Moksopaya with Bhaskarakantha's Tika 6.21

आसीत् किञ्चित्पुराकल्पे जगद् यच् चिरविस्मृतम् । सन्निवेशेनामुनैव तद् यद् अद्यातिदूरगम्

āsīt kiñcitpurākalpe jagad yac ciravismṛtam / sanniveśenāmunaiva tad yad adyātidūragam

Sanskrit only: no published translation is held for this verse.

तद् एतद् वृत्तम् अभ्यासाद् वर्तमानेन वर्णितम् । मया मुनीन्द्र बोधाय प्राग्जगत्साम्यदर्शिना

tad etad vṛttam abhyāsād vartamānena varṇitam / mayā munīndra bodhāya prāgjagatsāmyadarśinā

Sanskrit only: no published translation is held for this verse.

अद्य मे फलितं पुण्यैश् चिरकालोपबृंहितैः । निर्विघ्नम् एवं पश्यामि यद् भवन्तं मुने ततः

adya me phalitaṃ puṇyaiś cirakālopabṛṃhitaiḥ / nirvighnam evaṃ paśyāmi yad bhavantaṃ mune tataḥ

Sanskrit only: no published translation is held for this verse.

इदं नीडम् इमाश् शाखा अयं चाहम् अयं द्रुमः । अद्य पावनतां प्राप्तान्य् एतानि तव दर्शनात्

idaṃ nīḍam imāś śākhā ayaṃ cāham ayaṃ drumaḥ / adya pāvanatāṃ prāptāny etāni tava darśanāt

Sanskrit only: no published translation is held for this verse.

इदम् अर्घ्यम् इदं पाद्यं गृहीत्वा विभवार्पितम् । नूनं पावनतां नीत्वा शेषेणादिश मां मुने

idam arghyam idaṃ pādyaṃ gṛhītvā vibhavārpitam / nūnaṃ pāvanatāṃ nītvā śeṣeṇādiśa māṃ mune

Sanskrit only: no published translation is held for this verse.

इत्य् उक्त्वार्घ्यं च पाद्यं च भूयो दत्तवति स्वयम् । भुसुण्डविहगे तस्मिन्न् इदं रामाहम् उक्तवान्

ity uktvārghyaṃ ca pādyaṃ ca bhūyo dattavati svayam / bhusuṇḍavihage tasminn idaṃ rāmāham uktavān

Sanskrit only: no published translation is held for this verse.

भ्रातरस् ते विहङ्गेश तादृक्सत्त्वा महाधियः । इह कस्मान् न दृश्यन्ते त्वम् एवैको हि दृश्यसे

bhrātaras te vihaṅgeśa tādṛksattvā mahādhiyaḥ / iha kasmān na dṛśyante tvam evaiko hi dṛśyase

Sanskrit only: no published translation is held for this verse.

तिष्ठताम् इह नः कालो महान् अतिगतो मुने । युगानां पङ्क्तयः क्षीणा दिवसानाम् इवानघ

tiṣṭhatām iha naḥ kālo mahān atigato mune / yugānāṃ paṅktayaḥ kṣīṇā divasānām ivānagha

Sanskrit only: no published translation is held for this verse.

एतावता च कालेन सर्व एव ममानुजाः । तनूस् तृणम् इव त्यक्त्वा शिवे परिणताः परे

etāvatā ca kālena sarva eva mamānujāḥ / tanūs tṛṇam iva tyaktvā śive pariṇatāḥ pare

Sanskrit only: no published translation is held for this verse.

दीर्घायुषो महान्तो ऽपि सन्तो ऽपि बलिनो ऽपि च । सर्व एव निगीर्यन्ते कालेनाकलितात्मना

dīrghāyuṣo mahānto 'pi santo 'pi balino 'pi ca / sarva eva nigīryante kālenākalitātmanā

Sanskrit only: no published translation is held for this verse.

स्कन्धरूढार्कशशिषु वहत्स्व् अविरतं जवात् । वातस्कन्धातिवातेषु कच्चित् तात न खिद्यसे

skandharūḍhārkaśaśiṣu vahatsv avirataṃ javāt / vātaskandhātivāteṣu kaccit tāta na khidyase

Sanskrit only: no published translation is held for this verse.

दग्धोदयास्तशैलेन्द्रवनव्यूहै रवेः करैः । चिरम् अत्यन्तम् आसन्नैः कथं तात न खिद्यसे

dagdhodayāstaśailendravanavyūhai raveḥ karaiḥ / ciram atyantam āsannaiḥ kathaṃ tāta na khidyase

Sanskrit only: no published translation is held for this verse.

इन्दोर् अथ करैश् शीतैः पाषाणीकृतवारिभिः । आसन्नतरतां यातैः कच्चित् तात न खिद्यसे

indor atha karaiś śītaiḥ pāṣāṇīkṛtavāribhiḥ / āsannataratāṃ yātaiḥ kaccit tāta na khidyase

Sanskrit only: no published translation is held for this verse.

अजस्रम् इह विश्रान्तैः कल्पजीमूतमण्डलैः । परशुच्छेद्यनीहारैः कथं तात न खिद्यसे

ajasram iha viśrāntaiḥ kalpajīmūtamaṇḍalaiḥ / paraśucchedyanīhāraiḥ kathaṃ tāta na khidyase

Sanskrit only: no published translation is held for this verse.

विषमैर् जागतैः क्षोभैर् उच्चैस्तरपदस्थितः । कथं न क्षोभम् आयाति कल्पवृक्षो ऽयम् उन्नतः

viṣamair jāgataiḥ kṣobhair uccaistarapadasthitaḥ / kathaṃ na kṣobham āyāti kalpavṛkṣo 'yam unnataḥ

Sanskrit only: no published translation is held for this verse.

निरालम्बास्पदा ब्रह्मन् सर्वलोकावधीरिता । तुच्छेयं सर्वभूतानां मध्ये विहगजीविका

nirālambāspadā brahman sarvalokāvadhīritā / tuccheyaṃ sarvabhūtānāṃ madhye vihagajīvikā

Sanskrit only: no published translation is held for this verse.

यद् ईदृशेषु दूरेषु निर्जनेषु वनेषु च । कल्पितास्यास् स्थितिर् धात्रा शून्ये वा व्योमधन्वनि

yad īdṛśeṣu dūreṣu nirjaneṣu vaneṣu ca / kalpitāsyās sthitir dhātrā śūnye vā vyomadhanvani

Sanskrit only: no published translation is held for this verse.

कथम् अस्यां प्रभो जातौ जातस्य किल जीवतः । आशापाशनिबद्धस्य विहगस्य विशोकता

katham asyāṃ prabho jātau jātasya kila jīvataḥ / āśāpāśanibaddhasya vihagasya viśokatā

Sanskrit only: no published translation is held for this verse.

वयं तु भगवन् नित्यं स्वात्मसन्तोषसंयुताः । न कदाचन नीरूपैर् मुह्यामो जागतैर् भ्रमैः

vayaṃ tu bhagavan nityaṃ svātmasantoṣasaṃyutāḥ / na kadācana nīrūpair muhyāmo jāgatair bhramaiḥ

Sanskrit only: no published translation is held for this verse.

स्वभावमात्रसन्तुष्टाः कष्टैर् मुक्ता विचेष्टितैः । क्षिपामः केवलं कालम् अस्मिन् ब्रह्मन् निजालये

svabhāvamātrasantuṣṭāḥ kaṣṭair muktā viceṣṭitaiḥ / kṣipāmaḥ kevalaṃ kālam asmin brahman nijālaye

Sanskrit only: no published translation is held for this verse.

न जीवितान् न मरणात् कुर्मो देहस्य रोधनम् । यथा स्थितेन तिष्ठामस् तथैवास्तङ्गतेहिताः

na jīvitān na maraṇāt kurmo dehasya rodhanam / yathā sthitena tiṣṭhāmas tathaivāstaṅgatehitāḥ

Sanskrit only: no published translation is held for this verse.

आलोकिता लोकदशा दृष्टा दृष्टान्तदृष्टयः । नूनं सन्त्यक्तम् अस्माकं मनसा चञ्चलं वपुः

ālokitā lokadaśā dṛṣṭā dṛṣṭāntadṛṣṭayaḥ / nūnaṃ santyaktam asmākaṃ manasā cañcalaṃ vapuḥ

Sanskrit only: no published translation is held for this verse.

अनारतनिजालोके नित्यं चापरितापिनि । कल्पागस्योपरि सदा वेद्मि कालकलागतिम्

anāratanijāloke nityaṃ cāparitāpini / kalpāgasyopari sadā vedmi kālakalāgatim

Sanskrit only: no published translation is held for this verse.

रत्नगुच्छप्रकाशाढ्ये ब्रह्मन् कल्पलतागृहे । प्राणापानप्रवाहेण वेद्मि कालम् अखण्डितम्

ratnagucchaprakāśāḍhye brahman kalpalatāgṛhe / prāṇāpānapravāheṇa vedmi kālam akhaṇḍitam

Sanskrit only: no published translation is held for this verse.

अविज्ञातदिवारात्रे ऽप्य् अस्मिन्न् उच्चैश् शिलोच्चये । जानामि निजया बुद्ध्या लोककालक्रमस्थितिम्

avijñātadivārātre 'py asminn uccaiś śiloccaye / jānāmi nijayā buddhyā lokakālakramasthitim

Sanskrit only: no published translation is held for this verse.

सारासारपरिच्छेदि बोधाद् विश्रान्तिम् आगतम् । निरस्तचापलं शान्तं जातम् एव मुने मनः

sārāsāraparicchedi bodhād viśrāntim āgatam / nirastacāpalaṃ śāntaṃ jātam eva mune manaḥ

Sanskrit only: no published translation is held for this verse.

संसारव्यवहारोत्थैर् आशापाशैर् असन्मयैः । उद्गालैर् इव भूकाको न वैवश्यं व्रजाम्य् अहम्

saṃsāravyavahārotthair āśāpāśair asanmayaiḥ / udgālair iva bhūkāko na vaivaśyaṃ vrajāmy aham

Sanskrit only: no published translation is held for this verse.

परोपशमधर्मिण्या वयम् आलोकशीतया । पश्यन्तो जागतीं मायां धिया धैर्यम् उपागताः

paropaśamadharmiṇyā vayam ālokaśītayā / paśyanto jāgatīṃ māyāṃ dhiyā dhairyam upāgatāḥ

Sanskrit only: no published translation is held for this verse.

भीमास्व् अपि महाबुद्धे दशास्व् अचलबुद्धयः । बिभिमो नोपलाकारास् सम्प्राप्तासु यथाक्रमम्

bhīmāsv api mahābuddhe daśāsv acalabuddhayaḥ / bibhimo nopalākārās samprāptāsu yathākramam

Sanskrit only: no published translation is held for this verse.

इयम् आरम्भसुभगा तरला जागती स्थितिः । भूयो भूयः परामृष्टा नेह किञ्चन सन्मयम्

iyam ārambhasubhagā taralā jāgatī sthitiḥ / bhūyo bhūyaḥ parāmṛṣṭā neha kiñcana sanmayam

Sanskrit only: no published translation is held for this verse.

सर्वाण्य् एव प्रयान्त्य् एव समायान्ति च वा न वा । भगवन् भूतजालानि भयम् अस्माकम् अत्र किम्

sarvāṇy eva prayānty eva samāyānti ca vā na vā / bhagavan bhūtajālāni bhayam asmākam atra kim

Sanskrit only: no published translation is held for this verse.

भूतजालतरङ्गिण्या विशन्त्याः कालसागरम् । वयं संसारसरितस् तटस्था अप्य् अनाकुलाः

bhūtajālataraṅgiṇyā viśantyāḥ kālasāgaram / vayaṃ saṃsārasaritas taṭasthā apy anākulāḥ

Sanskrit only: no published translation is held for this verse.

नोज्झामो न च गृह्णीमस् तिष्ठामो नैव च स्थिताः । मृदवो ऽपि भृशं क्रूरा वयम् अस्मिन् द्रुमे स्थिताः

nojjhāmo na ca gṛhṇīmas tiṣṭhāmo naiva ca sthitāḥ / mṛdavo 'pi bhṛśaṃ krūrā vayam asmin drume sthitāḥ

Sanskrit only: no published translation is held for this verse.

वीतशोकभयायासैस् त्वादृशैः पुरुषोत्तमैः । तुष्टैर् अनुगृहीतास् स्मस् संस्थिता विगतज्वराः

vītaśokabhayāyāsais tvādṛśaiḥ puruṣottamaiḥ / tuṣṭair anugṛhītās smas saṃsthitā vigatajvarāḥ

Sanskrit only: no published translation is held for this verse.

नेतश् चेतश् च पर्यस्तं लुलितं न च वृत्तिषु । नापरामृष्टतत्त्वार्थम् अस्माकं भगवन् मनः

netaś cetaś ca paryastaṃ lulitaṃ na ca vṛttiṣu / nāparāmṛṣṭatattvārtham asmākaṃ bhagavan manaḥ

Sanskrit only: no published translation is held for this verse.

निर्विकारे गतक्षोभे स्वात्मन्य् उपशमं गते । अतरङ्गाः प्रपूर्णास् स्मः पर्वणीव महाब्धयः

nirvikāre gatakṣobhe svātmany upaśamaṃ gate / ataraṅgāḥ prapūrṇās smaḥ parvaṇīva mahābdhayaḥ

Sanskrit only: no published translation is held for this verse.

भवदागमनाद् ब्रह्मन्न् इदानीं मुदिताशयाः । फलिताशेषसङ्कल्पाः परमां पूर्णतां गताः

bhavadāgamanād brahmann idānīṃ muditāśayāḥ / phalitāśeṣasaṅkalpāḥ paramāṃ pūrṇatāṃ gatāḥ

Sanskrit only: no published translation is held for this verse.

रसायनमयी शीता परमानन्ददायिनी । नानन्दयति कं नाम साधुसङ्गतिचन्द्रिका

rasāyanamayī śītā paramānandadāyinī / nānandayati kaṃ nāma sādhusaṅgaticandrikā

Sanskrit only: no published translation is held for this verse.

सत्सङ्गमानन्दरसः केनायम् उपमीयते । मन्दरोद्धूतसर्वाम्बुः क्षीरोदो येन खर्व्यते

satsaṅgamānandarasaḥ kenāyam upamīyate / mandaroddhūtasarvāmbuḥ kṣīrodo yena kharvyate

Sanskrit only: no published translation is held for this verse.

नातः परतरं किञ्चिन् मन्ये कुशलम् आत्मनः । सन्तो यद् अनुगम्यन्ते सन्त्यक्तसकलैषणम्

nātaḥ parataraṃ kiñcin manye kuśalam ātmanaḥ / santo yad anugamyante santyaktasakalaiṣaṇam

Sanskrit only: no published translation is held for this verse.

आपातमात्ररम्येभ्यो भोगेभ्यः किम् अवाप्यते । सत्सङ्गचिन्तामणितस् सर्वं सारम् अवाप्यते

āpātamātraramyebhyo bhogebhyaḥ kim avāpyate / satsaṅgacintāmaṇitas sarvaṃ sāram avāpyate

Sanskrit only: no published translation is held for this verse.

स्निग्धगम्भीरमसृणमधुरोदारधीरवाक् । त्रैलोक्यपद्मकोशे ऽस्मिंस् त्वम् एकष् षट्पदायसे

snigdhagambhīramasṛṇamadhurodāradhīravāk / trailokyapadmakośe 'smiṃs tvam ekaṣ ṣaṭpadāyase

Sanskrit only: no published translation is held for this verse.

अधिगतपरमात्मनो ऽपि मन्ये भवदवलोकनशान्तदुष्कृतस्य । मम सफलम् इहाद्य जन्म साधो सकलभयापहरो हि साधुसङ्गः

adhigataparamātmano 'pi manye bhavadavalokanaśāntaduṣkṛtasya / mama saphalam ihādya janma sādho sakalabhayāpaharo hi sādhusaṅgaḥ

Sanskrit only: no published translation is held for this verse.