Moksopaya with Bhaskarakantha's Tika 5.50

एवम् एषातिवितता दुर्ज्ञाना रघुनन्दन । महामोहकरी माया विषमा पारमात्मिकी

evam eṣātivitatā durjñānā raghunandana / mahāmohakarī māyā viṣamā pāramātmikī

Sanskrit only: no published translation is held for this verse.

क्व मुहूर्तद्वयस्वप्नसम्भ्रमालोकदृष्टता । क्वानेकवर्षसम्भुक्तश्वपचावनिपभ्रमः

kva muhūrtadvayasvapnasambhramālokadṛṣṭatā / kvānekavarṣasambhuktaśvapacāvanipabhramaḥ

Sanskrit only: no published translation is held for this verse.

क्व सम्भ्रमोपलब्धत्वं क्व प्रत्यक्षनिदर्शनम् । क्वासत्यत्वम् असन्दिग्धं क्व सत्यपरिणामिता

kva sambhramopalabdhatvaṃ kva pratyakṣanidarśanam / kvāsatyatvam asandigdhaṃ kva satyapariṇāmitā

Sanskrit only: no published translation is held for this verse.

अतो वच्मि महाबाहो मायेयं विततेत्य् अलम् । असावधानमनसं योजयत्य् अतिसङ्कटे

ato vacmi mahābāho māyeyaṃ vitatety alam / asāvadhānamanasaṃ yojayaty atisaṅkaṭe

Sanskrit only: no published translation is held for this verse.

एवम् अस्य कथं ब्रह्मन् मायाचक्रस्य रोधनम् । कुर्मः प्रबलिनो वेगात् सर्वाङ्गच्छेदकारिणः

evam asya kathaṃ brahman māyācakrasya rodhanam / kurmaḥ prabalino vegāt sarvāṅgacchedakāriṇaḥ

Sanskrit only: no published translation is held for this verse.

अस्य संसाररूपस्य मायाचक्रस्य राघव । चित्तं विद्धि महानाभिं भ्रमतो भ्रमदायिनः

asya saṃsārarūpasya māyācakrasya rāghava / cittaṃ viddhi mahānābhiṃ bhramato bhramadāyinaḥ

Sanskrit only: no published translation is held for this verse.

तस्मिन् नूनम् अवष्टब्धे धिया पुरुषयत्नतः । गृहीतनाभि वहनान् मायाचक्रं निरुध्यते

tasmin nūnam avaṣṭabdhe dhiyā puruṣayatnataḥ / gṛhītanābhi vahanān māyācakraṃ nirudhyate

Sanskrit only: no published translation is held for this verse.

अवष्टब्धमनोनाभि मोहचक्रं न चोपति । यथा रज्ज्वां निरुद्धायां कीलकं रज्जुवेष्टितम्

avaṣṭabdhamanonābhi mohacakraṃ na copati / yathā rajjvāṃ niruddhāyāṃ kīlakaṃ rajjuveṣṭitam

Sanskrit only: no published translation is held for this verse.

चक्रयुद्धैकतज्ज्ञो ऽपि कस्माज् जानासि नानघ । चक्रं नाभाव् अवष्टब्धं वशम् आयाति नान्यथा

cakrayuddhaikatajjño 'pi kasmāj jānāsi nānagha / cakraṃ nābhāv avaṣṭabdhaṃ vaśam āyāti nānyathā

Sanskrit only: no published translation is held for this verse.

चित्तनाभाव् अवष्टभ्य तस्माद् यत्नेन राघव । संसारचक्रं वहनाद् आत्मनः परिरोधय

cittanābhāv avaṣṭabhya tasmād yatnena rāghava / saṃsāracakraṃ vahanād ātmanaḥ parirodhaya

Sanskrit only: no published translation is held for this verse.

एतां युक्तिं विना दुःखम् अनन्तम् इदम् आत्मनः । अस्यां युक्तौ क्षणात् त्व् अन्तं गतम् एवावलोकय

etāṃ yuktiṃ vinā duḥkham anantam idam ātmanaḥ / asyāṃ yuktau kṣaṇāt tv antaṃ gatam evāvalokaya

Sanskrit only: no published translation is held for this verse.

चित्ताक्रमणमात्राख्यात् परमाद् औषधाद् ऋते । प्रयत्नेनापि संसारमहारोगो न शाम्यति

cittākramaṇamātrākhyāt paramād auṣadhād ṛte / prayatnenāpi saṃsāramahārogo na śāmyati

Sanskrit only: no published translation is held for this verse.

तस्माद् राघव सन्त्यज्य तीर्थदानतपःक्रियाः । श्रेयसे परमायान्तश् चित्तम् एव वशीकुरु

tasmād rāghava santyajya tīrthadānatapaḥkriyāḥ / śreyase paramāyāntaś cittam eva vaśīkuru

Sanskrit only: no published translation is held for this verse.

चित्तान्तर् एव संसारः कुम्भान्तः कुम्भखं यथा । चित्तनाशे न संसारः कुम्भनाशे न कुम्भखम्

cittāntar eva saṃsāraḥ kumbhāntaḥ kumbhakhaṃ yathā / cittanāśe na saṃsāraḥ kumbhanāśe na kumbhakham

Sanskrit only: no published translation is held for this verse.

चित्तसंसारणाकाशकोटरे चित्तकुम्भखम् । विनाश्यातुलिताकाशरूपं स्वं रूपम् आविश

cittasaṃsāraṇākāśakoṭare cittakumbhakham / vināśyātulitākāśarūpaṃ svaṃ rūpam āviśa

Sanskrit only: no published translation is held for this verse.

वर्तमानं क्रमायातं भजद् बाह्यधिया क्षणम् । भूतं भविष्यद् अभजद् याति चित्तम् अचित्तताम्

vartamānaṃ kramāyātaṃ bhajad bāhyadhiyā kṣaṇam / bhūtaṃ bhaviṣyad abhajad yāti cittam acittatām

Sanskrit only: no published translation is held for this verse.

सङ्कल्पं सानुसन्धानवर्जनं चेत् प्रतिक्षणम् । करोषि तद् अचित्तत्वं प्राप्त एवासि पावनम्

saṅkalpaṃ sānusandhānavarjanaṃ cet pratikṣaṇam / karoṣi tad acittatvaṃ prāpta evāsi pāvanam

Sanskrit only: no published translation is held for this verse.

यावत् सङ्कल्पकलनं तावच् चित्तविभूतयः । यावज् जलदविस्तारस् तावत् खे जलबिन्दवः

yāvat saṅkalpakalanaṃ tāvac cittavibhūtayaḥ / yāvaj jaladavistāras tāvat khe jalabindavaḥ

Sanskrit only: no published translation is held for this verse.

सचित्तं चेतनं यावत् तावत् सङ्कल्पकल्पनम् । सचन्द्रांशु जगद् यावत् तावत् प्रालेयलेशकाः

sacittaṃ cetanaṃ yāvat tāvat saṅkalpakalpanam / sacandrāṃśu jagad yāvat tāvat prāleyaleśakāḥ

Sanskrit only: no published translation is held for this verse.

चेतनश् चित्तरिक्तश् चेद् भावितस् तत् कुसंसृतेः । आमूलम् एव दग्धानि विद्धि मूलानि सिद्धिमन्

cetanaś cittariktaś ced bhāvitas tat kusaṃsṛteḥ / āmūlam eva dagdhāni viddhi mūlāni siddhiman

Sanskrit only: no published translation is held for this verse.

चेतनं चित्तरिक्तं हि प्रत्यक्चेतनम् उच्यते । निर्मनस्कस्वभावं तन् न तत्र कलनामलः

cetanaṃ cittariktaṃ hi pratyakcetanam ucyate / nirmanaskasvabhāvaṃ tan na tatra kalanāmalaḥ

Sanskrit only: no published translation is held for this verse.

सा सत्यता सा शिवता सा सत्ता पारमात्मिकी । सर्वज्ञता सा सा तृप्तिर् ननु यत्र मनः क्षतम्

sā satyatā sā śivatā sā sattā pāramātmikī / sarvajñatā sā sā tṛptir nanu yatra manaḥ kṣatam

Sanskrit only: no published translation is held for this verse.

मनो यत्र तु तत्रास्थास् तत्र दुःखसुखानि च । सदा सन्निधिम् आयान्ति श्मशान इव वायसाः

mano yatra tu tatrāsthās tatra duḥkhasukhāni ca / sadā sannidhim āyānti śmaśāna iva vāyasāḥ

Sanskrit only: no published translation is held for this verse.

अवस्तुत्वावबोधेन सर्वभावव्यवस्थितेः । संसृतिव्रततेर् बीजं सङ्कल्पे नोपजायते

avastutvāvabodhena sarvabhāvavyavasthiteḥ / saṃsṛtivratater bījaṃ saṅkalpe nopajāyate

Sanskrit only: no published translation is held for this verse.

शास्त्रसज्जनसम्पर्कसन्तताभ्यासयोगतः । जागतानाम् अवस्तुत्वं भावानाम् अधिगम्यते

śāstrasajjanasamparkasantatābhyāsayogataḥ / jāgatānām avastutvaṃ bhāvānām adhigamyate

Sanskrit only: no published translation is held for this verse.

अविवेकाद् उपाहृत्य चेतस् स्वैर् यत्ननिश्चयैः । बलात्कारेण संयोज्यं शास्त्रसत्पुरुषक्रमे

avivekād upāhṛtya cetas svair yatnaniścayaiḥ / balātkāreṇa saṃyojyaṃ śāstrasatpuruṣakrame

Sanskrit only: no published translation is held for this verse.

मुख्यं कारणम् आत्मैव परमात्मावलोकने । अगाधे पतितं रत्नं रत्नेनैवावकृष्यते

mukhyaṃ kāraṇam ātmaiva paramātmāvalokane / agādhe patitaṃ ratnaṃ ratnenaivāvakṛṣyate

Sanskrit only: no published translation is held for this verse.

स्वानुभूतानि दुःखानि स्वात्मैव त्यक्तुम् अर्हति । तेनात्मैवात्मविज्ञाने हेतुर् एकः परस् स्मृतः

svānubhūtāni duḥkhāni svātmaiva tyaktum arhati / tenātmaivātmavijñāne hetur ekaḥ paras smṛtaḥ

Sanskrit only: no published translation is held for this verse.

प्रलपन् विसृजन् गृह्णन्न् उन्मिषन् निमिषन्न् अपि । निरस्तमननानन्तसंविन्मात्रपरो भव

pralapan visṛjan gṛhṇann unmiṣan nimiṣann api / nirastamananānantasaṃvinmātraparo bhava

Sanskrit only: no published translation is held for this verse.

ममेदं तद् अयं सो ऽहम् इति सन्त्यज्य वासनाः । एकनिष्ठतयान्तस्स्थसंविन्मात्रपरो भव

mamedaṃ tad ayaṃ so 'ham iti santyajya vāsanāḥ / ekaniṣṭhatayāntassthasaṃvinmātraparo bhava

Sanskrit only: no published translation is held for this verse.

वर्तमानभविष्यन्त्योस् स्थित्योर् आदेहम् एकधीः । स्वसंवित्त्यनुसन्धानात् समाधानपरो भव

vartamānabhaviṣyantyos sthityor ādeham ekadhīḥ / svasaṃvittyanusandhānāt samādhānaparo bhava

Sanskrit only: no published translation is held for this verse.

पलायनेषु युद्धेषु दुःखेषु च सुखेषु च । जाग्रत्स्वप्नसुषुप्तेषु स्वसंवित्तिपरो भव

palāyaneṣu yuddheṣu duḥkheṣu ca sukheṣu ca / jāgratsvapnasuṣupteṣu svasaṃvittiparo bhava

Sanskrit only: no published translation is held for this verse.

मलं संवेद्यम् उत्सृज्य मनो निर्मथ्य मन्थरम् । आशापाशान् अलं छित्त्वा स्वसंवित्तिपरो भव

malaṃ saṃvedyam utsṛjya mano nirmathya mantharam / āśāpāśān alaṃ chittvā svasaṃvittiparo bhava

Sanskrit only: no published translation is held for this verse.

अशुभाशुभसङ्केतस् संशान्ताशाविषूचिकः । नष्टेष्टानिष्टदृष्टिस् त्वं संवित्सारपरो भव

aśubhāśubhasaṅketas saṃśāntāśāviṣūcikaḥ / naṣṭeṣṭāniṣṭadṛṣṭis tvaṃ saṃvitsāraparo bhava

Sanskrit only: no published translation is held for this verse.

सकर्तृकर्मकरणान् स्वान् स्पर्शान् अन्तर् अस्पृशन् । निर्विकल्पनिरालम्बस् स्वचिन्मात्रपरो भव

sakartṛkarmakaraṇān svān sparśān antar aspṛśan / nirvikalpanirālambas svacinmātraparo bhava

Sanskrit only: no published translation is held for this verse.

जाग्रत्य् एव हि सौषुप्तीं भावयन् सुस्थिरां स्थितिम् । सर्वम् अस्तीति सञ्चिन्त्य सत्तैकात्मवपुर् भव

jāgraty eva hi sauṣuptīṃ bhāvayan susthirāṃ sthitim / sarvam astīti sañcintya sattaikātmavapur bhava

Sanskrit only: no published translation is held for this verse.

नानानानादशामुक्तो युक्तो मुक्ततयाशये । समग्रकलनादीपस् स्वचिन्मात्रपरो भव

nānānānādaśāmukto yukto muktatayāśaye / samagrakalanādīpas svacinmātraparo bhava

Sanskrit only: no published translation is held for this verse.

आत्मतापरते त्यक्त्वा निर्विभागो जगत्स्थितौ । वज्रस्तम्भवद् आत्मानम् अवलम्ब्य स्थिरो भव

ātmatāparate tyaktvā nirvibhāgo jagatsthitau / vajrastambhavad ātmānam avalambya sthiro bhava

Sanskrit only: no published translation is held for this verse.

छित्त्वान्तर् मानसान् पाशान् आशारूपान् उदारया । धिया धैर्यैकधारिण्या निर्धर्माधर्मतां व्रज

chittvāntar mānasān pāśān āśārūpān udārayā / dhiyā dhairyaikadhāriṇyā nirdharmādharmatāṃ vraja

Sanskrit only: no published translation is held for this verse.

समासादयतस् तत्त्वं स्वसंवेदनम् इत्य् अलम् । विषं हालाहलम् अपि यास्यत्य् अमृततां तव

samāsādayatas tattvaṃ svasaṃvedanam ity alam / viṣaṃ hālāhalam api yāsyaty amṛtatāṃ tava

Sanskrit only: no published translation is held for this verse.

तदोदेति महामोहस् संसृतिभ्रमकारणम् । निर्मलाया निरंशायास् स्वसंवित्तेश् च्युतिर् यदा

tadodeti mahāmohas saṃsṛtibhramakāraṇam / nirmalāyā niraṃśāyās svasaṃvitteś cyutir yadā

Sanskrit only: no published translation is held for this verse.

तदा सङ्क्षीयते मोहस् संसृतिभ्रमकारणम् । निर्मलायां निरंशायां स्वसंवित्तौ स्थितिर् यदा

tadā saṅkṣīyate mohas saṃsṛtibhramakāraṇam / nirmalāyāṃ niraṃśāyāṃ svasaṃvittau sthitir yadā

Sanskrit only: no published translation is held for this verse.

स्वरूपम् अनुयातस्य तीर्णस्याशामहार्णवम् । प्रसरिष्यति ते संवित् सूर्यांशुर् इव सर्वतः

svarūpam anuyātasya tīrṇasyāśāmahārṇavam / prasariṣyati te saṃvit sūryāṃśur iva sarvataḥ

Sanskrit only: no published translation is held for this verse.

स्वभावम् आलोकयत आनन्दमयसंस्थितेः । रसायनम् अपि स्वादु राम प्रतिविषायते

svabhāvam ālokayata ānandamayasaṃsthiteḥ / rasāyanam api svādu rāma prativiṣāyate

Sanskrit only: no published translation is held for this verse.

तैर् न लज्जामहे पुम्भिर् ये स्वभावम् उपागताः । शेषाः पुरुषनामानो गर्दभा दीर्घबाहवः

tair na lajjāmahe pumbhir ye svabhāvam upāgatāḥ / śeṣāḥ puruṣanāmāno gardabhā dīrghabāhavaḥ

Sanskrit only: no published translation is held for this verse.

पर्वताः खर्वतां यान्ति पुरो ऽद्रेर् इव दन्तिनः । परां कोटिं प्रयातस्य स्वसंवित्त्युन्नतस्थितेः

parvatāḥ kharvatāṃ yānti puro 'drer iva dantinaḥ / parāṃ koṭiṃ prayātasya svasaṃvittyunnatasthiteḥ

Sanskrit only: no published translation is held for this verse.

आदृश्यद्रष्टृसीम्नो ऽन्तस् सूर्यादीन्य् अखिलान्य् अपि । न तेजांस्य् उपकुर्वन्ति स्वसंविद्दिव्यचक्षुषः

ādṛśyadraṣṭṛsīmno 'ntas sūryādīny akhilāny api / na tejāṃsy upakurvanti svasaṃviddivyacakṣuṣaḥ

Sanskrit only: no published translation is held for this verse.

अवस्तुतां व्रजन्त्य् एते मध्याह्न इव दीपकाः । अर्कादयो महालोकविधाव् अधिगतात्मनः

avastutāṃ vrajanty ete madhyāhna iva dīpakāḥ / arkādayo mahālokavidhāv adhigatātmanaḥ

Sanskrit only: no published translation is held for this verse.

तेजोऽंशुषु प्रभावेषु बलेष्व् अतिमहत्स्व् अपि । सर्वेषून्नतियुक्तेषु तत्त्वज्ञः परमोन्नतः

tejo'ṃśuṣu prabhāveṣu baleṣv atimahatsv api / sarveṣūnnatiyukteṣu tattvajñaḥ paramonnataḥ

Sanskrit only: no published translation is held for this verse.

भान्ति भासा यथा सूर्यवह्नीन्दुमणितारकाः । तथा जगति राजन्ते ज्ञातज्ञेया नरोत्तमाः

bhānti bhāsā yathā sūryavahnīndumaṇitārakāḥ / tathā jagati rājante jñātajñeyā narottamāḥ

Sanskrit only: no published translation is held for this verse.

धराविवरकीटेभ्यो गर्दभेभ्यो ऽपि मानवाः । तिर्यग्भ्यश् चाप्य् अतत्त्वज्ञा राम तुच्छतरास् स्मृताः

dharāvivarakīṭebhyo gardabhebhyo 'pi mānavāḥ / tiryagbhyaś cāpy atattvajñā rāma tucchatarās smṛtāḥ

Sanskrit only: no published translation is held for this verse.

तावत् सम्मोहवेतालो देहो यावद् अनात्मवान् । आत्मज्ञ एव संयुक्तश् चेतनेनेति तद्विदः

tāvat sammohavetālo deho yāvad anātmavān / ātmajña eva saṃyuktaś cetaneneti tadvidaḥ

Sanskrit only: no published translation is held for this verse.

अनात्मज्ञो हि दुर्देहः प्रस्फुरन्न् अपि भूतले । शव एव भ्रमत्य् उच्चैर् आत्मज्ञस् तु सचेतनः

anātmajño hi durdehaḥ prasphurann api bhūtale / śava eva bhramaty uccair ātmajñas tu sacetanaḥ

Sanskrit only: no published translation is held for this verse.

दूरम् आत्मज्ञता याति चित्ते पीवरतां गते । आलोकलक्ष्मीर् अमला महामेघ इवोत्थिते

dūram ātmajñatā yāti citte pīvaratāṃ gate / ālokalakṣmīr amalā mahāmegha ivotthite

Sanskrit only: no published translation is held for this verse.

भोगाभोगतिरस्कारैः कार्श्यं नेयं मनश् शनैः । रसापहारैस् तज्ज्ञेन कालेनाजीर्णपर्णवत्

bhogābhogatiraskāraiḥ kārśyaṃ neyaṃ manaś śanaiḥ / rasāpahārais tajjñena kālenājīrṇaparṇavat

Sanskrit only: no published translation is held for this verse.

अनात्मन्य् आत्मभावेन देहमात्रास्थयानया । पुत्रदारकुटुम्बैश् च चेतो गच्छति पीनताम्

anātmany ātmabhāvena dehamātrāsthayānayā / putradārakuṭumbaiś ca ceto gacchati pīnatām

Sanskrit only: no published translation is held for this verse.

अहङ्कारविकारेण ममतामलहेलया । इदं ममेति भावेन चेतो गच्छति पीनताम्

ahaṅkāravikāreṇa mamatāmalahelayā / idaṃ mameti bhāvena ceto gacchati pīnatām

Sanskrit only: no published translation is held for this verse.

जरामरणदुःखेन व्यर्थम् उन्नतिम् ईयुषा । दोषाशीविषकोशेन चेतो गच्छति पीनताम्

jarāmaraṇaduḥkhena vyartham unnatim īyuṣā / doṣāśīviṣakośena ceto gacchati pīnatām

Sanskrit only: no published translation is held for this verse.

दुराशाक्षीरपानेन भोगानिलबलेन च । आस्थादानेन चानेन चित्ताहिर् याति पीनताम्

durāśākṣīrapānena bhogānilabalena ca / āsthādānena cānena cittāhir yāti pīnatām

Sanskrit only: no published translation is held for this verse.

आधिव्याधिविलासेन समाश्वासेन संसृतौ । हेयादेयप्रयत्नेन चेतो गच्छति पीनताम्

ādhivyādhivilāsena samāśvāsena saṃsṛtau / heyādeyaprayatnena ceto gacchati pīnatām

Sanskrit only: no published translation is held for this verse.

आगमापायवपुषा विषवैषम्यशंसिना । भोगाभोगेन पीनेन चित्ताहिर् याति पीनताम्

āgamāpāyavapuṣā viṣavaiṣamyaśaṃsinā / bhogābhogena pīnena cittāhir yāti pīnatām

Sanskrit only: no published translation is held for this verse.

शरीरदुश्श्वभ्रचिरप्ररूढं चिन्ताचयोच्चाकृतिमञ्जरीकम् । जरामृतिव्याधिफलावनम्रं कामोपभोगौघविकासिपुष्पम्

śarīraduśśvabhraciraprarūḍhaṃ cintācayoccākṛtimañjarīkam / jarāmṛtivyādhiphalāvanamraṃ kāmopabhogaughavikāsipuṣpam

Sanskrit only: no published translation is held for this verse.

विचारसारक्रकचेन चित्तविषद्रुमं त्वं द्रुतम् इन्दुकल्प । आशामहाशाखम् अशङ्कम् एव च्छिन्द्धि प्रसह्यार्द्रविकल्पपत्त्रम्

vicārasārakrakacena cittaviṣadrumaṃ tvaṃ drutam indukalpa / āśāmahāśākham aśaṅkam eva cchinddhi prasahyārdravikalpapattram

Sanskrit only: no published translation is held for this verse.

मत्तं क्षणं चैकतटोपवेशविश्रान्तिसौख्येष्व् असमर्थम् उग्रम् । आलोडनोत्कं सुजनक्रमाब्जषण्डस्य चण्डं सुखदुःखगण्डम्

mattaṃ kṣaṇaṃ caikataṭopaveśaviśrāntisaukhyeṣv asamartham ugram / āloḍanotkaṃ sujanakramābjaṣaṇḍasya caṇḍaṃ sukhaduḥkhagaṇḍam

Sanskrit only: no published translation is held for this verse.

चेतोगजं कायकुकाननस्थं सुतीक्ष्णया धीकरजाग्रपङ्क्त्या । विदारयादीर्घविकारदन्तं क्रियाकरं राघव राजसिंह

cetogajaṃ kāyakukānanasthaṃ sutīkṣṇayā dhīkarajāgrapaṅktyā / vidārayādīrghavikāradantaṃ kriyākaraṃ rāghava rājasiṃha

Sanskrit only: no published translation is held for this verse.

रतिं गतं नित्यम् असत्प्रदेशे शरीरमालाग्रसनेन पुष्टम् । धृष्टं क्रियाकर्कशचञ्चुचण्डम् एकेक्षणं पुष्टतमोऽंशकृष्णम्

ratiṃ gataṃ nityam asatpradeśe śarīramālāgrasanena puṣṭam / dhṛṣṭaṃ kriyākarkaśacañcucaṇḍam ekekṣaṇaṃ puṣṭatamo'ṃśakṛṣṇam

Sanskrit only: no published translation is held for this verse.

दूरे समुत्सारय सारभूतं दुश्चेष्टितं कर्कशम् आरटन्तम् । गर्वोद्धतं कायकुलायकोशाद् दोषोपशान्त्यै निजचित्तकाकम्

dūre samutsāraya sārabhūtaṃ duśceṣṭitaṃ karkaśam āraṭantam / garvoddhataṃ kāyakulāyakośād doṣopaśāntyai nijacittakākam

Sanskrit only: no published translation is held for this verse.

तृष्णापिशाच्या परिचर्यमाणं विश्रान्तम् अज्ञानमहावटेषु । भ्रान्तं चिरं देहशतेष्व् अटव्यां स्वसंसृतौ चेतनवर्जितेषु

tṛṣṇāpiśācyā paricaryamāṇaṃ viśrāntam ajñānamahāvaṭeṣu / bhrāntaṃ ciraṃ dehaśateṣv aṭavyāṃ svasaṃsṛtau cetanavarjiteṣu

Sanskrit only: no published translation is held for this verse.

विवेकवैराग्यगुरुप्रयत्नमन्त्रैस् स्वतन्त्रैस् स्वचिदात्मगेहात् । नोत्सारितश् चित्तपिशाचको ऽयं यावत् कुतस् तावद् इहात्मसिद्धिः

vivekavairāgyaguruprayatnamantrais svatantrais svacidātmagehāt / notsāritaś cittapiśācako 'yaṃ yāvat kutas tāvad ihātmasiddhiḥ

Sanskrit only: no published translation is held for this verse.

शुभासुभाशीर्हतमानवौघं चिन्ताविषं कायकुकञ्चुकं च । अजस्रम् अच्छश्वसनाशनं च सर्वस्य रामाभयनाशनं च

śubhāsubhāśīrhatamānavaughaṃ cintāviṣaṃ kāyakukañcukaṃ ca / ajasram acchaśvasanāśanaṃ ca sarvasya rāmābhayanāśanaṃ ca

Sanskrit only: no published translation is held for this verse.

हृदब्जदुश्शल्मलिकोटरस्थं भोगौघगर्हाखगमन्त्रशक्त्या । नीत्वा शमं राम मनोमहाहिं भयं भृशं प्रोज्झ्य भवाभयात्मा

hṛdabjaduśśalmalikoṭarasthaṃ bhogaughagarhākhagamantraśaktyā / nītvā śamaṃ rāma manomahāhiṃ bhayaṃ bhṛśaṃ projjhya bhavābhayātmā

Sanskrit only: no published translation is held for this verse.

अमङ्गलाकारधरश् शरीरशवावलीसन्ततसेवनेन । दिगावलीसम्भ्रमणश्रमार्तश् श्मशानसेवी वपुषा क्षतेन

amaṅgalākāradharaś śarīraśavāvalīsantatasevanena / digāvalīsambhramaṇaśramārtaś śmaśānasevī vapuṣā kṣatena

Sanskrit only: no published translation is held for this verse.

भोगामिषे दिक्ष्व् अभिधावमान उत्कन्धरो धीरविवृद्धगर्वः । उड्डीय चेद् गच्छति चित्तगृध्रो देहद्रुमात् तन् निपुणं जयस् ते

bhogāmiṣe dikṣv abhidhāvamāna utkandharo dhīravivṛddhagarvaḥ / uḍḍīya ced gacchati cittagṛdhro dehadrumāt tan nipuṇaṃ jayas te

Sanskrit only: no published translation is held for this verse.

भ्रान्तं वनान्तेषु दिगन्तरेषु फलार्थिनं चञ्चलम् आकुलाङ्गम् । जन्मावनेर् जन्ममहीं प्रयान्तं संसारपान्थं जनम् आहसन्तम्

bhrāntaṃ vanānteṣu digantareṣu phalārthinaṃ cañcalam ākulāṅgam / janmāvaner janmamahīṃ prayāntaṃ saṃsārapānthaṃ janam āhasantam

Sanskrit only: no published translation is held for this verse.

द्रुमे ऽक्षिनासाकुसुमे भुजादिशाखे विलोलाङ्गुलिजालपत्त्रे । समुल्लसन्तं परिमारयैनं मनोमहामर्कटम् अङ्ग सिद्ध्यै

drume 'kṣināsākusume bhujādiśākhe vilolāṅgulijālapattre / samullasantaṃ parimārayainaṃ manomahāmarkaṭam aṅga siddhyai

Sanskrit only: no published translation is held for this verse.

अभ्युत्थितं सत्फलसङ्क्षयाय लसत्सुखासङ्गतडित्प्रकाशम् । वर्षन्तम् आसारम् अनर्थसार्थम् आन्दोलितं वासनवात्ययान्तः

abhyutthitaṃ satphalasaṅkṣayāya lasatsukhāsaṅgataḍitprakāśam / varṣantam āsāram anarthasārtham āndolitaṃ vāsanavātyayāntaḥ

Sanskrit only: no published translation is held for this verse.

सङ्कल्प्यसङ्कल्पनवर्जनोग्रमन्त्रप्रभावाद् धृदयाम्बरात् त्वम् । सोत्साहम् उत्सादय चित्तमेघं महत् फलं प्राप्य भवालम् आढ्यः

saṅkalpyasaṅkalpanavarjanogramantraprabhāvād dhṛdayāmbarāt tvam / sotsāham utsādaya cittameghaṃ mahat phalaṃ prāpya bhavālam āḍhyaḥ

Sanskrit only: no published translation is held for this verse.

ग्रन्थीकृतं कर्मभिर् आत्मसृष्टैश् शस्त्रैर् अभेद्यं ज्वलनैर् अदग्धम् । पीडां पराम् आत्मनि कल्पयन्तं समस्तजात्यन्तरदीर्घदाम

granthīkṛtaṃ karmabhir ātmasṛṣṭaiś śastrair abhedyaṃ jvalanair adagdham / pīḍāṃ parām ātmani kalpayantaṃ samastajātyantaradīrghadāma

Sanskrit only: no published translation is held for this verse.

सम्प्रोतनिस्सङ्ख्यशरीरमालं बलाद् असङ्कल्पनमात्रशस्त्रैः । छित्त्वा स्वयं राघव चित्तपाशं यथासुखं त्वं विहरास्तशङ्कः

samprotanissaṅkhyaśarīramālaṃ balād asaṅkalpanamātraśastraiḥ / chittvā svayaṃ rāghava cittapāśaṃ yathāsukhaṃ tvaṃ viharāstaśaṅkaḥ

Sanskrit only: no published translation is held for this verse.

फूत्कारदग्धाखिलमार्गलोकम् अत्यन्तदुष्प्रापपरप्रबोधम् । आशाविषाशोषितलोकषण्डं वातामिषोच्छूनशरीरदण्डम्

phūtkāradagdhākhilamārgalokam atyantaduṣprāpaparaprabodham / āśāviṣāśoṣitalokaṣaṇḍaṃ vātāmiṣocchūnaśarīradaṇḍam

Sanskrit only: no published translation is held for this verse.

आमन्थरं देहगुहाप्रसुप्तं सङ्कल्पघोराजगरं जवेन । अकामनानाममहानलेन बलेन दग्ध्वा विभयो भव त्वम्

āmantharaṃ dehaguhāprasuptaṃ saṅkalpaghorājagaraṃ javena / akāmanānāmamahānalena balena dagdhvā vibhayo bhava tvam

Sanskrit only: no published translation is held for this verse.

चित्तेन चेतश् शमम् आशु नीत्वा शुद्धेन घोरास्त्रम् इवास्त्रयुक्त्या । चिराय साधो त्यज चञ्चलत्वं विमर्कटो वृक्ष इवाक्षतश्रीः

cittena cetaś śamam āśu nītvā śuddhena ghorāstram ivāstrayuktyā / cirāya sādho tyaja cañcalatvaṃ vimarkaṭo vṛkṣa ivākṣataśrīḥ

Sanskrit only: no published translation is held for this verse.

अलम् अलम् इति कृत्वा चेतसा वीतशङ्कं व्युपशमितमलो ऽन्तस् सर्वम् आदेहम् एव । तृणलवलघु पश्यंल् लीलयाहेयदृष्ट्या पिब विहर रमस्व प्राप्तसंसारपारः

alam alam iti kṛtvā cetasā vītaśaṅkaṃ vyupaśamitamalo 'ntas sarvam ādeham eva / tṛṇalavalaghu paśyaṃl līlayāheyadṛṣṭyā piba vihara ramasva prāptasaṃsārapāraḥ

Sanskrit only: no published translation is held for this verse.