Moksopaya with Bhaskarakantha's Tika 5.4

मेघगम्भीरया वाचा विस्रब्धपदसुन्दरम् । इदं दशरथो वाक्यम् उवाच मुनिनायकम्

meghagambhīrayā vācā visrabdhapadasundaram / idaṃ daśaratho vākyam uvāca munināyakam

Sanskrit only: no published translation is held for this verse.

भगवन् ह्यस्तनेन त्वं वाक्यसन्दर्भजन्मना । कच्चिन् मुक्तो ऽसि खेदेन तपःकार्श्यातिशायिना

bhagavan hyastanena tvaṃ vākyasandarbhajanmanā / kaccin mukto 'si khedena tapaḥkārśyātiśāyinā

Sanskrit only: no published translation is held for this verse.

ह्यस् त्वयोक्तो य आनन्दी विविक्तो वचसां गणः । अमृतावर्षणेनेव तेनेहाश्वासिता वयम्

hyas tvayokto ya ānandī vivikto vacasāṃ gaṇaḥ / amṛtāvarṣaṇeneva tenehāśvāsitā vayam

Sanskrit only: no published translation is held for this verse.

चन्द्रांशव इवोत्सार्य तमांस्य् अमृतनिर्मिताः । अन्तश् शीतलयन्त्य् एता महताम् अमला गिरः

candrāṃśava ivotsārya tamāṃsy amṛtanirmitāḥ / antaś śītalayanty etā mahatām amalā giraḥ

Sanskrit only: no published translation is held for this verse.

अपूर्वाह्लाददायिन्य उच्चैस्तरपदाश्रयाः । अतिमोहापहारिण्यस् सूक्तयो ऽमृतवृष्टयः

apūrvāhlādadāyinya uccaistarapadāśrayāḥ / atimohāpahāriṇyas sūktayo 'mṛtavṛṣṭayaḥ

Sanskrit only: no published translation is held for this verse.

आत्मरत्नावलोकैकदीपिका पारमार्थिकी । यस्माद् उक्तिलतोदेति स वन्द्यस् सज्जनद्रुमः

ātmaratnāvalokaikadīpikā pāramārthikī / yasmād uktilatodeti sa vandyas sajjanadrumaḥ

Sanskrit only: no published translation is held for this verse.

दुरीहितं दुर्विहितं सर्वं सज्जनसूक्तयः । प्रमार्जयन्ति शीतांशोस् तमस्काण्डम् इवांशवः

durīhitaṃ durvihitaṃ sarvaṃ sajjanasūktayaḥ / pramārjayanti śītāṃśos tamaskāṇḍam ivāṃśavaḥ

Sanskrit only: no published translation is held for this verse.

तृष्णालोभादयो ऽस्माकं संसारनिगडा मुने । तवोक्त्या तनुतां याताश् शरदीवासिताम्बुदाः

tṛṣṇālobhādayo 'smākaṃ saṃsāranigaḍā mune / tavoktyā tanutāṃ yātāś śaradīvāsitāmbudāḥ

Sanskrit only: no published translation is held for this verse.

सम्प्रवृत्ता वयं द्रष्टुम् आत्मानम् अपकल्मषम् । रसाञ्जनानीतदृशो जात्यन्धा इव काञ्चनम्

sampravṛttā vayaṃ draṣṭum ātmānam apakalmaṣam / rasāñjanānītadṛśo jātyandhā iva kāñcanam

Sanskrit only: no published translation is held for this verse.

संसारवासनानाम्नी मिहिका हृदयाम्बरे । प्रवृत्ता तनुतां गन्तुं त्वदुक्तिशरदेह नः

saṃsāravāsanānāmnī mihikā hṛdayāmbare / pravṛttā tanutāṃ gantuṃ tvaduktiśaradeha naḥ

Sanskrit only: no published translation is held for this verse.

मुने मन्दारमञ्जर्यस् तरङ्गा वामृताम्भसः । न तथाह्लादयन्त्य् अन्तर् यथोदारधियां गिरः

mune mandāramañjaryas taraṅgā vāmṛtāmbhasaḥ / na tathāhlādayanty antar yathodāradhiyāṃ giraḥ

Sanskrit only: no published translation is held for this verse.

यद् यद् राघव संयाति महाजनसपर्यया । दिनं तद् इह सालोकं शेषास् त्व् अन्धा दिनालयः

yad yad rāghava saṃyāti mahājanasaparyayā / dinaṃ tad iha sālokaṃ śeṣās tv andhā dinālayaḥ

Sanskrit only: no published translation is held for this verse.

राम राजीवपत्त्राक्ष प्रकृतार्थदिदृक्षया । मुनिम् आबोधय पुनः प्रसादे समवस्थितम्

rāma rājīvapattrākṣa prakṛtārthadidṛkṣayā / munim ābodhaya punaḥ prasāde samavasthitam

Sanskrit only: no published translation is held for this verse.

इत्य् उक्ते भूभृता तत्र रामाभिमुखम् आस्थितः । उवाचेदम् उदारात्मा वसिष्ठो भगवान् मुनिः

ity ukte bhūbhṛtā tatra rāmābhimukham āsthitaḥ / uvācedam udārātmā vasiṣṭho bhagavān muniḥ

Sanskrit only: no published translation is held for this verse.

राघव स्वकुलैकेन्दो तं मयोक्तं महामते । कच्चित् स्मरसि वाक्यार्थं पूर्वापरविचारितम्

rāghava svakulaikendo taṃ mayoktaṃ mahāmate / kaccit smarasi vākyārthaṃ pūrvāparavicāritam

Sanskrit only: no published translation is held for this verse.

उत्पत्तीनां विचित्राणां सत्त्वादिगुणभेदतः । कच्चित् स्मरसि सर्वासां विभागम् अरिमर्दन

utpattīnāṃ vicitrāṇāṃ sattvādiguṇabhedataḥ / kaccit smarasi sarvāsāṃ vibhāgam arimardana

Sanskrit only: no published translation is held for this verse.

कच्चित् सर्वम् असर्वं च सद् असच् च सदोदितम् । रूपं स्मरसि देवस्य विमलं परमात्मनः

kaccit sarvam asarvaṃ ca sad asac ca sadoditam / rūpaṃ smarasi devasya vimalaṃ paramātmanaḥ

Sanskrit only: no published translation is held for this verse.

यथेदम् उदितं विश्वं विश्वेशाद् ईश्वरेश्वरात् । कच्चित् स्मरसि तत् साधो साधुवादैकभाजन

yathedam uditaṃ viśvaṃ viśveśād īśvareśvarāt / kaccit smarasi tat sādho sādhuvādaikabhājana

Sanskrit only: no published translation is held for this verse.

रूपं कच्चिद् अविद्यायाः फल्गुभङ्गुरम् आततम् । अनन्तम् अन्तवच् चैव सम्यक् स्मरसि सन्मते

rūpaṃ kaccid avidyāyāḥ phalgubhaṅguram ātatam / anantam antavac caiva samyak smarasi sanmate

Sanskrit only: no published translation is held for this verse.

चित्तम् एव नरो नान्यद् इति यत् प्रतिपादितम् । लवणादिविचारेण कच्चित् स्मरसि साधु तत्

cittam eva naro nānyad iti yat pratipāditam / lavaṇādivicāreṇa kaccit smarasi sādhu tat

Sanskrit only: no published translation is held for this verse.

वाक्यार्थश् चाखिलः कच्चित् त्वया राम विचारितः । ह्यस्तनस्य विचारस्य रात्रौ हृदि निवेशितः

vākyārthaś cākhilaḥ kaccit tvayā rāma vicāritaḥ / hyastanasya vicārasya rātrau hṛdi niveśitaḥ

Sanskrit only: no published translation is held for this verse.

भूयो भूयः परामृष्टं हृदये सुनियोजितम् । प्रयोजनं फलत्य् उच्चैर् न हेलाहतसंस्थिति

bhūyo bhūyaḥ parāmṛṣṭaṃ hṛdaye suniyojitam / prayojanaṃ phalaty uccair na helāhatasaṃsthiti

Sanskrit only: no published translation is held for this verse.

भाजनं त्वं विविक्तानां वचसां शुद्धिशालिनाम् । विविक्तहृदयो वेणुर् मुक्तानाम् इव मानद

bhājanaṃ tvaṃ viviktānāṃ vacasāṃ śuddhiśālinām / viviktahṛdayo veṇur muktānām iva mānada

Sanskrit only: no published translation is held for this verse.

कमलासनपुत्रेण मुनिना सुमहौजसा । एवंवितीर्णावसरो रामो वाक्यम् उवाच ह

kamalāsanaputreṇa muninā sumahaujasā / evaṃvitīrṇāvasaro rāmo vākyam uvāca ha

Sanskrit only: no published translation is held for this verse.

भगवन् सर्वधर्मज्ञ तवैवैतद् विजृम्भितम् । यद् अहं परमोदारं बुद्धवान् वचनं तव

bhagavan sarvadharmajña tavaivaitad vijṛmbhitam / yad ahaṃ paramodāraṃ buddhavān vacanaṃ tava

Sanskrit only: no published translation is held for this verse.

यद् आदिशसि तत् सर्वं तथैव न तद् अन्यथा । अपास्तनिद्रेण मया वाक्यार्थो निशि चिन्तितः

yad ādiśasi tat sarvaṃ tathaiva na tad anyathā / apāstanidreṇa mayā vākyārtho niśi cintitaḥ

Sanskrit only: no published translation is held for this verse.

भवान्धकारक्षतये भवतोर्वीविवस्वता । ह्यः प्रसारितम् आह्लादि वाग्रश्मिपटलं प्रभो

bhavāndhakārakṣataye bhavatorvīvivasvatā / hyaḥ prasāritam āhlādi vāgraśmipaṭalaṃ prabho

Sanskrit only: no published translation is held for this verse.

तद् अदीनम् अदीनात्मन् सर्वम् अन्तःकृतं मया । रम्यं पुण्यं विचित्रं च रत्नवृन्दम् इवाब्धिना

tad adīnam adīnātman sarvam antaḥkṛtaṃ mayā / ramyaṃ puṇyaṃ vicitraṃ ca ratnavṛndam ivābdhinā

Sanskrit only: no published translation is held for this verse.

हितानुबन्धि हृद्यं च पुण्यम् आनन्दसाधनम् । शिरसा ध्रियते कैर् नो सिद्ध्यै त्वदनुशासनम्

hitānubandhi hṛdyaṃ ca puṇyam ānandasādhanam / śirasā dhriyate kair no siddhyai tvadanuśāsanam

Sanskrit only: no published translation is held for this verse.

प्रक्षीयमाणसंसारनीहारावरणा वयम् । प्रसन्नास् त्वत्प्रसादेन वर्षान्त इव वासराः

prakṣīyamāṇasaṃsāranīhārāvaraṇā vayam / prasannās tvatprasādena varṣānta iva vāsarāḥ

Sanskrit only: no published translation is held for this verse.

आपातमधुरारम्भं मध्ये सौभाग्यवर्धनम् । अनुत्तमफलोदर्कं पुण्यं त्वदनुशासनम्

āpātamadhurārambhaṃ madhye saubhāgyavardhanam / anuttamaphalodarkaṃ puṇyaṃ tvadanuśāsanam

Sanskrit only: no published translation is held for this verse.

विकासि सितम् अम्लानम् आह्लादि मुदिताशयम् । त्वद्वचःकुसुमं नित्यं श्रीमत्फलदम् अस्तु नः

vikāsi sitam amlānam āhlādi muditāśayam / tvadvacaḥkusumaṃ nityaṃ śrīmatphaladam astu naḥ

Sanskrit only: no published translation is held for this verse.

सकलशाश्वतशास्त्रविशारद प्रसृतपुण्यजलैकमहाह्रद । भज भृशं विततव्रत सम्प्रति प्रसृततां हतकिल्बिष मां प्रति

sakalaśāśvataśāstraviśārada prasṛtapuṇyajalaikamahāhrada / bhaja bhṛśaṃ vitatavrata samprati prasṛtatāṃ hatakilbiṣa māṃ prati

Sanskrit only: no published translation is held for this verse.