस्माद् रसातलं गत्वा यथावत् स्थापयाम्य् अहम् । स्वे क्रमे दानवाधीशम् ऋतुः पुनर् इव द्रुमम्

tasmād rasātalaṃ gatvā yathāvat sthāpayāmy aham / sve krame dānavādhīśam ṛtuḥ punar iva drumam

Sanskrit only: no published translation is held for this verse.

विना प्रह्लादम् अथ चेद् इतरं दानवेश्वरम् । करोमि तद् असौ मन्ये देवान् उत्सादयिष्यति

vinā prahlādam atha ced itaraṃ dānaveśvaram / karomi tad asau manye devān utsādayiṣyati

Sanskrit only: no published translation is held for this verse.

प्रह्लादस्य त्व् अयं देहः पश्चिमः पावनो महान् । आकल्पम् इह वस्तव्यं देहेनानेन तेन च

prahlādasya tv ayaṃ dehaḥ paścimaḥ pāvano mahān / ākalpam iha vastavyaṃ dehenānena tena ca

Sanskrit only: no published translation is held for this verse.

एवं हि नियतिर् दैवी निश्चिता पारमेश्वरी । प्रह्लादेन यथाकल्पं स्थातव्यम् इह देहिना

evaṃ hi niyatir daivī niścitā pārameśvarī / prahlādena yathākalpaṃ sthātavyam iha dehinā

Sanskrit only: no published translation is held for this verse.

तस्मात् तम् एव गत्वाशु दैत्येन्द्रं बोधयाम्य् अहम् । गर्जन् गिरिदरीसुप्तं मयूरम् इव वारिदः

tasmāt tam eva gatvāśu daityendraṃ bodhayāmy aham / garjan giridarīsuptaṃ mayūram iva vāridaḥ

Sanskrit only: no published translation is held for this verse.

जीवन्मुक्तसमाधिस्थः करोत्व् असुरनाथताम् । मणिर् मुक्तमनस्कारः प्रतिबिम्बक्रियाम् इव

jīvanmuktasamādhisthaḥ karotv asuranāthatām / maṇir muktamanaskāraḥ pratibimbakriyām iva

Sanskrit only: no published translation is held for this verse.

न विनश्यति सर्गो ऽयम् एवं सह सुरासुरैः । भविष्यति च नाद्वन्द्वं तन् मे क्रीडा भविष्यति

na vinaśyati sargo 'yam evaṃ saha surāsuraiḥ / bhaviṣyati ca nādvandvaṃ tan me krīḍā bhaviṣyati

Sanskrit only: no published translation is held for this verse.

सर्गक्षयोदयाव् एतौ सुसमौ मम यद्य् अपि । तथापीदं यथासंस्थं भवत्व् अन्येन किं मम

sargakṣayodayāv etau susamau mama yady api / tathāpīdaṃ yathāsaṃsthaṃ bhavatv anyena kiṃ mama

Sanskrit only: no published translation is held for this verse.

भावाभावेषु यत् तुल्यं तन्नाशे तत्स्थितौ च वा । यः प्रयत्नः कुबुद्धित्वात् तद् व्योमहननं भवेत्

bhāvābhāveṣu yat tulyaṃ tannāśe tatsthitau ca vā / yaḥ prayatnaḥ kubuddhitvāt tad vyomahananaṃ bhavet

Sanskrit only: no published translation is held for this verse.

तस्मात् प्रयामि पातालं बोधयाम्य् असुरेश्वरम् । स्थैर्यं नयामि संसारं लीलां सम्पादयाम्य् अहम्

tasmāt prayāmi pātālaṃ bodhayāmy asureśvaram / sthairyaṃ nayāmi saṃsāraṃ līlāṃ sampādayāmy aham

Sanskrit only: no published translation is held for this verse.

असुरपुरम् अवाप्य प्रोद्धताचारघोरं कमलम् इव विवस्वान् दैत्यम् उद्बोधयामि । जगद् इदम् अखिलास्थं स्थैर्यम् अभ्यानयामि घनविधिर् इव शैले चञ्चलं मेघजालम्

asurapuram avāpya proddhatācāraghoraṃ kamalam iva vivasvān daityam udbodhayāmi / jagad idam akhilāsthaṃ sthairyam abhyānayāmi ghanavidhir iva śaile cañcalaṃ meghajālam

Sanskrit only: no published translation is held for this verse.