Moksopaya with Bhaskarakantha's Tika 6.27

एषा हि चिति विश्रान्तिर् मया प्राणसमाधिना । क्रमेणानेन सम्प्राप्ता स्वयम् आत्मनि निर्मले

eṣā hi citi viśrāntir mayā prāṇasamādhinā / krameṇānena samprāptā svayam ātmani nirmale

Sanskrit only: no published translation is held for this verse.

एतां दृष्टिम् अवष्टभ्य संस्थितो ऽस्मि महामुने । न चलामि निमेषांशम् अपि मेरुर् इवाचलः

etāṃ dṛṣṭim avaṣṭabhya saṃsthito 'smi mahāmune / na calāmi nimeṣāṃśam api merur ivācalaḥ

Sanskrit only: no published translation is held for this verse.

गच्छतस् तिष्ठतो वापि जाग्रतस् स्वपतो ऽपि वा । स्वप्ने ऽपि न चलत्य् एष सुसमाधिर् ममात्मनि

gacchatas tiṣṭhato vāpi jāgratas svapato 'pi vā / svapne 'pi na calaty eṣa susamādhir mamātmani

Sanskrit only: no published translation is held for this verse.

नित्यानित्यासु लोलासु जगत्स्थितिषु संस्थितः । अन्तर्मुखो ऽस्मि तिष्ठामि स्वयम् एवात्मनात्मनि

nityānityāsu lolāsu jagatsthitiṣu saṃsthitaḥ / antarmukho 'smi tiṣṭhāmi svayam evātmanātmani

Sanskrit only: no published translation is held for this verse.

अपि संरुध्यते वायुर् अपि वा सलिलं गतेः । नैतस्मात् सुसमाधानान् निरुद्धं संस्मराम्य् अहम्

api saṃrudhyate vāyur api vā salilaṃ gateḥ / naitasmāt susamādhānān niruddhaṃ saṃsmarāmy aham

Sanskrit only: no published translation is held for this verse.

प्राणापानानुसरणात् परमात्मावलोकनात् । अशोकम् अनुयातो ऽस्मि पदम् आद्यं महातपः

prāṇāpānānusaraṇāt paramātmāvalokanāt / aśokam anuyāto 'smi padam ādyaṃ mahātapaḥ

Sanskrit only: no published translation is held for this verse.

आ महाप्रलयाद् ब्रह्मन्न् उन्मज्जननिमज्जने । अयम् अद्यापि भूतानां पश्यञ् जीवामि धीरधीः

ā mahāpralayād brahmann unmajjananimajjane / ayam adyāpi bhūtānāṃ paśyañ jīvāmi dhīradhīḥ

Sanskrit only: no published translation is held for this verse.

न भूतं न भविष्यच् च चिन्तयामि कदाचन । दृष्टिम् आलम्ब्य तिष्ठामि वर्तमानाम् इहात्मनः

na bhūtaṃ na bhaviṣyac ca cintayāmi kadācana / dṛṣṭim ālambya tiṣṭhāmi vartamānām ihātmanaḥ

Sanskrit only: no published translation is held for this verse.

यथाप्राप्तेषु कार्येषु परित्यक्तफलैषणः । सुषुप्तसमया बुद्ध्या परितिष्ठामि केवलम्

yathāprāpteṣu kāryeṣu parityaktaphalaiṣaṇaḥ / suṣuptasamayā buddhyā paritiṣṭhāmi kevalam

Sanskrit only: no published translation is held for this verse.

भावाभावमयीं चिन्ताम् ईहितानीहितान्विताम् । विमुच्यात्मनि तिष्ठामि चिरं जीवाम्य् अनामयः

bhāvābhāvamayīṃ cintām īhitānīhitānvitām / vimucyātmani tiṣṭhāmi ciraṃ jīvāmy anāmayaḥ

Sanskrit only: no published translation is held for this verse.

प्राणापानसमायोगसमयं समनुस्मरन् । स्वयम् आत्मनि तुष्यामि तेनास्मि चिरजीवितः

prāṇāpānasamāyogasamayaṃ samanusmaran / svayam ātmani tuṣyāmi tenāsmi cirajīvitaḥ

Sanskrit only: no published translation is held for this verse.

इदम् अद्य मया लब्धम् इदं लप्स्यामि सुन्दरम् । इति चिन्ता न मे तेन चिरं जीवाम्य् अनामयः

idam adya mayā labdham idaṃ lapsyāmi sundaram / iti cintā na me tena ciraṃ jīvāmy anāmayaḥ

Sanskrit only: no published translation is held for this verse.

न स्तौमि न च निन्दामि क्वचित् किञ्चित् कदाचन । आत्मनो ऽन्यस्य वा साधो तेन जीवाम्य् अनामयः

na staumi na ca nindāmi kvacit kiñcit kadācana / ātmano 'nyasya vā sādho tena jīvāmy anāmayaḥ

Sanskrit only: no published translation is held for this verse.

न तुष्यति शुभप्राप्तौ नाशुभेष्व् अपि खिद्यते । मनो मम समं नित्यं तेन जीवाम्य् अनामयः

na tuṣyati śubhaprāptau nāśubheṣv api khidyate / mano mama samaṃ nityaṃ tena jīvāmy anāmayaḥ

Sanskrit only: no published translation is held for this verse.

परमं त्यागम् आलम्ब्य सर्वम् एव सदैव हि । जीवितादि मया त्यक्तं तेन जीवाम्य् अनामयः

paramaṃ tyāgam ālambya sarvam eva sadaiva hi / jīvitādi mayā tyaktaṃ tena jīvāmy anāmayaḥ

Sanskrit only: no published translation is held for this verse.

प्रशान्तचापलं वीतशोकम् अस्तसमीहितम् । मनो मम मुने शान्तं तेन जीवाम्य् अनामयः

praśāntacāpalaṃ vītaśokam astasamīhitam / mano mama mune śāntaṃ tena jīvāmy anāmayaḥ

Sanskrit only: no published translation is held for this verse.

काष्ठं विलासिनीं शैलं तृणम् अग्निं हिमं नभः । समं सर्वत्र पश्यामि तेन जीवाम्य् अनामयः

kāṣṭhaṃ vilāsinīṃ śailaṃ tṛṇam agniṃ himaṃ nabhaḥ / samaṃ sarvatra paśyāmi tena jīvāmy anāmayaḥ

Sanskrit only: no published translation is held for this verse.

किम् अद्य मम सम्प्राप्तं प्रातर् वा भविता पुनः । इति चिन्ताज्वरो नास्ति तेन जीवाम्य् अनामयः

kim adya mama samprāptaṃ prātar vā bhavitā punaḥ / iti cintājvaro nāsti tena jīvāmy anāmayaḥ

Sanskrit only: no published translation is held for this verse.

जरामरणदुःखेषु राज्यलाभसुखेषु च । न बिभेमि न हृष्यामि तेन जीवाम्य् अनामयः

jarāmaraṇaduḥkheṣu rājyalābhasukheṣu ca / na bibhemi na hṛṣyāmi tena jīvāmy anāmayaḥ

Sanskrit only: no published translation is held for this verse.

अयं बन्धुः परश् चायं ममायम् अयम् अन्यतः । इति ब्रह्मन् न जानामि तेन जीवाम्य् अनामयः

ayaṃ bandhuḥ paraś cāyaṃ mamāyam ayam anyataḥ / iti brahman na jānāmi tena jīvāmy anāmayaḥ

Sanskrit only: no published translation is held for this verse.

आहरन् विहरंस् तिष्ठन्न् उत्तिष्ठन्न् उच्छ्वसन् स्वपन् । देहो ऽहम् इति नो वेद्मि तेन जीवाम्य् अनामयः

āharan viharaṃs tiṣṭhann uttiṣṭhann ucchvasan svapan / deho 'ham iti no vedmi tena jīvāmy anāmayaḥ

Sanskrit only: no published translation is held for this verse.

इमं संसारम् आरम्भं सुषुप्तवद् अवस्थितः । असन्तम् इव पश्यामि तेन जीवाम्य् अनामयः

imaṃ saṃsāram ārambhaṃ suṣuptavad avasthitaḥ / asantam iva paśyāmi tena jīvāmy anāmayaḥ

Sanskrit only: no published translation is held for this verse.

यथाकालम् उपायाताव् अर्थानर्थौ समौ मम । हस्ताव् इव शरीरस्थौ तेन जीवाम्य् अनामयः

yathākālam upāyātāv arthānarthau samau mama / hastāv iva śarīrasthau tena jīvāmy anāmayaḥ

Sanskrit only: no published translation is held for this verse.

अपारिप्लवया ऋज्व्या सुदृशा स्निग्धमुग्धया । ऋजु पश्यामि सर्वत्र तेन जीवाम्य् अनामयः

apāriplavayā ṛjvyā sudṛśā snigdhamugdhayā / ṛju paśyāmi sarvatra tena jīvāmy anāmayaḥ

Sanskrit only: no published translation is held for this verse.

आपादमस्तकान्ते ऽस्मिन् न देहे ममता मम । त्यक्ताहङ्कारपङ्कस्य तेन जीवाम्य् अनामयः

āpādamastakānte 'smin na dehe mamatā mama / tyaktāhaṅkārapaṅkasya tena jīvāmy anāmayaḥ

Sanskrit only: no published translation is held for this verse.

यत् करोमि यद् अश्नामि तत् त्यक्त्वा तद्वतो ऽपि मे । मनो नैष्कर्म्यम् आदत्ते तेन जीवाम्य् अनामयः

yat karomi yad aśnāmi tat tyaktvā tadvato 'pi me / mano naiṣkarmyam ādatte tena jīvāmy anāmayaḥ

Sanskrit only: no published translation is held for this verse.

यदा यदा मुने किञ्चिद् विजानामि तदा तदा । नतिम् आयामि नौद्धत्यं तेन जीवाम्य् अनामयः

yadā yadā mune kiñcid vijānāmi tadā tadā / natim āyāmi nauddhatyaṃ tena jīvāmy anāmayaḥ

Sanskrit only: no published translation is held for this verse.

करोमीशो ऽपि नाक्रान्तिं परितप्ये न खेदितः । दरिद्रो ऽपि न वाञ्छामि तेन जीवाम्य् अनामयः

karomīśo 'pi nākrāntiṃ paritapye na kheditaḥ / daridro 'pi na vāñchāmi tena jīvāmy anāmayaḥ

Sanskrit only: no published translation is held for this verse.

नश्यद्रूपे शरीरे ऽस्मिन्न् अनष्टात्मा चिदास्पदः । भूतवृन्दं हसाम्य् आरात् तेन जीवाम्य् अनामयः

naśyadrūpe śarīre 'sminn anaṣṭātmā cidāspadaḥ / bhūtavṛndaṃ hasāmy ārāt tena jīvāmy anāmayaḥ

Sanskrit only: no published translation is held for this verse.

आशापाशविनुन्नायाश् चित्तवृत्तेस् समाहितः । संस्पर्शं न ददाम्य् अन्तस् तेन जीवाम्य् अनामयः

āśāpāśavinunnāyāś cittavṛttes samāhitaḥ / saṃsparśaṃ na dadāmy antas tena jīvāmy anāmayaḥ

Sanskrit only: no published translation is held for this verse.

असत्तां जगतस् सत्ताम् आत्मनः करबिल्ववत् । सुप्तः प्रबुद्धः पश्यामि तेन जीवाम्य् अनामयः

asattāṃ jagatas sattām ātmanaḥ karabilvavat / suptaḥ prabuddhaḥ paśyāmi tena jīvāmy anāmayaḥ

Sanskrit only: no published translation is held for this verse.

क्षीणं भिन्नं श्लथं जीर्णं क्षुब्धं क्षुण्णं क्षयं गतम् । पश्यामि नववत् सर्वं तेन जीवाम्य् अनामयः

kṣīṇaṃ bhinnaṃ ślathaṃ jīrṇaṃ kṣubdhaṃ kṣuṇṇaṃ kṣayaṃ gatam / paśyāmi navavat sarvaṃ tena jīvāmy anāmayaḥ

Sanskrit only: no published translation is held for this verse.

सुखितो ऽस्मि सुखासक्ते दुःखितो दुःखिते जने । सर्वस्य प्रियमित्रं च तेन जीवाम्य् अनामयः

sukhito 'smi sukhāsakte duḥkhito duḥkhite jane / sarvasya priyamitraṃ ca tena jīvāmy anāmayaḥ

Sanskrit only: no published translation is held for this verse.

आपद्य् अचलधीरो ऽस्मि जगन्मित्रं च सम्पदि । भावाभावेषु नैवास्मि तेन जीवाम्य् अनामयः

āpady acaladhīro 'smi jaganmitraṃ ca sampadi / bhāvābhāveṣu naivāsmi tena jīvāmy anāmayaḥ

Sanskrit only: no published translation is held for this verse.

नाहम् अस्मि न चान्यो मे नाहम् अन्यस्य कस्यचित् । इति मे भावितं चेतस् तेन जीवाम्य् अनामयः

nāham asmi na cānyo me nāham anyasya kasyacit / iti me bhāvitaṃ cetas tena jīvāmy anāmayaḥ

Sanskrit only: no published translation is held for this verse.

अहं जगद् अहं व्योम देशकालक्रमाव् अहम् । अहं क्रियेति मे बुद्धिस् तेन जीवाम्य् अनामयः

ahaṃ jagad ahaṃ vyoma deśakālakramāv aham / ahaṃ kriyeti me buddhis tena jīvāmy anāmayaḥ

Sanskrit only: no published translation is held for this verse.

घटश् चिच् चित् पटश् चित् खं चिद् वटश् शकटश् च चित् । चित् सर्वम् इति मे भावस् तेन जीवाम्य् अनामयः

ghaṭaś cic cit paṭaś cit khaṃ cid vaṭaś śakaṭaś ca cit / cit sarvam iti me bhāvas tena jīvāmy anāmayaḥ

Sanskrit only: no published translation is held for this verse.

इत्य् अहं मुनिशार्दूल त्रिलोकीकमलालिकः । भुसुण्डनामा काकोलः कथितश् चिरजीवितः

ity ahaṃ muniśārdūla trilokīkamalālikaḥ / bhusuṇḍanāmā kākolaḥ kathitaś cirajīvitaḥ

Sanskrit only: no published translation is held for this verse.

ब्रह्मार्णवे विलुलितं त्रिजगत्तरङ्गम् उत्पादनाशविभवेन विभिन्नरूपम् । आलीनम् उन्नमितम् आकुलदृश्यदृश्यम् आलोकयन् प्रकलयंश् च चिरं स्थितो ऽस्मि

brahmārṇave vilulitaṃ trijagattaraṅgam utpādanāśavibhavena vibhinnarūpam / ālīnam unnamitam ākuladṛśyadṛśyam ālokayan prakalayaṃś ca ciraṃ sthito 'smi

Sanskrit only: no published translation is held for this verse.