Moksopaya with Bhaskarakantha's Tika 5.76

ब्रह्मणस् समुपायान्ति जगन्तीमानि राघव । स्थैर्यं यान्त्य् अविवेकेन शाम्यन्त्य् अङ्ग विवेकतः

brahmaṇas samupāyānti jagantīmāni rāghava / sthairyaṃ yānty avivekena śāmyanty aṅga vivekataḥ

Sanskrit only: no published translation is held for this verse.

जगज्जालजलावर्तवृत्तयो ब्रह्मवारिधौ । सङ्ख्यातुं केन शक्यन्ते भासां च त्रसरेणवः

jagajjālajalāvartavṛttayo brahmavāridhau / saṅkhyātuṃ kena śakyante bhāsāṃ ca trasareṇavaḥ

Sanskrit only: no published translation is held for this verse.

असम्यक्प्रेक्षणं विद्धि कारणं जगतस् स्थितौ । संसारशान्ताव् एकान्तकारणं सम्यगीक्षणम्

asamyakprekṣaṇaṃ viddhi kāraṇaṃ jagatas sthitau / saṃsāraśāntāv ekāntakāraṇaṃ samyagīkṣaṇam

Sanskrit only: no published translation is held for this verse.

अयं हि राम दुष्पारो घोरस् संसारसागरः । विना युक्तिप्रयत्नाभ्याम् अस्मान् नाम न तीर्यते

ayaṃ hi rāma duṣpāro ghoras saṃsārasāgaraḥ / vinā yuktiprayatnābhyām asmān nāma na tīryate

Sanskrit only: no published translation is held for this verse.

अयं हि सागरः पूर्णो मोहाम्बुभरपूरितः । अगाधमरणावर्तः कल्लोलाकुलकोटरः

ayaṃ hi sāgaraḥ pūrṇo mohāmbubharapūritaḥ / agādhamaraṇāvartaḥ kallolākulakoṭaraḥ

Sanskrit only: no published translation is held for this verse.

प्रभ्रमत्पुण्यदिण्डीरो ज्वलन्नरकवाडवः । तृष्णाविलोललहरिर् मनोजलमतङ्गजः

prabhramatpuṇyadiṇḍīro jvalannarakavāḍavaḥ / tṛṣṇāvilolalaharir manojalamataṅgajaḥ

Sanskrit only: no published translation is held for this verse.

आलीनजीवितसरिद् भोगरत्नसमुद्गकः । क्रुद्धरोगोरगाकीर्ण इन्द्रियग्राहघर्घरः

ālīnajīvitasarid bhogaratnasamudgakaḥ / kruddharogoragākīrṇa indriyagrāhaghargharaḥ

Sanskrit only: no published translation is held for this verse.

पश्यास्मिन् प्रसृता राम वीचयश् चारुचञ्चलाः । इमा मुग्धाङ्गनानाम्न्यश् शिखराकर्षणक्षमाः

paśyāsmin prasṛtā rāma vīcayaś cārucañcalāḥ / imā mugdhāṅganānāmnyaś śikharākarṣaṇakṣamāḥ

Sanskrit only: no published translation is held for this verse.

छदश्रीपद्मरागाढ्या नेत्रनीलोत्पलाकुलाः । दन्तमुक्ताफलाकीर्णास् स्मितफेनोपशोभिताः

chadaśrīpadmarāgāḍhyā netranīlotpalākulāḥ / dantamuktāphalākīrṇās smitaphenopaśobhitāḥ

Sanskrit only: no published translation is held for this verse.

केशेन्द्रनीलवलया भ्रूविलासतरङ्गिताः । नितम्बपुलिनस्फीताः कण्ठकम्बुविभूषिताः

keśendranīlavalayā bhrūvilāsataraṅgitāḥ / nitambapulinasphītāḥ kaṇṭhakambuvibhūṣitāḥ

Sanskrit only: no published translation is held for this verse.

ललाटमणिपट्टाढ्या विलासग्राहसङ्कुलाः । कटाक्षलोलशफरा वर्णकाञ्चनवालुकाः

lalāṭamaṇipaṭṭāḍhyā vilāsagrāhasaṅkulāḥ / kaṭākṣalolaśapharā varṇakāñcanavālukāḥ

Sanskrit only: no published translation is held for this verse.

एवंविलोललहरीभीमात् संसारसागरात् । उत्तीर्यते चेन् मग्नेन तत् परं पौरुषं भवेत्

evaṃvilolalaharībhīmāt saṃsārasāgarāt / uttīryate cen magnena tat paraṃ pauruṣaṃ bhavet

Sanskrit only: no published translation is held for this verse.

सत्यां प्रज्ञामहानावि विवेके सति नाविके । संसारसागराद् अस्माद् यो न तीर्णो धिग् अस्तु तम्

satyāṃ prajñāmahānāvi viveke sati nāvike / saṃsārasāgarād asmād yo na tīrṇo dhig astu tam

Sanskrit only: no published translation is held for this verse.

अपारावारम् आक्रम्य प्रमेयीकृत्य सर्वतः । संसाराब्धिं गाहते यस् स एव पुरुषस् स्मृतः

apārāvāram ākramya prameyīkṛtya sarvataḥ / saṃsārābdhiṃ gāhate yas sa eva puruṣas smṛtaḥ

Sanskrit only: no published translation is held for this verse.

विचार्यार्यैस् सहालोक्य धिया संसारसागरम् । एतस्मिंस् तदनु क्रीडा शोभते राम नान्यथा

vicāryāryais sahālokya dhiyā saṃsārasāgaram / etasmiṃs tadanu krīḍā śobhate rāma nānyathā

Sanskrit only: no published translation is held for this verse.

इह भव्यो भवान् साधो विचारपरया धिया । त्वया यूनैव येनायं संसारः प्रविचार्यते

iha bhavyo bhavān sādho vicāraparayā dhiyā / tvayā yūnaiva yenāyaṃ saṃsāraḥ pravicāryate

Sanskrit only: no published translation is held for this verse.

भवान् इव विचार्यादौ संसारम् अतिकान्तया । मत्या यो गाहते लोके नेहासौ परिमज्जति

bhavān iva vicāryādau saṃsāram atikāntayā / matyā yo gāhate loke nehāsau parimajjati

Sanskrit only: no published translation is held for this verse.

पूर्वं धिया विचार्यैते भोगा भोगिभयप्रदाः । भोक्तव्याश् चरमं राम गरुडेनेव पन्नगाः

pūrvaṃ dhiyā vicāryaite bhogā bhogibhayapradāḥ / bhoktavyāś caramaṃ rāma garuḍeneva pannagāḥ

Sanskrit only: no published translation is held for this verse.

विचार्य तत्त्वम् आलोक्य सेव्यन्ते या विभूतयः । ता उदर्कोदया जन्तोश् शेषा दुःखाय केवलम्

vicārya tattvam ālokya sevyante yā vibhūtayaḥ / tā udarkodayā jantoś śeṣā duḥkhāya kevalam

Sanskrit only: no published translation is held for this verse.

बलं बुद्धिश् च तेजश् च दृष्टतत्त्वस्य वर्धते । सवसन्तस्य वृक्षस्य सौन्दर्याद्या गुणा इव

balaṃ buddhiś ca tejaś ca dṛṣṭatattvasya vardhate / savasantasya vṛkṣasya saundaryādyā guṇā iva

Sanskrit only: no published translation is held for this verse.

घनरसायनपूरणशीतया विमलया समया सततं धिया । शिशिररश्मिर् इवातिविराजते विदितवेद्यसुखं रघुनन्दन

ghanarasāyanapūraṇaśītayā vimalayā samayā satataṃ dhiyā / śiśiraraśmir ivātivirājate viditavedyasukhaṃ raghunandana

Sanskrit only: no published translation is held for this verse.