Moksopaya with Bhaskarakantha's Tika 6.14

अस्ति तावद् अनन्तस्य खस्य क्वचिद् अयं किल । जगद्रूपः परिस्पन्दो मृगतृष्णा मराव् इव

asti tāvad anantasya khasya kvacid ayaṃ kila / jagadrūpaḥ parispando mṛgatṛṣṇā marāv iva

Sanskrit only: no published translation is held for this verse.

तत्र कारणतां यातो ब्रह्मा कमलसम्भवः । स्थितः पितामहत्वेन सृष्टभूतभरभ्रमः

tatra kāraṇatāṃ yāto brahmā kamalasambhavaḥ / sthitaḥ pitāmahatvena sṛṣṭabhūtabharabhramaḥ

Sanskrit only: no published translation is held for this verse.

तस्याहं मानसः पुत्रो वसिष्ठश् श्रेष्ठचेष्टितः । ऋक्षचक्रे ध्रुववृते निवसामि युगं प्रति

tasyāhaṃ mānasaḥ putro vasiṣṭhaś śreṣṭhaceṣṭitaḥ / ṛkṣacakre dhruvavṛte nivasāmi yugaṃ prati

Sanskrit only: no published translation is held for this verse.

सो ऽहं कदाचिद् आस्थाने स्वर्गे तिष्ठञ् शतक्रतोः । श्रुतवान् नारदादिभ्यः कथां सुचिरजीविनाम्

so 'haṃ kadācid āsthāne svarge tiṣṭhañ śatakratoḥ / śrutavān nāradādibhyaḥ kathāṃ sucirajīvinām

Sanskrit only: no published translation is held for this verse.

कथाप्रसङ्गे कस्मिंश्चिद् अथ तत्राभ्युवाच ह । शातातपो नाम मुनिर् मौनी मानी महामतिः

kathāprasaṅge kasmiṃścid atha tatrābhyuvāca ha / śātātapo nāma munir maunī mānī mahāmatiḥ

Sanskrit only: no published translation is held for this verse.

मेरोर् ईशानकोणस्थपद्मरागमये दिवि । अस्ति कल्पतरुश् श्रीमाञ् शृङ्गे चूड इति श्रुतः

meror īśānakoṇasthapadmarāgamaye divi / asti kalpataruś śrīmāñ śṛṅge cūḍa iti śrutaḥ

Sanskrit only: no published translation is held for this verse.

तस्य कल्पतरोर् मूर्ध्नि दक्षिणस्कन्धकोटरे । कलधौतलताप्रान्ते विद्यते विहगालयः

tasya kalpataror mūrdhni dakṣiṇaskandhakoṭare / kaladhautalatāprānte vidyate vihagālayaḥ

Sanskrit only: no published translation is held for this verse.

तस्मिन् निवसति श्रीमान् भुसुण्डो नाम वायसः । वीतरागो बृहत्कोशे ब्रह्मेव निजपङ्कजे

tasmin nivasati śrīmān bhusuṇḍo nāma vāyasaḥ / vītarāgo bṛhatkośe brahmeva nijapaṅkaje

Sanskrit only: no published translation is held for this verse.

स यथा जगतः कोशे जीवतीह सुराश् चिरम् । चिरजीवी तथा स्वर्गे न भूतो न भविष्यति

sa yathā jagataḥ kośe jīvatīha surāś ciram / cirajīvī tathā svarge na bhūto na bhaviṣyati

Sanskrit only: no published translation is held for this verse.

स दीर्घायुस् स नीरोगस् स श्रीमान् स महामतिः । स विश्रान्तमतिश् शान्तस् स कान्तः कालकोविदः

sa dīrghāyus sa nīrogas sa śrīmān sa mahāmatiḥ / sa viśrāntamatiś śāntas sa kāntaḥ kālakovidaḥ

Sanskrit only: no published translation is held for this verse.

स यथा जीवति खगस् तथेह यदि जीव्यते । तद् भवेज् जीवितं पुंसां दीर्घं चादेयम् एव च

sa yathā jīvati khagas tatheha yadi jīvyate / tad bhavej jīvitaṃ puṃsāṃ dīrghaṃ cādeyam eva ca

Sanskrit only: no published translation is held for this verse.

इति तेन भुसुण्डो ऽसौ भूयःपृष्टेन वर्णितः । यथावद् एव देवानां सभायां सत्यमूर्तिना

iti tena bhusuṇḍo 'sau bhūyaḥpṛṣṭena varṇitaḥ / yathāvad eva devānāṃ sabhāyāṃ satyamūrtinā

Sanskrit only: no published translation is held for this verse.

कथावसरसंशान्ताव् अथ याते सुरव्रजे । भुसुण्डविहगं द्रष्टुम् अहं यातः कुतूहलात्

kathāvasarasaṃśāntāv atha yāte suravraje / bhusuṇḍavihagaṃ draṣṭum ahaṃ yātaḥ kutūhalāt

Sanskrit only: no published translation is held for this verse.

भुसुण्डस् संस्थितो यत्र मेरोश् शृङ्गं तद् उन्नतम् । सम्प्राप्तवान् क्षणेनाहं पद्मरागमयं बृहत्

bhusuṇḍas saṃsthito yatra meroś śṛṅgaṃ tad unnatam / samprāptavān kṣaṇenāhaṃ padmarāgamayaṃ bṛhat

Sanskrit only: no published translation is held for this verse.

द्रुतगैरिककान्तेन तेजसा वह्निवर्चसा । मध्वासवरसेनेव रञ्जयन् ककुभां गणम्

drutagairikakāntena tejasā vahnivarcasā / madhvāsavaraseneva rañjayan kakubhāṃ gaṇam

Sanskrit only: no published translation is held for this verse.

कल्पान्तज्वलनज्वालापिण्डाद्रिम् इव सञ्चितम् । इन्द्रनीलशिलाधूमम् आलोकारुणिताम्बरम्

kalpāntajvalanajvālāpiṇḍādrim iva sañcitam / indranīlaśilādhūmam ālokāruṇitāmbaram

Sanskrit only: no published translation is held for this verse.

सर्वेषाम् एव रागाणां राशिम् अद्राव् इव स्थितम् । सर्वसन्ध्याभ्रजालानां घनम् एकम् इवाकरम्

sarveṣām eva rāgāṇāṃ rāśim adrāv iva sthitam / sarvasandhyābhrajālānāṃ ghanam ekam ivākaram

Sanskrit only: no published translation is held for this verse.

उत्क्रान्तिं कुर्वतो मेरोर् ब्रह्मनाड्येव निर्गतम् । मूर्धानम् आगतं कान्तं वाडवं जठरानलम्

utkrāntiṃ kurvato meror brahmanāḍyeva nirgatam / mūrdhānam āgataṃ kāntaṃ vāḍavaṃ jaṭharānalam

Sanskrit only: no published translation is held for this verse.

सुमेरुवनदेव्येव नवालक्तकरञ्जितम् । लीलयादातुम् इन्दुं खे नीतं हस्तं शिखाङ्गुलिम्

sumeruvanadevyeva navālaktakarañjitam / līlayādātum induṃ khe nītaṃ hastaṃ śikhāṅgulim

Sanskrit only: no published translation is held for this verse.

ज्वालाभिर् इव मालाभिर् अरुणाभिः पयोमुचाम् । खं गन्तुम् इव सस्पन्दं शैलस्थम् इव वाडवम्

jvālābhir iva mālābhir aruṇābhiḥ payomucām / khaṃ gantum iva saspandaṃ śailastham iva vāḍavam

Sanskrit only: no published translation is held for this verse.

तारास् स्प्रष्टुम् इवाकाशम् अङ्गुलीभिर् इवाश्रिभिः । कचदंशुनखाग्राभिः परिचुम्बद् इवोन्नतम्

tārās spraṣṭum ivākāśam aṅgulībhir ivāśribhiḥ / kacadaṃśunakhāgrābhiḥ paricumbad ivonnatam

Sanskrit only: no published translation is held for this verse.

कचद्रत्नशिलाश्वभ्रं भास्वत्कनककन्दरम् । सरत्कुसुमरेण्वभ्रं भ्रमद्विद्याधरामरम्

kacadratnaśilāśvabhraṃ bhāsvatkanakakandaram / saratkusumareṇvabhraṃ bhramadvidyādharāmaram

Sanskrit only: no published translation is held for this verse.

क्वणद्वंशलसद्वातं नृत्यद्रत्नलताङ्गनम् । गर्जज्जीमूतमुरजं भूभृतो नाट्यमण्डपम्

kvaṇadvaṃśalasadvātaṃ nṛtyadratnalatāṅganam / garjajjīmūtamurajaṃ bhūbhṛto nāṭyamaṇḍapam

Sanskrit only: no published translation is held for this verse.

हसत्कुसुमगुच्छाढ्यं ध्वनत्षट्पदपेटकम् । दन्ततालं दलावल्या परिहासाद् इव स्फुटम्

hasatkusumagucchāḍhyaṃ dhvanatṣaṭpadapeṭakam / dantatālaṃ dalāvalyā parihāsād iva sphuṭam

Sanskrit only: no published translation is held for this verse.

दोलालोलाप्सरोवृन्दम् उद्दाममदमन्मथम् । शिलाविश्रान्तविबुधं मिथुनाश्रितकन्दरम्

dolālolāpsarovṛndam uddāmamadamanmatham / śilāviśrāntavibudhaṃ mithunāśritakandaram

Sanskrit only: no published translation is held for this verse.

वराम्बराजिनं शुभ्रं गङ्गायज्ञोपवीति च । तापसं पिङ्गलम् इव वेणुदण्डधरं स्थितम्

varāmbarājinaṃ śubhraṃ gaṅgāyajñopavīti ca / tāpasaṃ piṅgalam iva veṇudaṇḍadharaṃ sthitam

Sanskrit only: no published translation is held for this verse.

गङ्गानिर्झरनिर्ह्रादि लतागृहगतामरम् । गन्धर्वगीतसुभगम् आमोदिमधुरानिलम्

gaṅgānirjharanirhrādi latāgṛhagatāmaram / gandharvagītasubhagam āmodimadhurānilam

Sanskrit only: no published translation is held for this verse.

फुल्लहेमाम्बुजोत्तंसं तारारत्नविभूषितम् । व्योम्नः पारम् इव प्राप्तं पिङ्गलं मैरवं शिरः

phullahemāmbujottaṃsaṃ tārāratnavibhūṣitam / vyomnaḥ pāram iva prāptaṃ piṅgalaṃ mairavaṃ śiraḥ

Sanskrit only: no published translation is held for this verse.

सितहरितपीतपाटलधवलैर् मणिकुसुमराशिनवरङ्गैः । विधिविहितामलचित्रं लीलाचलम् अमरयुवतिलोकस्य

sitaharitapītapāṭaladhavalair maṇikusumarāśinavaraṅgaiḥ / vidhivihitāmalacitraṃ līlācalam amarayuvatilokasya

Sanskrit only: no published translation is held for this verse.