यावत् तुर्यपरामर्शस् तावत् केवलतापदम् । जीवन्मुक्तस्य विषयो वचसां च रघूद्वह
yāvat turyaparāmarśas tāvat kevalatāpadam / jīvanmuktasya viṣayo vacasāṃ ca raghūdvaha
Sanskrit only: no published translation is held for this verse.
Library·Moksopaya with Bhaskarakantha's Tika·5·5.71
Moksopaya with Bhaskarakantha's Tika 5.71
अत ऊर्ध्वं सदेहानां मुक्तानां वचसां तथा । विषयो न महाबाहो पुरुषाणां इवाम्बरम्
ata ūrdhvaṃ sadehānāṃ muktānāṃ vacasāṃ tathā / viṣayo na mahābāho puruṣāṇāṃ ivāmbaram
Sanskrit only: no published translation is held for this verse.
सा हि विश्रान्तिपदवी दूरेभ्यो ऽपि दवीयसी । गम्या विदेहमुक्तानां खलेखेव नभस्वताम्
sā hi viśrāntipadavī dūrebhyo 'pi davīyasī / gamyā videhamuktānāṃ khalekheva nabhasvatām
Sanskrit only: no published translation is held for this verse.
सुषुप्तावस्थया कञ्चित् कालं भुक्त्वा जगत्स्थितिम् । तुर्यताम् एत्य तदनु परमानन्दघूर्णिताः
suṣuptāvasthayā kañcit kālaṃ bhuktvā jagatsthitim / turyatām etya tadanu paramānandaghūrṇitāḥ
Sanskrit only: no published translation is held for this verse.
तुर्यातीतां दशां तज्ज्ञा यथा यान्त्य् आत्मकोविदाः । तथाधिगच्छ निर्द्वन्द्वं पदं रघुकुलोद्वह
turyātītāṃ daśāṃ tajjñā yathā yānty ātmakovidāḥ / tathādhigaccha nirdvandvaṃ padaṃ raghukulodvaha
Sanskrit only: no published translation is held for this verse.
सुषुप्तावस्थया राम भव संव्यवहारवान् । चित्रेन्दोर् इव ते न स्तः क्षयोद्वेगाव् अरिन्दम
suṣuptāvasthayā rāma bhava saṃvyavahāravān / citrendor iva te na staḥ kṣayodvegāv arindama
Sanskrit only: no published translation is held for this verse.
शरीरसन्निवेशस्य क्षये स्थैर्ये च संविदम् । मा गृहाण भ्रमो ह्य् एष शरीरम् इति जृम्भते
śarīrasanniveśasya kṣaye sthairye ca saṃvidam / mā gṛhāṇa bhramo hy eṣa śarīram iti jṛmbhate
Sanskrit only: no published translation is held for this verse.
देहनाशेन को ऽर्थस् ते को ऽर्थस् ते देहसंस्थया । भव त्वं प्रकृतारम्भस् तिष्ठत्व् एष यथास्थितम्
dehanāśena ko 'rthas te ko 'rthas te dehasaṃsthayā / bhava tvaṃ prakṛtārambhas tiṣṭhatv eṣa yathāsthitam
Sanskrit only: no published translation is held for this verse.
ज्ञातवान् असि तत् सत्यं बुद्धवान् असि तत् पदम् । प्राप्तवान् असि रूपं स्वं विशोको भव भूतये
jñātavān asi tat satyaṃ buddhavān asi tat padam / prāptavān asi rūpaṃ svaṃ viśoko bhava bhūtaye
Sanskrit only: no published translation is held for this verse.
ईप्सितानीप्सितत्यक्तश् शीतलालोकशोभया । अन्धकारातपाम्भोदमुक्तं खम् इव शोभसे
īpsitānīpsitatyaktaś śītalālokaśobhayā / andhakārātapāmbhodamuktaṃ kham iva śobhase
Sanskrit only: no published translation is held for this verse.
मनस् तवात्मा सम्पन्नं नाधस् समनुधावति । योगमन्त्रतपस्सिद्धः पुरुषः खाद् इवावनिम्
manas tavātmā sampannaṃ nādhas samanudhāvati / yogamantratapassiddhaḥ puruṣaḥ khād ivāvanim
Sanskrit only: no published translation is held for this verse.
इह शुद्धा चिद् एवास्ति पारावारविवर्जिता । अयं सो ऽहम् इदं तन् मे इति ते मास्तु विभ्रमः
iha śuddhā cid evāsti pārāvāravivarjitā / ayaṃ so 'ham idaṃ tan me iti te māstu vibhramaḥ
Sanskrit only: no published translation is held for this verse.
आत्मेति व्यवहारार्थम् अभिधा कल्पिता विभोः । नामरूपादिभेदास् तु दूरम् अस्माद् अलं गताः
ātmeti vyavahārārtham abhidhā kalpitā vibhoḥ / nāmarūpādibhedās tu dūram asmād alaṃ gatāḥ
Sanskrit only: no published translation is held for this verse.
जलम् एव यथाम्भोधिर् न तरङ्गादिकं पृथक् । आत्मैवेदं तथा सर्वं न भूतौघादिकं पृथक्
jalam eva yathāmbhodhir na taraṅgādikaṃ pṛthak / ātmaivedaṃ tathā sarvaṃ na bhūtaughādikaṃ pṛthak
Sanskrit only: no published translation is held for this verse.
यथा समस्ताज् जलधेर् जलाद् अन्यन् न लभ्यते । तथैव जगतस् स्फाराद् आत्मनो ऽन्यन् न लभ्यते
yathā samastāj jaladher jalād anyan na labhyate / tathaiva jagatas sphārād ātmano 'nyan na labhyate
Sanskrit only: no published translation is held for this verse.
अयं सो ऽहम् इति प्राज्ञ क्व करोषि व्यवस्थितिम् । किं तत् त्वं किं च वा ते स्यात् किं न त्वं किं च वा न ते
ayaṃ so 'ham iti prājña kva karoṣi vyavasthitim / kiṃ tat tvaṃ kiṃ ca vā te syāt kiṃ na tvaṃ kiṃ ca vā na te
Sanskrit only: no published translation is held for this verse.
न द्वित्वम् अस्ति नो देहस् सम्बन्धो न च तैश् चितः । सम्भवत्य् अकलङ्काया भानोर् इव तमःपटैः
na dvitvam asti no dehas sambandho na ca taiś citaḥ / sambhavaty akalaṅkāyā bhānor iva tamaḥpaṭaiḥ
Sanskrit only: no published translation is held for this verse.
द्वित्वम् अभ्युपगम्यापि कथयामि तवारिहन् । देहादिभिस् सद्भिर् अपि न सम्बन्धो विभोर् भवेत्
dvitvam abhyupagamyāpi kathayāmi tavārihan / dehādibhis sadbhir api na sambandho vibhor bhavet
Sanskrit only: no published translation is held for this verse.
छायातपप्रसरयोः प्रकाशतमसोर् यथा । न सम्भवति सम्बन्धस् तथा वै देहदेहिनोः
chāyātapaprasarayoḥ prakāśatamasor yathā / na sambhavati sambandhas tathā vai dehadehinoḥ
Sanskrit only: no published translation is held for this verse.
यथा शीतोष्णयोर् नित्यं परस्परविरुद्धयोः । न सम्भवति सम्बन्धो राम देहात्मनोस् तथा
yathā śītoṣṇayor nityaṃ parasparaviruddhayoḥ / na sambhavati sambandho rāma dehātmanos tathā
Sanskrit only: no published translation is held for this verse.
अविनाभावितार्थस् तु सम्बन्धः कथम् एतयोः । जडचेतनयोर् देहदेहिनोर् अनुभूयते
avinābhāvitārthas tu sambandhaḥ katham etayoḥ / jaḍacetanayor dehadehinor anubhūyate
Sanskrit only: no published translation is held for this verse.
चिन्मात्रेणात्मना देहस् सम्बद्ध इति या कथा । सैषा दुरवबोधोत्था दावाग्नौ जलधीर् यथा
cinmātreṇātmanā dehas sambaddha iti yā kathā / saiṣā duravabodhotthā dāvāgnau jaladhīr yathā
Sanskrit only: no published translation is held for this verse.
सत्यावलोकनेनैषा मिथ्यादृष्टिर् विनश्यति । अवलोकनया सम्यग् आतपे जलधीर् यथा
satyāvalokanenaiṣā mithyādṛṣṭir vinaśyati / avalokanayā samyag ātape jaladhīr yathā
Sanskrit only: no published translation is held for this verse.
चिदात्मा निर्मलो नित्यस् स्वावभासो निरामयः । देहस् त्व् अनित्यो मलवांस् तेन सम्बध्यते कथम्
cidātmā nirmalo nityas svāvabhāso nirāmayaḥ / dehas tv anityo malavāṃs tena sambadhyate katham
Sanskrit only: no published translation is held for this verse.
स्पन्दम् आयाति वातेन भूतैर् आपीवरीकृतः । देहस् तेन न सम्बन्धो मनाग् एव महात्मनः
spandam āyāti vātena bhūtair āpīvarīkṛtaḥ / dehas tena na sambandho manāg eva mahātmanaḥ
Sanskrit only: no published translation is held for this verse.
सिद्धे द्वित्वे ऽपि देहस्य न सम्बन्धस्य सम्भवः । द्वित्वासिद्धौ तु सुमते कलनैवेदृशी कुतः
siddhe dvitve 'pi dehasya na sambandhasya sambhavaḥ / dvitvāsiddhau tu sumate kalanaivedṛśī kutaḥ
Sanskrit only: no published translation is held for this verse.
इत्य् एतद् एव तत् सत्यम् अत्रैवाङ्ग स्थितिं कुरु । न बन्धो ऽस्ति न मोक्षो ऽस्ति कदाचित् कस्यचित् क्वचित्
ity etad eva tat satyam atraivāṅga sthitiṃ kuru / na bandho 'sti na mokṣo 'sti kadācit kasyacit kvacit
Sanskrit only: no published translation is held for this verse.
सर्वम् आत्ममयं शान्तम् इत्य् एव प्रत्ययं स्फुटम् । सबाह्याभ्यन्तरं राम सर्वत्र दृढतां नय
sarvam ātmamayaṃ śāntam ity eva pratyayaṃ sphuṭam / sabāhyābhyantaraṃ rāma sarvatra dṛḍhatāṃ naya
Sanskrit only: no published translation is held for this verse.
सुखी दुःखी च मूढो ऽस्मीत्य् एता दुर्दृष्टयस् स्मृताः । आसु चेद् वस्तुबुद्धिस् ते तच् चिरं दुःखम् एष्यसि
sukhī duḥkhī ca mūḍho 'smīty etā durdṛṣṭayas smṛtāḥ / āsu ced vastubuddhis te tac ciraṃ duḥkham eṣyasi
Sanskrit only: no published translation is held for this verse.
यः क्रमश् शैलतृणयोः कौशेयोपलयोस् तथा । साम्यं प्रति स एवोक्तः परमात्मशरीरयोः
yaḥ kramaś śailatṛṇayoḥ kauśeyopalayos tathā / sāmyaṃ prati sa evoktaḥ paramātmaśarīrayoḥ
Sanskrit only: no published translation is held for this verse.
यथा शीतोष्णयोर् ऐक्यं कथास्व् अपि न दृश्यते । जडप्रकाशयोश् श्लेषो न तथात्मशरीरयोः
yathā śītoṣṇayor aikyaṃ kathāsv api na dṛśyate / jaḍaprakāśayoś śleṣo na tathātmaśarīrayoḥ
Sanskrit only: no published translation is held for this verse.
यथा तेजस्तिमिरयोर् न सम्बन्धो न तुल्यता । अत्यन्तभिन्नयो राम तथा ह्य् आत्मशरीरयोः
yathā tejastimirayor na sambandho na tulyatā / atyantabhinnayo rāma tathā hy ātmaśarīrayoḥ
Sanskrit only: no published translation is held for this verse.
देहश् चलति वातेन तेनैवायाति गच्छति । शब्दं करोति तेनैव देहनाडीविलासिना
dehaś calati vātena tenaivāyāti gacchati / śabdaṃ karoti tenaiva dehanāḍīvilāsinā
Sanskrit only: no published translation is held for this verse.
शब्दः कचटतप्रायस् स्फुरत्य् अन्तस् समीरणे । यथा प्रजायते वंशाद् देहरन्ध्रात् तथैव हि
śabdaḥ kacaṭataprāyas sphuraty antas samīraṇe / yathā prajāyate vaṃśād deharandhrāt tathaiva hi
Sanskrit only: no published translation is held for this verse.
कनीनिकापरिस्पन्दश् चक्षुस्स्पन्दश् च मारुतात् । इन्द्रियस्फुरणं चैव संवित् केवलम् आत्मनः
kanīnikāparispandaś cakṣusspandaś ca mārutāt / indriyasphuraṇaṃ caiva saṃvit kevalam ātmanaḥ
Sanskrit only: no published translation is held for this verse.
आकाशोपलकुड्यादौ सर्वत्रात्मदशा स्थिता । प्रतिबिम्बम् इवादर्शे चित्त एव च दृश्यते
ākāśopalakuḍyādau sarvatrātmadaśā sthitā / pratibimbam ivādarśe citta eva ca dṛśyate
Sanskrit only: no published translation is held for this verse.
शरीरालयम् उत्सृज्य यत्र चित्तविहङ्गमः । स्ववासनावशाद् याति तत्रैवात्मानुभूयते
śarīrālayam utsṛjya yatra cittavihaṅgamaḥ / svavāsanāvaśād yāti tatraivātmānubhūyate
Sanskrit only: no published translation is held for this verse.
यत्र पुष्पं तत्र गन्धसंविदस् संस्थिता यथा । यत्र चित्तं हि तत्रात्मसंविदस् संस्थितास् तथा
yatra puṣpaṃ tatra gandhasaṃvidas saṃsthitā yathā / yatra cittaṃ hi tatrātmasaṃvidas saṃsthitās tathā
Sanskrit only: no published translation is held for this verse.
सर्वत्र स्थितम् आकाशम् आदर्शे प्रतिबिम्बते । यथा तथात्मा सर्वत्र स्थितश् चेतसि दृश्यते
sarvatra sthitam ākāśam ādarśe pratibimbate / yathā tathātmā sarvatra sthitaś cetasi dṛśyate
Sanskrit only: no published translation is held for this verse.
अपाम् अवनतं स्थानम् आस्पदं भूतले यथा । अन्तःकरणम् एवात्मसंविदाम् आस्पदं तथा
apām avanataṃ sthānam āspadaṃ bhūtale yathā / antaḥkaraṇam evātmasaṃvidām āspadaṃ tathā
Sanskrit only: no published translation is held for this verse.
सत्यासत्यं जगद्रूपम् अन्तःकरणबिम्बिता । आत्मसंवित् तनोतीदम् आलोकम् इव सूर्यभाः
satyāsatyaṃ jagadrūpam antaḥkaraṇabimbitā / ātmasaṃvit tanotīdam ālokam iva sūryabhāḥ
Sanskrit only: no published translation is held for this verse.
अन्तःकरणम् एवातः कारणं भूतसंसृतौ । आत्मा सर्वातिगत्वात् तु कारणं सद् अकारणम्
antaḥkaraṇam evātaḥ kāraṇaṃ bhūtasaṃsṛtau / ātmā sarvātigatvāt tu kāraṇaṃ sad akāraṇam
Sanskrit only: no published translation is held for this verse.
अविचारणम् अज्ञानं मौर्ख्यम् आहुर् महाधियः । संसारसंसृतौ सारम् अन्तःकरणकारणम्
avicāraṇam ajñānaṃ maurkhyam āhur mahādhiyaḥ / saṃsārasaṃsṛtau sāram antaḥkaraṇakāraṇam
Sanskrit only: no published translation is held for this verse.
असम्यक्प्रेक्षणान् मोहाच् चेतस् सत्तां गृहीतवत् । सम्मोहबीजकणिकां तमो ऽर्कद्रवणाद् इव
asamyakprekṣaṇān mohāc cetas sattāṃ gṛhītavat / sammohabījakaṇikāṃ tamo 'rkadravaṇād iva
Sanskrit only: no published translation is held for this verse.
यथाभूतात्मतत्त्वैकपरिज्ञानेन राघव । असत्ताम् एत्य् अलं चेतो दीपेनेव तमः क्षणात्
yathābhūtātmatattvaikaparijñānena rāghava / asattām ety alaṃ ceto dīpeneva tamaḥ kṣaṇāt
Sanskrit only: no published translation is held for this verse.
संसारकारणम् अतस् स्वयं चेतो ऽविचारणात् । जीवो ऽन्तःकरणं चित्तं मनश् चेत्यादिनामकम्
saṃsārakāraṇam atas svayaṃ ceto 'vicāraṇāt / jīvo 'ntaḥkaraṇaṃ cittaṃ manaś cetyādināmakam
Sanskrit only: no published translation is held for this verse.
एतास् सञ्ज्ञाः प्रभो बह्व्यश् चेतसो रूढिम् आगताः । कथम् इत्य् एव कथय मयि मानद सिद्धये
etās sañjñāḥ prabho bahvyaś cetaso rūḍhim āgatāḥ / katham ity eva kathaya mayi mānada siddhaye
Sanskrit only: no published translation is held for this verse.
सर्वे भावा इमे नित्यम् आत्मतत्त्वैकरूपिणः । चित्रास् तरङ्गककणा जलैककलिता यथा
sarve bhāvā ime nityam ātmatattvaikarūpiṇaḥ / citrās taraṅgakakaṇā jalaikakalitā yathā
Sanskrit only: no published translation is held for this verse.
आत्मा स्पन्दैकरूपात्मा स्थितस् तेषु क्वचित् क्वचित् । तरङ्गेषु विलोलेषु पयो व्योमामलं यथा
ātmā spandaikarūpātmā sthitas teṣu kvacit kvacit / taraṅgeṣu viloleṣu payo vyomāmalaṃ yathā
Sanskrit only: no published translation is held for this verse.
क्वचिद् अस्पन्दरूपात्मा स्थितस् तेषु महेश्वरः । तरङ्गत्वम् अयातेषु जलभावो जलेष्व् इव
kvacid aspandarūpātmā sthitas teṣu maheśvaraḥ / taraṅgatvam ayāteṣu jalabhāvo jaleṣv iva
Sanskrit only: no published translation is held for this verse.
तत्रोपलादयो भावा अलोला आत्मनि स्थिताः । सुराफेनवद् उत्स्पन्दा लोलास् तु पुरुषादयः
tatropalādayo bhāvā alolā ātmani sthitāḥ / surāphenavad utspandā lolās tu puruṣādayaḥ
Sanskrit only: no published translation is held for this verse.
तत्र तेषु शरीरेषु सर्वशक्तितयात्मना । कलिताज्ञानकलना तेनाज्ञानम् असौ श्रितः
tatra teṣu śarīreṣu sarvaśaktitayātmanā / kalitājñānakalanā tenājñānam asau śritaḥ
Sanskrit only: no published translation is held for this verse.
तद् अज्ञानम् अनन्तात्मरूषितं जीव उच्यते । स संसारी महामोहमायापञ्जरकुञ्जरः
tad ajñānam anantātmarūṣitaṃ jīva ucyate / sa saṃsārī mahāmohamāyāpañjarakuñjaraḥ
Sanskrit only: no published translation is held for this verse.
जीवनाज् जीव इत्य् उक्तो ऽहम्भावश् चाप्य् अहन्तया । बुद्धिर् निश्चायकत्वेन सङ्कल्पकलनान् मनः
jīvanāj jīva ity ukto 'hambhāvaś cāpy ahantayā / buddhir niścāyakatvena saṅkalpakalanān manaḥ
Sanskrit only: no published translation is held for this verse.
प्रकृतिः प्रकृतत्वेन देहो दिग्धतया स्थितः । जडः प्रकृतिभावेन चेतनस् स्वात्मसत्तया
prakṛtiḥ prakṛtatvena deho digdhatayā sthitaḥ / jaḍaḥ prakṛtibhāvena cetanas svātmasattayā
Sanskrit only: no published translation is held for this verse.
जडाजडदृशोर् मध्ये यत् तत्त्वं पारमात्मिकम् । तद् एतद् एव नानात्वं नानासञ्ज्ञाभिर् आगतम्
jaḍājaḍadṛśor madhye yat tattvaṃ pāramātmikam / tad etad eva nānātvaṃ nānāsañjñābhir āgatam
Sanskrit only: no published translation is held for this verse.
एवं स्वरूपं जीवस्य बृहदारण्यकादिषु । बहुधा बहुषु प्रोक्तं वेदान्तेषु किलानघ
evaṃ svarūpaṃ jīvasya bṛhadāraṇyakādiṣu / bahudhā bahuṣu proktaṃ vedānteṣu kilānagha
Sanskrit only: no published translation is held for this verse.
अन्यैस् त्व् एतासु सञ्ज्ञासु कुविकल्पकुतार्किकैः । मोहाय केवलं मूढैर् व्यर्थम् अर्थाः प्रकल्पिताः
anyais tv etāsu sañjñāsu kuvikalpakutārkikaiḥ / mohāya kevalaṃ mūḍhair vyartham arthāḥ prakalpitāḥ
Sanskrit only: no published translation is held for this verse.
एवम् एष महाबाहो जीवस् संसारकारणम् । मूकेनातिवराकेण देहकेनेह किं कृतम्
evam eṣa mahābāho jīvas saṃsārakāraṇam / mūkenātivarākeṇa dehakeneha kiṃ kṛtam
Sanskrit only: no published translation is held for this verse.
आधाराधेययोर् एकनाशेनान्यस्य नष्टता । यथा तथा शरीरादिनाशे नात्मनि नष्टता
ādhārādheyayor ekanāśenānyasya naṣṭatā / yathā tathā śarīrādināśe nātmani naṣṭatā
Sanskrit only: no published translation is held for this verse.
एकपर्णरसे क्षीणे रसो नैति यथा क्षयम् । याति पर्णरसश् चार्करश्मिजालान्तरं यथा
ekaparṇarase kṣīṇe raso naiti yathā kṣayam / yāti parṇarasaś cārkaraśmijālāntaraṃ yathā
Sanskrit only: no published translation is held for this verse.
शरीरसङ्क्षये देही न क्षयं याति कस्यचित् । निर्वासनश् चेत् तद् व्योम्नि तिष्ठत्य् आत्मपदे तथा
śarīrasaṅkṣaye dehī na kṣayaṃ yāti kasyacit / nirvāsanaś cet tad vyomni tiṣṭhaty ātmapade tathā
Sanskrit only: no published translation is held for this verse.
देहनाशे विनष्टो ऽस्मीत्य् एवं यस्यामतेर् भ्रमः । मातुस् स्तनतटात् तस्य मन्ये वेताल उत्थितः
dehanāśe vinaṣṭo 'smīty evaṃ yasyāmater bhramaḥ / mātus stanataṭāt tasya manye vetāla utthitaḥ
Sanskrit only: no published translation is held for this verse.
यस्य ह्य् आत्यन्तिको नाशस् स्याद् असाव् उदितस् स्मृतः । चित्तनाशो हि नाशस् स्यात् स मोक्ष इति कथ्यते
yasya hy ātyantiko nāśas syād asāv uditas smṛtaḥ / cittanāśo hi nāśas syāt sa mokṣa iti kathyate
Sanskrit only: no published translation is held for this verse.
मृतो नष्ट इति प्रोक्तम् अन्यैस् तच् च मृषा न सत् । स देशकालान्तरितो भूत्वा भूयो ऽनुभूयते
mṛto naṣṭa iti proktam anyais tac ca mṛṣā na sat / sa deśakālāntarito bhūtvā bhūyo 'nubhūyate
Sanskrit only: no published translation is held for this verse.
इहोह्यते जनैर् ओघतरङ्गान्तस् तृणैर् इव । मरणव्यपदेशात् तु देशकालतिरोहितैः
ihohyate janair oghataraṅgāntas tṛṇair iva / maraṇavyapadeśāt tu deśakālatirohitaiḥ
Sanskrit only: no published translation is held for this verse.
वासनावलितो जीवो यात्य् उत्सृज्य शरीरकम् । कपिर् वनतरुं त्यक्त्वा तर्वन्तरम् इवास्थितः
vāsanāvalito jīvo yāty utsṛjya śarīrakam / kapir vanataruṃ tyaktvā tarvantaram ivāsthitaḥ
Sanskrit only: no published translation is held for this verse.
पुनस् तद् अपि सन्त्यज्य प्रयात्य् अन्यद् अपि क्षणात् । अन्यस्मिन् वितते देशे काले ऽन्यस्मिंश् च राघव
punas tad api santyajya prayāty anyad api kṣaṇāt / anyasmin vitate deśe kāle 'nyasmiṃś ca rāghava
Sanskrit only: no published translation is held for this verse.
इतश् चेतश् च नीयन्ते जीवा वासनया स्वया । चिरं तदुपजीविन्या धूर्तधात्र्येव बालकाः
itaś cetaś ca nīyante jīvā vāsanayā svayā / ciraṃ tadupajīvinyā dhūrtadhātryeva bālakāḥ
Sanskrit only: no published translation is held for this verse.
वासनारज्जुवलिता जीर्णाः पर्वतकुक्षिषु । जरयन्त्य् अतिदुःखेन जीवितं जीवजीवकाः
vāsanārajjuvalitā jīrṇāḥ parvatakukṣiṣu / jarayanty atiduḥkhena jīvitaṃ jīvajīvakāḥ
Sanskrit only: no published translation is held for this verse.
जरढजगदुपोढदुःखभाराः परिणतजर्जरजीविताश् श्वसन्त्यः । हृदयजनितवासनानुवृत्त्या नरकभरे जनताश् चिरं पतन्ति
jaraḍhajagadupoḍhaduḥkhabhārāḥ pariṇatajarjarajīvitāś śvasantyaḥ / hṛdayajanitavāsanānuvṛttyā narakabhare janatāś ciraṃ patanti
Sanskrit only: no published translation is held for this verse.
इत्य् उक्तवत्य् अथ मुनौ दिवसो जगाम सायन्तनाय विधये ऽस्तम् इनो जगाम । स्नातुं सभा कृतनमस्करणा जगाम श्यामाक्षये रविकरैश् च सहाजगाम
ity uktavaty atha munau divaso jagāma sāyantanāya vidhaye 'stam ino jagāma / snātuṃ sabhā kṛtanamaskaraṇā jagāma śyāmākṣaye ravikaraiś ca sahājagāma
Sanskrit only: no published translation is held for this verse.