Moksopaya with Bhaskarakantha's Tika 6.8

संसारवनषण्डे ऽस्मिंश् चित्पर्वततटस्थिते । कीदृशी खल्व् अविद्याख्या लता विकसिता तता

saṃsāravanaṣaṇḍe 'smiṃś citparvatataṭasthite / kīdṛśī khalv avidyākhyā latā vikasitā tatā

Sanskrit only: no published translation is held for this verse.

बृहत्पर्वतपर्वाढ्या ब्रह्माण्डत्वक्परावृता । देहयष्टिर् इयं यस्यास् त्रिलोकी लोकलासिनी

bṛhatparvataparvāḍhyā brahmāṇḍatvakparāvṛtā / dehayaṣṭir iyaṃ yasyās trilokī lokalāsinī

Sanskrit only: no published translation is held for this verse.

सुखं दुःखं भवो भावो ज्ञानम् अज्ञानम् एव च । अत्रैतान्य् उरुवृत्तानि मूलानि च फलानि च

sukhaṃ duḥkhaṃ bhavo bhāvo jñānam ajñānam eva ca / atraitāny uruvṛttāni mūlāni ca phalāni ca

Sanskrit only: no published translation is held for this verse.

सुखाद् अविद्योदेत्य् उच्चैस् तद् एवान्ते प्रयच्छति । दुःखाद् अविद्योदेत्य् उच्चैस् तद् एवान्ते फलत्य् अलम्

sukhād avidyodety uccais tad evānte prayacchati / duḥkhād avidyodety uccais tad evānte phalaty alam

Sanskrit only: no published translation is held for this verse.

भवाद् अविद्योदेत्य् एषा तम् एव फलति स्फुटम् । भावात् सत्ताम् अवाप्नोति तम् एव फलति क्षणात्

bhavād avidyodety eṣā tam eva phalati sphuṭam / bhāvāt sattām avāpnoti tam eva phalati kṣaṇāt

Sanskrit only: no published translation is held for this verse.

अज्ञानाद् वृद्धिम् आयाति तद् एवास्याः फलं स्मृतम् । ज्ञानेन याति संवित्तिं तद् एवान्ते प्रयच्छति

ajñānād vṛddhim āyāti tad evāsyāḥ phalaṃ smṛtam / jñānena yāti saṃvittiṃ tad evānte prayacchati

Sanskrit only: no published translation is held for this verse.

नानाविधोल्लासवती वासनामोददायिनी । घनप्रवालपटला तनुर् अस्या विजृम्भते

nānāvidhollāsavatī vāsanāmodadāyinī / ghanapravālapaṭalā tanur asyā vijṛmbhate

Sanskrit only: no published translation is held for this verse.

दिवसव्यूहकुसुमा यामिनीलोलषट्पदा । अजस्रं स्पन्दमानैषा प्रपतद्भूतपल्लवा

divasavyūhakusumā yāminīlolaṣaṭpadā / ajasraṃ spandamānaiṣā prapatadbhūtapallavā

Sanskrit only: no published translation is held for this verse.

आगत्यागत्य तरसा विवेककरिणा क्वचित् । विधूयते धूतरजःप्रसरा पुनर् एति च

āgatyāgatya tarasā vivekakariṇā kvacit / vidhūyate dhūtarajaḥprasarā punar eti ca

Sanskrit only: no published translation is held for this verse.

जायमानप्रवालाढ्या सञ्जाताङ्कुरदन्तुरा । सर्वर्तुकुसुमोपेता समग्ररसशालिनी

jāyamānapravālāḍhyā sañjātāṅkuradanturā / sarvartukusumopetā samagrarasaśālinī

Sanskrit only: no published translation is held for this verse.

जन्मपर्वालिनीरन्ध्रा विनाशच्छिद्रदद्रुला । भोगाभोगरसापूर्णा विचारैकघुणक्षता

janmaparvālinīrandhrā vināśacchidradadrulā / bhogābhogarasāpūrṇā vicāraikaghuṇakṣatā

Sanskrit only: no published translation is held for this verse.

विकसन्त्यः प्रतिदिनं चन्द्रार्कावलयो हि याः । व्योम्नि वातविलोलानि पुष्पाण्य् अस्याः किलाङ्ग ताः

vikasantyaḥ pratidinaṃ candrārkāvalayo hi yāḥ / vyomni vātavilolāni puṣpāṇy asyāḥ kilāṅga tāḥ

Sanskrit only: no published translation is held for this verse.

अस्याः प्रस्फुरिताकाराः कोरकत्वम् उपागताः । पूरिताकाशकोशा यास् तारका रघुनन्दन

asyāḥ prasphuritākārāḥ korakatvam upāgatāḥ / pūritākāśakośā yās tārakā raghunandana

Sanskrit only: no published translation is held for this verse.

चन्द्रार्कदहनालोका अस्यास् तत् कौसुमं रजः । अनेनेयं हि गौराङ्गी स्त्रीवच् चेतांसि कर्षति

candrārkadahanālokā asyās tat kausumaṃ rajaḥ / aneneyaṃ hi gaurāṅgī strīvac cetāṃsi karṣati

Sanskrit only: no published translation is held for this verse.

मनोमातङ्गवलिता सङ्कल्पकलकोकिला । इन्द्रियव्यालशबला तृष्णात्वगुपरञ्जिता

manomātaṅgavalitā saṅkalpakalakokilā / indriyavyālaśabalā tṛṣṇātvaguparañjitā

Sanskrit only: no published translation is held for this verse.

नीलाकाशतमालाङ्गसंश्रयेणोन्नतिं गता । रोदसीजानुसुस्तम्भा भुवनोद्यानभूस्थिता

nīlākāśatamālāṅgasaṃśrayeṇonnatiṃ gatā / rodasījānusustambhā bhuvanodyānabhūsthitā

Sanskrit only: no published translation is held for this verse.

अधोब्रह्माण्डखण्डेन स्वालवालेन जालिना । विहिताशेषजलधिजलक्षीरादिसेचना

adhobrahmāṇḍakhaṇḍena svālavālena jālinā / vihitāśeṣajaladhijalakṣīrādisecanā

Sanskrit only: no published translation is held for this verse.

त्रयीविलोलभ्रमरा रमणीपुष्परञ्जिता । चित्स्पन्दवातवलिता क्रियाविपुलपत्त्रिका

trayīvilolabhramarā ramaṇīpuṣparañjitā / citspandavātavalitā kriyāvipulapattrikā

Sanskrit only: no published translation is held for this verse.

कुकर्माजगरव्याप्ता स्वर्गश्रीपुष्पमण्डपा । जीवजीवकनीरन्ध्रा नानामोदमदप्रदा

kukarmājagaravyāptā svargaśrīpuṣpamaṇḍapā / jīvajīvakanīrandhrā nānāmodamadapradā

Sanskrit only: no published translation is held for this verse.

नानारसमयी चित्रा नानाकुसुमहासिनी । नानाफलावलिव्याप्ता नानावर्णविकासिनी

nānārasamayī citrā nānākusumahāsinī / nānāphalāvalivyāptā nānāvarṇavikāsinī

Sanskrit only: no published translation is held for this verse.

नानालवालवलया नानाविहगधारिणी । नानापरागपरुषा नानाभ्रलवलाञ्छिता

nānālavālavalayā nānāvihagadhāriṇī / nānāparāgaparuṣā nānābhralavalāñchitā

Sanskrit only: no published translation is held for this verse.

नानालताकुट्मलिता नानावनगणोत्थिता । नानागिरितटारूढा नानाचलनिरन्तरा

nānālatākuṭmalitā nānāvanagaṇotthitā / nānāgiritaṭārūḍhā nānācalanirantarā

Sanskrit only: no published translation is held for this verse.

जाता च जायमाना च म्रियमाणा तथा मृता । अनुच्छिन्ना तथा च्छिन्ना नित्यम् अच्छेदिनी तथा

jātā ca jāyamānā ca mriyamāṇā tathā mṛtā / anucchinnā tathā cchinnā nityam acchedinī tathā

Sanskrit only: no published translation is held for this verse.

अतीता वर्तमाना च सत्येवासत्पदास्पदा । नित्यम् अत्यन्ततरुणा नित्यं शमम् उपेयुषी

atītā vartamānā ca satyevāsatpadāspadā / nityam atyantataruṇā nityaṃ śamam upeyuṣī

Sanskrit only: no published translation is held for this verse.

महाविषलतैषा हि संसारविषमूर्छनाम् । ददाति रभसा श्लिष्टा परामृष्टा विनश्यति

mahāviṣalataiṣā hi saṃsāraviṣamūrchanām / dadāti rabhasā śliṣṭā parāmṛṣṭā vinaśyati

Sanskrit only: no published translation is held for this verse.

स्फीतेतो गलितेतश् च रूढेतस् संस्थितान्व् इतः । इतो जलम् इतश् शैला इतो नागास् सुरा इतः

sphīteto galitetaś ca rūḍhetas saṃsthitānv itaḥ / ito jalam itaś śailā ito nāgās surā itaḥ

Sanskrit only: no published translation is held for this verse.

इतः पृथ्वीत्वम् आयाता तथेतो द्युतया स्थिता । इतश् चन्द्रार्कतां प्राप्ता तथेतस् तारकाकृतिम्

itaḥ pṛthvītvam āyātā tatheto dyutayā sthitā / itaś candrārkatāṃ prāptā tathetas tārakākṛtim

Sanskrit only: no published translation is held for this verse.

इतस् तम इतस् तेज इतः खम् इत उर्वरा । इतश् शास्त्रम् इतो वेदा इतो द्वयविवर्जिता

itas tama itas teja itaḥ kham ita urvarā / itaś śāstram ito vedā ito dvayavivarjitā

Sanskrit only: no published translation is held for this verse.

इतः पुण्यम् इतः पापम् इतस् स्थावरमूढता । इतो ज्ञानात् परिक्षीणा पीनेतो ऽज्ञानभावनात्

itaḥ puṇyam itaḥ pāpam itas sthāvaramūḍhatā / ito jñānāt parikṣīṇā pīneto 'jñānabhāvanāt

Sanskrit only: no published translation is held for this verse.

इतः पुण्यतपोदानैः क्षीयमाणतया स्थिता । इतो योगविलासेन नूनं क्षयम् उपागता

itaḥ puṇyatapodānaiḥ kṣīyamāṇatayā sthitā / ito yogavilāsena nūnaṃ kṣayam upāgatā

Sanskrit only: no published translation is held for this verse.

क्वचित् खगतयोड्डीना क्वचिद् देवतया स्थिता । क्वचित् स्थाणुतया रूढा क्वचित् पवनतां गता

kvacit khagatayoḍḍīnā kvacid devatayā sthitā / kvacit sthāṇutayā rūḍhā kvacit pavanatāṃ gatā

Sanskrit only: no published translation is held for this verse.

क्वचिन् नरकसंलीना क्वचित् स्वर्गनिवासिनी । क्वचित् सुरपदं प्राप्ता क्वचित् क्रिमितया स्थिता

kvacin narakasaṃlīnā kvacit svarganivāsinī / kvacit surapadaṃ prāptā kvacit krimitayā sthitā

Sanskrit only: no published translation is held for this verse.

क्वचिद् विष्णुः क्वचिद् ब्रह्मा क्वचिद् रुद्रः क्वचिद् रविः । क्वचिद् अग्निः क्वचिद् वायुः क्वचिच् चन्द्रः क्वचिद् यमः

kvacid viṣṇuḥ kvacid brahmā kvacid rudraḥ kvacid raviḥ / kvacid agniḥ kvacid vāyuḥ kvacic candraḥ kvacid yamaḥ

Sanskrit only: no published translation is held for this verse.

यत् किञ्चनाङ्ग भुवनेषु महामहिम्ना व्याप्तं जरत्तृणलवत्वम् उपागतं वा । दृश्यं स्फुरत्तनु हराद्य् अपि ताम् अविद्यां विद्धि क्षयाय तदतीततयात्मलाभः

yat kiñcanāṅga bhuvaneṣu mahāmahimnā vyāptaṃ jarattṛṇalavatvam upāgataṃ vā / dṛśyaṃ sphurattanu harādy api tām avidyāṃ viddhi kṣayāya tadatītatayātmalābhaḥ

Sanskrit only: no published translation is held for this verse.