Moksopaya with Bhaskarakantha's Tika 5.53

अपारपर्यन्तवपुः परमाण्वणुर् एव वा । चिद् अचेत्या तदाक्रान्तौ न शक्ता वासनादयः

apāraparyantavapuḥ paramāṇvaṇur eva vā / cid acetyā tadākrāntau na śaktā vāsanādayaḥ

Sanskrit only: no published translation is held for this verse.

मनश्शेमुष्यहङ्कारप्रतिबिम्बैश् शठेन्द्रियैः । वासनोत्थापिता शून्यवेताली त्रासनोद्यता

manaśśemuṣyahaṅkārapratibimbaiś śaṭhendriyaiḥ / vāsanotthāpitā śūnyavetālī trāsanodyatā

Sanskrit only: no published translation is held for this verse.

तत्कृतेभ्यो विकारेभ्यो भीतिं तान्य् एव भूरिशः । भूयो ऽप्य् अनुभवन्त्व् अन्तर् अहं हि चिद् अलेपिका

tatkṛtebhyo vikārebhyo bhītiṃ tāny eva bhūriśaḥ / bhūyo 'py anubhavantv antar ahaṃ hi cid alepikā

Sanskrit only: no published translation is held for this verse.

चितो न जन्ममरणे सर्वगायाश् चितः किल । किं नाम म्रियते ब्रूत मार्यते केन वापि किम्

cito na janmamaraṇe sarvagāyāś citaḥ kila / kiṃ nāma mriyate brūta māryate kena vāpi kim

Sanskrit only: no published translation is held for this verse.

चितो न जीवितेनार्थस् सर्वात्मा सैव जीवितम् । किं प्राप्स्यति कदात्मैष प्राङ्मृतो यदि जीवति

cito na jīvitenārthas sarvātmā saiva jīvitam / kiṃ prāpsyati kadātmaiṣa prāṅmṛto yadi jīvati

Sanskrit only: no published translation is held for this verse.

जीव्यते म्रियते चेति कुविकल्पकलापिनाम् । कलना मनसाम् एव नात्मनो विततात्मनः

jīvyate mriyate ceti kuvikalpakalāpinām / kalanā manasām eva nātmano vitatātmanaḥ

Sanskrit only: no published translation is held for this verse.

यो ह्य् अहम्भावतां प्राप्तो भावाभावैस् स गृह्यते । आत्मनो नास्त्य् अहम्भावो भावाभावाः कुतो ऽस्य ते

yo hy ahambhāvatāṃ prāpto bhāvābhāvais sa gṛhyate / ātmano nāsty ahambhāvo bhāvābhāvāḥ kuto 'sya te

Sanskrit only: no published translation is held for this verse.

अहम्भावो मुधा मोहो मनश् च मृगतृष्णिका । जडः पदार्थसम्भारः कस्याहम्भावभावना

ahambhāvo mudhā moho manaś ca mṛgatṛṣṇikā / jaḍaḥ padārthasambhāraḥ kasyāhambhāvabhāvanā

Sanskrit only: no published translation is held for this verse.

रक्तमांसमयो देहो मनो नष्टं विचारणात् । जडाश् चित्तादयस् सर्वे कुतो ऽहम्भावभावना

raktamāṃsamayo deho mano naṣṭaṃ vicāraṇāt / jaḍāś cittādayas sarve kuto 'hambhāvabhāvanā

Sanskrit only: no published translation is held for this verse.

आत्मम्भरितया नित्यम् इन्द्रियाणि स्थितान्य् अलम् । पदार्थाश् च पदार्थत्वे कुतो ऽहम्भावभावना

ātmambharitayā nityam indriyāṇi sthitāny alam / padārthāś ca padārthatve kuto 'hambhāvabhāvanā

Sanskrit only: no published translation is held for this verse.

गुणा गुणेषु वर्तन्ते प्रकृतिः प्रकृतौ स्थिता । सद् एव सति विश्रान्तं कुतो ऽहम्भावभावना

guṇā guṇeṣu vartante prakṛtiḥ prakṛtau sthitā / sad eva sati viśrāntaṃ kuto 'hambhāvabhāvanā

Sanskrit only: no published translation is held for this verse.

सर्वगं सर्वदेहस्थं सर्वकालमयं महत् । केवलं परमाभानं चिदात्मैव हि संस्थितम्

sarvagaṃ sarvadehasthaṃ sarvakālamayaṃ mahat / kevalaṃ paramābhānaṃ cidātmaiva hi saṃsthitam

Sanskrit only: no published translation is held for this verse.

एवं किमाकृतिः को वा किमादेयश् च किङ्कृतः । किंरूपः किम्मयः को ऽहं किं गृह्णामि त्यजामि किम्

evaṃ kimākṛtiḥ ko vā kimādeyaś ca kiṅkṛtaḥ / kiṃrūpaḥ kimmayaḥ ko 'haṃ kiṃ gṛhṇāmi tyajāmi kim

Sanskrit only: no published translation is held for this verse.

तेनाहं नाम नेहास्ति भावाभावोपपत्तिमान् । अनहङ्काररूपस्य सम्बन्धः केन मे कथम्

tenāhaṃ nāma nehāsti bhāvābhāvopapattimān / anahaṅkārarūpasya sambandhaḥ kena me katham

Sanskrit only: no published translation is held for this verse.

असत्य् अलम् अहङ्कारे सम्बन्धः केन कस्य कः । सम्बन्धाभावसंसिद्धौ विलीना द्वित्वकल्पना

asaty alam ahaṅkāre sambandhaḥ kena kasya kaḥ / sambandhābhāvasaṃsiddhau vilīnā dvitvakalpanā

Sanskrit only: no published translation is held for this verse.

एवं ब्रह्मात्मकम् इदं यत् किञ्चिज् जगति स्थितम् । ब्रह्मैवास्ति तद् एवास्मि परिशोचामि किं मुधा

evaṃ brahmātmakam idaṃ yat kiñcij jagati sthitam / brahmaivāsti tad evāsmi pariśocāmi kiṃ mudhā

Sanskrit only: no published translation is held for this verse.

एकस्मिन्न् एव विमले पदे सर्वगते स्थिते । अहङ्कारकलङ्कस्य कथं नामोदयः कुतः

ekasminn eva vimale pade sarvagate sthite / ahaṅkārakalaṅkasya kathaṃ nāmodayaḥ kutaḥ

Sanskrit only: no published translation is held for this verse.

नास्त्य् एव हि पदार्थश्रीर् आत्मैवास्तीह सर्वगः । पदार्थलक्ष्म्यां सत्यां च सम्बन्धो ऽस्ति न कस्यचित्

nāsty eva hi padārthaśrīr ātmaivāstīha sarvagaḥ / padārthalakṣmyāṃ satyāṃ ca sambandho 'sti na kasyacit

Sanskrit only: no published translation is held for this verse.

इन्द्रियैर् इन्द्रियेष्व् अङ्गैर् मनो मनसि वल्गति । चिद् अलुप्तवपुः केन सम्बद्धं कस्य किं कथम्

indriyair indriyeṣv aṅgair mano manasi valgati / cid aluptavapuḥ kena sambaddhaṃ kasya kiṃ katham

Sanskrit only: no published translation is held for this verse.

उपलायश्शलाकानां सम्बन्धो न यथा मिथः । तथैकत्रापि दृष्टानां देहेन्द्रियमनश्चिताम्

upalāyaśśalākānāṃ sambandho na yathā mithaḥ / tathaikatrāpi dṛṣṭānāṃ dehendriyamanaścitām

Sanskrit only: no published translation is held for this verse.

असदभ्युत्थिते व्यर्थम् अहङ्कारमहाभ्रमे । ममेदम् इदम् अस्येति विपर्यस्तम् इदं जगत्

asadabhyutthite vyartham ahaṅkāramahābhrame / mamedam idam asyeti viparyastam idaṃ jagat

Sanskrit only: no published translation is held for this verse.

अतत्त्वालोकजातेयम् अहङ्कारचमत्कृतिः । तापेन हिमलेखेव तत्त्वालोकेन लीयते

atattvālokajāteyam ahaṅkāracamatkṛtiḥ / tāpena himalekheva tattvālokena līyate

Sanskrit only: no published translation is held for this verse.

आत्मनो व्यतिरेकेण न किञ्चिद् अपि विद्यते । शब्दब्रह्मेति तत् तत्त्वम् एतत् तद् भावयाम्य् अलम्

ātmano vyatirekeṇa na kiñcid api vidyate / śabdabrahmeti tat tattvam etat tad bhāvayāmy alam

Sanskrit only: no published translation is held for this verse.

अहङ्कारभ्रमस्यास्य जातस्याकाशवर्णवत् । अपुनस्स्मरणं मन्ये नूनं विस्मरणं वरम्

ahaṅkārabhramasyāsya jātasyākāśavarṇavat / apunassmaraṇaṃ manye nūnaṃ vismaraṇaṃ varam

Sanskrit only: no published translation is held for this verse.

समूलं परिविस्मृत्य चिरायाहङ्कृतिभ्रमम् । तिष्ठाम्य् आत्मनि सत्यात्मा शरत्खे शरदीव खम्

samūlaṃ parivismṛtya cirāyāhaṅkṛtibhramam / tiṣṭhāmy ātmani satyātmā śaratkhe śaradīva kham

Sanskrit only: no published translation is held for this verse.

ददात्य् अनर्थनिचयं विकासयति दुष्कृतम् । विस्तारयति सन्तापम् अहम्भावो ऽनुसंहितः

dadāty anarthanicayaṃ vikāsayati duṣkṛtam / vistārayati santāpam ahambhāvo 'nusaṃhitaḥ

Sanskrit only: no published translation is held for this verse.

स्फुरत्य् अहङ्कारघने हृद्व्योम्नि सलिलात्मनि । विकसत्य् अभितः कायकदम्बे दोषमञ्जरी

sphuraty ahaṅkāraghane hṛdvyomni salilātmani / vikasaty abhitaḥ kāyakadambe doṣamañjarī

Sanskrit only: no published translation is held for this verse.

मरणम् जीवितोपान्तं जीवितं मरणान्तगम् । भावो ऽभावावधिच्छिन्नः कष्टेयं दुःखवेदना

maraṇam jīvitopāntaṃ jīvitaṃ maraṇāntagam / bhāvo 'bhāvāvadhicchinnaḥ kaṣṭeyaṃ duḥkhavedanā

Sanskrit only: no published translation is held for this verse.

इदं लब्धम् इदं प्राप्स्यामीत्य् अन्तर्दाहकारिणी । न शाम्यत्य् अर्करत्नानां ग्रीष्मे ऽर्चिर् इव दुर्धियाम्

idaṃ labdham idaṃ prāpsyāmīty antardāhakāriṇī / na śāmyaty arkaratnānāṃ grīṣme 'rcir iva durdhiyām

Sanskrit only: no published translation is held for this verse.

नास्तीदम् इदम् अस्तीति चिन्ता धावत्य् अहङ्कृतिम् । जडाशया जडाम् अभ्रमाला शैलावलीम् इव

nāstīdam idam astīti cintā dhāvaty ahaṅkṛtim / jaḍāśayā jaḍām abhramālā śailāvalīm iva

Sanskrit only: no published translation is held for this verse.

अहङ्कारे परिक्षीणे शुष्कस् संसारपादपः । भूयः प्रयच्छत्य् अरसो न पाषाणवद् अङ्कुरम्

ahaṅkāre parikṣīṇe śuṣkas saṃsārapādapaḥ / bhūyaḥ prayacchaty araso na pāṣāṇavad aṅkuram

Sanskrit only: no published translation is held for this verse.

सुतृष्णाकृष्णभोगिन्यो देहद्रुमकृतालयाः । क्वापि यान्ति विचारात्मन्य् आगते विनतासुते

sutṛṣṇākṛṣṇabhoginyo dehadrumakṛtālayāḥ / kvāpi yānti vicārātmany āgate vinatāsute

Sanskrit only: no published translation is held for this verse.

असदभ्युत्थिते विश्वे तज्जा वयम् असन्मयाः । असन्मयपरिस्पन्दे त्वम् अहं चेति कः क्रमः

asadabhyutthite viśve tajjā vayam asanmayāḥ / asanmayaparispande tvam ahaṃ ceti kaḥ kramaḥ

Sanskrit only: no published translation is held for this verse.

इदं जगद् उदेत्य् आदाव् अकारणम् अकारणात् । यद् अकारणम् उच्छूनं तत् सद् इत्य् उच्यते कथम्

idaṃ jagad udety ādāv akāraṇam akāraṇāt / yad akāraṇam ucchūnaṃ tat sad ity ucyate katham

Sanskrit only: no published translation is held for this verse.

अपर्यन्तं पुरा कालं मृदि कुम्भ इवाकृतः । देहो ऽभवद् इदानीं तु तथैवान्ते भविष्यति

aparyantaṃ purā kālaṃ mṛdi kumbha ivākṛtaḥ / deho 'bhavad idānīṃ tu tathaivānte bhaviṣyati

Sanskrit only: no published translation is held for this verse.

मध्ये नरवयोमात्रं कञ्चित् कालं तु चञ्चलम् । आद्यन्तसोम्यते त्यक्त्वा वारि वीचितया यथा

madhye naravayomātraṃ kañcit kālaṃ tu cañcalam / ādyantasomyate tyaktvā vāri vīcitayā yathā

Sanskrit only: no published translation is held for this verse.

अस्मिन् क्षणपरिस्पन्दे देहे विशरणोन्मुखे । तरङ्गे च निबद्धास्था ये हतास् ते कुदृष्टयः

asmin kṣaṇaparispande dehe viśaraṇonmukhe / taraṅge ca nibaddhāsthā ye hatās te kudṛṣṭayaḥ

Sanskrit only: no published translation is held for this verse.

प्राक् पुरस्ताच् च सर्वाणि सन्ति वस्तूनि चाभितः । मध्यस्फुटत्व एतेषां केवास्था हतरूपिणि

prāk purastāc ca sarvāṇi santi vastūni cābhitaḥ / madhyasphuṭatva eteṣāṃ kevāsthā hatarūpiṇi

Sanskrit only: no published translation is held for this verse.

चित्त पूर्वं पुरस्ताच् च विदेहं शान्तम् इत्य् असि । सद् असद् वा खसंलीनं मध्ये ऽस्मिन् किं तवोग्रता

citta pūrvaṃ purastāc ca videhaṃ śāntam ity asi / sad asad vā khasaṃlīnaṃ madhye 'smin kiṃ tavogratā

Sanskrit only: no published translation is held for this verse.

यथा स्वप्नविकारेषु यथा सम्भ्रमदृष्टिषु । यथा वा मदलीलासु यथा नौयानसम्भ्रमे

yathā svapnavikāreṣu yathā sambhramadṛṣṭiṣu / yathā vā madalīlāsu yathā nauyānasambhrame

Sanskrit only: no published translation is held for this verse.

यथा धातुविकारेषु यथा वेन्द्रियविप्लवे । यथातिसम्भ्रमानन्ददोषावेशवशेषु च

yathā dhātuvikāreṣu yathā vendriyaviplave / yathātisambhramānandadoṣāveśavaśeṣu ca

Sanskrit only: no published translation is held for this verse.

दृश्यते क्षीयते चैव रूपं सदसतोश् चलम् । तथैवेदम् इयं त्व् एषा काले न्यूनातिरिक्तता

dṛśyate kṣīyate caiva rūpaṃ sadasatoś calam / tathaivedam iyaṃ tv eṣā kāle nyūnātiriktatā

Sanskrit only: no published translation is held for this verse.

सा च त्वया कृता नित्यं चित्त दुःखसुखोदयैः । यथा वियोगसंयोगयामिन्योर् अनुरागिणाम्

sā ca tvayā kṛtā nityaṃ citta duḥkhasukhodayaiḥ / yathā viyogasaṃyogayāminyor anurāgiṇām

Sanskrit only: no published translation is held for this verse.

त्वम् अप्य् एवासदाभासं मिथ्या सद् इव लक्ष्यसे । मृगतृष्णेव तेनैतत् त्वत्कृतं सत् कथं भवेत्

tvam apy evāsadābhāsaṃ mithyā sad iva lakṣyase / mṛgatṛṣṇeva tenaitat tvatkṛtaṃ sat kathaṃ bhavet

Sanskrit only: no published translation is held for this verse.

यद् इदं किञ्चिद् आभोगि तत् सर्वं दृश्यमण्डलम् । अवस्त्व् इति विनिर्णीय मनो याह्य् अमनःपदम्

yad idaṃ kiñcid ābhogi tat sarvaṃ dṛśyamaṇḍalam / avastv iti vinirṇīya mano yāhy amanaḥpadam

Sanskrit only: no published translation is held for this verse.

अवस्त्व् इदम् इति स्फारे रूढे मनसि निश्चये । हेमन्त इव पद्मिन्यः क्षीयन्ते भोगवासनाः

avastv idam iti sphāre rūḍhe manasi niścaye / hemanta iva padminyaḥ kṣīyante bhogavāsanāḥ

Sanskrit only: no published translation is held for this verse.

चिता दृष्टात्मना नूनं सन्त्यक्तमननौजसा । मनसा वीतरागेण स्वयं स्वस्थेन भूयते

citā dṛṣṭātmanā nūnaṃ santyaktamananaujasā / manasā vītarāgeṇa svayaṃ svasthena bhūyate

Sanskrit only: no published translation is held for this verse.

परमात्मानले क्षिप्तसंवित्त्यवयवं स्वयम् । दग्धात्मकम् अलं चित्तं शुद्धताम् एति शाश्वतीम्

paramātmānale kṣiptasaṃvittyavayavaṃ svayam / dagdhātmakam alaṃ cittaṃ śuddhatām eti śāśvatīm

Sanskrit only: no published translation is held for this verse.

देहम् अन्यतया दृष्ट्वा त्यक्त्वा विषयवासनाम् । विनाशम् उररीकृत्य मनो जयति वीरवत्

deham anyatayā dṛṣṭvā tyaktvā viṣayavāsanām / vināśam urarīkṛtya mano jayati vīravat

Sanskrit only: no published translation is held for this verse.

मनश् शत्रुश् शरीरस्य शरीरं मनसो रिपुः । एकभावेन नश्येते आधाराधेयकार्यवत्

manaś śatruś śarīrasya śarīraṃ manaso ripuḥ / ekabhāvena naśyete ādhārādheyakāryavat

Sanskrit only: no published translation is held for this verse.

रागद्वेषवतोर् नित्यम् अन्योऽन्यातिविरुद्धयोः । एतयोर् मूलकाषेण विनाशः परमं सुखम्

rāgadveṣavator nityam anyo'nyātiviruddhayoḥ / etayor mūlakāṣeṇa vināśaḥ paramaṃ sukham

Sanskrit only: no published translation is held for this verse.

एतयोर् एकसंस्थाने रतिर् इत्य् एव या कथा । सा व्योम्न्य् अयस्स्त्रिया भुक्ता धरेति कथया समा

etayor ekasaṃsthāne ratir ity eva yā kathā / sā vyomny ayasstriyā bhuktā dhareti kathayā samā

Sanskrit only: no published translation is held for this verse.

अकृत्रिमविरोधस्थौ यत्र सङ्घटिताव् उभौ । धारा इव पतन्त्य् एव तत्रानर्थपरम्पराः

akṛtrimavirodhasthau yatra saṅghaṭitāv ubhau / dhārā iva patanty eva tatrānarthaparamparāḥ

Sanskrit only: no published translation is held for this verse.

मिथोविरुद्धसंसर्गे रतिम् एत्य् अधमो हि यः । त्यक्तव्यस् स पतद्वाराव् अग्निराशाव् अपेलवे

mithoviruddhasaṃsarge ratim ety adhamo hi yaḥ / tyaktavyas sa patadvārāv agnirāśāv apelave

Sanskrit only: no published translation is held for this verse.

सङ्कल्पेन मनस् स्पृष्ट्वा शरीरं बालयक्षवत् । पात्रायेव धनान्य् अस्मै स्वदुःखानि प्रयच्छति

saṅkalpena manas spṛṣṭvā śarīraṃ bālayakṣavat / pātrāyeva dhanāny asmai svaduḥkhāni prayacchati

Sanskrit only: no published translation is held for this verse.

तैर् दुःखैस् तापितो देहो मनो हन्तुम् अथेच्छति । पुत्रो ऽपि हन्ति पितरम् आततायिपदं गतम्

tair duḥkhais tāpito deho mano hantum athecchati / putro 'pi hanti pitaram ātatāyipadaṃ gatam

Sanskrit only: no published translation is held for this verse.

नास्ति शत्रुः प्रकृत्यैव न च मित्रं कदाचन । सुखदं मित्रम् इत्य् उक्तं दुःखदाश् शत्रवस् स्मृताः

nāsti śatruḥ prakṛtyaiva na ca mitraṃ kadācana / sukhadaṃ mitram ity uktaṃ duḥkhadāś śatravas smṛtāḥ

Sanskrit only: no published translation is held for this verse.

देहो दुःखान्य् अनुभवन् स्वमनो हन्तुम् इच्छति । देहं मनस् स्वदुःखानां सत्कोशं कुरुते क्षणात्

deho duḥkhāny anubhavan svamano hantum icchati / dehaṃ manas svaduḥkhānāṃ satkośaṃ kurute kṣaṇāt

Sanskrit only: no published translation is held for this verse.

एवं मिथो दुःखदयोश् श्लिष्टयोः कस् सुखागमः । एतयोर् देहमनसोर् जात्यैवान्योऽन्यविद्धयोः

evaṃ mitho duḥkhadayoś śliṣṭayoḥ kas sukhāgamaḥ / etayor dehamanasor jātyaivānyo'nyaviddhayoḥ

Sanskrit only: no published translation is held for this verse.

मनस्य् एव परिक्षीणे न देहो दुःखभाजनम् । तत्क्षयोत्कतया नित्यं देहो ऽपि परिधावति

manasy eva parikṣīṇe na deho duḥkhabhājanam / tatkṣayotkatayā nityaṃ deho 'pi paridhāvati

Sanskrit only: no published translation is held for this verse.

नष्टं नष्टम् अनर्थाय शरीरं पदम् आपदाम् । अलब्धात्मविवेकेन मनसाशु विनिन्द्यते

naṣṭaṃ naṣṭam anarthāya śarīraṃ padam āpadām / alabdhātmavivekena manasāśu vinindyate

Sanskrit only: no published translation is held for this verse.

एते मनश्शरीरे हि मिथः पीवरतां गते । जडरूपे हि वर्षासु पयोदसरसी यथा

ete manaśśarīre hi mithaḥ pīvaratāṃ gate / jaḍarūpe hi varṣāsu payodasarasī yathā

Sanskrit only: no published translation is held for this verse.

मिथो दुःखाय सम्पन्ने एकरूपे द्विधा स्थिते । व्यवहारपरे सार्धं लोके वाय्वनलाव् इव

mitho duḥkhāya sampanne ekarūpe dvidhā sthite / vyavahārapare sārdhaṃ loke vāyvanalāv iva

Sanskrit only: no published translation is held for this verse.

चित्ते क्षयिणि सङ्क्षीणो देह आ मूलतो भवेत् । वर्धमाने तरुर् इव शतशाखः प्रवर्धते

citte kṣayiṇi saṅkṣīṇo deha ā mūlato bhavet / vardhamāne tarur iva śataśākhaḥ pravardhate

Sanskrit only: no published translation is held for this verse.

क्षीयते मनसि क्षीणे देहः प्रक्षीणवासनः । मनो न क्षीयते क्षीणे देहे तत् क्षपयेन् मनः

kṣīyate manasi kṣīṇe dehaḥ prakṣīṇavāsanaḥ / mano na kṣīyate kṣīṇe dehe tat kṣapayen manaḥ

Sanskrit only: no published translation is held for this verse.

सङ्कल्पपादपं तृष्णालतं छित्त्वा मनोवनम् । वितताम् भुवम् आसाद्य विहरामि यथासुखम्

saṅkalpapādapaṃ tṛṣṇālataṃ chittvā manovanam / vitatām bhuvam āsādya viharāmi yathāsukham

Sanskrit only: no published translation is held for this verse.

प्रक्षीयमाणम् एवेदं मम मन्ये मनस् स्थितम् । प्रशाम्यद्वासनाजालं प्रावृडन्त इवाम्बुदः

prakṣīyamāṇam evedaṃ mama manye manas sthitam / praśāmyadvāsanājālaṃ prāvṛḍanta ivāmbudaḥ

Sanskrit only: no published translation is held for this verse.

धातूनां सन्निवेशो ऽयं देहनामा वपुर् मम । प्रक्षीयमाणे मनसि गलन्न् एवावतिष्ठतु

dhātūnāṃ sanniveśo 'yaṃ dehanāmā vapur mama / prakṣīyamāṇe manasi galann evāvatiṣṭhatu

Sanskrit only: no published translation is held for this verse.

यदर्थं किल भोगश्रीर् वाञ्छ्यते तत् कलेवरम् । न मे नापि च तस्याहं को ऽर्थस् सुखलवेन मे

yadarthaṃ kila bhogaśrīr vāñchyate tat kalevaram / na me nāpi ca tasyāhaṃ ko 'rthas sukhalavena me

Sanskrit only: no published translation is held for this verse.

नाहं देह इति त्व् अस्मिन् युक्तिम् आकर्णय क्रमे । सर्वाङ्गेष्व् अपि सत्स्व् एव शवः कस्मान् न वल्गति

nāhaṃ deha iti tv asmin yuktim ākarṇaya krame / sarvāṅgeṣv api satsv eva śavaḥ kasmān na valgati

Sanskrit only: no published translation is held for this verse.

तस्माद् देहाद् अतीतो ऽहं नित्यो ऽनस्तमितद्युतिः । यस् सङ्गं भास्वता प्राप्य वेद्मि व्योमनि भास्करम्

tasmād dehād atīto 'haṃ nityo 'nastamitadyutiḥ / yas saṅgaṃ bhāsvatā prāpya vedmi vyomani bhāskaram

Sanskrit only: no published translation is held for this verse.

ज्ञो ऽहं मे न सुखेनार्थो नानर्थेन च दुःखिता । शरीरम् अस्तु वा मास्तु स्थितो ऽस्मि विगतज्वरः

jño 'haṃ me na sukhenārtho nānarthena ca duḥkhitā / śarīram astu vā māstu sthito 'smi vigatajvaraḥ

Sanskrit only: no published translation is held for this verse.

यत्रात्मा तत्र न मनो नेन्द्रियाणि न वासनाः । पामराः परितिष्ठन्ति निकटे न महीभृतः

yatrātmā tatra na mano nendriyāṇi na vāsanāḥ / pāmarāḥ paritiṣṭhanti nikaṭe na mahībhṛtaḥ

Sanskrit only: no published translation is held for this verse.

पदं तद् अनुयातो ऽस्मि केवलो ऽस्मि जयाम्य् अहम् । निस्स्पृहो ऽस्मि निरंशो ऽस्मि निरीहो ऽस्मि निरीप्सितः

padaṃ tad anuyāto 'smi kevalo 'smi jayāmy aham / nisspṛho 'smi niraṃśo 'smi nirīho 'smi nirīpsitaḥ

Sanskrit only: no published translation is held for this verse.

नेदानीं मम सम्बन्धो मनोदेहेन्द्रियादिभिः । पृथक्कृतस्य तैलस्य तिलैर् विदलितैर् यथा

nedānīṃ mama sambandho manodehendriyādibhiḥ / pṛthakkṛtasya tailasya tilair vidalitair yathā

Sanskrit only: no published translation is held for this verse.

स्वस्मात् पदवराद् अस्माल् लीलया चलितस्य मे । अध आक्रमतः किञ्चित् परिवारो ह्य् अयं शुभः

svasmāt padavarād asmāl līlayā calitasya me / adha ākramataḥ kiñcit parivāro hy ayaṃ śubhaḥ

Sanskrit only: no published translation is held for this verse.

स्वस्थतोर्जितता सत्ता हृद्यता सत्यता ज्ञता । आनन्दितोपशमिता मता च मुदितोदिता

svasthatorjitatā sattā hṛdyatā satyatā jñatā / ānanditopaśamitā matā ca muditoditā

Sanskrit only: no published translation is held for this verse.

पूर्णतोदारता सत्या कान्तिमत्तैकतानता । सर्वैकता निर्भयता क्षीणद्वित्वविकल्पता

pūrṇatodāratā satyā kāntimattaikatānatā / sarvaikatā nirbhayatā kṣīṇadvitvavikalpatā

Sanskrit only: no published translation is held for this verse.

एता नित्योदितास् स्वस्थास् सुन्दर्यस् सुभगोदयाः । ममैकात्मरतेः कान्ता नित्यं हृदयवल्लभाः

etā nityoditās svasthās sundaryas subhagodayāḥ / mamaikātmarateḥ kāntā nityaṃ hṛdayavallabhāḥ

Sanskrit only: no published translation is held for this verse.

सर्वथा सर्वदा सर्वं सर्वस्मिन् सम्भवत्य् अतः । सर्वं प्रति मम क्षीणे वाञ्छावाञ्छे सुखासुखम्

sarvathā sarvadā sarvaṃ sarvasmin sambhavaty ataḥ / sarvaṃ prati mama kṣīṇe vāñchāvāñche sukhāsukham

Sanskrit only: no published translation is held for this verse.

विगतमोहतया विमनस्तया गतविकल्पनचित्ततया स्फुटम् । उपरमाम्य् अहम् आत्मनि शीतले घनलवश् शरदीव नभस्तले

vigatamohatayā vimanastayā gatavikalpanacittatayā sphuṭam / uparamāmy aham ātmani śītale ghanalavaś śaradīva nabhastale

Sanskrit only: no published translation is held for this verse.