Moksopaya with Bhaskarakantha's Tika 6.113

अथ तां दयितां दृष्ट्वा विस्मयोत्फुल्ललोचनः । शिखिध्वज उवाचेदम् आश्चर्याकुलया गिरा

atha tāṃ dayitāṃ dṛṣṭvā vismayotphullalocanaḥ / śikhidhvaja uvācedam āścaryākulayā girā

Sanskrit only: no published translation is held for this verse.

का त्वम् उत्पलपत्त्राक्षि कुतः प्राप्तासि सुन्दरि । किमीहासि कियत्कालं किमर्थम् इह तिष्ठसि

kā tvam utpalapattrākṣi kutaḥ prāptāsi sundari / kimīhāsi kiyatkālaṃ kimartham iha tiṣṭhasi

Sanskrit only: no published translation is held for this verse.

अङ्गेन व्यवहारेण स्मितेनानुनयेन च । मम जाया विलासेन चूडालेवोपलक्ष्यसे

aṅgena vyavahāreṇa smitenānunayena ca / mama jāyā vilāsena cūḍālevopalakṣyase

Sanskrit only: no published translation is held for this verse.

एवम् एव प्रभो विद्धि चूडालास्मि न संशयः । अकृत्रिमेन देहेन लब्धो ऽस्य् अद्य मया स्वयम्

evam eva prabho viddhi cūḍālāsmi na saṃśayaḥ / akṛtrimena dehena labdho 'sy adya mayā svayam

Sanskrit only: no published translation is held for this verse.

कुम्भादिदेहनिर्माणस् त्वां बोधयितुम् एष मे । प्रपञ्चश् शतशाखत्वम् इह यातो वनान्तरे

kumbhādidehanirmāṇas tvāṃ bodhayitum eṣa me / prapañcaś śataśākhatvam iha yāto vanāntare

Sanskrit only: no published translation is held for this verse.

यदा राज्यं परित्यज्य मोहेन तपसे वनम् । त्वम् अगास् तत्प्रभृत्य् एव त्वद्बोधायाहम् उद्यता

yadā rājyaṃ parityajya mohena tapase vanam / tvam agās tatprabhṛty eva tvadbodhāyāham udyatā

Sanskrit only: no published translation is held for this verse.

अनेन कुम्भदेहेन मयैवं त्वं विबोधितः । मायया न तु कुम्भादि किञ्चित् सत्यं महीपते

anena kumbhadehena mayaivaṃ tvaṃ vibodhitaḥ / māyayā na tu kumbhādi kiñcit satyaṃ mahīpate

Sanskrit only: no published translation is held for this verse.

बुद्धो विदितवेद्यस् त्वं ध्यानेनैतद् अखण्डितम् । सर्वं पश्यसि तत्त्वज्ञ ध्यानेनाश्व् अवलोकय

buddho viditavedyas tvaṃ dhyānenaitad akhaṇḍitam / sarvaṃ paśyasi tattvajña dhyānenāśv avalokaya

Sanskrit only: no published translation is held for this verse.

अथ चूडालयेत्य् उक्ते बद्ध्वा परिकरं नृपः । आत्मोदन्तम् अशेषेण ध्यानेनालम् अवैक्षत

atha cūḍālayety ukte baddhvā parikaraṃ nṛpaḥ / ātmodantam aśeṣeṇa dhyānenālam avaikṣata

Sanskrit only: no published translation is held for this verse.

आ स्वराज्यपरित्यागाच् चूडालादर्शनावधिम् । सर्वं मुहूर्तध्यानेन स्वात्मोदन्तं ददर्श सः

ā svarājyaparityāgāc cūḍālādarśanāvadhim / sarvaṃ muhūrtadhyānena svātmodantaṃ dadarśa saḥ

Sanskrit only: no published translation is held for this verse.

आ राज्यसम्परित्यागाद् वर्तमानक्षणक्रमम् । सर्वम् आलोक्य भूपालो विरराम समाधितः

ā rājyasamparityāgād vartamānakṣaṇakramam / sarvam ālokya bhūpālo virarāma samādhitaḥ

Sanskrit only: no published translation is held for this verse.

समाधिविरतो हर्षविकासिनयनाम्बुजः । विसार्य तरसा बाहू पुलकोज्ज्वलतां गतः

samādhivirato harṣavikāsinayanāmbujaḥ / visārya tarasā bāhū pulakojjvalatāṃ gataḥ

Sanskrit only: no published translation is held for this verse.

गलदङ्गं लसत्स्नेहम् उद्यद्बाष्पं स्फुरत्स्पृहम् । आलिलिङ्ग चिरं कान्तां नकुलो नकुलीम् इव

galadaṅgaṃ lasatsneham udyadbāṣpaṃ sphuratspṛham / āliliṅga ciraṃ kāntāṃ nakulo nakulīm iva

Sanskrit only: no published translation is held for this verse.

तयोर् आलिङ्गने तस्मिंस् तत्र भावो बभूव यः । न स वासुकिजिह्वाभिर् वक्तुं वर्षैर् हि शक्यते

tayor āliṅgane tasmiṃs tatra bhāvo babhūva yaḥ / na sa vāsukijihvābhir vaktuṃ varṣair hi śakyate

Sanskrit only: no published translation is held for this verse.

चित्रस्थाव् इव पङ्केन कृताव् इव गलत्तनू । शैलाद् इव समुत्कीर्णौ श्लिष्टाव् आस्तां चिरं प्रियौ

citrasthāv iva paṅkena kṛtāv iva galattanū / śailād iva samutkīrṇau śliṣṭāv āstāṃ ciraṃ priyau

Sanskrit only: no published translation is held for this verse.

मुहूर्तेन गलद्घर्मजालौ पुलकपीवरौ । बाहू विश्लथताम् ईषन् निन्यतुस् तौ शनैः प्रियौ

muhūrtena galadgharmajālau pulakapīvarau / bāhū viślathatām īṣan ninyatus tau śanaiḥ priyau

Sanskrit only: no published translation is held for this verse.

अमृतापूर्णहृदयं संशून्यहृदयोपमम् । उन्मुक्तभुजम् आस्तां ताव् अलक्ष्यस्थितलोचनम्

amṛtāpūrṇahṛdayaṃ saṃśūnyahṛdayopamam / unmuktabhujam āstāṃ tāv alakṣyasthitalocanam

Sanskrit only: no published translation is held for this verse.

घनानन्दः क्षणं स्थित्वा तूष्णीं प्रणयपेशलम् । कान्ताचिबुकसंलग्नकरः प्रोवाच भूपतिः

ghanānandaḥ kṣaṇaṃ sthitvā tūṣṇīṃ praṇayapeśalam / kāntācibukasaṃlagnakaraḥ provāca bhūpatiḥ

Sanskrit only: no published translation is held for this verse.

अहो नु मधुरस् स्निग्धः कान्तश् च कुलयोषिताम् । पुण्यश् चरितनिष्ष्यन्दस् स्वादवान् अमृताद् अपि

aho nu madhuras snigdhaḥ kāntaś ca kulayoṣitām / puṇyaś caritaniṣṣyandas svādavān amṛtād api

Sanskrit only: no published translation is held for this verse.

कियत्प्रमाणं तन्वङ्गि त्वया बालेन्दुमुग्धया । अनुभूतश् चिरं क्लेशो भर्तुर् अर्थेन दारुणः

kiyatpramāṇaṃ tanvaṅgi tvayā bālendumugdhayā / anubhūtaś ciraṃ kleśo bhartur arthena dāruṇaḥ

Sanskrit only: no published translation is held for this verse.

एवं दुरुत्तराद् अस्मात् संसारकुहराद् अहम् । उत्तारितो यया बुद्ध्या सा हि केनोपमीयते

evaṃ duruttarād asmāt saṃsārakuharād aham / uttārito yayā buddhyā sā hi kenopamīyate

Sanskrit only: no published translation is held for this verse.

अरुन्धती शची गौरी गायत्री श्रीस् सरस्वती । समस्ताः पेलवायन्ते तन्व्यास् सत्त्वगुणश्रिया

arundhatī śacī gaurī gāyatrī śrīs sarasvatī / samastāḥ pelavāyante tanvyās sattvaguṇaśriyā

Sanskrit only: no published translation is held for this verse.

धीश्रीकान्तिक्षमामैत्रीकरुणाद्यासु सुन्दरि । कान्तास्व् आकारकान्तासु प्रथमैवासि लक्ष्यसे

dhīśrīkāntikṣamāmaitrīkaruṇādyāsu sundari / kāntāsv ākārakāntāsu prathamaivāsi lakṣyase

Sanskrit only: no published translation is held for this verse.

परेणाध्यवसायेन त्वयाहम् अवबोधितः । केन प्रत्युपकारेण तुलाम् एष्यन्ति मे गुणाः

pareṇādhyavasāyena tvayāham avabodhitaḥ / kena pratyupakāreṇa tulām eṣyanti me guṇāḥ

Sanskrit only: no published translation is held for this verse.

मोहाद् अनादिगहनाद् अनन्तविषमाद् अपि । पतिम् अध्यवसायिन्यस् तारयन्ति कुलस्त्रियः

mohād anādigahanād anantaviṣamād api / patim adhyavasāyinyas tārayanti kulastriyaḥ

Sanskrit only: no published translation is held for this verse.

शास्त्रार्थगुरुमन्त्रादि न तथोत्तारणक्षमम् । यथैतास् स्नेहशालिन्यो भर्तॄणां कुलयोषितः

śāstrārthagurumantrādi na tathottāraṇakṣamam / yathaitās snehaśālinyo bhartṝṇāṃ kulayoṣitaḥ

Sanskrit only: no published translation is held for this verse.

सखा भ्राता सुहृद् भृत्यो गुरुर् मन्त्रो धनं सुखम् । शास्त्रम् आयतनं दास्यस् सर्वं भर्तुः कुलस्त्रियः

sakhā bhrātā suhṛd bhṛtyo gurur mantro dhanaṃ sukham / śāstram āyatanaṃ dāsyas sarvaṃ bhartuḥ kulastriyaḥ

Sanskrit only: no published translation is held for this verse.

सर्वदा सर्वयत्नेन पूजनीयाः कुलाङ्गनाः । लोकद्वयसुखं सम्यक् सर्वं तासु प्रतिष्ठितम्

sarvadā sarvayatnena pūjanīyāḥ kulāṅganāḥ / lokadvayasukhaṃ samyak sarvaṃ tāsu pratiṣṭhitam

Sanskrit only: no published translation is held for this verse.

निरिच्छायाः प्रयातायाः पारं संसारवारिधेः । कथम् अस्योपकारस्य करिष्ये ते प्रतिक्रियाम्

niricchāyāḥ prayātāyāḥ pāraṃ saṃsāravāridheḥ / katham asyopakārasya kariṣye te pratikriyām

Sanskrit only: no published translation is held for this verse.

मन्ये कुलाङ्गनालोको लोके सर्वस् त्वयाधुना । नारीसौजन्यचर्चासु व्यपदेश्यो भविष्यति

manye kulāṅganāloko loke sarvas tvayādhunā / nārīsaujanyacarcāsu vyapadeśyo bhaviṣyati

Sanskrit only: no published translation is held for this verse.

त्वां निर्मितवतो धातुर् गुणजालातिशायिनीम् । मन्ये प्रकुपिता नूनम् अरुन्धत्यादिकास् स्त्रियः

tvāṃ nirmitavato dhātur guṇajālātiśāyinīm / manye prakupitā nūnam arundhatyādikās striyaḥ

Sanskrit only: no published translation is held for this verse.

सतीत्वरूपसौजन्यगुणरत्नसमुद्गिके । एहि मे त्वद्गुणोत्कस्य पुनर् आलिङ्गनं कुरु

satītvarūpasaujanyaguṇaratnasamudgike / ehi me tvadguṇotkasya punar āliṅganaṃ kuru

Sanskrit only: no published translation is held for this verse.

इत्य् उक्त्वा मृगशावाक्षीं चूडालां स शिखिध्वजः । आलिलिङ्ग पुनर् गाढं नकुलो नकुलीम् इव

ity uktvā mṛgaśāvākṣīṃ cūḍālāṃ sa śikhidhvajaḥ / āliliṅga punar gāḍhaṃ nakulo nakulīm iva

Sanskrit only: no published translation is held for this verse.

देव शुष्कक्रियाजालपरे त्वय्य् आकुलात्मनि । तथाभूवं भृशम् अहं त्वदर्थं दुःखिता किल

deva śuṣkakriyājālapare tvayy ākulātmani / tathābhūvaṃ bhṛśam ahaṃ tvadarthaṃ duḥkhitā kila

Sanskrit only: no published translation is held for this verse.

तेन त्वदवबोधात्मा स्वार्थ एवोपपादितः । मया तद् अत्र किं देवः करोति मयि शंसनम्

tena tvadavabodhātmā svārtha evopapāditaḥ / mayā tad atra kiṃ devaḥ karoti mayi śaṃsanam

Sanskrit only: no published translation is held for this verse.

त्वया यथा वरारोहे स्वार्थस् सम्पादितश् शुभः । तथेदानीं सतां सर्वास् साधयन्तु कुलस्त्रियः

tvayā yathā varārohe svārthas sampāditaś śubhaḥ / tathedānīṃ satāṃ sarvās sādhayantu kulastriyaḥ

Sanskrit only: no published translation is held for this verse.

बुद्ध्यंशैकान्तविश्रान्तजगज्जालक देव हे । अद्य तं प्राक्तनं कच्चिन् मोहं समनुपश्यसि

buddhyaṃśaikāntaviśrāntajagajjālaka deva he / adya taṃ prāktanaṃ kaccin mohaṃ samanupaśyasi

Sanskrit only: no published translation is held for this verse.

इदं करोमि नेदं तु प्राप्नोमीदम् इतस् त्व् इति । अन्तर् हससि तां कच्चिद् आशापेलवतां धियः

idaṃ karomi nedaṃ tu prāpnomīdam itas tv iti / antar hasasi tāṃ kaccid āśāpelavatāṃ dhiyaḥ

Sanskrit only: no published translation is held for this verse.

तास् तुच्छतृष्णाकलनास् तास् सङ्कल्पकुकल्पनाः । त्वयि नाद्यावलोक्यन्ते देव व्योम्नीव पर्वताः

tās tucchatṛṣṇākalanās tās saṅkalpakukalpanāḥ / tvayi nādyāvalokyante deva vyomnīva parvatāḥ

Sanskrit only: no published translation is held for this verse.

कस् त्वम् अद्याङ्गसम्पन्नः किंनिष्ठो ऽसि किम् ईहसे । कथं पश्यसि पाश्चात्यं देहावस्थाक्रमं प्रभो

kas tvam adyāṅgasampannaḥ kiṃniṣṭho 'si kim īhase / kathaṃ paśyasi pāścātyaṃ dehāvasthākramaṃ prabho

Sanskrit only: no published translation is held for this verse.

सुमनःपूर्णनीलाब्जमालासारविलोकने । यस्य त्वम् एव तज्ज्ञासि तद् एवाहम् उपस्थितः

sumanaḥpūrṇanīlābjamālāsāravilokane / yasya tvam eva tajjñāsi tad evāham upasthitaḥ

Sanskrit only: no published translation is held for this verse.

निरीहो ऽस्मि निरंशो ऽस्मि नभस्स्वच्छो ऽस्मि निस्स्पृहः । शान्ताहमर्थरूपो ऽस्मि चिरायाहम् अहं स्थितः

nirīho 'smi niraṃśo 'smi nabhassvaccho 'smi nisspṛhaḥ / śāntāhamartharūpo 'smi cirāyāham ahaṃ sthitaḥ

Sanskrit only: no published translation is held for this verse.

तां दशाम् उपयातो ऽस्मि यतश् चण्पकवर्णिनि । प्रतिभान्ति महान्तो ऽपि शोच्या हरिजिनादयः

tāṃ daśām upayāto 'smi yataś caṇpakavarṇini / pratibhānti mahānto 'pi śocyā harijinādayaḥ

Sanskrit only: no published translation is held for this verse.

नकिञ्चिन्मात्रचिन्मात्रनिष्ठो ऽस्मि स्वस्थ आस्थितः । भ्रमेणालं विमुक्तो ऽस्मि संसारेणालिलोचने

nakiñcinmātracinmātraniṣṭho 'smi svastha āsthitaḥ / bhrameṇālaṃ vimukto 'smi saṃsāreṇālilocane

Sanskrit only: no published translation is held for this verse.

न तुष्टो ऽस्मि न खिन्नो ऽस्मि नायम् अस्मि न चेतरत् । न स्थूलो ऽस्मि न सूक्ष्मो ऽस्मि सर्वम् अस्मि च सुन्दरि

na tuṣṭo 'smi na khinno 'smi nāyam asmi na cetarat / na sthūlo 'smi na sūkṣmo 'smi sarvam asmi ca sundari

Sanskrit only: no published translation is held for this verse.

तेजोबिम्बात् प्रयातेन भित्ताव् अपतितेन च । क्षयातिशयमुक्तेन प्रकाशेनास्मि वै समः

tejobimbāt prayātena bhittāv apatitena ca / kṣayātiśayamuktena prakāśenāsmi vai samaḥ

Sanskrit only: no published translation is held for this verse.

शान्तो ऽस्मि साम्यम् एवास्मि स्वच्छो ऽस्मि विगतामयः । परिनिर्वाण एवास्मि सद् अस्म्य् अतिसतीव्रते

śānto 'smi sāmyam evāsmi svaccho 'smi vigatāmayaḥ / parinirvāṇa evāsmi sad asmy atisatīvrate

Sanskrit only: no published translation is held for this verse.

यत् तद् अस्ति तद् एवास्मि वक्तुं शक्नोमि नेतरत् । तरङ्गतरलापाङ्गे गुरुस् त्वं मे नमो ऽस्तु ते

yat tad asti tad evāsmi vaktuṃ śaknomi netarat / taraṅgataralāpāṅge gurus tvaṃ me namo 'stu te

Sanskrit only: no published translation is held for this verse.

प्रसादेन विशालाक्ष्यास् तीर्णो ऽस्मि भवसागरात् । पुनर् मलं न गृह्णामि शतध्मातसुवर्णवत्

prasādena viśālākṣyās tīrṇo 'smi bhavasāgarāt / punar malaṃ na gṛhṇāmi śatadhmātasuvarṇavat

Sanskrit only: no published translation is held for this verse.

स्वस्थश् शान्तो मृदुर् दान्तो वीतरागो निरंशधीः । सर्वातीतस् सर्वगश् च खम् इवायम् अहं स्थितः

svasthaś śānto mṛdur dānto vītarāgo niraṃśadhīḥ / sarvātītas sarvagaś ca kham ivāyam ahaṃ sthitaḥ

Sanskrit only: no published translation is held for this verse.

एवं स्थिते महासत्त्व प्राणेश हृदयप्रिय । किम् इदानीं प्रभो ब्रूहि रोचते ते महामते

evaṃ sthite mahāsattva prāṇeśa hṛdayapriya / kim idānīṃ prabho brūhi rocate te mahāmate

Sanskrit only: no published translation is held for this verse.

प्रतिषेधं न जानामि न जानाम्य् अभिवाञ्छनम् । यद् आचरसि तन्वि त्वं कदाचिद् वेद्मि तन् न वा

pratiṣedhaṃ na jānāmi na jānāmy abhivāñchanam / yad ācarasi tanvi tvaṃ kadācid vedmi tan na vā

Sanskrit only: no published translation is held for this verse.

मन्मनो नाशकलनां तथा स्थितिकलां प्रिये । न काञ्चिद् अनुसन्धातुं जानात्य् अम्बरसुव्रतम्

manmano nāśakalanāṃ tathā sthitikalāṃ priye / na kāñcid anusandhātuṃ jānāty ambarasuvratam

Sanskrit only: no published translation is held for this verse.

यद् एव किञ्चिज् जानासि तद् एव कुरु सुन्दरि । तद् एव धारयिष्यामि प्रतिबिम्बं यथा मणिः

yad eva kiñcij jānāsi tad eva kuru sundari / tad eva dhārayiṣyāmi pratibimbaṃ yathā maṇiḥ

Sanskrit only: no published translation is held for this verse.

चेतसा विगतेच्छेन यथाप्राप्तम् अनिन्दिते । न स्तौमि न च निन्दामि यद् इच्छसि तद् आचर

cetasā vigatecchena yathāprāptam anindite / na staumi na ca nindāmi yad icchasi tad ācara

Sanskrit only: no published translation is held for this verse.

यद्य् एवं तन् महाभाग समाकर्णय मन्मतम् । आकर्ण्य जीवन्मुक्तात्मंस् तद् एवाहर्तुम् अर्हसि

yady evaṃ tan mahābhāga samākarṇaya manmatam / ākarṇya jīvanmuktātmaṃs tad evāhartum arhasi

Sanskrit only: no published translation is held for this verse.

सर्वत्रैक्यावबोधेन मौर्ख्यक्षयभुवाधुना । निरिच्छास् तावद् आकाशविशदास् संस्थिता वयम्

sarvatraikyāvabodhena maurkhyakṣayabhuvādhunā / niricchās tāvad ākāśaviśadās saṃsthitā vayam

Sanskrit only: no published translation is held for this verse.

यादृग् एषणम् अस्माकम् तादृग् एतद् अनेषणम् । एषणानेषणे भेदश् चिन्मात्रोल्लसने हि कः

yādṛg eṣaṇam asmākam tādṛg etad aneṣaṇam / eṣaṇāneṣaṇe bhedaś cinmātrollasane hi kaḥ

Sanskrit only: no published translation is held for this verse.

तस्माद् आद्यन्तमध्येषु ये वयं पुरुषोत्तम । मौर्ख्यम् एव परित्यज्य त एवेमे स्थिता इह

tasmād ādyantamadhyeṣu ye vayaṃ puruṣottama / maurkhyam eva parityajya ta eveme sthitā iha

Sanskrit only: no published translation is held for this verse.

साम्प्रतं प्रकृतेनेमं कालं नीत्वा क्रमेण वै । विदेहतां प्रयास्यामः प्रभो कालेन केनचित्

sāmprataṃ prakṛtenemaṃ kālaṃ nītvā krameṇa vai / videhatāṃ prayāsyāmaḥ prabho kālena kenacit

Sanskrit only: no published translation is held for this verse.

वयम् आद्यन्तमध्येषु कीदृशास् तरले वद । मोहम् एकं परित्यज्य तिष्ठामः कथम् एव वा

vayam ādyantamadhyeṣu kīdṛśās tarale vada / moham ekaṃ parityajya tiṣṭhāmaḥ katham eva vā

Sanskrit only: no published translation is held for this verse.

वयम् आद्यन्तमध्येषु राजानो राजसत्तम । मोहम् एकं परित्यज्य तिष्ठामः पुनर् एव ते

vayam ādyantamadhyeṣu rājāno rājasattama / moham ekaṃ parityajya tiṣṭhāmaḥ punar eva te

Sanskrit only: no published translation is held for this verse.

स्व एव नगरे राजा भव त्वं स्वासने स्थितः । ललामभूता कान्तानां महिषी ते भवाम्य् अहम्

sva eva nagare rājā bhava tvaṃ svāsane sthitaḥ / lalāmabhūtā kāntānāṃ mahiṣī te bhavāmy aham

Sanskrit only: no published translation is held for this verse.

सनृपा मत्तवास्तव्या नृत्यन्नववराङ्गना । सपताका ध्वनत्तूर्या पुष्पप्रकरिणी पुरी

sanṛpā mattavāstavyā nṛtyannavavarāṅganā / sapatākā dhvanattūryā puṣpaprakariṇī purī

Sanskrit only: no published translation is held for this verse.

लसद्वल्ल्या समञ्जर्या रणत्षट्पदया समा । मधुमासवनावल्या चिराद् भवतु नः प्रभो

lasadvallyā samañjaryā raṇatṣaṭpadayā samā / madhumāsavanāvalyā cirād bhavatu naḥ prabho

Sanskrit only: no published translation is held for this verse.

इति चूडालया प्रोक्ते विहस्य स शिखिध्वजः । प्रोवाच मधुरं वाक्यम् अक्षुब्धं विगतत्वरम्

iti cūḍālayā prokte vihasya sa śikhidhvajaḥ / provāca madhuraṃ vākyam akṣubdhaṃ vigatatvaram

Sanskrit only: no published translation is held for this verse.

एवं चेत् तद् विशालाक्षि स्वायत्ता नस् त्रिविष्टपे । सिद्धभोगभुवस् तासु निवसामो न किं प्रिये

evaṃ cet tad viśālākṣi svāyattā nas triviṣṭape / siddhabhogabhuvas tāsu nivasāmo na kiṃ priye

Sanskrit only: no published translation is held for this verse.

न राजन् मम भोगेषु वाञ्छा न च विभूतिषु । स्वभावस्य वशाद् एव यथाप्राप्ते रमे नृप

na rājan mama bhogeṣu vāñchā na ca vibhūtiṣu / svabhāvasya vaśād eva yathāprāpte rame nṛpa

Sanskrit only: no published translation is held for this verse.

न सुखाय मम स्वर्गो न राज्यं नापि नाकिता । यथास्थितम् अविक्षुब्धं तिष्ठामि स्वस्थचेष्टिता

na sukhāya mama svargo na rājyaṃ nāpi nākitā / yathāsthitam avikṣubdhaṃ tiṣṭhāmi svasthaceṣṭitā

Sanskrit only: no published translation is held for this verse.

इदं सुखम् इदं नेति मनने क्षयम् आगते । समम् एव पदे शान्ते तिष्ठामीह यथासुखम्

idaṃ sukham idaṃ neti manane kṣayam āgate / samam eva pade śānte tiṣṭhāmīha yathāsukham

Sanskrit only: no published translation is held for this verse.

युक्तम् उक्तं विशालाक्षि त्वयैतत् समया धिया । को वार्थः किल राज्यस्य ग्रहे त्यागे ऽपि वा भवेत्

yuktam uktaṃ viśālākṣi tvayaitat samayā dhiyā / ko vārthaḥ kila rājyasya grahe tyāge 'pi vā bhavet

Sanskrit only: no published translation is held for this verse.

सुखदुःखदशाचिन्तां त्यक्त्वा विगतमत्सरम् । यथासंस्थानम् एवेमौ तिष्ठावस् स्वस्थतां गतौ

sukhaduḥkhadaśācintāṃ tyaktvā vigatamatsaram / yathāsaṃsthānam evemau tiṣṭhāvas svasthatāṃ gatau

Sanskrit only: no published translation is held for this verse.

इति तत्र कथालापकथनेन तयोर् द्वयोः । कान्तयोश् चिरदम्पत्योर् वासरस् तनुतां ययौ

iti tatra kathālāpakathanena tayor dvayoḥ / kāntayoś ciradampatyor vāsaras tanutāṃ yayau

Sanskrit only: no published translation is held for this verse.

अथोत्थाय दिनाचारं यथाप्राप्तम् अनिन्दितौ । सोत्कण्ठाव् अप्य् अनुत्कण्ठौ चक्रतुः कार्यकोविदौ । स्वर्गसिद्धिम् अनादृत्य तस्थतुः पूर्णचेतसौ

athotthāya dinācāraṃ yathāprāptam aninditau / sotkaṇṭhāv apy anutkaṇṭhau cakratuḥ kāryakovidau / svargasiddhim anādṛtya tasthatuḥ pūrṇacetasau

Sanskrit only: no published translation is held for this verse.

एकस्मिन्न् एव शयने तैस् तैः प्रणयचेष्टितैः । सा व्यतीयाय रजनी तयोर् जीवद्विमुक्तयोः

ekasminn eva śayane tais taiḥ praṇayaceṣṭitaiḥ / sā vyatīyāya rajanī tayor jīvadvimuktayoḥ

Sanskrit only: no published translation is held for this verse.

तद् भोगमोक्षसुखम् उत्तमयोस् तयोस् स्वम् आचेततोः प्रणयवाक्यविलासगर्भम् । उत्कण्ठितं प्रणयिनोर् घनतां नयन्ती दीर्घा मुहूर्तवद् असौ रजनी जगाम

tad bhogamokṣasukham uttamayos tayos svam ācetatoḥ praṇayavākyavilāsagarbham / utkaṇṭhitaṃ praṇayinor ghanatāṃ nayantī dīrghā muhūrtavad asau rajanī jagāma

Sanskrit only: no published translation is held for this verse.