Matsya Purāṇa 117

*सूत उवाच आलोकयन्नदीं पुण्यां तत्समीरहृतश्रमः । स गच्छन्नेव ददृशे हिमवन्तं महागिरिम्

*sūta uvāca ālokayannadīṃ puṇyāṃ tatsamīrahṛtaśramaḥ / sa gacchanneva dadṛśe himavantaṃ mahāgirim

Sanskrit only: no published translation is held for this verse.

खमुल्लिखद्भिर्बहुभिर् वृतं शृङ्गैस्तु पाण्डुरैः । पक्षिणामपि संचारैर् विना सिद्धगतिं शुभाम्

khamullikhadbhirbahubhir vṛtaṃ śṛṅgaistu pāṇḍuraiḥ / pakṣiṇāmapi saṃcārair vinā siddhagatiṃ śubhām

Sanskrit only: no published translation is held for this verse.

नदीप्रवाहसंजात-महाशब्दैः समन्ततः । असंश्रुतान्यशब्दं तं शीततोयं मनोरमम्

nadīpravāhasaṃjāta-mahāśabdaiḥ samantataḥ / asaṃśrutānyaśabdaṃ taṃ śītatoyaṃ manoramam

Sanskrit only: no published translation is held for this verse.

देवदारुवनैर्नीलैः कृताधोवसनं शुभम् । मेघोत्तरीयकं शैलं ददृशे स नराधिपः

devadāruvanairnīlaiḥ kṛtādhovasanaṃ śubham / meghottarīyakaṃ śailaṃ dadṛśe sa narādhipaḥ

Sanskrit only: no published translation is held for this verse.

श्वेतमेघकृतोष्णीषं चन्द्रार्कमुकुटं क्वचित् । हिमानुलिप्तसर्वाङ्गं क्वचिद्धातुविमिश्रितम्

śvetameghakṛtoṣṇīṣaṃ candrārkamukuṭaṃ kvacit / himānuliptasarvāṅgaṃ kvaciddhātuvimiśritam

Sanskrit only: no published translation is held for this verse.

चन्दनेनानुलिप्ताङ्गं दत्तपञ्चाङ्गुलं यथा । शीतप्रदं निदाघे ऽपि शिलाविकटसंकटम् । सालक्तकैरप्सरसां मुद्रितं चरणैः क्वचित्

candanenānuliptāṅgaṃ dattapañcāṅgulaṃ yathā / śītapradaṃ nidāghe 'pi śilāvikaṭasaṃkaṭam / sālaktakairapsarasāṃ mudritaṃ caraṇaiḥ kvacit

Sanskrit only: no published translation is held for this verse.

क्वचित्संस्पृष्टसूर्यांशुं क्वचिच् च तमसावृतम् । दरीमुखैः क्वचिद्भीमैः पिबन्तं सलिलं महत्

kvacitsaṃspṛṣṭasūryāṃśuṃ kvacic ca tamasāvṛtam / darīmukhaiḥ kvacidbhīmaiḥ pibantaṃ salilaṃ mahat

Sanskrit only: no published translation is held for this verse.

क्वचिद्विद्याधरगणैः क्रीडद्भिरुपशोभितम् । उपगीतं तथा मुख्यैः किंनराणां गणैः क्वचित्

kvacidvidyādharagaṇaiḥ krīḍadbhirupaśobhitam / upagītaṃ tathā mukhyaiḥ kiṃnarāṇāṃ gaṇaiḥ kvacit

Sanskrit only: no published translation is held for this verse.

आपानभूमौ गलितैर् गन्धर्वाप्सरसां क्वचित् । पुष्पैः संतानकादीनां दिव्यैस्तम् उपशोभितम्

āpānabhūmau galitair gandharvāpsarasāṃ kvacit / puṣpaiḥ saṃtānakādīnāṃ divyaistam upaśobhitam

Sanskrit only: no published translation is held for this verse.

सुप्तोत्थिताभिः शय्याभिः कुसुमानां तथा क्वचित् । मृदिताभिः समाकीर्णं गन्धर्वाणां मनोरमम्

suptotthitābhiḥ śayyābhiḥ kusumānāṃ tathā kvacit / mṛditābhiḥ samākīrṇaṃ gandharvāṇāṃ manoramam

Sanskrit only: no published translation is held for this verse.

निरुद्धपवनैर्देशैर् नीलशाद्वलमण्डितैः । क्वचिच् च कुसुमैर्युक्तम् अत्यन्तरुचिरं शुभम्

niruddhapavanairdeśair nīlaśādvalamaṇḍitaiḥ / kvacic ca kusumairyuktam atyantaruciraṃ śubham

Sanskrit only: no published translation is held for this verse.

तपस्विशरणं शैलं कामिनामतिदुर्लभम् । मृगैर्यथानुचरितं दन्तिभिन्नमहाद्रुमम्

tapasviśaraṇaṃ śailaṃ kāmināmatidurlabham / mṛgairyathānucaritaṃ dantibhinnamahādrumam

Sanskrit only: no published translation is held for this verse.

यत्र सिंहनिनादेन त्रस्तानां भैरवं रवम् । दृश्यते न च संश्रान्तं गजानामाकुलं कुलम्

yatra siṃhaninādena trastānāṃ bhairavaṃ ravam / dṛśyate na ca saṃśrāntaṃ gajānāmākulaṃ kulam

Sanskrit only: no published translation is held for this verse.

तटाश्च तापसैर्यत्र कुञ्जदेशैरलंकृताः । रत्नैर्यस्य समुत्पन्नैस् त्रैलोक्यं समलंकृतम्

taṭāśca tāpasairyatra kuñjadeśairalaṃkṛtāḥ / ratnairyasya samutpannais trailokyaṃ samalaṃkṛtam

Sanskrit only: no published translation is held for this verse.

अहीनशरणं नित्यम् अहीनजनसेवितम् । अहीनः पश्यति गिरिम् अहीनं रत्नसम्पदा

ahīnaśaraṇaṃ nityam ahīnajanasevitam / ahīnaḥ paśyati girim ahīnaṃ ratnasampadā

Sanskrit only: no published translation is held for this verse.

अल्पेन तपसा यत्र सिद्धिं प्राप्स्यन्ति तापसाः । यस्य दर्शनमात्रेण सर्वकल्मषनाशनम्

alpena tapasā yatra siddhiṃ prāpsyanti tāpasāḥ / yasya darśanamātreṇa sarvakalmaṣanāśanam

Sanskrit only: no published translation is held for this verse.

महाप्रपातसम्पात-प्रपातादिगताम्बुभिः । वायुनीतैः सदा तृप्ति-कृतदेशं क्वचित्क्वचित्

mahāprapātasampāta-prapātādigatāmbubhiḥ / vāyunītaiḥ sadā tṛpti-kṛtadeśaṃ kvacitkvacit

Sanskrit only: no published translation is held for this verse.

समालब्धजलैः शृङ्गैः क्वचिच् चापि समुच्छ्रितैः । नित्यार्कतापविषमैर् अगम्यैर्मनसा युतम्

samālabdhajalaiḥ śṛṅgaiḥ kvacic cāpi samucchritaiḥ / nityārkatāpaviṣamair agamyairmanasā yutam

Sanskrit only: no published translation is held for this verse.

देवदारुमहावृक्ष-व्रजशाखानिरन्तरैः । वंशस्तम्बवनाकारैः प्रदेशैरुपशोभितम्

devadārumahāvṛkṣa-vrajaśākhānirantaraiḥ / vaṃśastambavanākāraiḥ pradeśairupaśobhitam

Sanskrit only: no published translation is held for this verse.

हिमछत्त्रमहाशृङ्गं प्रपातशतनिर्झरम् । शब्दलभ्याम्बुविषमं हिमसंरुद्धकन्दरम्

himachattramahāśṛṅgaṃ prapātaśatanirjharam / śabdalabhyāmbuviṣamaṃ himasaṃruddhakandaram

Sanskrit only: no published translation is held for this verse.

दृष्ट्वैव तं चारुनितम्बभूमिं महानुभावः स तु मद्रनाथः । बभ्राम तत्रैव मुदा समेतः स्थानं तदा किंचिदथाससाद

dṛṣṭvaiva taṃ cārunitambabhūmiṃ mahānubhāvaḥ sa tu madranāthaḥ / babhrāma tatraiva mudā sametaḥ sthānaṃ tadā kiṃcidathāsasāda

Sanskrit only: no published translation is held for this verse.