Moksopaya with Bhaskarakantha's Tika 6.47

एतद् उक्तं परेशेन स्वयम् एव च वेद्म्य् अहम् । राम त्वम् अपि जानीषे यथेदं समवस्थितम्

etad uktaṃ pareśena svayam eva ca vedmy aham / rāma tvam api jānīṣe yathedaṃ samavasthitam

Sanskrit only: no published translation is held for this verse.

यत्रालीकम् अलीकेन किलालीकं विलोक्यते । तस्यां संसारमायायां किं सत्यं किम् असन्मयम्

yatrālīkam alīkena kilālīkaṃ vilokyate / tasyāṃ saṃsāramāyāyāṃ kiṃ satyaṃ kim asanmayam

Sanskrit only: no published translation is held for this verse.

यथा येन विकल्पेन यद्विकल्पेन कल्प्यते । तथा तेनात्मकल्पेन न सताप्य् अनुभूयते

yathā yena vikalpena yadvikalpena kalpyate / tathā tenātmakalpena na satāpy anubhūyate

Sanskrit only: no published translation is held for this verse.

यथा द्रवत्वं पयसि यथा स्पन्दो नभस्वति । यथा नभसि शून्यत्वं तथा सर्गत्वम् आत्मनि

yathā dravatvaṃ payasi yathā spando nabhasvati / yathā nabhasi śūnyatvaṃ tathā sargatvam ātmani

Sanskrit only: no published translation is held for this verse.

ततः प्रभृति तेनैव क्रमेणार्चनम् आत्मनः । अद्य यावद् गतव्यग्रः कुर्वन्न् अहम् अवस्थितः

tataḥ prabhṛti tenaiva krameṇārcanam ātmanaḥ / adya yāvad gatavyagraḥ kurvann aham avasthitaḥ

Sanskrit only: no published translation is held for this verse.

अनेनार्चाविधानेन मयेमा राम वासनाः । अखिन्नेनातिवाह्यन्ते व्यवहारपरा अपि

anenārcāvidhānena mayemā rāma vāsanāḥ / akhinnenātivāhyante vyavahāraparā api

Sanskrit only: no published translation is held for this verse.

यथाप्राप्तैः क्रियाचारकुसुमैर् आत्मनो ऽर्चनम् । व्युच्छिन्नम् अप्य् उच्छिन्नं मे न कदाचिद् अहर्निशम्

yathāprāptaiḥ kriyācārakusumair ātmano 'rcanam / vyucchinnam apy ucchinnaṃ me na kadācid aharniśam

Sanskrit only: no published translation is held for this verse.

ग्राह्यग्राहकसम्बन्धे सामान्ये सर्वदेहिनाम् । योगिनस् सावधानत्वं यत् तद् अर्चनम् आत्मनः

grāhyagrāhakasambandhe sāmānye sarvadehinām / yoginas sāvadhānatvaṃ yat tad arcanam ātmanaḥ

Sanskrit only: no published translation is held for this verse.

दृष्ट्यानया रघुपते सङ्गमुक्तेन चेतसा । संसारे विपुलारण्ये विहरास्मिन् न खिद्यसे

dṛṣṭyānayā raghupate saṅgamuktena cetasā / saṃsāre vipulāraṇye viharāsmin na khidyase

Sanskrit only: no published translation is held for this verse.

दुःखे महति सम्प्राप्ते धनबन्धुवियोगजे । एतां दृष्टिम् अवष्टभ्य विचारं कुरु सुव्रत

duḥkhe mahati samprāpte dhanabandhuviyogaje / etāṃ dṛṣṭim avaṣṭabhya vicāraṃ kuru suvrata

Sanskrit only: no published translation is held for this verse.

सुखदुःखे न कर्तव्ये धनबन्धूदयक्षयैः । एवम्प्राया एव सर्वा नित्यं संसारदृष्टयः

sukhaduḥkhe na kartavye dhanabandhūdayakṣayaiḥ / evamprāyā eva sarvā nityaṃ saṃsāradṛṣṭayaḥ

Sanskrit only: no published translation is held for this verse.

जानासीव गतीश् चित्रा विषयाणां प्रमाथिनीः । यथा यान्ति यथायान्ति यथा परिभवन्ति च

jānāsīva gatīś citrā viṣayāṇāṃ pramāthinīḥ / yathā yānti yathāyānti yathā paribhavanti ca

Sanskrit only: no published translation is held for this verse.

एवम् एव प्रवर्तन्ते प्रेमाणि च धनानि च । एवम् एवावहीयन्ते निमित्तैर् अविचारितैः

evam eva pravartante premāṇi ca dhanāni ca / evam evāvahīyante nimittair avicāritaiḥ

Sanskrit only: no published translation is held for this verse.

न तास् तव न तासां त्वं निर्मलस् त्वं जगत्क्रियाः । इदम् इत्थं जगत् किञ्चित् किं मुधा परितप्यसे

na tās tava na tāsāṃ tvaṃ nirmalas tvaṃ jagatkriyāḥ / idam itthaṃ jagat kiñcit kiṃ mudhā paritapyase

Sanskrit only: no published translation is held for this verse.

त्वम् एवासि जगद्रूपं चिन्मात्रं वितताकृतिः । निजावयवकावृत्तौ कः क्रमो हर्षशोकयोः

tvam evāsi jagadrūpaṃ cinmātraṃ vitatākṛtiḥ / nijāvayavakāvṛttau kaḥ kramo harṣaśokayoḥ

Sanskrit only: no published translation is held for this verse.

चिदेकतानताम् एत्य सौषुप्तीम् आगतस् स्थितिम् । अद्यप्रभृति राम त्वं तुर्यावस्थात्मको भव

cidekatānatām etya sauṣuptīm āgatas sthitim / adyaprabhṛti rāma tvaṃ turyāvasthātmako bhava

Sanskrit only: no published translation is held for this verse.

समस् समसमाभासो भास्वद्वपुर् उदारधीः । तिष्ठात्माचारतो नित्यं परिपूर्ण इवार्णवः

samas samasamābhāso bhāsvadvapur udāradhīḥ / tiṣṭhātmācārato nityaṃ paripūrṇa ivārṇavaḥ

Sanskrit only: no published translation is held for this verse.

एतत् त्वं श्रुतवान् सर्वं स्थितस् त्वं परिपूर्णधीः । यदीच्छसीतरत् प्रष्टुं तत् पृच्छ रघुनन्दन

etat tvaṃ śrutavān sarvaṃ sthitas tvaṃ paripūrṇadhīḥ / yadīcchasītarat praṣṭuṃ tat pṛccha raghunandana

Sanskrit only: no published translation is held for this verse.

ब्रह्मणो ऽनन्तरूपस्य कुतो मलम् इति त्वया । यत् पृष्टं प्रथमे कल्पे तद् अद्य परिचोदय

brahmaṇo 'nantarūpasya kuto malam iti tvayā / yat pṛṣṭaṃ prathame kalpe tad adya paricodaya

Sanskrit only: no published translation is held for this verse.

इदानीं संशयो ब्रह्मन् विनिवृत्तो विशेषतः । ज्ञातं ज्ञातव्यम् अखिलं जाता तृप्तिर् अकृत्रिमा

idānīṃ saṃśayo brahman vinivṛtto viśeṣataḥ / jñātaṃ jñātavyam akhilaṃ jātā tṛptir akṛtrimā

Sanskrit only: no published translation is held for this verse.

नात्मनो ऽस्ति मलं द्वित्वं न चैक्यं न च कल्पना । तदा ममाभूद् अज्ञानं प्रशान्तम् अधुना तु तत्

nātmano 'sti malaṃ dvitvaṃ na caikyaṃ na ca kalpanā / tadā mamābhūd ajñānaṃ praśāntam adhunā tu tat

Sanskrit only: no published translation is held for this verse.

कलङ्क आत्मनो ऽस्तीति ममाज्ञानवशेन या । आसीद् भ्रान्तिर् इदानीं सा निवृत्ता त्वत्प्रसादतः

kalaṅka ātmano 'stīti mamājñānavaśena yā / āsīd bhrāntir idānīṃ sā nivṛttā tvatprasādataḥ

Sanskrit only: no published translation is held for this verse.

न जायते न म्रियते न चैवात्मा कलङ्कितः । सर्वं च ब्रह्ममयम् इत्य् उदितः खलु चास्म्य् अहम्

na jāyate na mriyate na caivātmā kalaṅkitaḥ / sarvaṃ ca brahmamayam ity uditaḥ khalu cāsmy aham

Sanskrit only: no published translation is held for this verse.

प्रश्नेभ्यस् संशयेभ्यश् च वाञ्छितेभ्यश् च सर्वतः । शुद्धं मे निर्गतं चेतस् त्वष्टा यन्त्रभ्रमाद् इव

praśnebhyas saṃśayebhyaś ca vāñchitebhyaś ca sarvataḥ / śuddhaṃ me nirgataṃ cetas tvaṣṭā yantrabhramād iva

Sanskrit only: no published translation is held for this verse.

सर्वसारोपदेशेषु प्रायः प्रोक्तेषु साधुभिः । निराकाङ्क्षस् स्थितो ऽस्म्य् अन्तस् सुमेरुः कनकेष्व् इव

sarvasāropadeśeṣu prāyaḥ prokteṣu sādhubhiḥ / nirākāṅkṣas sthito 'smy antas sumeruḥ kanakeṣv iva

Sanskrit only: no published translation is held for this verse.

न तद् अस्त्य् अस्ति यत्राशा न तद् अस्ति यद् ईप्सितम् । न तद् अस्ति यद् आदेयं हेयं मध्यं च वा मम

na tad asty asti yatrāśā na tad asti yad īpsitam / na tad asti yad ādeyaṃ heyaṃ madhyaṃ ca vā mama

Sanskrit only: no published translation is held for this verse.

इदं हेयम् उपादेयम् इदं सद् इदम् अप्य् असत् । इति चिन्ताभ्रमश् शान्तो निपुणं परमो मुने

idaṃ heyam upādeyam idaṃ sad idam apy asat / iti cintābhramaś śānto nipuṇaṃ paramo mune

Sanskrit only: no published translation is held for this verse.

न स्वर्गम् अभिवाञ्छामि द्वेष्मि वा न च रौरवम् । आत्मन्य् एव हि तिष्ठामि मन्दराद्रिर् इवाभ्रमः

na svargam abhivāñchāmi dveṣmi vā na ca rauravam / ātmany eva hi tiṣṭhāmi mandarādrir ivābhramaḥ

Sanskrit only: no published translation is held for this verse.

कणशःकीर्णत्रिजगत्क्षीरसागरसन्ततिः । विश्रान्तश् चिरसम्भ्रान्तो निर्भ्रमो राममन्दरः

kaṇaśaḥkīrṇatrijagatkṣīrasāgarasantatiḥ / viśrāntaś cirasambhrānto nirbhramo rāmamandaraḥ

Sanskrit only: no published translation is held for this verse.

अवस्त्व् इदम् इदं वस्तु यस्येति कलनामलम् । हृदि तस्य कुसन्देहजालिका ज्वलिताधिकम्

avastv idam idaṃ vastu yasyeti kalanāmalam / hṛdi tasya kusandehajālikā jvalitādhikam

Sanskrit only: no published translation is held for this verse.

इदम् इत्थं जगद् इति ज्ञातं येन मुनीश्वर । स यत्र याति कार्पण्यं जगतस् तन् न लभ्यते

idam itthaṃ jagad iti jñātaṃ yena munīśvara / sa yatra yāti kārpaṇyaṃ jagatas tan na labhyate

Sanskrit only: no published translation is held for this verse.

विचित्राकुलकल्लोलाज् जडावृत्तिविवर्तितात् । त्वत्प्रसादेन भगवंस् तीर्णास् स्मो भवसागरात्

vicitrākulakallolāj jaḍāvṛttivivartitāt / tvatprasādena bhagavaṃs tīrṇās smo bhavasāgarāt

Sanskrit only: no published translation is held for this verse.

सम्पदाम् अवधिर् ज्ञातो दृष्टस् सीमान्त आपदाम् । सर्वसारेष्व् अदीनास् स्मः पूर्णास् स्मः परमेश्वराः

sampadām avadhir jñāto dṛṣṭas sīmānta āpadām / sarvasāreṣv adīnās smaḥ pūrṇās smaḥ parameśvarāḥ

Sanskrit only: no published translation is held for this verse.

पराम् अभेद्याम् अपरैर् दलिताशामतङ्गजाम् । संसारसमरे सम्यग् धीरताम् आगतं मनः

parām abhedyām aparair dalitāśāmataṅgajām / saṃsārasamare samyag dhīratām āgataṃ manaḥ

Sanskrit only: no published translation is held for this verse.

परिगलितविकल्पताम् उपेतं प्रगलितवाञ्छम् अदीनसारसत्त्वम् । त्रिजगति जयति प्रसिद्धरूपं प्रमुदितम् अन्तर् अनुत्तरं मनो मे

parigalitavikalpatām upetaṃ pragalitavāñcham adīnasārasattvam / trijagati jayati prasiddharūpaṃ pramuditam antar anuttaraṃ mano me

Sanskrit only: no published translation is held for this verse.