Moksopaya with Bhaskarakantha's Tika 6.94

मणिसाधनवन्येभबन्धनाद्य् अमरात्मज । सूचितं सत्कथाजालं पुनर् मे प्रकटीकुरु

maṇisādhanavanyebhabandhanādy amarātmaja / sūcitaṃ satkathājālaṃ punar me prakaṭīkuru

Sanskrit only: no published translation is held for this verse.

वाक्यार्थदृष्टेर् निष्पत्त्या हृद्गृहे चित्तभित्तिषु । शृणुष्व सत्कथाचित्रं चित्रम् उन्मीलयामि ते

vākyārthadṛṣṭer niṣpattyā hṛdgṛhe cittabhittiṣu / śṛṇuṣva satkathācitraṃ citram unmīlayāmi te

Sanskrit only: no published translation is held for this verse.

यो ऽसौ शास्त्रार्थकुशलस् तत्त्वज्ञाने त्व् अपण्डितः । रत्नसंसाधने प्रोक्तस् स त्वम् एव महीपते

yo 'sau śāstrārthakuśalas tattvajñāne tv apaṇḍitaḥ / ratnasaṃsādhane proktas sa tvam eva mahīpate

Sanskrit only: no published translation is held for this verse.

तज्ज्ञो भवसि शास्त्रेषु रविर् मेरुतटेष्व् इव । तत्त्वज्ञाने तु विश्रान्तो न त्वं दृषद् इवाम्बरे

tajjño bhavasi śāstreṣu ravir merutaṭeṣv iva / tattvajñāne tu viśrānto na tvaṃ dṛṣad ivāmbare

Sanskrit only: no published translation is held for this verse.

विद्धि चिन्तामणिं साधो सर्वत्यागम् अकृत्रिमम् । तम् अन्तं सर्वदुःखानां संसाधयसि शुद्धधीः

viddhi cintāmaṇiṃ sādho sarvatyāgam akṛtrimam / tam antaṃ sarvaduḥkhānāṃ saṃsādhayasi śuddhadhīḥ

Sanskrit only: no published translation is held for this verse.

सर्वत्यागेन शुद्धेन सर्वम् आसाद्यते ऽनघ । सर्वत्यागो हि साम्राज्यं किं चिन्तामणिना भवेत्

sarvatyāgena śuddhena sarvam āsādyate 'nagha / sarvatyāgo hi sāmrājyaṃ kiṃ cintāmaṇinā bhavet

Sanskrit only: no published translation is held for this verse.

सिद्धस् स सर्वसन्त्यागस् साधो संसाधितस् तव । खर्वीकुर्वञ् जगद्भूतिं विन्ध्यस्यात्मोदयो यथा

siddhas sa sarvasantyāgas sādho saṃsādhitas tava / kharvīkurvañ jagadbhūtiṃ vindhyasyātmodayo yathā

Sanskrit only: no published translation is held for this verse.

सन्त्यक्तं भवता राज्यं सदारधनबान्धवम् । ब्रह्मणेव जगत्सर्गव्यापारस् स्वनिशागमे

santyaktaṃ bhavatā rājyaṃ sadāradhanabāndhavam / brahmaṇeva jagatsargavyāpāras svaniśāgame

Sanskrit only: no published translation is held for this verse.

स्वदेशस्यातिदूरस्थम् आगतो ऽसीमम् आश्रमम् । भुवो ऽन्तम् इव विश्रान्त्यै वैनतेयस् सकच्छपः

svadeśasyātidūrastham āgato 'sīmam āśramam / bhuvo 'ntam iva viśrāntyai vainateyas sakacchapaḥ

Sanskrit only: no published translation is held for this verse.

केवलं सर्वसन्त्यागे शेषिताहम्मतिस् त्वया । मृष्टाखिलकलङ्केन स्वसत्तेवानिलेन खे

kevalaṃ sarvasantyāge śeṣitāhammatis tvayā / mṛṣṭākhilakalaṅkena svasattevānilena khe

Sanskrit only: no published translation is held for this verse.

मनोमात्रे हृदस् त्यक्ते यावत् ते याति पूर्णताम् । त्यागस् तावद् विकल्पस् त्वां खम् अम्बुद इवावृणोत्

manomātre hṛdas tyakte yāvat te yāti pūrṇatām / tyāgas tāvad vikalpas tvāṃ kham ambuda ivāvṛṇot

Sanskrit only: no published translation is held for this verse.

नायं स परमानन्दस् सर्वत्यागो महोदयः । को ऽप्य् उच्चैर् अन्य एवासौ चिरसाध्यो महान् इति

nāyaṃ sa paramānandas sarvatyāgo mahodayaḥ / ko 'py uccair anya evāsau cirasādhyo mahān iti

Sanskrit only: no published translation is held for this verse.

चिन्तयेति गते वृद्धिं सङ्कल्पग्रहणे शनैः । वात्ययेव वनस्पन्दे त्यागः प्रोड्डीय ते गतः

cintayeti gate vṛddhiṃ saṅkalpagrahaṇe śanaiḥ / vātyayeva vanaspande tyāgaḥ proḍḍīya te gataḥ

Sanskrit only: no published translation is held for this verse.

त्यागिता स्यात् कुतस् तस्य चिन्ताम् अप्य् आवृणोति यः । पवनस्पन्दयुक्तस्य निस्स्पन्दत्वं कुतस् तरोः

tyāgitā syāt kutas tasya cintām apy āvṛṇoti yaḥ / pavanaspandayuktasya nisspandatvaṃ kutas taroḥ

Sanskrit only: no published translation is held for this verse.

चिन्तैव चित्तम् इत्य् आहुस् सङ्कल्पेतरनामकम् । तस्याम् एव स्फुरन्त्यां तु चित्तं त्यक्तं कथं भवेत्

cintaiva cittam ity āhus saṅkalpetaranāmakam / tasyām eva sphurantyāṃ tu cittaṃ tyaktaṃ kathaṃ bhavet

Sanskrit only: no published translation is held for this verse.

चित्ते गृहीते त्रिजगज्जालबीजकणे क्षणात् । कथं सम्पद्यते साधो सर्वत्यागो निरञ्जनः

citte gṛhīte trijagajjālabījakaṇe kṣaṇāt / kathaṃ sampadyate sādho sarvatyāgo nirañjanaḥ

Sanskrit only: no published translation is held for this verse.

सङ्कल्पग्रहणेनान्तस् त्यागः प्रोड्डीय ते गतः । शब्दसंश्रवणेनाङ्ग यथा ग्रामविहङ्गमः

saṅkalpagrahaṇenāntas tyāgaḥ proḍḍīya te gataḥ / śabdasaṃśravaṇenāṅga yathā grāmavihaṅgamaḥ

Sanskrit only: no published translation is held for this verse.

निश्चिन्तत्वधनं सर्वं त्याग आदाय ते गतः । आमन्त्र्यापूजितो याति यस् स दुःखं करोति हि

niścintatvadhanaṃ sarvaṃ tyāga ādāya te gataḥ / āmantryāpūjito yāti yas sa duḥkhaṃ karoti hi

Sanskrit only: no published translation is held for this verse.

सर्वत्यागमणाव् एवं गते कमललोचन । तपःकाचमणिर् दृष्टस् त्वया सङ्कल्पचक्षुषा

sarvatyāgamaṇāv evaṃ gate kamalalocana / tapaḥkācamaṇir dṛṣṭas tvayā saṅkalpacakṣuṣā

Sanskrit only: no published translation is held for this verse.

त्वया तस्मिंस् तपस्य् एव दुःखे दृष्टिभ्रमोदिते । ग्राह्यैकभावना बद्धा जलेन्दौ शिशुना यथा

tvayā tasmiṃs tapasy eva duḥkhe dṛṣṭibhramodite / grāhyaikabhāvanā baddhā jalendau śiśunā yathā

Sanskrit only: no published translation is held for this verse.

अवासनम् अनारभ्य कृतानन्दा सवासना । आद्यन्तमध्यविषमा दुःखायैव तपःक्रिया

avāsanam anārabhya kṛtānandā savāsanā / ādyantamadhyaviṣamā duḥkhāyaiva tapaḥkriyā

Sanskrit only: no published translation is held for this verse.

अमितानन्दम् उत्सृज्य सुसाधं यः प्रवर्तते । मिते वस्तुनि दुस्साधे स्वात्महा स शठस् स्मृतः

amitānandam utsṛjya susādhaṃ yaḥ pravartate / mite vastuni dussādhe svātmahā sa śaṭhas smṛtaḥ

Sanskrit only: no published translation is held for this verse.

सर्वत्यागस् समारभ्य न विनिष्पादितस् त्वया । तपोदुःखैकतज्ज्ञेन बद्धेन वनसद्मनि

sarvatyāgas samārabhya na viniṣpāditas tvayā / tapoduḥkhaikatajjñena baddhena vanasadmani

Sanskrit only: no published translation is held for this verse.

राज्यबन्धाद् विनिष्क्रम्य गजवद् दुःखपूरिते । वनवासाभिधे साधो बद्धो ऽसि दृढबन्धने

rājyabandhād viniṣkramya gajavad duḥkhapūrite / vanavāsābhidhe sādho baddho 'si dṛḍhabandhane

Sanskrit only: no published translation is held for this verse.

द्विगुणा एव ते चिन्ताश् शीतवातातपादयः । बन्धनाद् अधिकं मन्ये वनवासम् अजानतः

dviguṇā eva te cintāś śītavātātapādayaḥ / bandhanād adhikaṃ manye vanavāsam ajānataḥ

Sanskrit only: no published translation is held for this verse.

चिन्तामणिर् मया प्राप्त इत्य् अलं बुद्धवान् असि । न लब्धवान् भवान् साधो स्फटिकस्यापि खण्डिकाम्

cintāmaṇir mayā prāpta ity alaṃ buddhavān asi / na labdhavān bhavān sādho sphaṭikasyāpi khaṇḍikām

Sanskrit only: no published translation is held for this verse.

इत्य् एतद् अङ्ग मणियत्नकथासमानं सम्यङ् मया प्रकटितं तव पद्मनेत्र । उद्बोध्य बोधम् अमलं स्वयम् एव बुद्ध्या यद् वच्मि तत् परिणतिं कुरु चित्तकोशे

ity etad aṅga maṇiyatnakathāsamānaṃ samyaṅ mayā prakaṭitaṃ tava padmanetra / udbodhya bodham amalaṃ svayam eva buddhyā yad vacmi tat pariṇatiṃ kuru cittakośe

Sanskrit only: no published translation is held for this verse.