Moksopaya with Bhaskarakantha's Tika 6.20

सर्वरत्नगणाधारस् समस्तसुरसंश्रयः । अस्त्य् अमेयमहोत्सेधो मेरुर् नाम महीधरः

sarvaratnagaṇādhāras samastasurasaṃśrayaḥ / asty ameyamahotsedho merur nāma mahīdharaḥ

Sanskrit only: no published translation is held for this verse.

चलच्चन्द्रार्कदीपस्य भूतवृन्दकलत्रिणः । ब्रह्माण्डमण्डपस्यास्य स्तम्भः कनकनिर्मितः

calaccandrārkadīpasya bhūtavṛndakalatriṇaḥ / brahmāṇḍamaṇḍapasyāsya stambhaḥ kanakanirmitaḥ

Sanskrit only: no published translation is held for this verse.

सौवर्णश् चन्द्रवीटार्थं रत्नाढ्यश् शिखराङ्गुलिः । ध्वनद्द्वीपाब्धिवलयो भुवेवोन्नामितो भुजः

sauvarṇaś candravīṭārthaṃ ratnāḍhyaś śikharāṅguliḥ / dhvanaddvīpābdhivalayo bhuvevonnāmito bhujaḥ

Sanskrit only: no published translation is held for this verse.

वृतः कुलाद्रिसामन्तैर् जम्बुद्वीपासने स्थितः । राजा चन्द्रार्कनयने भ्रमयञ् शैलसंसदि

vṛtaḥ kulādrisāmantair jambudvīpāsane sthitaḥ / rājā candrārkanayane bhramayañ śailasaṃsadi

Sanskrit only: no published translation is held for this verse.

तारौघमालतीमाल्यो दिग्दशैकाम्बराम्बरः । नागद्वितयसंस्थात्मा नाकनायकभूषणम्

tāraughamālatīmālyo digdaśaikāmbarāmbaraḥ / nāgadvitayasaṃsthātmā nākanāyakabhūṣaṇam

Sanskrit only: no published translation is held for this verse.

दिगङ्गनाभिर् अभितो रम्याभिः पुरभूषणैः । पृषन्निष्ष्यन्दिभिश् शीतैर् वीजितो घनचामरैः

digaṅganābhir abhito ramyābhiḥ purabhūṣaṇaiḥ / pṛṣanniṣṣyandibhiś śītair vījito ghanacāmaraiḥ

Sanskrit only: no published translation is held for this verse.

षोडशास्य सहस्राणि योजनानाम् अधः क्षितेः । स्थिताः पादाः प्रपूज्यन्ते नानासुरमहोरगैः

ṣoḍaśāsya sahasrāṇi yojanānām adhaḥ kṣiteḥ / sthitāḥ pādāḥ prapūjyante nānāsuramahoragaiḥ

Sanskrit only: no published translation is held for this verse.

अशीतिस् तु सहस्राणि देहो ऽस्यार्केन्दुलोचनः । पूज्यते नाकसदनैस् सुरगन्धर्वकिन्नरैः

aśītis tu sahasrāṇi deho 'syārkendulocanaḥ / pūjyate nākasadanais suragandharvakinnaraiḥ

Sanskrit only: no published translation is held for this verse.

चतुर्दशविधान्य् एनं गृहस्थम् इव बन्धवः । उपजीवन्ति भूतानि मिथोऽदृष्टपुरास्पदम्

caturdaśavidhāny enaṃ gṛhastham iva bandhavaḥ / upajīvanti bhūtāni mitho'dṛṣṭapurāspadam

Sanskrit only: no published translation is held for this verse.

अस्य त्व् ईशानदिग्भागे पद्मरागमयं बृहत् । विद्यते शृङ्गम् अपरो दिवाकर इवोदितः

asya tv īśānadigbhāge padmarāgamayaṃ bṛhat / vidyate śṛṅgam aparo divākara ivoditaḥ

Sanskrit only: no published translation is held for this verse.

तस्यास्ति पृष्ठे भूतौघवृतः कल्पतरुर् महान् । जगतश् शिखरादर्शे प्रतिबिम्बम् इव स्थितः

tasyāsti pṛṣṭhe bhūtaughavṛtaḥ kalpatarur mahān / jagataś śikharādarśe pratibimbam iva sthitaḥ

Sanskrit only: no published translation is held for this verse.

तस्यास्ति दक्षिणस्कन्धे शाखा कनकपल्लवा । रत्नस्तबकनीरन्ध्रा चन्द्रबिम्बाभसत्फला

tasyāsti dakṣiṇaskandhe śākhā kanakapallavā / ratnastabakanīrandhrā candrabimbābhasatphalā

Sanskrit only: no published translation is held for this verse.

तत्र नीडं मया पूर्वं कृतम् आसीत् स्फुरन्मणि । देव्यां ध्याननिषण्णायां यस्मिन् किल रमे सुताः

tatra nīḍaṃ mayā pūrvaṃ kṛtam āsīt sphuranmaṇi / devyāṃ dhyānaniṣaṇṇāyāṃ yasmin kila rame sutāḥ

Sanskrit only: no published translation is held for this verse.

रत्नपुष्पदलच्छन्नं रसायनफलान्वितम् । चिन्तामणिशलाकाभिर् विहितालिन्दसंस्थिति

ratnapuṣpadalacchannaṃ rasāyanaphalānvitam / cintāmaṇiśalākābhir vihitālindasaṃsthiti

Sanskrit only: no published translation is held for this verse.

बुद्धिपूर्वसमाचारैस् सम्पूर्णं काकपुत्रकैः । शीतलाभ्यन्तरं हृद्यं पूरितं कुसुमोत्करैः

buddhipūrvasamācārais sampūrṇaṃ kākaputrakaiḥ / śītalābhyantaraṃ hṛdyaṃ pūritaṃ kusumotkaraiḥ

Sanskrit only: no published translation is held for this verse.

तद् गच्छत सुता नीडं दुर्गं नाकसदाम् अपि । भोगं मोक्षं च तत्रस्था निर्विघ्नं समवाप्स्यथ

tad gacchata sutā nīḍaṃ durgaṃ nākasadām api / bhogaṃ mokṣaṃ ca tatrasthā nirvighnaṃ samavāpsyatha

Sanskrit only: no published translation is held for this verse.

इत्य् उक्त्वास्मान् पिता तत्र चुचुम्बाभ्यालिलिङ्ग च । ददौ देव्यै यद् आनीतम् अस्मभ्यं च तद् आमिषम्

ity uktvāsmān pitā tatra cucumbābhyāliliṅga ca / dadau devyai yad ānītam asmabhyaṃ ca tad āmiṣam

Sanskrit only: no published translation is held for this verse.

तद् भुक्त्वा चरणौ देव्याः पितुश् चैवाभिवन्द्य च । विन्ध्यकच्छाद् वयं तस्मात् स्थानाद् आलम्बुसात् प्लुताः

tad bhuktvā caraṇau devyāḥ pituś caivābhivandya ca / vindhyakacchād vayaṃ tasmāt sthānād ālambusāt plutāḥ

Sanskrit only: no published translation is held for this verse.

क्रमेणाकाशम् उल्लङ्घ्य निर्गत्याम्बुदकोटरैः । पवनस्कन्धम् आरुह्य वन्दितव्योमचारिणः

krameṇākāśam ullaṅghya nirgatyāmbudakoṭaraiḥ / pavanaskandham āruhya vanditavyomacāriṇaḥ

Sanskrit only: no published translation is held for this verse.

परिहृत्य दिनाधीशं लोकान्तरपुराद् गताः । स्वर्गम् उल्लङ्घ्य यातास् स्मो ब्रह्मलोकं मुनीश्वर

parihṛtya dinādhīśaṃ lokāntarapurād gatāḥ / svargam ullaṅghya yātās smo brahmalokaṃ munīśvara

Sanskrit only: no published translation is held for this verse.

प्रणामपूर्वं तत्रैतद् यथावस्तु पितुर् वचः । मात्रे च भगवत्यै च ब्राह्म्यै चाशु निवेद्य ह

praṇāmapūrvaṃ tatraitad yathāvastu pitur vacaḥ / mātre ca bhagavatyai ca brāhmyai cāśu nivedya ha

Sanskrit only: no published translation is held for this verse.

ताभ्यां सस्नेहम् आलिङ्ग्य गच्छथेत्य् आज्ञयैधिताः । वयं कृतनमस्कारा ब्रह्मलोकाद् विनिर्गताः

tābhyāṃ sasneham āliṅgya gacchathety ājñayaidhitāḥ / vayaṃ kṛtanamaskārā brahmalokād vinirgatāḥ

Sanskrit only: no published translation is held for this verse.

उल्लङ्घ्य लोकपालानां पुरीस् तपनभासुराः । आकाशगामिनो लोलाः पवनस्कन्धचारिणः

ullaṅghya lokapālānāṃ purīs tapanabhāsurāḥ / ākāśagāmino lolāḥ pavanaskandhacāriṇaḥ

Sanskrit only: no published translation is held for this verse.

इमं कल्पतरुं प्राप्य निजं नीडं प्रविश्य च । निरस्तबाधं तिष्ठामो मुने मौनम् अवस्थिताः

imaṃ kalpataruṃ prāpya nijaṃ nīḍaṃ praviśya ca / nirastabādhaṃ tiṣṭhāmo mune maunam avasthitāḥ

Sanskrit only: no published translation is held for this verse.

जाता यथा वयम् इमे स्थितिम् आगताश् च सम्प्राप्तबोधम् उपशान्तधियो यथा च । एतत् तद् उक्तम् अविखण्डम् अलं मया ते शेषेण मां समनुशाधि महानुभाव

jātā yathā vayam ime sthitim āgatāś ca samprāptabodham upaśāntadhiyo yathā ca / etat tad uktam avikhaṇḍam alaṃ mayā te śeṣeṇa māṃ samanuśādhi mahānubhāva

Sanskrit only: no published translation is held for this verse.