Moksopaya with Bhaskarakantha's Tika 6.12

इति निश्चयवन्तस् ते महान्तो विगतैनसः । सत्यासत्यपदे शान्ते समे सुखम् अवस्थिताः

iti niścayavantas te mahānto vigatainasaḥ / satyāsatyapade śānte same sukham avasthitāḥ

Sanskrit only: no published translation is held for this verse.

इति पूर्णधियो धीरास् समनीरागचेतसः । न निन्दन्ति न नन्दन्ति जीवितं मरणं तथा

iti pūrṇadhiyo dhīrās samanīrāgacetasaḥ / na nindanti na nandanti jīvitaṃ maraṇaṃ tathā

Sanskrit only: no published translation is held for this verse.

इत्य् अलङ्घ्यचमत्कारा नारायणभुजा इव । रेजुर् अस्खलिताकारा अपरा इव मेरवः

ity alaṅghyacamatkārā nārāyaṇabhujā iva / rejur askhalitākārā aparā iva meravaḥ

Sanskrit only: no published translation is held for this verse.

रेमिरे वनषण्डेषु द्वीपेषु नगरेषु च । देवोपवनमालासु स्वर्गेषु च सुरा इव

remire vanaṣaṇḍeṣu dvīpeṣu nagareṣu ca / devopavanamālāsu svargeṣu ca surā iva

Sanskrit only: no published translation is held for this verse.

भ्रेमुः कुसुमपूर्णासु दोलालीलाबिलासु च । विचित्रवनलेखासु मेरुशृङ्गशिलासु च

bhremuḥ kusumapūrṇāsu dolālīlābilāsu ca / vicitravanalekhāsu meruśṛṅgaśilāsu ca

Sanskrit only: no published translation is held for this verse.

चक्रुर् विजितशत्रूणि चामरच्छत्रवन्ति च । विचित्रार्थानि राज्यानि चित्राचारमयानि च

cakrur vijitaśatrūṇi cāmaracchatravanti ca / vicitrārthāni rājyāni citrācāramayāni ca

Sanskrit only: no published translation is held for this verse.

अनुजग्मुर् इमां सर्वां नानारसविचेष्टिताम् । श्रुतिस्मृत्युदितारम्भाम् इतिकर्तव्यताम् इह

anujagmur imāṃ sarvāṃ nānārasaviceṣṭitām / śrutismṛtyuditārambhām itikartavyatām iha

Sanskrit only: no published translation is held for this verse.

विलेसू रमणीयेषु ललनालास्यहारिषु । विहाराहाररम्येषु भोगाभोगेषु भूषिताः

vilesū ramaṇīyeṣu lalanālāsyahāriṣu / vihārāhāraramyeṣu bhogābhogeṣu bhūṣitāḥ

Sanskrit only: no published translation is held for this verse.

विचेरुश् चारुचूतासु मन्दारवलितासु च । अप्सरोगीतपूर्णासु नन्दनोद्यानभूमिषु

viceruś cārucūtāsu mandāravalitāsu ca / apsarogītapūrṇāsu nandanodyānabhūmiṣu

Sanskrit only: no published translation is held for this verse.

ऊषुर् आचारपूतेषु विश्रान्ताखिलजन्तुषु । यज्ञक्रियाकरालेषु गार्हस्थ्येषु यथाक्रमम्

ūṣur ācārapūteṣu viśrāntākhilajantuṣu / yajñakriyākarāleṣu gārhasthyeṣu yathākramam

Sanskrit only: no published translation is held for this verse.

तेरुर् हतगजेन्द्रासु भ्रान्तभूरिशरासु च । भेरीभाङ्कारभीमासु सङ्ग्रामार्णववीचिषु

terur hatagajendrāsu bhrāntabhūriśarāsu ca / bherībhāṅkārabhīmāsu saṅgrāmārṇavavīciṣu

Sanskrit only: no published translation is held for this verse.

तस्थुः पुरुषचिन्तासु हृतचित्तोद्धतासु च । संरम्भक्षोभरौद्रासु सर्वासु द्वन्द्वनीतिषु

tasthuḥ puruṣacintāsu hṛtacittoddhatāsu ca / saṃrambhakṣobharaudrāsu sarvāsu dvandvanītiṣu

Sanskrit only: no published translation is held for this verse.

मनस् तेषां तु नीरागम् अनुपाधि गतभ्रमम् । असक्तम् उत्तमं शान्तं परं सत्त्वपदं गतम्

manas teṣāṃ tu nīrāgam anupādhi gatabhramam / asaktam uttamaṃ śāntaṃ paraṃ sattvapadaṃ gatam

Sanskrit only: no published translation is held for this verse.

न ममज्ज क्वचिद् अपि सङ्कटेषु महत्सु च । मुहुर् अप्य् उपयातेषु कुलशैलस् सरस्स्व् इव

na mamajja kvacid api saṅkaṭeṣu mahatsu ca / muhur apy upayāteṣu kulaśailas sarassv iva

Sanskrit only: no published translation is held for this verse.

नोल्ललास विलासिन्या श्रिया परमकान्तया । परिपूर्णेन्दुलक्ष्म्येव जलराशी रघूद्वह

nollalāsa vilāsinyā śriyā paramakāntayā / paripūrṇendulakṣmyeva jalarāśī raghūdvaha

Sanskrit only: no published translation is held for this verse.

न मम्लौ दुःखशोषेण ग्रीष्मेणेव वनस्थलम् । जहर्ष च न भोगौघैर् अवश्यायैर् इवौषधिः

na mamlau duḥkhaśoṣeṇa grīṣmeṇeva vanasthalam / jaharṣa ca na bhogaughair avaśyāyair ivauṣadhiḥ

Sanskrit only: no published translation is held for this verse.

ते हि केवलम् अव्यग्राः कुर्वन्तः कार्यपञ्जरम् । इष्टानिष्टफलं राम नाभिलेषुर् न तत्यजुः

te hi kevalam avyagrāḥ kurvantaḥ kāryapañjaram / iṣṭāniṣṭaphalaṃ rāma nābhileṣur na tatyajuḥ

Sanskrit only: no published translation is held for this verse.

नोदगुः कार्यसम्पत्ताव् आक्रान्ता नास्तम् आययुः । जहृषुर् न सुखप्राप्तौ मम्लुर् नैव च सङ्कटे

nodaguḥ kāryasampattāv ākrāntā nāstam āyayuḥ / jahṛṣur na sukhaprāptau mamlur naiva ca saṅkaṭe

Sanskrit only: no published translation is held for this verse.

मुमुहुर् न विमोहेषु ममज्जुर् न विपत्क्रमे । शुशुचुर् न शुचा शोके रुरुदुर् न भवान् इव

mumuhur na vimoheṣu mamajjur na vipatkrame / śuśucur na śucā śoke rurudur na bhavān iva

Sanskrit only: no published translation is held for this verse.

प्रकृताचारसम्प्राप्तं कुर्वन्तः कर्म केवलम् । स्थिता विगतसंरम्भम् अपरा इव मेरवः

prakṛtācārasamprāptaṃ kurvantaḥ karma kevalam / sthitā vigatasaṃrambham aparā iva meravaḥ

Sanskrit only: no published translation is held for this verse.

तां त्वं दृष्टिम् अवष्टभ्य राघवाघविघातिनीम् । अनहङ्कृत्यलङ्कारो विहरेह यथासुखम्

tāṃ tvaṃ dṛṣṭim avaṣṭabhya rāghavāghavighātinīm / anahaṅkṛtyalaṅkāro vihareha yathāsukham

Sanskrit only: no published translation is held for this verse.

यथाभूताम् इमाम् एवं पश्यन् सर्गपरम्पराम् । मेरुस्थिरो ऽब्धिगम्भीरस् समास्स्व विगतभ्रमः

yathābhūtām imām evaṃ paśyan sargaparamparām / merusthiro 'bdhigambhīras samāssva vigatabhramaḥ

Sanskrit only: no published translation is held for this verse.

चिन्मात्रं सर्वम् एवेदम् इत्थम् आभासतां गतम् । नेह सत्यम् असत्यं वा क्वचिद् अप्य् अस्ति किञ्चन

cinmātraṃ sarvam evedam ittham ābhāsatāṃ gatam / neha satyam asatyaṃ vā kvacid apy asti kiñcana

Sanskrit only: no published translation is held for this verse.

महत्ताम् अलम् आलम्ब्य त्यक्त्वेदम् अवहेलया । असक्तबुद्धिस् सर्वत्र भव भव्य भवक्षयी

mahattām alam ālambya tyaktvedam avahelayā / asaktabuddhis sarvatra bhava bhavya bhavakṣayī

Sanskrit only: no published translation is held for this verse.

किं रोदिषि घनोद्वेगं मूढवच् चानुशोचसि । भ्रमस्य् उद्भ्रान्तचित्तं च सोम्यावर्ते तृणं यथा

kiṃ rodiṣi ghanodvegaṃ mūḍhavac cānuśocasi / bhramasy udbhrāntacittaṃ ca somyāvarte tṛṇaṃ yathā

Sanskrit only: no published translation is held for this verse.

अहो नु भगवन् नूनं सम्यग्रूपं विलक्षये । त्वत्प्रसादात् प्रबुद्धो ऽस्मि सूर्यासङ्गाद् इवाम्बुजम्

aho nu bhagavan nūnaṃ samyagrūpaṃ vilakṣaye / tvatprasādāt prabuddho 'smi sūryāsaṅgād ivāmbujam

Sanskrit only: no published translation is held for this verse.

भ्रान्तिर् अस्तङ्गता नूनं मिहिका शरदीव मे । संशान्ताखिलसन्देहः करिष्ये वचनं तव

bhrāntir astaṅgatā nūnaṃ mihikā śaradīva me / saṃśāntākhilasandehaḥ kariṣye vacanaṃ tava

Sanskrit only: no published translation is held for this verse.

व्यपगतमदमोहो मानमात्सर्यमुक्तश् चिरतरम् उदितात्मा शान्तशोकश् चिरेण । पुनर् असुखम् अगच्छन् स्वच्छयैकान्तबुद्ध्या वदसि यद् असि साधो तत् करिष्ये विशङ्कम्

vyapagatamadamoho mānamātsaryamuktaś cirataram uditātmā śāntaśokaś cireṇa / punar asukham agacchan svacchayaikāntabuddhyā vadasi yad asi sādho tat kariṣye viśaṅkam

Sanskrit only: no published translation is held for this verse.