Moksopaya with Bhaskarakantha's Tika 6.95

इदानीं राजशार्दूल वस्तुसम्प्रतिपत्तये । शृणु विन्ध्येभवृत्तान्तविवृतिं स्मयकारिणीम्

idānīṃ rājaśārdūla vastusampratipattaye / śṛṇu vindhyebhavṛttāntavivṛtiṃ smayakāriṇīm

Sanskrit only: no published translation is held for this verse.

यो ऽसौ विन्ध्यवने हस्ती सो ऽस्मिन् भूमितले भवान् । यौ वैराग्यविवेकौ ते तौ तस्य दशनौ शितौ

yo 'sau vindhyavane hastī so 'smin bhūmitale bhavān / yau vairāgyavivekau te tau tasya daśanau śitau

Sanskrit only: no published translation is held for this verse.

यश् चासौ वारणाक्रान्तितत्परो हस्तिपस् स्थितः । तद् अज्ञानं त्वदाक्रान्तितत्परं तव दुःखदम्

yaś cāsau vāraṇākrāntitatparo hastipas sthitaḥ / tad ajñānaṃ tvadākrāntitatparaṃ tava duḥkhadam

Sanskrit only: no published translation is held for this verse.

अतिशक्तो ऽप्य् अशक्तेन दुःखाद् दुःखं भयाद् भयम् । हस्ती हस्तिपकेनेव राजन् मौर्ख्येण नीयसे

atiśakto 'py aśaktena duḥkhād duḥkhaṃ bhayād bhayam / hastī hastipakeneva rājan maurkhyeṇa nīyase

Sanskrit only: no published translation is held for this verse.

यल् लोहरज्जुसारेण वारणः परियन्त्रितः । तद् आशापाशजालेन भवान् आपदम् आगतः

yal loharajjusāreṇa vāraṇaḥ pariyantritaḥ / tad āśāpāśajālena bhavān āpadam āgataḥ

Sanskrit only: no published translation is held for this verse.

आशा हि लोहरज्जुभ्यो विषमा विपुला दृढा । कालेन क्षीयते लोहं तृष्णा तु परिवर्धते

āśā hi loharajjubhyo viṣamā vipulā dṛḍhā / kālena kṣīyate lohaṃ tṛṣṇā tu parivardhate

Sanskrit only: no published translation is held for this verse.

यद् बद्धं प्रेक्षते वैरी गजम् आराद् अलक्षितः । प्रेक्षते त्वां तद् अज्ञानं क्रीडार्थं बद्धम् एककम्

yad baddhaṃ prekṣate vairī gajam ārād alakṣitaḥ / prekṣate tvāṃ tad ajñānaṃ krīḍārthaṃ baddham ekakam

Sanskrit only: no published translation is held for this verse.

यद् बभञ्ज गजश् शस्त्रशृङ्खलाजालबन्धनम् । तत् तत्याज भवान् भोगभूमिं राज्यम् अकण्टकम्

yad babhañja gajaś śastraśṛṅkhalājālabandhanam / tat tatyāja bhavān bhogabhūmiṃ rājyam akaṇṭakam

Sanskrit only: no published translation is held for this verse.

कदाचित् सुकरं शस्त्रशृङ्खलाजालभेदनम् । न त्व् अस्य मनसस् साधो भोगाशाविनिवारणम्

kadācit sukaraṃ śastraśṛṅkhalājālabhedanam / na tv asya manasas sādho bhogāśāvinivāraṇam

Sanskrit only: no published translation is held for this verse.

यद् इभे पाटयत्य् उच्चैर् बन्धं हस्तिपको ऽपतत् । त्वयि त्यजति तद् राज्यम् अज्ञानं पतितं क्षतम्

yad ibhe pāṭayaty uccair bandhaṃ hastipako 'patat / tvayi tyajati tad rājyam ajñānaṃ patitaṃ kṣatam

Sanskrit only: no published translation is held for this verse.

यदा विरक्तः पुरुषो भोगाशां त्यक्तुम् इच्छति । तदा प्रकम्पते ऽज्ञानं छेद्यवृक्षपिशाचवत्

yadā viraktaḥ puruṣo bhogāśāṃ tyaktum icchati / tadā prakampate 'jñānaṃ chedyavṛkṣapiśācavat

Sanskrit only: no published translation is held for this verse.

यदा विवेकी पुरुषो भोगान् सन्त्यज्य तिष्ठति । तदा पलायते ऽज्ञानं छिन्नवृक्षपिशाचवत्

yadā vivekī puruṣo bhogān santyajya tiṣṭhati / tadā palāyate 'jñānaṃ chinnavṛkṣapiśācavat

Sanskrit only: no published translation is held for this verse.

भोगौघे नूनम् उन्मुक्ते पतत्य् अज्ञानम् अस्थिति । पादपे क्रकचच्छिन्ने कुलायस् तद्गतो यथा

bhogaughe nūnam unmukte pataty ajñānam asthiti / pādape krakacacchinne kulāyas tadgato yathā

Sanskrit only: no published translation is held for this verse.

यदा वनं प्रयातस् त्वं तदाज्ञानं क्षतं त्वया । पतितं सन् न विहतं मनस्त्यागमहासिना

yadā vanaṃ prayātas tvaṃ tadājñānaṃ kṣataṃ tvayā / patitaṃ san na vihataṃ manastyāgamahāsinā

Sanskrit only: no published translation is held for this verse.

तेन भूयस् समुत्थाय स्मृत्वा परिभवः कृतः । तपःप्रपञ्चखाते ऽस्मिन् गहने त्वं नियोजितः

tena bhūyas samutthāya smṛtvā paribhavaḥ kṛtaḥ / tapaḥprapañcakhāte 'smin gahane tvaṃ niyojitaḥ

Sanskrit only: no published translation is held for this verse.

तदैवाघातयिष्यस् त्वं यद्य् अज्ञानं यदा पतत् । राज्यत्यागविधौ तत् त्वां नाहनिष्यत् क्षयं गतम्

tadaivāghātayiṣyas tvaṃ yady ajñānaṃ yadā patat / rājyatyāgavidhau tat tvāṃ nāhaniṣyat kṣayaṃ gatam

Sanskrit only: no published translation is held for this verse.

यत् खातवलयस् तेन वैरिणा हस्तिनः कृतः । तत् तपोदुःखम् अतुलम् अज्ञानेन तवार्पितम्

yat khātavalayas tena vairiṇā hastinaḥ kṛtaḥ / tat tapoduḥkham atulam ajñānena tavārpitam

Sanskrit only: no published translation is held for this verse.

यां तस्य राजसामग्रीं गजारेर् आहरन् नृपः । सा त्वदज्ञाननृपतेश् चित्तभूतिर् विसारिणी

yāṃ tasya rājasāmagrīṃ gajārer āharan nṛpaḥ / sā tvadajñānanṛpateś cittabhūtir visāriṇī

Sanskrit only: no published translation is held for this verse.

त्वं गजेन्द्रस् तपःखाते दीर्घे वनगतो ऽपि सन् । अज्ञानवैरिणा तेन निक्षिप्तस् तरसाचिति

tvaṃ gajendras tapaḥkhāte dīrghe vanagato 'pi san / ajñānavairiṇā tena nikṣiptas tarasāciti

Sanskrit only: no published translation is held for this verse.

यत् खातवलयो बाललताभिर् अवगुण्ठितः । आवृतं तत् तपोदुःखम् ईषत्सज्जनवृत्तिभिः

yat khātavalayo bālalatābhir avaguṇṭhitaḥ / āvṛtaṃ tat tapoduḥkham īṣatsajjanavṛttibhiḥ

Sanskrit only: no published translation is held for this verse.

इत्य् अद्यापि तपःखाते दुःखे ह्य् अस्मिन् सुदारुणे । स्थितो ऽसि पातालतले नृप बद्धो यथा बडिः

ity adyāpi tapaḥkhāte duḥkhe hy asmin sudāruṇe / sthito 'si pātālatale nṛpa baddho yathā baḍiḥ

Sanskrit only: no published translation is held for this verse.

गजस् त्वम् आशा निगडानि वैरी मोहो निखातः पुनर् उग्रबन्धः । महीतलं विन्ध्य उदन्त इत्थं त्वदीय उक्तः कुरु यत् करोषि

gajas tvam āśā nigaḍāni vairī moho nikhātaḥ punar ugrabandhaḥ / mahītalaṃ vindhya udanta itthaṃ tvadīya uktaḥ kuru yat karoṣi

Sanskrit only: no published translation is held for this verse.