Moksopaya with Bhaskarakantha's Tika 6.18

अस्त्य् अस्मिञ् जगति ज्येष्ठस् सर्वनाकनिवासिनाम् । देवदेवो हरो नाम देवदेवाभिपूजितः

asty asmiñ jagati jyeṣṭhas sarvanākanivāsinām / devadevo haro nāma devadevābhipūjitaḥ

Sanskrit only: no published translation is held for this verse.

षट्पदश्रेणिनयना यस्योच्चस्तबकस्तनी । विलासिनी शरीरार्धे लता चूततरोर् इव

ṣaṭpadaśreṇinayanā yasyoccastabakastanī / vilāsinī śarīrārdhe latā cūtataror iva

Sanskrit only: no published translation is held for this verse.

हिमहारसिता यस्य लहरीस्तबकोम्भिता । आवेष्टितजटाजूटा गङ्गा कुसुममालिका

himahārasitā yasya laharīstabakombhitā / āveṣṭitajaṭājūṭā gaṅgā kusumamālikā

Sanskrit only: no published translation is held for this verse.

क्षीरसागरसम्भूतः प्रसृतामृतनिर्झरः । प्रतिबिम्बशशश् श्रीमान् यस्य चूडामणिश् शशी

kṣīrasāgarasambhūtaḥ prasṛtāmṛtanirjharaḥ / pratibimbaśaśaś śrīmān yasya cūḍāmaṇiś śaśī

Sanskrit only: no published translation is held for this verse.

अनारतशिरश्चन्द्रप्रस्रवेणामरीकृतः । यस्येन्द्रनीलवत् कालकूटः कण्ठस्य भूषणम्

anārataśiraścandraprasraveṇāmarīkṛtaḥ / yasyendranīlavat kālakūṭaḥ kaṇṭhasya bhūṣaṇam

Sanskrit only: no published translation is held for this verse.

धूलिलेखामहावर्तं स्वच्छं पावकसम्भवम् । परमाणुचयं भस्म यस्य स्नानजलं सितम्

dhūlilekhāmahāvartaṃ svacchaṃ pāvakasambhavam / paramāṇucayaṃ bhasma yasya snānajalaṃ sitam

Sanskrit only: no published translation is held for this verse.

निर्मलानि जितेन्दूनि घृष्टानि घटितानि च । यस्यास्थीन्य् एव रत्नानि देहे कान्तिमयानि च

nirmalāni jitendūni ghṛṣṭāni ghaṭitāni ca / yasyāsthīny eva ratnāni dehe kāntimayāni ca

Sanskrit only: no published translation is held for this verse.

दशाशादशम् अम्भोदनीलं शीतलपल्लवम् । तारकाबिन्दुशबलं यस्य चाम्बरम् अम्बरम्

daśāśādaśam ambhodanīlaṃ śītalapallavam / tārakābinduśabalaṃ yasya cāmbaram ambaram

Sanskrit only: no published translation is held for this verse.

भ्रमच्छिवाङ्गनं पक्वमहामांसौदनाकुलम् । बहुभूतेर् गृहं यस्य श्मशानं हिमपाण्डुरम्

bhramacchivāṅganaṃ pakvamahāmāṃsaudanākulam / bahubhūter gṛhaṃ yasya śmaśānaṃ himapāṇḍuram

Sanskrit only: no published translation is held for this verse.

कपालमालाभरणाः पीतरक्तरसासवाः । अन्त्रस्रग्दामवलिता बन्धवो यस्य मातरः

kapālamālābharaṇāḥ pītaraktarasāsavāḥ / antrasragdāmavalitā bandhavo yasya mātaraḥ

Sanskrit only: no published translation is held for this verse.

प्रस्फुरन्मूर्धमणयश् चोपन्तो मसृणाङ्गकाः । भुजगा वलया यस्य प्रकचत्कनकत्विषः

prasphuranmūrdhamaṇayaś copanto masṛṇāṅgakāḥ / bhujagā valayā yasya prakacatkanakatviṣaḥ

Sanskrit only: no published translation is held for this verse.

दृक्पातप्लुष्टशैलेन्द्रं जगत्कवलनालसम् । भैरवाचरितं यस्य लीलासन्त्रासितामरम्

dṛkpātapluṣṭaśailendraṃ jagatkavalanālasam / bhairavācaritaṃ yasya līlāsantrāsitāmaram

Sanskrit only: no published translation is held for this verse.

स्वस्थीकृतजगज्जीवस् स्वव्यापारस्थचेतसः । यदृच्छया करस्पन्दो यस्यासुरपुरक्षयः

svasthīkṛtajagajjīvas svavyāpārasthacetasaḥ / yadṛcchayā karaspando yasyāsurapurakṣayaḥ

Sanskrit only: no published translation is held for this verse.

एकाग्रमूर्तयस् स्नेहरागद्वेषविवर्जिताः । स्वजना यस्य ते शैलास् सरसा अपि नीरसाः

ekāgramūrtayas sneharāgadveṣavivarjitāḥ / svajanā yasya te śailās sarasā api nīrasāḥ

Sanskrit only: no published translation is held for this verse.

शिरःखुराः खुरकराः करदन्ता भुजोदराः । ऋक्षोष्ट्राजाहिवक्त्राश् च प्रमथा यस्य लालकाः

śiraḥkhurāḥ khurakarāḥ karadantā bhujodarāḥ / ṛkṣoṣṭrājāhivaktrāś ca pramathā yasya lālakāḥ

Sanskrit only: no published translation is held for this verse.

यस्य नेत्रत्रयोद्भासिवदनस्यामरप्रभोः । यथा गणास् तथैवान्यः परिवारो हि मातरः

yasya netratrayodbhāsivadanasyāmaraprabhoḥ / yathā gaṇās tathaivānyaḥ parivāro hi mātaraḥ

Sanskrit only: no published translation is held for this verse.

नृत्यन्ति मातरस् तस्य पुरो भूतगणानताः । चतुर्दशविधानन्तभूतजातैकभोजनाः

nṛtyanti mātaras tasya puro bhūtagaṇānatāḥ / caturdaśavidhānantabhūtajātaikabhojanāḥ

Sanskrit only: no published translation is held for this verse.

खरोष्ट्रकाकवदना रक्तमेदोवसासवाः । दिगम्बरा विहारिण्यश् शरीरावयवस्रजः

kharoṣṭrakākavadanā raktamedovasāsavāḥ / digambarā vihāriṇyaś śarīrāvayavasrajaḥ

Sanskrit only: no published translation is held for this verse.

वसन्ति गिरिकूटेषु व्योम्नि लोकान्तरेषु च । अटवीषु श्मशानेषु शरीरेषु च देहिनाम्

vasanti girikūṭeṣu vyomni lokāntareṣu ca / aṭavīṣu śmaśāneṣu śarīreṣu ca dehinām

Sanskrit only: no published translation is held for this verse.

जया च विजया चैव जयन्ती चापराजिता । वामस्रोतोगता एतास् तुम्बुरुं रुद्रम् आश्रिताः

jayā ca vijayā caiva jayantī cāparājitā / vāmasrotogatā etās tumburuṃ rudram āśritāḥ

Sanskrit only: no published translation is held for this verse.

सिद्धा शुष्का च रक्ता च उत्पला चेति देवताः । स्रोतो दक्षिणम् आश्रित्य भैरवं रुद्रम् आश्रिताः

siddhā śuṣkā ca raktā ca utpalā ceti devatāḥ / sroto dakṣiṇam āśritya bhairavaṃ rudram āśritāḥ

Sanskrit only: no published translation is held for this verse.

सर्वासाम् एव मातॄणाम् अष्टाव् एतास् तु नायिकाः । आसाम् अनुगतास् त्व् अन्या देव्यश् शतसहस्रशः

sarvāsām eva mātṝṇām aṣṭāv etās tu nāyikāḥ / āsām anugatās tv anyā devyaś śatasahasraśaḥ

Sanskrit only: no published translation is held for this verse.

रौद्री च वैष्णवी ब्राह्मी वाराही वायवी तथा । कौमारी वासवी सौरी चेत्याद्यास् तास् सहस्रशः

raudrī ca vaiṣṇavī brāhmī vārāhī vāyavī tathā / kaumārī vāsavī saurī cetyādyās tās sahasraśaḥ

Sanskrit only: no published translation is held for this verse.

आसाम् अनुगतास् त्व् अन्या देव्यः खेचर्य उत्तमाः । देवकिन्नरगन्धर्वपुरुषासुरसम्भवाः

āsām anugatās tv anyā devyaḥ khecarya uttamāḥ / devakinnaragandharvapuruṣāsurasambhavāḥ

Sanskrit only: no published translation is held for this verse.

तासाम् अनुगतास् त्व् अन्या भूचर्यः कोटिशस् स्थिताः । रूपिकानामधारिण्यो भूमौ पुरुषभोजनाः

tāsām anugatās tv anyā bhūcaryaḥ koṭiśas sthitāḥ / rūpikānāmadhāriṇyo bhūmau puruṣabhojanāḥ

Sanskrit only: no published translation is held for this verse.

हया गजाः खराः काका उष्ट्राजगरमर्कटाः । इत्यादिवाहनान्य् आसां चरन्तीनां जगत्त्रये

hayā gajāḥ kharāḥ kākā uṣṭrājagaramarkaṭāḥ / ityādivāhanāny āsāṃ carantīnāṃ jagattraye

Sanskrit only: no published translation is held for this verse.

ताः काश्चित् पशुधर्मिण्यः क्षुद्रकर्मस्व् अवस्थिताः । काश्चिद् विदितवेद्यत्वाज् जीवन्मुक्तपदे स्थिताः

tāḥ kāścit paśudharmiṇyaḥ kṣudrakarmasv avasthitāḥ / kāścid viditavedyatvāj jīvanmuktapade sthitāḥ

Sanskrit only: no published translation is held for this verse.

तासां मध्ये महार्हाणां मातॄणां मुनिनायक । अलम्बुसेति विख्याता माता मानद विद्यते

tāsāṃ madhye mahārhāṇāṃ mātṝṇāṃ munināyaka / alambuseti vikhyātā mātā mānada vidyate

Sanskrit only: no published translation is held for this verse.

वज्राश्रितुण्डश् चण्डाख्य इन्द्रनीलाचलोपमः । तस्यास् तु वाहनं काको वैष्णव्या गरुडो यथा

vajrāśrituṇḍaś caṇḍākhya indranīlācalopamaḥ / tasyās tu vāhanaṃ kāko vaiṣṇavyā garuḍo yathā

Sanskrit only: no published translation is held for this verse.

इत्य् अष्टैश्वर्ययुक्तास् ता मातरो रौद्रचेष्टिताः । व्योम्नि मेलापकं चक्रुर् एकदा समम् आगताः

ity aṣṭaiśvaryayuktās tā mātaro raudraceṣṭitāḥ / vyomni melāpakaṃ cakrur ekadā samam āgatāḥ

Sanskrit only: no published translation is held for this verse.

पूजयित्वा जगत्पूज्यौ देवौ तुम्बुरुभैरवौ । विचित्रार्थाः कथाश् चक्रू रुधिरासवतोषिताः

pūjayitvā jagatpūjyau devau tumburubhairavau / vicitrārthāḥ kathāś cakrū rudhirāsavatoṣitāḥ

Sanskrit only: no published translation is held for this verse.

अथेयम् आययौ तासां कथावसरतः कथा । अस्मान् उमापतिर् देवः किं पश्यत्य् अवहेलया

atheyam āyayau tāsāṃ kathāvasarataḥ kathā / asmān umāpatir devaḥ kiṃ paśyaty avahelayā

Sanskrit only: no published translation is held for this verse.

प्रभावं दर्शयामो ऽस्य पुनर् नास्मान् असौ यथा । दृष्टमात्रमहाशक्तिः करिष्यत्य् अवधीरणम्

prabhāvaṃ darśayāmo 'sya punar nāsmān asau yathā / dṛṣṭamātramahāśaktiḥ kariṣyaty avadhīraṇam

Sanskrit only: no published translation is held for this verse.

इति निश्चित्य ता देव्यो विवर्णवदनाङ्गिकाम् । उमाम् एव वशीकृत्य प्रोक्षयाम् आसुर् आदृताः

iti niścitya tā devyo vivarṇavadanāṅgikām / umām eva vaśīkṛtya prokṣayām āsur ādṛtāḥ

Sanskrit only: no published translation is held for this verse.

माययापहृतां भर्तुर् अङ्गाद् भङ्गम् उपागताम् । ताम् आलोलकचां देव्यश् चक्रुर् ओदनतां गताम्

māyayāpahṛtāṃ bhartur aṅgād bhaṅgam upāgatām / tām ālolakacāṃ devyaś cakrur odanatāṃ gatām

Sanskrit only: no published translation is held for this verse.

पार्वतीप्रोक्षणदिने तस्मिंस् तत्र महोत्सवः । बभूव तासां सर्वासां नृत्तगेयमनोरमः

pārvatīprokṣaṇadine tasmiṃs tatra mahotsavaḥ / babhūva tāsāṃ sarvāsāṃ nṛttageyamanoramaḥ

Sanskrit only: no published translation is held for this verse.

अन्या ननृतुर् उद्दामरवम् एवाम्बराम्बराः । दीर्घावयवविक्षेपविकासिजघनोदराः

anyā nanṛtur uddāmaravam evāmbarāmbarāḥ / dīrghāvayavavikṣepavikāsijaghanodarāḥ

Sanskrit only: no published translation is held for this verse.

अन्या जहसुर् उद्दामतालक्ष्वेडाघनारवम् । लसदङ्गविकारं च ध्वनड्डमरुकाननाः

anyā jahasur uddāmatālakṣveḍāghanāravam / lasadaṅgavikāraṃ ca dhvanaḍḍamarukānanāḥ

Sanskrit only: no published translation is held for this verse.

अन्या जगुर् ध्वनच्छैलगुहम् आपानतोषिताः । तारारवं रणद्रन्ध्रजगन्मण्डपकोटरे

anyā jagur dhvanacchailaguham āpānatoṣitāḥ / tārāravaṃ raṇadrandhrajaganmaṇḍapakoṭare

Sanskrit only: no published translation is held for this verse.

अन्याः पानं पपुः पुष्टचर्वितार्द्रशिरःखुरम् । लीलाघुरघुरारावरणदाकाशकोटराः

anyāḥ pānaṃ papuḥ puṣṭacarvitārdraśiraḥkhuram / līlāghuraghurārāvaraṇadākāśakoṭarāḥ

Sanskrit only: no published translation is held for this verse.

पपुर् उदगुर् अथोच्चैस् तेरुर् आजग्मुर् ऊषुर् जहसुर् अपुर् अहौषुः पेतुर् उच्चैर् ववल्गुः । ननृतुर् अनिशम् आदुस् स्वादुमांसं च देव्यस् त्रिभुवनम् अपवृत्तं चक्रुर् उन्मत्तनृत्ताः

papur udagur athoccais terur ājagmur ūṣur jahasur apur ahauṣuḥ petur uccair vavalguḥ / nanṛtur aniśam ādus svādumāṃsaṃ ca devyas tribhuvanam apavṛttaṃ cakrur unmattanṛttāḥ

Sanskrit only: no published translation is held for this verse.