Moksopaya with Bhaskarakantha's Tika 6.67

स कदाचिद् ददर्शाथ रुद्रं रुद्रपुरे खगः । वैरिञ्चनलिनीनाललीलालानेभलीलया

sa kadācid dadarśātha rudraṃ rudrapure khagaḥ / vairiñcanalinīnālalīlālānebhalīlayā

Sanskrit only: no published translation is held for this verse.

तत्र बुद्धिर् अभूत् तस्य रुद्रो ऽहम् इति निश्चिता । प्रतिबिम्बं वरादर्शे झगित्य् एव हि बिम्बति

tatra buddhir abhūt tasya rudro 'ham iti niścitā / pratibimbaṃ varādarśe jhagity eva hi bimbati

Sanskrit only: no published translation is held for this verse.

रुद्रीभूतवपुस् तत्र तनुं तत्याज ताम् असौ । गन्धः पवनतां गच्छन् कुसुमस्तबकं यथा

rudrībhūtavapus tatra tanuṃ tatyāja tām asau / gandhaḥ pavanatāṃ gacchan kusumastabakaṃ yathā

Sanskrit only: no published translation is held for this verse.

रुद्रो ऽथ रुद्रभवने विजहार यदृच्छया । तैस् तैश् शिवपुराचारैर् गणगोष्ठीगरिष्ठया

rudro 'tha rudrabhavane vijahāra yadṛcchayā / tais taiś śivapurācārair gaṇagoṣṭhīgariṣṭhayā

Sanskrit only: no published translation is held for this verse.

रुद्रस् त्व् अनुत्तरज्ञानविलासैकतया तया । स्वम् अशेषम् उदन्तं तम् अपश्यत् प्राक्तनं धिया

rudras tv anuttarajñānavilāsaikatayā tayā / svam aśeṣam udantaṃ tam apaśyat prāktanaṃ dhiyā

Sanskrit only: no published translation is held for this verse.

निरावरणविज्ञानवपुस् स भगवान् हरः । उवाच स्वयम् एकान्ते स्वस्वप्नशतविस्मितः

nirāvaraṇavijñānavapus sa bhagavān haraḥ / uvāca svayam ekānte svasvapnaśatavismitaḥ

Sanskrit only: no published translation is held for this verse.

अहो नु चित्रा मायेयं बत विश्वविमोहिनी । असत्य् एवापि सद्रूपा सुरूढा मरुवारिवत्

aho nu citrā māyeyaṃ bata viśvavimohinī / asaty evāpi sadrūpā surūḍhā maruvārivat

Sanskrit only: no published translation is held for this verse.

इदम्प्रथमम् आक्रान्तचेत्यो ऽहं चित्ततां गतः । पूर्वसम्पन्नसर्गस्थगगनादिविभावनात्

idamprathamam ākrāntacetyo 'haṃ cittatāṃ gataḥ / pūrvasampannasargasthagaganādivibhāvanāt

Sanskrit only: no published translation is held for this verse.

यदृच्छास्थितजीवत्वो भूततन्मात्ररञ्जितः । कस्मिंश्चिद् अभवं सर्गे भिक्षुर् अक्षुभितो ऽभितः

yadṛcchāsthitajīvatvo bhūtatanmātrarañjitaḥ / kasmiṃścid abhavaṃ sarge bhikṣur akṣubhito 'bhitaḥ

Sanskrit only: no published translation is held for this verse.

तेनालयनिबद्धेन बहिस् स्वैरविहारिता । लीलाविलुलिताकारा यदा रम्येति भाविता

tenālayanibaddhena bahis svairavihāritā / līlāvilulitākārā yadā ramyeti bhāvitā

Sanskrit only: no published translation is held for this verse.

सर्वभावोपमर्देन तदभ्यासवशात् तदा । ताम् एव सो ऽन्वभूद् भिक्षुस् त्यक्त्वान्यं मननोदयम्

sarvabhāvopamardena tadabhyāsavaśāt tadā / tām eva so 'nvabhūd bhikṣus tyaktvānyaṃ mananodayam

Sanskrit only: no published translation is held for this verse.

चमत्कृतिश् चेतसि या रूढा सैव विजृम्भते । वल्ली त्यजति नैदाघी पीतम् अप्य् अम्बु माधवम्

camatkṛtiś cetasi yā rūḍhā saiva vijṛmbhate / vallī tyajati naidāghī pītam apy ambu mādhavam

Sanskrit only: no published translation is held for this verse.

स भिक्षुर् जीवटो भूत्वा जन्तुर् जरढवासनः । तेषु देशेषु बभ्राम रन्ध्रेष्व् इव पिपीलकः

sa bhikṣur jīvaṭo bhūtvā jantur jaraḍhavāsanaḥ / teṣu deśeṣu babhrāma randhreṣv iva pipīlakaḥ

Sanskrit only: no published translation is held for this verse.

आत्मनि द्विजभक्तत्वात् सो ऽपश्यद् द्विजताम् अथ । भावो भावविपर्यासे बलवान् एव वर्धते

ātmani dvijabhaktatvāt so 'paśyad dvijatām atha / bhāvo bhāvaviparyāse balavān eva vardhate

Sanskrit only: no published translation is held for this verse.

सामन्तताम् अवापासौ विप्रस् सततचिन्तिताम् । सातत्येन रसः पीतः फलताम् एति पादपे

sāmantatām avāpāsau vipras satatacintitām / sātatyena rasaḥ pītaḥ phalatām eti pādape

Sanskrit only: no published translation is held for this verse.

राज्यार्थधर्मकार्याणां कर्तृत्वात् सो ऽभवन् नृपः । स कामुकतया राजा सुरस्त्रीत्वम् अवाप ह

rājyārthadharmakāryāṇāṃ kartṛtvāt so 'bhavan nṛpaḥ / sa kāmukatayā rājā surastrītvam avāpa ha

Sanskrit only: no published translation is held for this verse.

लोललोचनलोभेन सा मृगी रसशालिनी । बभूव वासनामोहस् त्व् अहो दुःखाय जन्तुषु

lolalocanalobhena sā mṛgī rasaśālinī / babhūva vāsanāmohas tv aho duḥkhāya jantuṣu

Sanskrit only: no published translation is held for this verse.

मृगी सततचित्तस्था बभूव विपिने लता । अवश्यम्भावि लवनं लतिकानुबभूव ह

mṛgī satatacittasthā babhūva vipine latā / avaśyambhāvi lavanaṃ latikānubabhūva ha

Sanskrit only: no published translation is held for this verse.

अन्तस्सञ्ज्ञाचिराभ्यस्तं भ्रमरत्वम् अथात्मनि । सापश्यद् भावमर्देन सदातद्भावभाविता

antassañjñācirābhyastaṃ bhramaratvam athātmani / sāpaśyad bhāvamardena sadātadbhāvabhāvitā

Sanskrit only: no published translation is held for this verse.

स वारणखुरक्षोदम् अनुभूयाथ भावितम् । भूयो भूयः प्रबभ्राम महासंसृतिविभ्रमान्

sa vāraṇakhurakṣodam anubhūyātha bhāvitam / bhūyo bhūyaḥ prababhrāma mahāsaṃsṛtivibhramān

Sanskrit only: no published translation is held for this verse.

संसारशतपर्यन्ते रुद्रस् सो ऽयम् अहं स्थितः । अस्मिन् संसारसंरम्भे स्वमनोमात्रसम्भृते

saṃsāraśataparyante rudras so 'yam ahaṃ sthitaḥ / asmin saṃsārasaṃrambhe svamanomātrasambhṛte

Sanskrit only: no published translation is held for this verse.

एवं संशान्तरूपासु संसारारण्यभूमिषु । बह्वीष्व् अहम् अभिभ्रान्तस् त्व् अशून्यास्व् इव भूरिशः

evaṃ saṃśāntarūpāsu saṃsārāraṇyabhūmiṣu / bahvīṣv aham abhibhrāntas tv aśūnyāsv iva bhūriśaḥ

Sanskrit only: no published translation is held for this verse.

कस्मिंश्चिद् अभवं सर्गे त्व् अहं जीवटनामकः । कस्मिंश्चिद् ब्राह्मणश्रेष्ठः कस्मिंश्चिद् वसुधाधिपः

kasmiṃścid abhavaṃ sarge tv ahaṃ jīvaṭanāmakaḥ / kasmiṃścid brāhmaṇaśreṣṭhaḥ kasmiṃścid vasudhādhipaḥ

Sanskrit only: no published translation is held for this verse.

हंसः पद्मवने भूत्वा विन्ध्यकच्छे च वारणः । हरिणो हेहयाद्रौ च दशाम् अहम् इमां गतः

haṃsaḥ padmavane bhūtvā vindhyakacche ca vāraṇaḥ / hariṇo hehayādrau ca daśām aham imāṃ gataḥ

Sanskrit only: no published translation is held for this verse.

अत्र वर्षसहस्राणि चतुर्युगशतानि च । समतीतान्य् अनन्तानि दिनर्तुरचितानि च

atra varṣasahasrāṇi caturyugaśatāni ca / samatītāny anantāni dinarturacitāni ca

Sanskrit only: no published translation is held for this verse.

मम प्रथमम् एव प्राक्स्फुरितस्य परात् पदात् । सत्त्वजातितया रूढो भिक्षुत्वे यो ज्ञताक्रमः

mama prathamam eva prāksphuritasya parāt padāt / sattvajātitayā rūḍho bhikṣutve yo jñatākramaḥ

Sanskrit only: no published translation is held for this verse.

भूयो भूयो ऽप्य् अतिक्रम्य गतस्य ब्रह्महंसताम् । स एव प्राक्तनो ऽभ्यासः फलितस् सङ्गमोदयात्

bhūyo bhūyo 'py atikramya gatasya brahmahaṃsatām / sa eva prāktano 'bhyāsaḥ phalitas saṅgamodayāt

Sanskrit only: no published translation is held for this verse.

दृढाभ्यासो य एवास्य जीवस्योदेत्य् अविघ्नतः । योन्यन्तरशतेनापि तम् एवैषो ऽनुधावति

dṛḍhābhyāso ya evāsya jīvasyodety avighnataḥ / yonyantaraśatenāpi tam evaiṣo 'nudhāvati

Sanskrit only: no published translation is held for this verse.

काकतालीययोगेन कदाचित् साधुसङ्गमात् । अशुभो वासनाभ्यासो जीवस्य विनिवर्तते

kākatālīyayogena kadācit sādhusaṅgamāt / aśubho vāsanābhyāso jīvasya vinivartate

Sanskrit only: no published translation is held for this verse.

सङ्गत्यादिकम् एवैष केवलं स्वोदयं प्रति । प्राक्तनो वासनाभ्यासो हेतुं लघुम् अपेक्षते

saṅgatyādikam evaiṣa kevalaṃ svodayaṃ prati / prāktano vāsanābhyāso hetuṃ laghum apekṣate

Sanskrit only: no published translation is held for this verse.

यद् यद् अभ्यस्यते ऽजस्रम् अन्यदेहान्तरे ऽपि च । जाग्रत्स्वप्नेष्व् असद् अपि तत् सद् इत्य् अनुभूयते

yad yad abhyasyate 'jasram anyadehāntare 'pi ca / jāgratsvapneṣv asad api tat sad ity anubhūyate

Sanskrit only: no published translation is held for this verse.

तत् तद् अर्थक्रियाकारि दुःखाय च सुखाय च । उदेति भावना तस्माद् भावनाभावनं जयः

tat tad arthakriyākāri duḥkhāya ca sukhāya ca / udeti bhāvanā tasmād bhāvanābhāvanaṃ jayaḥ

Sanskrit only: no published translation is held for this verse.

भावनैव स्वम् आत्मानं देहो ऽयम् इति पश्यति । स्वसत्तामात्रविस्तारं तं गुल्मत्वम् इवाङ्कुरः

bhāvanaiva svam ātmānaṃ deho 'yam iti paśyati / svasattāmātravistāraṃ taṃ gulmatvam ivāṅkuraḥ

Sanskrit only: no published translation is held for this verse.

भावना प्रेक्ष्यमाणैषा न किञ्चिद् अपि शिष्यते । नैव विद्यत एवेति तद्भ्रमेणालम् अस्तु नः

bhāvanā prekṣyamāṇaiṣā na kiñcid api śiṣyate / naiva vidyata eveti tadbhrameṇālam astu naḥ

Sanskrit only: no published translation is held for this verse.

भ्रमस्यासन्मयस्यास्य जातस्याकाशवर्णवत् । असंवेदनमात्रैकमार्जनीयस्य वस्तुतः

bhramasyāsanmayasyāsya jātasyākāśavarṇavat / asaṃvedanamātraikamārjanīyasya vastutaḥ

Sanskrit only: no published translation is held for this verse.

असन्मयी खरूपैषा वरं सत्तैव लालनी । प्रवर्ततां विनोदाय किम् असन् नः करिष्यति

asanmayī kharūpaiṣā varaṃ sattaiva lālanī / pravartatāṃ vinodāya kim asan naḥ kariṣyati

Sanskrit only: no published translation is held for this verse.

तत् तान् सर्वान् स्वसंसारान् उत्थायालोकयाम्य् अहम् । कांश्चिद् आलोकदानेन तेभ्य एकीकरोम्य् अहम्

tat tān sarvān svasaṃsārān utthāyālokayāmy aham / kāṃścid ālokadānena tebhya ekīkaromy aham

Sanskrit only: no published translation is held for this verse.

इति सञ्चिन्त्य रुद्रो ऽसौ तं सर्गं प्रजगाम ह । यत्र भिक्षुर् विहारस्थस् सुप्तश् शव इव स्थितः

iti sañcintya rudro 'sau taṃ sargaṃ prajagāma ha / yatra bhikṣur vihārasthas suptaś śava iva sthitaḥ

Sanskrit only: no published translation is held for this verse.

बोधयित्वाथ तं भिक्षुं चेतसा चेतनेन च । योजयाम् आस सस्मार भिक्षुर् अप्य् आत्मनो भ्रमम्

bodhayitvātha taṃ bhikṣuṃ cetasā cetanena ca / yojayām āsa sasmāra bhikṣur apy ātmano bhramam

Sanskrit only: no published translation is held for this verse.

रुद्रम् आत्मानम् आलोक्य जीवटादिमयं तथा । बोधाद् अविस्मयार्हो ऽपि स्थित्यर्थं विस्मयं ययौ

rudram ātmānam ālokya jīvaṭādimayaṃ tathā / bodhād avismayārho 'pi sthityarthaṃ vismayaṃ yayau

Sanskrit only: no published translation is held for this verse.

अथ रुद्रस् तथा भिक्षुर् द्वाव् एवोत्थाय जग्मतुः । क्वापि जीवटसंसारं चिदाकाशैककोणगम्

atha rudras tathā bhikṣur dvāv evotthāya jagmatuḥ / kvāpi jīvaṭasaṃsāraṃ cidākāśaikakoṇagam

Sanskrit only: no published translation is held for this verse.

तत्र तद्भवनं गत्वा तद् द्वीपं तच् च मण्डलम् । विषयं तं पुरं तच् च तच् च पानवणिग्गृहम्

tatra tadbhavanaṃ gatvā tad dvīpaṃ tac ca maṇḍalam / viṣayaṃ taṃ puraṃ tac ca tac ca pānavaṇiggṛham

Sanskrit only: no published translation is held for this verse.

सुप्तं ददृशतुर् नष्टसञ्ज्ञं जीवटकं शवम् । स्थापयित्वा वपुर्भारं प्रभ्रान्तं भवभूमिषु

suptaṃ dadṛśatur naṣṭasañjñaṃ jīvaṭakaṃ śavam / sthāpayitvā vapurbhāraṃ prabhrāntaṃ bhavabhūmiṣu

Sanskrit only: no published translation is held for this verse.

तं प्रबोध्य नियोज्याशु चेतसा चेतनेन च । एकरूपास् त्रिरूपास् ते रुद्रजीवटभिक्षुकाः

taṃ prabodhya niyojyāśu cetasā cetanena ca / ekarūpās trirūpās te rudrajīvaṭabhikṣukāḥ

Sanskrit only: no published translation is held for this verse.

बोधवन्तो ऽप्य् अबुद्धाभा विस्मिता अप्य् अविस्मिताः । बभुस् तूष्णीं स्थिताश् चित्रे कृताकारा इव क्षणम्

bodhavanto 'py abuddhābhā vismitā apy avismitāḥ / babhus tūṣṇīṃ sthitāś citre kṛtākārā iva kṣaṇam

Sanskrit only: no published translation is held for this verse.

अथ जग्मुश् च ते सर्वे क्वचिच् चिद्व्योमनि स्थितम् । विप्रसंसारम् आरम्भपरभूतसघुङ्घुमम्

atha jagmuś ca te sarve kvacic cidvyomani sthitam / viprasaṃsāram ārambhaparabhūtasaghuṅghumam

Sanskrit only: no published translation is held for this verse.

तत्र तद्भवनं गत्वा तद् द्वीपं तच् च मण्डलम् । विषयं तं च तं ग्रामं प्रापुस् ते ब्राह्मणालयम्

tatra tadbhavanaṃ gatvā tad dvīpaṃ tac ca maṇḍalam / viṣayaṃ taṃ ca taṃ grāmaṃ prāpus te brāhmaṇālayam

Sanskrit only: no published translation is held for this verse.

विप्रं ते ददृशुस् सुप्तं कलत्रवलितं गृहे । कण्ठे गृहीतं ब्राह्मण्या बहिर्जीवम् इव स्थितम्

vipraṃ te dadṛśus suptaṃ kalatravalitaṃ gṛhe / kaṇṭhe gṛhītaṃ brāhmaṇyā bahirjīvam iva sthitam

Sanskrit only: no published translation is held for this verse.

तं प्रबोध्य नियोज्याशु चेतसा चेतनेन च । तस्थुस् ते बहवो ऽप्य् एके सविस्मयम् अविस्मयाः

taṃ prabodhya niyojyāśu cetasā cetanena ca / tasthus te bahavo 'py eke savismayam avismayāḥ

Sanskrit only: no published translation is held for this verse.

अथ जग्मुश् चिदाकाशकचितं चेतितं च तैः । सामन्तनृपसंसारम् आरम्भभरसुन्दरम्

atha jagmuś cidākāśakacitaṃ cetitaṃ ca taiḥ / sāmantanṛpasaṃsāram ārambhabharasundaram

Sanskrit only: no published translation is held for this verse.

तत्र तद्भवनं प्रापुस् तद् द्वीपं तच् च मण्डलम् । सामन्तं ददृशुर् मत्तं सुप्तं पर्यङ्कपङ्कजे

tatra tadbhavanaṃ prāpus tad dvīpaṃ tac ca maṇḍalam / sāmantaṃ dadṛśur mattaṃ suptaṃ paryaṅkapaṅkaje

Sanskrit only: no published translation is held for this verse.

हेमावदातं हेमाङ्ग्या निहितं कुचकोटरे । भ्रमर्येवान्वितं पद्मकोशसुप्तं मधुव्रतम्

hemāvadātaṃ hemāṅgyā nihitaṃ kucakoṭare / bhramaryevānvitaṃ padmakośasuptaṃ madhuvratam

Sanskrit only: no published translation is held for this verse.

कान्ताभिर् अभ्यावलितं मञ्जरीभिर् इव द्रुमम् । दीपजालकमध्यस्थं रत्नौघ इव काञ्चनम्

kāntābhir abhyāvalitaṃ mañjarībhir iva drumam / dīpajālakamadhyasthaṃ ratnaugha iva kāñcanam

Sanskrit only: no published translation is held for this verse.

तं प्रबोध्य नियोज्याशु चेतसा चेतनेन च । तस्थुस् ते बहवो ऽप्य् एवं सविस्मयम् अविस्मयम्

taṃ prabodhya niyojyāśu cetasā cetanena ca / tasthus te bahavo 'py evaṃ savismayam avismayam

Sanskrit only: no published translation is held for this verse.

अथ ते राजसंसारं जग्मुस् तत्र प्रबोध्य तम् । तेन सार्धम् अथान्यासु भ्रेमुस् संसृतिभूमिषु

atha te rājasaṃsāraṃ jagmus tatra prabodhya tam / tena sārdham athānyāsu bhremus saṃsṛtibhūmiṣu

Sanskrit only: no published translation is held for this verse.

प्राप्य तां ब्रह्महंसेहां रुद्रतां सर्व एव ते । समाजग्मुर् विरेजुश् च रुद्राणाम् उत्तमं शतम्

prāpya tāṃ brahmahaṃsehāṃ rudratāṃ sarva eva te / samājagmur virejuś ca rudrāṇām uttamaṃ śatam

Sanskrit only: no published translation is held for this verse.

एकसंविद् भिन्नतनु चित्रचेष्टम् अचेष्टितम् । एकरूपम् अनेकात्म रूपं च परमेश्वरम्

ekasaṃvid bhinnatanu citraceṣṭam aceṣṭitam / ekarūpam anekātma rūpaṃ ca parameśvaram

Sanskrit only: no published translation is held for this verse.

रुद्राणां तच् छतम् अथ निरावरणचिन्मयम् । सर्वसंसारगं विद्धि स्थितं सर्वजगत्स्थिति

rudrāṇāṃ tac chatam atha nirāvaraṇacinmayam / sarvasaṃsāragaṃ viddhi sthitaṃ sarvajagatsthiti

Sanskrit only: no published translation is held for this verse.

दश रुद्रशतानीह सन्ति राम महान्ति च । एतद् एकादशं विद्धि संसारं प्रति संस्थितम्

daśa rudraśatānīha santi rāma mahānti ca / etad ekādaśaṃ viddhi saṃsāraṃ prati saṃsthitam

Sanskrit only: no published translation is held for this verse.

यो यो हि यस्य जीवस्य संसारस् समुदेति हि । तत्राप्रबुद्धा जीवौघाः पश्यन्ति न परस्परम्

yo yo hi yasya jīvasya saṃsāras samudeti hi / tatrāprabuddhā jīvaughāḥ paśyanti na parasparam

Sanskrit only: no published translation is held for this verse.

मिलन्ति हि मिथो बुद्धास् तरङ्गाम्ब्व् इव वारिधौ । अप्रबुद्धास् स्वतामात्रनिष्ठा लोष्टवद् आस्थिताः

milanti hi mitho buddhās taraṅgāmbv iva vāridhau / aprabuddhās svatāmātraniṣṭhā loṣṭavad āsthitāḥ

Sanskrit only: no published translation is held for this verse.

यथा द्रवत्वाद् वीच्यम्बून्य् अन्योऽन्यं सम्मिलन्त्य् अलम् । तथा प्रबुद्धा जीवौघा मिथश् चित्त्वान् मिलन्त्य् अलम्

yathā dravatvād vīcyambūny anyo'nyaṃ sammilanty alam / tathā prabuddhā jīvaughā mithaś cittvān milanty alam

Sanskrit only: no published translation is held for this verse.

प्रत्येकम् उदिताश् चैते संसारे जीवराशयः । चिद्धातोस् सर्वगत्वेन त्व् असत्यास् सत्यवत् स्थिताः

pratyekam uditāś caite saṃsāre jīvarāśayaḥ / ciddhātos sarvagatvena tv asatyās satyavat sthitāḥ

Sanskrit only: no published translation is held for this verse.

यद् यद् आखन्यते भूमेस् तत् तन् नाम यथाङ्ग मृत् । सर्वगायाश् चितेर् यद् यद् ऊह्यते तत् तथेह चित्

yad yad ākhanyate bhūmes tat tan nāma yathāṅga mṛt / sarvagāyāś citer yad yad ūhyate tat tatheha cit

Sanskrit only: no published translation is held for this verse.

सर्वत्र पञ्चभूतानि यथानुभवसीह हि । तथेह सर्वभूतात्म चित्त्वं सर्वत्र विद्यते

sarvatra pañcabhūtāni yathānubhavasīha hi / tatheha sarvabhūtātma cittvaṃ sarvatra vidyate

Sanskrit only: no published translation is held for this verse.

यत् सालभञ्जिकावृन्दे शैलस्तम्भगते ऽङ्गकम् । प्रेक्ष्यते तत् तद् एवाश्म तथा चिति जगच् चितः

yat sālabhañjikāvṛnde śailastambhagate 'ṅgakam / prekṣyate tat tad evāśma tathā citi jagac citaḥ

Sanskrit only: no published translation is held for this verse.

अवेदने परे शुद्धे वेदनं यज् जगन्ति तत् । अकारणकम् एवैतच् छून्यत्वं नभसो यथा

avedane pare śuddhe vedanaṃ yaj jaganti tat / akāraṇakam evaitac chūnyatvaṃ nabhaso yathā

Sanskrit only: no published translation is held for this verse.

चिद्घने वेदनं दृश्यं बन्धो मोक्षस् त्व् अवेदनं । यद् एव रुचितं ते स्यात् तद् एवाशु दृढीकुरु

cidghane vedanaṃ dṛśyaṃ bandho mokṣas tv avedanaṃ / yad eva rucitaṃ te syāt tad evāśu dṛḍhīkuru

Sanskrit only: no published translation is held for this verse.

सर्गासर्गौ बन्धमोक्षौ वेदनावेदनात्मकौ । अभिन्नौ बोधतश् चैतौ यथेच्छसि तथा कुरु

sargāsargau bandhamokṣau vedanāvedanātmakau / abhinnau bodhataś caitau yathecchasi tathā kuru

Sanskrit only: no published translation is held for this verse.

असंवित्त्यैव यन् नास्ति तन्नाशे का कदर्थना । तूष्णीम्भावेन यत् प्राप्यं प्राप्तम् एवाशु विद्धि तत्

asaṃvittyaiva yan nāsti tannāśe kā kadarthanā / tūṣṇīmbhāvena yat prāpyaṃ prāptam evāśu viddhi tat

Sanskrit only: no published translation is held for this verse.

यद् वै वेदनमात्रात्म तद् अङ्गावेदनक्षयम् । तद् वेदनावेदनयोर् यद् इष्टं तत् समाचर

yad vai vedanamātrātma tad aṅgāvedanakṣayam / tad vedanāvedanayor yad iṣṭaṃ tat samācara

Sanskrit only: no published translation is held for this verse.

वीचिर् यथाम्भसि स्पन्दो जगच् चित्रं तथा चितौ । एतावन्मात्र एवात्र भेदो यद् रघुनन्दन

vīcir yathāmbhasi spando jagac citraṃ tathā citau / etāvanmātra evātra bhedo yad raghunandana

Sanskrit only: no published translation is held for this verse.

देशकालखरूपेषु सत्सु वीच्यादिताम्भसि । जगदादौ तु देशाद्या असन्तो निर्मिताश् चिता

deśakālakharūpeṣu satsu vīcyāditāmbhasi / jagadādau tu deśādyā asanto nirmitāś citā

Sanskrit only: no published translation is held for this verse.

आभासुरं त्रिजगद् इत्य् अवभाति भास्वत् संवेदनं चयनम् एकचितेस् स्वरूपम् । वाचि स्थितं भवति चैतद् उपोढभेदं क्लिष्टं प्रशान्तवचनस् तु शिवः परात्मा

ābhāsuraṃ trijagad ity avabhāti bhāsvat saṃvedanaṃ cayanam ekacites svarūpam / vāci sthitaṃ bhavati caitad upoḍhabhedaṃ kliṣṭaṃ praśāntavacanas tu śivaḥ parātmā

Sanskrit only: no published translation is held for this verse.

संवेदनं सर्ग इतीह शब्दाव् अर्थेन भिन्नौ न कदाचिद् एतौ । वीच्यम्भसी द्वे इति नोचितोक्तिर् ज्ञस्याज्ञतायां त्व् इदम् एव युक्तम्

saṃvedanaṃ sarga itīha śabdāv arthena bhinnau na kadācid etau / vīcyambhasī dve iti nocitoktir jñasyājñatāyāṃ tv idam eva yuktam

Sanskrit only: no published translation is held for this verse.