Moksopaya with Bhaskarakantha's Tika 6.114

ततस् समुदिते सूर्ये वितमस्य् अम्बरे स्थिते । समुद्गकाद् इव जगन्मणाव् अस्मिन् विनिर्गते

tatas samudite sūrye vitamasy ambare sthite / samudgakād iva jaganmaṇāv asmin vinirgate

Sanskrit only: no published translation is held for this verse.

विकसत्य् अरुणोपान्ते चक्षुषीवाम्बुजाकरे । आचारेष्व् इव लोकेषु प्रसृतेष्व् अर्करश्मिषु

vikasaty aruṇopānte cakṣuṣīvāmbujākare / ācāreṣv iva lokeṣu prasṛteṣv arkaraśmiṣu

Sanskrit only: no published translation is held for this verse.

दम्पती तौ समुत्थाय कृतसन्ध्याक्रमौ स्थितौ । पत्त्रासने मृदुस्निग्धे कान्तौ काञ्चनकन्दरे

dampatī tau samutthāya kṛtasandhyākramau sthitau / pattrāsane mṛdusnigdhe kāntau kāñcanakandare

Sanskrit only: no published translation is held for this verse.

अथोत्थायात्र चूडाला रत्नकुम्भं करस्थितम् । ॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥

athotthāyātra cūḍālā ratnakumbhaṃ karasthitam / .. .. .. .. .. .. .. .. .. .. .. .. .. .. .. ..

Sanskrit only: no published translation is held for this verse.

॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥ ॥ । भार्या भर्तारम् एकान्ते स्वराज्ये ऽभिषिषेच सा

.. .. .. .. .. .. .. .. .. .. .. .. .. .. .. .. / bhāryā bhartāram ekānte svarājye 'bhiṣiṣeca sā

Sanskrit only: no published translation is held for this verse.

सङ्कल्पोपनते सैंहे स्वभिषिक्तं सुविष्टरे । स्थितं प्रोवाच तन्वी सा चूडाला देवरूपिणी

saṅkalpopanate saiṃhe svabhiṣiktaṃ suviṣṭare / sthitaṃ provāca tanvī sā cūḍālā devarūpiṇī

Sanskrit only: no published translation is held for this verse.

केवलं मौनम् उत्सृज्य तेजश् शान्तम् इदं प्रभो । अष्टानां लोकपालानां तेजांस्य् आहर्तुम् अर्हसि

kevalaṃ maunam utsṛjya tejaś śāntam idaṃ prabho / aṣṭānāṃ lokapālānāṃ tejāṃsy āhartum arhasi

Sanskrit only: no published translation is held for this verse.

चूडालयेति स प्रोक्तो वने राजा शिखिध्वजः । वदन्न् एवं करोमीति महाराजत्वम् आययौ

cūḍālayeti sa prokto vane rājā śikhidhvajaḥ / vadann evaṃ karomīti mahārājatvam āyayau

Sanskrit only: no published translation is held for this verse.

अथ प्रतीहारपदे तिष्ठन्तीम् आह मानिनीम् । महादेवीपदे राज्ञि त्वां करोम्य् अभिषेकिनीम्

atha pratīhārapade tiṣṭhantīm āha māninīm / mahādevīpade rājñi tvāṃ karomy abhiṣekinīm

Sanskrit only: no published translation is held for this verse.

इत्य् उक्त्वासन आस्थाप्य महादेवीपदे तदा । अभिषिक्तां नृपः कृत्वा मेघवाग् आह तां प्रियाम्

ity uktvāsana āsthāpya mahādevīpade tadā / abhiṣiktāṃ nṛpaḥ kṛtvā meghavāg āha tāṃ priyām

Sanskrit only: no published translation is held for this verse.

प्रिये कमलपत्त्राक्षि क्षणात् सङ्कल्पसम्भवम् । महाविभवम् उद्दामं सैन्यम् आहर्तुम् अर्हसि

priye kamalapattrākṣi kṣaṇāt saṅkalpasambhavam / mahāvibhavam uddāmaṃ sainyam āhartum arhasi

Sanskrit only: no published translation is held for this verse.

इति कान्तवचश् श्रुत्वा चूडाला वरवर्णिनी । सैन्यं सङ्कल्पयाम् आस प्रावृड्घनम् इवोद्भटम्

iti kāntavacaś śrutvā cūḍālā varavarṇinī / sainyaṃ saṅkalpayām āsa prāvṛḍghanam ivodbhaṭam

Sanskrit only: no published translation is held for this verse.

सैन्यं ददृशतुस् तत् तौ वाजिवारणसङ्कुलम् । पताकापूरिताकाशनीरन्ध्रीकृतकाननम्

sainyaṃ dadṛśatus tat tau vājivāraṇasaṅkulam / patākāpūritākāśanīrandhrīkṛtakānanam

Sanskrit only: no published translation is held for this verse.

तूर्यारवध्वनच्छैलगुहं गहनकोटरम् । मत्तसामन्तवलितं विद्रवद्वनवारणम्

tūryāravadhvanacchailaguhaṃ gahanakoṭaram / mattasāmantavalitaṃ vidravadvanavāraṇam

Sanskrit only: no published translation is held for this verse.

उद्यन्नादमहासिंहविदारकरणोद्भटम् । वनेभमदनिष्ष्यन्दगन्धोद्गर्जज्जयद्विपम्

udyannādamahāsiṃhavidārakaraṇodbhaṭam / vanebhamadaniṣṣyandagandhodgarjajjayadvipam

Sanskrit only: no published translation is held for this verse.

विमानरथसङ्घट्टचक्रचीत्कारपीवरम् । मौलिरत्नघनोद्द्योतभग्नधूलितमःपटम्

vimānarathasaṅghaṭṭacakracītkārapīvaram / mauliratnaghanoddyotabhagnadhūlitamaḥpaṭam

Sanskrit only: no published translation is held for this verse.

तत्र गन्धद्विपवरे कृतपार्थिवमन्दिरे । रक्षिते दृप्तसामन्तैर् आरूढौ नृपदम्पती

tatra gandhadvipavare kṛtapārthivamandire / rakṣite dṛptasāmantair ārūḍhau nṛpadampatī

Sanskrit only: no published translation is held for this verse.

ततश् शिखिध्वजो राजा महिष्या समम् इष्टया । पदातिरथसम्बाधं कर्षन्न् अतिबलो बलम्

tataś śikhidhvajo rājā mahiṣyā samam iṣṭayā / padātirathasambādhaṃ karṣann atibalo balam

Sanskrit only: no published translation is held for this verse.

चचालाचलचालिन्या सेनया रभसेनया । भिनन्त्या तरसा शैलान् वात्ययेवाशु तोयदान्

cacālācalacālinyā senayā rabhasenayā / bhinantyā tarasā śailān vātyayevāśu toyadān

Sanskrit only: no published translation is held for this verse.

तस्मान् महेन्द्रशैलेन्द्राच् चलितस् स महीपतिः । पथि पश्यन् गिरीन् देशान् नदीर् ग्रामान् सजङ्गलान्

tasmān mahendraśailendrāc calitas sa mahīpatiḥ / pathi paśyan girīn deśān nadīr grāmān sajaṅgalān

Sanskrit only: no published translation is held for this verse.

दर्शयंश् च प्रियायास् तम् आत्मवृत्तान्तसञ्चयम् । प्रापाल्पेनैव कालेन स्वां पुरीं स्वर्गशोभनाम्

darśayaṃś ca priyāyās tam ātmavṛttāntasañcayam / prāpālpenaiva kālena svāṃ purīṃ svargaśobhanām

Sanskrit only: no published translation is held for this verse.

तत्र ते तस्य सामन्तास् तदागमनम् आदृताः । विविदुर् जयशब्देन निर्जग्मुश् चोदिताशयाः

tatra te tasya sāmantās tadāgamanam ādṛtāḥ / vividur jayaśabdena nirjagmuś coditāśayāḥ

Sanskrit only: no published translation is held for this verse.

एकतां सम्प्रयातेन तारतूर्यनिनादिना । बलद्वयेन तेनासौ विवेश नगरं नृपः

ekatāṃ samprayātena tāratūryaninādinā / baladvayena tenāsau viveśa nagaraṃ nṛpaḥ

Sanskrit only: no published translation is held for this verse.

लाजपुष्पाञ्जलिव्रातैर् आवृष्टः पौरयोषिताम् । वणिङ्मार्गगतो ऽपश्यत् पुरं परमभूषितम्

lājapuṣpāñjalivrātair āvṛṣṭaḥ paurayoṣitām / vaṇiṅmārgagato 'paśyat puraṃ paramabhūṣitam

Sanskrit only: no published translation is held for this verse.

पताकाध्वजसम्बाधं मुक्ताजालमनोरमम् । नृत्तगीतपरस्त्रीकं स्वर्गं भूमाव् इव च्युतम्

patākādhvajasambādhaṃ muktājālamanoramam / nṛttagītaparastrīkaṃ svargaṃ bhūmāv iva cyutam

Sanskrit only: no published translation is held for this verse.

प्रविश्याथ गृहं तैस् तैस् संयुतं नृपमङ्गलैः । सम्यक् सम्मानयाम् आस प्रणतं प्रकृतिव्रजम्

praviśyātha gṛhaṃ tais tais saṃyutaṃ nṛpamaṅgalaiḥ / samyak sammānayām āsa praṇataṃ prakṛtivrajam

Sanskrit only: no published translation is held for this verse.

पुरोत्सवं भृशं कृत्वा दिनसप्तकम् उत्तमम् । अकरोद् राजकार्याणि मानितान्तःपुरो नृपः

purotsavaṃ bhṛśaṃ kṛtvā dinasaptakam uttamam / akarod rājakāryāṇi mānitāntaḥpuro nṛpaḥ

Sanskrit only: no published translation is held for this verse.

दशवर्षसहस्राणि राज्यं कृत्वा महीतले । सह चूडालया राजा विरतो देहधारणात्

daśavarṣasahasrāṇi rājyaṃ kṛtvā mahītale / saha cūḍālayā rājā virato dehadhāraṇāt

Sanskrit only: no published translation is held for this verse.

देहम् उत्सृज्य निर्वाणम् अस्नेह इव दीपकः । अपुनर्जन्मने राम जगामेति महामतिः

deham utsṛjya nirvāṇam asneha iva dīpakaḥ / apunarjanmane rāma jagāmeti mahāmatiḥ

Sanskrit only: no published translation is held for this verse.

दशवर्षसहस्राणि समदृष्टितया तया । राज्यं तथानुशिष्यासौ निर्वाणपदम् आप्तवान्

daśavarṣasahasrāṇi samadṛṣṭitayā tayā / rājyaṃ tathānuśiṣyāsau nirvāṇapadam āptavān

Sanskrit only: no published translation is held for this verse.

विगतभयविषादो मानमात्सर्यमुक्तः प्रकृतसहजकर्मा सक्तनीरागबुद्धिः । इति स सुसमदृष्टिर् मृत्युम् आर्यो ऽथ जित्वा दशशिशिरसहस्राण्य् एकराज्यं चकार

vigatabhayaviṣādo mānamātsaryamuktaḥ prakṛtasahajakarmā saktanīrāgabuddhiḥ / iti sa susamadṛṣṭir mṛtyum āryo 'tha jitvā daśaśiśirasahasrāṇy ekarājyaṃ cakāra

Sanskrit only: no published translation is held for this verse.

भुक्त्वा भोगान् अनन्तान् भुवि सकलमही पालचूडामणित्वे स्थित्वा वै दीर्घकालं परम् अमृतपदं प्राप्तवांस् तद् यथैषः । एवं रामागतं त्वं प्रकृतम् अनुसरन् कार्यजातं विशोकस् तिष्ठोत्तिष्ठ स्वयत्नात् प्रसभम् अनुभवन् भोगमोक्षाग्र्यलक्ष्मीम्

bhuktvā bhogān anantān bhuvi sakalamahī pālacūḍāmaṇitve sthitvā vai dīrghakālaṃ param amṛtapadaṃ prāptavāṃs tad yathaiṣaḥ / evaṃ rāmāgataṃ tvaṃ prakṛtam anusaran kāryajātaṃ viśokas tiṣṭhottiṣṭha svayatnāt prasabham anubhavan bhogamokṣāgryalakṣmīm

Sanskrit only: no published translation is held for this verse.