Moksopaya with Bhaskarakantha's Tika 6.112

तां मायां शमम् आनीय चूडाला समचिन्तयत् । दिष्ट्या भोगेच्छया नायं ह्रियते वसुधाधिपः

tāṃ māyāṃ śamam ānīya cūḍālā samacintayat / diṣṭyā bhogecchayā nāyaṃ hriyate vasudhādhipaḥ

Sanskrit only: no published translation is held for this verse.

शान्तस् समसमाभोग एव शक्रसमागमे । असम्भ्रमम् अहेलं च कृतवान् व्यवहारिताम्

śāntas samasamābhoga eva śakrasamāgame / asambhramam ahelaṃ ca kṛtavān vyavahāritām

Sanskrit only: no published translation is held for this verse.

भूय एव प्रपञ्चेन विमृशाम्य् एनम् आदरात् । रागद्वेषप्रधानेन केनचिद् बुद्धिहारिणा

bhūya eva prapañcena vimṛśāmy enam ādarāt / rāgadveṣapradhānena kenacid buddhihāriṇā

Sanskrit only: no published translation is held for this verse.

इति सञ्चिन्त्य सा रात्राव् इन्दाव् अभ्युदिते वने । गृहीतमण्डना नूनं कान्ता मदनिका सती

iti sañcintya sā rātrāv indāv abhyudite vane / gṛhītamaṇḍanā nūnaṃ kāntā madanikā satī

Sanskrit only: no published translation is held for this verse.

वाते वहति पुष्पाढ्ये मदिरामोदमांसले । सन्ध्याजप्यपरे नद्यास् तीरसंस्थे शिखिध्वजे

vāte vahati puṣpāḍhye madirāmodamāṃsale / sandhyājapyapare nadyās tīrasaṃsthe śikhidhvaje

Sanskrit only: no published translation is held for this verse.

सन्तानकलतागेहं नीरन्ध्रं पुष्पगुच्छकैः । शुद्धान्तं वनदेवीनां प्रविवेश मदान्विता

santānakalatāgehaṃ nīrandhraṃ puṣpagucchakaiḥ / śuddhāntaṃ vanadevīnāṃ praviveśa madānvitā

Sanskrit only: no published translation is held for this verse.

तत्र सङ्कल्पिते पुष्पशयने माल्यमालिता । कण्ठे सङ्कल्पितं कान्तं शिड्गम् आदाय संस्थिता

tatra saṅkalpite puṣpaśayane mālyamālitā / kaṇṭhe saṅkalpitaṃ kāntaṃ śiḍgam ādāya saṃsthitā

Sanskrit only: no published translation is held for this verse.

आगत्यान्विष्य कुञ्जान् स प्रददर्श शिखिध्वजः । लतागेहे मदनिकाकण्ठे शिड्गं मनोहरम्

āgatyānviṣya kuñjān sa pradadarśa śikhidhvajaḥ / latāgehe madanikākaṇṭhe śiḍgaṃ manoharam

Sanskrit only: no published translation is held for this verse.

कुन्तलावलितस्कन्धं समालब्धं च चन्दनैः । शयनावृत्तिविक्षेपपर्याकुलितशेखरम्

kuntalāvalitaskandhaṃ samālabdhaṃ ca candanaiḥ / śayanāvṛttivikṣepaparyākulitaśekharam

Sanskrit only: no published translation is held for this verse.

हेमाभे द्विगुणाकारे बालाबाहूपधानके । मग्नैकश्रवणापाङ्गकपोलतलकुन्तलम्

hemābhe dviguṇākāre bālābāhūpadhānake / magnaikaśravaṇāpāṅgakapolatalakuntalam

Sanskrit only: no published translation is held for this verse.

मिथुनं तद् ददर्शाथ मिथः प्रहसिताननम् । अन्योऽन्यवदनासक्तं छन्नं कल्पलतांशुकैः

mithunaṃ tad dadarśātha mithaḥ prahasitānanam / anyo'nyavadanāsaktaṃ channaṃ kalpalatāṃśukaiḥ

Sanskrit only: no published translation is held for this verse.

आलोलमाल्यशयनं मदनातुरम् आकुलम् । अङ्गरागच्छलेनात्मरागम् अन्योऽन्यम् अर्पयत्

ālolamālyaśayanaṃ madanāturam ākulam / aṅgarāgacchalenātmarāgam anyo'nyam arpayat

Sanskrit only: no published translation is held for this verse.

रत्युन्मुखं घनानन्दम् उद्दाममदमन्मथम् । परस्पराहतं पुष्पैर् वक्षोभ्यां पीडितस्तनम्

ratyunmukhaṃ ghanānandam uddāmamadamanmatham / parasparāhataṃ puṣpair vakṣobhyāṃ pīḍitastanam

Sanskrit only: no published translation is held for this verse.

तद् आलोक्याविकारेण चेतसा स तुतोष च । अहो सुखं स्थितौ शिड्गाव् इत्य् आह स शिखिध्वजः

tad ālokyāvikāreṇa cetasā sa tutoṣa ca / aho sukhaṃ sthitau śiḍgāv ity āha sa śikhidhvajaḥ

Sanskrit only: no published translation is held for this verse.

तिष्ठथो ऽङ्ग यथाकामं सुखं शिड्गौ यथास्थितम् । विघ्नं मा कुरुथः प्रीताव् इत्य् उक्त्वा निर्जगाम सः

tiṣṭhatho 'ṅga yathākāmaṃ sukhaṃ śiḍgau yathāsthitam / vighnaṃ mā kuruthaḥ prītāv ity uktvā nirjagāma saḥ

Sanskrit only: no published translation is held for this verse.

ततो मुहूर्तमात्रेण प्रपञ्चं स्वम् उपेक्ष्य सा । निर्ययौ दर्शयन्ती स्वं रतियुद्धाकुलं वपुः

tato muhūrtamātreṇa prapañcaṃ svam upekṣya sā / niryayau darśayantī svaṃ ratiyuddhākulaṃ vapuḥ

Sanskrit only: no published translation is held for this verse.

उपविष्टं ददर्शैनं नृपं हेमशिलातले । समाधिसंस्थम् एकान्ते मनाग्विकसितेक्षणम्

upaviṣṭaṃ dadarśainaṃ nṛpaṃ hemaśilātale / samādhisaṃstham ekānte manāgvikasitekṣaṇam

Sanskrit only: no published translation is held for this verse.

तं प्रदेशम् उपागत्य लज्जावनमितानना । तूष्णीम् आसित् क्षणं खिन्ना म्लाना मदनिकाङ्गना

taṃ pradeśam upāgatya lajjāvanamitānanā / tūṣṇīm āsit kṣaṇaṃ khinnā mlānā madanikāṅganā

Sanskrit only: no published translation is held for this verse.

क्षणाच् छिखिध्वजो ध्यानाद् विरतस् ताम् उवाच ह । प्रसन्नमधुरं वाक्यम् इदम् अक्षुब्धया धिया

kṣaṇāc chikhidhvajo dhyānād viratas tām uvāca ha / prasannamadhuraṃ vākyam idam akṣubdhayā dhiyā

Sanskrit only: no published translation is held for this verse.

तन्वि किं शीघ्रम् एव त्वं विघ्नितानन्दम् आगता । आनन्दायैव भूतानि यतन्ते यानि कानिचित्

tanvi kiṃ śīghram eva tvaṃ vighnitānandam āgatā / ānandāyaiva bhūtāni yatante yāni kānicit

Sanskrit only: no published translation is held for this verse.

भूयस् तोषय तं गच्छ कान्तं प्रणयवृत्तिभिः । परस्परेप्सितस्नेहो दुर्लभो हि जगत्त्रये

bhūyas toṣaya taṃ gaccha kāntaṃ praṇayavṛttibhiḥ / parasparepsitasneho durlabho hi jagattraye

Sanskrit only: no published translation is held for this verse.

अहम् एतेन चार्थेन नोद्वेगं यामि मानिनि । यद् यद् इष्टतमं लोके तद् तद् देयं विजानता

aham etena cārthena nodvegaṃ yāmi mānini / yad yad iṣṭatamaṃ loke tad tad deyaṃ vijānatā

Sanskrit only: no published translation is held for this verse.

अहं कुम्भश् च तन्वङ्गि वीतरागाव् इह स्थितौ । दुर्वासश्शापजा बाला त्वं यद् इच्छसि तत् कुरु

ahaṃ kumbhaś ca tanvaṅgi vītarāgāv iha sthitau / durvāsaśśāpajā bālā tvaṃ yad icchasi tat kuru

Sanskrit only: no published translation is held for this verse.

एवम् एष महाभाग स्त्रीपुम्भावो हि चञ्चलः । कामो ह्य् अष्टगुणस् स्त्रीणां न कोपं कर्तुम् अर्हसि

evam eṣa mahābhāga strīpumbhāvo hi cañcalaḥ / kāmo hy aṣṭaguṇas strīṇāṃ na kopaṃ kartum arhasi

Sanskrit only: no published translation is held for this verse.

अबलाहम् अनेनास्मि क्रान्ता गहनकानने । त्वयि सन्ध्याजपपरे किं करोमि वराकिका

abalāham anenāsmi krāntā gahanakānane / tvayi sandhyājapapare kiṃ karomi varākikā

Sanskrit only: no published translation is held for this verse.

अबला वाक्यमात्रेण तावन् नरनिरोधनम् । करोति यावच् छिड्गेन नाङ्गे स्वे विनिवेशिता

abalā vākyamātreṇa tāvan naranirodhanam / karoti yāvac chiḍgena nāṅge sve viniveśitā

Sanskrit only: no published translation is held for this verse.

स्त्रियास् सुन्दर यातायाः परपुंसाङ्गसङ्गमम् । मन्युर् निषेध आक्रन्दस् सतीत्वं किं करिष्यति

striyās sundara yātāyāḥ parapuṃsāṅgasaṅgamam / manyur niṣedha ākrandas satītvaṃ kiṃ kariṣyati

Sanskrit only: no published translation is held for this verse.

अबला स्त्री तथा बाला मूढाहम् अपराधिनी । क्षन्तुम् अर्हसि मां नाथ क्षमावन्तो हि साधवः

abalā strī tathā bālā mūḍhāham aparādhinī / kṣantum arhasi māṃ nātha kṣamāvanto hi sādhavaḥ

Sanskrit only: no published translation is held for this verse.

मन्युर् मम न बाले ऽन्तर् विद्यते ख इव द्रुमः । केवलं साधुनिन्द्यत्वान् नेच्छामि त्वाम् अहम् वधूम्

manyur mama na bāle 'ntar vidyate kha iva drumaḥ / kevalaṃ sādhunindyatvān necchāmi tvām aham vadhūm

Sanskrit only: no published translation is held for this verse.

सुहृत्त्वेन वनान्तेषु पूर्ववत् समम् अङ्गने । वीतरागतया नित्यं तपसैव रमावहे

suhṛttvena vanānteṣu pūrvavat samam aṅgane / vītarāgatayā nityaṃ tapasaiva ramāvahe

Sanskrit only: no published translation is held for this verse.

एवं समतया तत्र स्थिते तस्मिञ् शिखिध्वजे । चूडाला चिन्तयाम् आस तत्सत्येनोदिताशया

evaṃ samatayā tatra sthite tasmiñ śikhidhvaje / cūḍālā cintayām āsa tatsatyenoditāśayā

Sanskrit only: no published translation is held for this verse.

अहो बत परं साम्यं भगवान् अयम् आगतः । वीतरागभयक्रोधो जीवन्मुक्तो ऽवतिष्ठति

aho bata paraṃ sāmyaṃ bhagavān ayam āgataḥ / vītarāgabhayakrodho jīvanmukto 'vatiṣṭhati

Sanskrit only: no published translation is held for this verse.

नैनं हरन्ति भोगाशा न महत्यो ऽपि सिद्धयः । न सुखानि न दुःखानि नापदो न च सम्पदः

nainaṃ haranti bhogāśā na mahatyo 'pi siddhayaḥ / na sukhāni na duḥkhāni nāpado na ca sampadaḥ

Sanskrit only: no published translation is held for this verse.

चिन्तितास् सकला एव प्रयान्त्य् एनम् अनिन्दिताः । मन्ये महर्द्धयः कान्ता नारायणम् इवापरम्

cintitās sakalā eva prayānty enam aninditāḥ / manye maharddhayaḥ kāntā nārāyaṇam ivāparam

Sanskrit only: no published translation is held for this verse.

आत्मवृत्तान्तम् अखिलं तद् एनं स्मारयाम्य् अहम् । कुम्भरूपम् इदं त्यक्त्वा चूडालैव भवाम्य् अहम्

ātmavṛttāntam akhilaṃ tad enaṃ smārayāmy aham / kumbharūpam idaṃ tyaktvā cūḍālaiva bhavāmy aham

Sanskrit only: no published translation is held for this verse.

इति सञ्चिन्त्य चूडाला चूडालावपुर् अक्षतम् । दर्शयाम् आस तत्राशु त्यक्त्वा मदनिकावपुः

iti sañcintya cūḍālā cūḍālāvapur akṣatam / darśayām āsa tatrāśu tyaktvā madanikāvapuḥ

Sanskrit only: no published translation is held for this verse.

तस्मान् मदनिकादेहाच् चूडाला निर्गतेव सा । बभाव् इन्द्वमला मुक्ता निर्गतेव समुद्गकात्

tasmān madanikādehāc cūḍālā nirgateva sā / babhāv indvamalā muktā nirgateva samudgakāt

Sanskrit only: no published translation is held for this verse.

तां ददर्शानवद्याङ्गीं पुरः प्रणयपेशलाम् । कान्तो मदनिकाम् एव चूडालां दयितां स्थिताम्

tāṃ dadarśānavadyāṅgīṃ puraḥ praṇayapeśalām / kānto madanikām eva cūḍālāṃ dayitāṃ sthitām

Sanskrit only: no published translation is held for this verse.

समुदिताम् इव माधवपद्मिनीम् उपगताम् इव भूमितलाच् छ्रियम् । प्रकटिताम् इव रत्नसमुद्गकात् परिददर्श निजां दयितां नृपः

samuditām iva mādhavapadminīm upagatām iva bhūmitalāc chriyam / prakaṭitām iva ratnasamudgakāt paridadarśa nijāṃ dayitāṃ nṛpaḥ

Sanskrit only: no published translation is held for this verse.